Luka

18 Jesuh nih a zultu hna kha lungdong loin thlacam zungzal a herhnak kong kha tahchunhnak hmang in hitin a cawnpiak hna: 2 “Khua pakhat ah Pathian a ṭih lo i mi zong zei ah a rel lomi biaceihtu pakhat a um. 3 Cuka khua ah a ummi nuhmei nu pakhat cu mah biaceihtu sinah atu le atu a kal i ‘Mi pakhat he biaceihnak zung ah taza kan i cuai i ding tein bia ka ceihpiak ko’ tiah a va nawl lengmang. 4 Biaceihtu nih caan sau nawn tiang cu a bawm duh lo, a caan a rauh tikah a lung chung in ‘Kei cu Pathian a ṭih lomi, mi zong zei ah a rel lomi ka si. 5 Asinain hi nuhmei nu nih hna a ka hnawh lengmang caah dinnak in bia ka ceihpiak ko lai, cutin a si lo ahcun ka inkhawh lo tiang in a ra lengmang lai i a ka nawl lengmang lai’ tiah a ti.” 6 Bawipa Jesuh nih “A ding lomi biaceihtu hmanh nih zeitindah a chim ti kha nan thei ko lo maw? 7 Pathian chinchin cu a mithim mi hna nih chunzan in an nawl tikah ding tein an bia ceihpiak loin a um hnga maw? Mah leng ah Pathian cu an cung ah a lung a sau. 8 Kaan chimh hna lai, Pathian nih an caah khulrang in dinnak he bia a ceihpiak hna lai. Asinain mi Fapa a rat tikah vawleicung ah cu bantuk zumhnak cu a hmu te hnga maw?” tiah a ti.

9 Anmahle anmah ka ding tiah aa ruat i midang zei ah a rel lomi, mi cheukhat kha Jesuh nih hi tahchunhnak bia hi a chimh hna: 10 “Mi pahnih cu thlacam awkah biakinn ah an kal, pakhat cu Farasi mi a si i a dang pakhat cu ngunkhuai kholtu a si. 11 Farasi mi cu a dir i ‘Maw Pathian, kei cu midang bantuk in mi thil a chutmi, a ding lomi, a zuangzammi ka si lo ca le hi ngunkhuai kholtu bantuk zong ka si lo caah kaa lawm. 12 Zarhkhat ah voihnih lengmang rawl ka ul; ka hmuhmi vialte chung in cheuhra cheukhat zong ka pek’ tiah thla a cam. 13 Ngunkhuai kholtu cu lamhla nawn in a dir i vanlei hmanh zoh ngam loin ‘Maw Pathian, misual pa keimah hi ka zaangfah ko’ tiah a ṭang aa cum i thla a cam. 14 Mah hnuah ngunkhuai kholtu cu inn ah a ṭin. Kaan chimh hna lai, anih cu Farasi mipa nakin a ding deuh. Mahle mah aa hlorhmi cu ṭhumh an si lai i mi toi ah aa dormi cu hlorh an si lai.”

15 Mi nih hnuk ding liomi an fale cung ah a kut chuanter an duh caah Jesuh sinah an ratpi hna. Mah kha zultu pawl nih an hmuh tikah an thlauh hna. 16 Asinain Jesuh nih hnuk ding liomi ngakchia kha ratpi ding in a fial hna i “Ngakchia cu ka sinah ra ko hna seh, kham hna hlah u. Pathian Pennak cu hi ngakchia bantuk mi hna ta pei a si cu. 17 Biatak kaan chimh hna lai, Pathian Pennak kha hi ngakchia nih a cohlan bantuk in nan cohlan lo ahcun Pennak chung ah nan lut kho lai lo” tiah a ti hna.

18 Judah mi haotu pakhat nih “A Ṭhami Saya, zungzal nunnak hmuh awkah zeidah ka tuah lai?” tiah a hal. 19 Jesuh nih “Zeicahdah a ṭhami saya tiah na ka auh? Pathian dah ti lo cu a ṭhami ahohmanh an um lo. 20 ‘Va zuangzam hlah, lai va nawng hlah, fir hlah, lih chim hlah, na nu le na pa kha upat hna’ timi nawlbia hna kha na hngalh ko cu ta” tiah a ti. 21 Cu pa nih cun “Mah nawlbia vialte cu ka ngakchiat lioin ka rak tuahmi an si” tiah a ti. 22 Cun Jesuh nih “Na tuah dingmi pakhat a um rih: Na ngeihmi thilri hna kha va zuar law misifak va ṭhen hna, cuticun van ah chawva na ngei lai, mