Johan

1 A hramthawk ah Bia* a rak um, Bia cu Pathian he an rak um i cu Bia cu pathian pakhat a si ve. 2 Anih cu a hramthawk tein Pathian he an umṭi. 3 Pathian nih amah kha hmang in zeizong vialte a rak ser, amah tel loin a sermi zeihmanh a um lo.

4 Amah hmang in Pathian nih a sermi cu nunnak a si, mah nunnak cu minung caah ceunak a si. 5 Mah ceunak cu muihnak ah a ceu, muihnak nih mah ceunak kha a hmit kho lo.

6 Pathian nih amah aiawhtu in a thlahmi mi pakhat a um i a min cu Johan a si. 7 Anih cu mah ceunak kong tehte khaan awkah a ra, mi vialte nih a bia kha an theih i an zumh nakhnga caah a si. 8 Anih cu mah ceunak cu a si lo, ceunak kong tehte khaan awkah a rami a si.

9 Miphun vialte ceunak a petu ding ceunak taktak cu hi vawlei ah a ra cang lai. 10 Anih cu hi vawlei ah a um, Pathian nih amah kha hmang in hi vawlei hi a rak ser. Asinain hi vawlei nih amah cu a hngal lo. 11 Amah ram ah a ra nain a miphun nih an rak cohlang lo. 12 Asinain amah a cohlang i a min a zummi paoh kha Pathian fale sinak nawl a pek hna. 13 Annih cu minung phung ning in hrinmi an si lo. Nulepa duhnak in siseh, pale duhnak in siseh hrinmi an si lo. Pathian duhnak ning in hrinmi an si.

14 Bia cu taksa pum in hrin a si i kan lakah khua a sa. A sunparnak kha kan rak hmuh, pa nih a fapa ngeihchunh a pekmi sunparnak phun kha a si. Anih cu Pathian vel le biatak in a khat. 15 (Johan nih “‘Ka hnu in a rami cu ka hlanah a rak um cangmi a si caah keimah nakin a ngan deuh’ tiah ka rak chimmi cu hi pa hi a si” tiin a kong kha tehte a khaan.) 16 Velngeihnak in a khatmi a si caah a sinin velngeihnak kha liam thluahmah in kan hmuh. 17 Nawlbia cu Moses thawng in hmuh a si, velngeihnak le biatak tu cu Jesuh Khrih thawng in hmuh a si. 18 Pathian cu ahohmanh nih an hmu bal lo; asinain a Pa pawng ah* a um i pathian pakhat zong a si vemi fapa ngeihchunh nih Pa kong kha a langhter.

19 Judah mi nih Jerusalem khua in tlangbawi hna le Levi mi hna kha Johan sinah an thlah hna i, “Ahodah na si?” tiah an va hal. 20 Johan nih i pheh lo tein “Kei cu Khrih ka si lo” tiah hlangfang tein a rak chimh hna. 21 “Cu a si ah, Elijah tah na si maw?” tiah an hal tikah “Ka si lo” tiah a leh hna. “A ra dingmi Profet cu tah na si maw?” tiah an hal tikah “Ka si lo!” tiah a leh ṭhan hna. 22 Mah tikah annih nih “Ahodah na si kun? A kan thlahtu hna sinah bia kan phorh khawh nakhnga kan chim tuah. Ahodah na si?” tiah an hal. 23 Johan nih “‘Jehovah* lam a tluan nakhnga sialpiak tuah u’ tiah ramcar ah mipa pakhat cu a au tiin profet Isaiah nih a rak chimmi cu keimah hi ka si” tiah a leh hna. 24 Farasi* mi hna thlahmi mah mi hna nih, 25 “Khrih zong na si lo, Elijah zong na si lo, a ra dingmi Profet zong na si lo ahcun zeicah tipil na pek hna?” tiah an hal. 26 Johan nih “Kei nih cun ti in tipil kaan pek hna. Nan hngalh lomi mi pakhat cu nan lakah a um. 27 Anih cu ka hnu in a ra lio, a phanat hri phoihtu ding hmanh ah kaa tlak lo” tiah a leh hna. 28 Mah thil hna cu Johan nih tipil a peknak Jordan Tiva ral, Bethani khua ah a cangmi a si.

29 A thaizing ah Johan nih Jesuh a sinah a ratmi kha a hmuh tikah “Vawlei sualnak a kalpitu Pathian Tuufa khi zoh hmanh u! 30 ‘Ka hnu in a rami cu ka hlanah a rak um cangmi a si caah keimah nakin a ngan deuh’ tiah ka rak chimmi cu hi pa hi a si. 31 Keimah hmanh nih ka rak hngal lo, asinain ti in tipil ka peknak a ruang cu Israel mi nih amah kha an hun hngalh khawh nakhnga caah a si” tiah a ti. 32 Mah leng ah Johan nih “Thlarau cu van in ṭhuro bantuk in a rung ṭum i a cung ah aa futmi kha ka hmuh. 33 Amah kha ka hngal lo nain ti in tipil pek awkah a ka thlahtu nih ‘Mi pakhat cung ah thlarau a ṭum i aa futmi na hmuh ahcun anih cu thiang thlarau in tipil a petu ding cu a si’ tiah a ka ti. 34 Mah kha ka hmuh cang i anih cu Pathian Fapa a si ti kha tehte ka khaan” tiah a ti.

35 A thaizing ah Johan cu a zultu pahnih hna he a dir lioah, 36 Jesuh a ratmi kha a hmuh i “Pathian Tuufa khi zoh hmanh u!” tiah a ti. 37 A zultu pahnih nih a chimmi kha an theih tikah Jesuh hnu kha an zulh. 38 Jesuh cu a hun i mer i a hnu in an zulhmi kha a hmuh tikah “Zeidah nan duh?” tiah a hal hna. Annih nih “Rabbi, khoika ah dah na um?” tiah an hal. (Rabbi timi a sullam cu “Saya” tinak a si.) 39 Jesuh nih “Ra u law rak zoh u” tiah a ti hna. Cucaah an kal i Jesuh a umnak hmun cu an va hmuh, mah ni cu a sinah an caam; cu caan cu zanlei suimilam 4* hrawng a si. 40 Johan bia a thei i Jesuh hnu a zulmi, zultu pahnih lak i pakhat cu Simon Peter a nau Andru kha a si. 41 A hmasa bik ah a upa Simon kha a kawl i, “Messiah* kan hmuh cang” tiah a ti. (Messiah timi a sullam cu “Khrih” tinak a si.) 42 Mah hnuah Simon kha Jesuh sinah a kalpi. Jesuh nih Simon kha a zoh i “Nang cu Johan fapa Simon na si. Sefas tiah auh na si cang lai” tiah a ti. (Sefas timi a sullam cu “Peter”* tinak a si.)

43 A thaizing ah Jesuh cu Galili ram ah kal a duh. Filip kha a hmuh tikah “Rak ka zul” tiah a ti. 44 Filip cu Peter le Andru bantuk in Bethsaida khuami a si. 45 Filip nih Nathanael kha a hmuh tikah “Moses Nawlbia le Profet bia* hna ah a kong an rak ṭialmi pa kha kan hmuh cang. Anih cu Josef fapa, Nazareth khuami Jesuh a si” tiah a ti. 46 Asinain Nathanael nih “Nazareth khua in cun thilṭha pakhatkhat a chuak kho hnga maw?” tiah a ti tikah Filip nih “Ra law rak zoh” tiah a leh. 47 Nathanael a ratmi kha Jesuh nih a hmuh tikah “Zoh hmanh u, anih cu hlenthawinak zeihmanh a ngei lomi, Israel mi taktak a si” tiah a ti. 48 Nathanael nih “Zeitindah na ka hngalh?” tiah a hal tikah Jesuh nih “Filip nih aan auh hlanah, theipi kung tang ah na ummi kha kaan hmuh” tiah a leh. 49 Mah tikah Nathanael nih “Rabbi, nang cu Pathian Fapa, Israel Siangpahrang na si” tiah a ti. 50 Jesuh nih “Theipi kung tang ah kaan hmuh ka ti caah maw na ka zumh? Hi nakin a ngan deuhmi khuaruahhar thil hna na hmuh rih lai” tiah a ti. 51 Cun “Biatak kaan chimh hna lai; a hmaan tein kaan chimh hna lai, van aa hung i Pathian vancungmi hna cu mi Fapa sinah an ṭummi le an kaimi kha nan hmuh lai” tiah a ti.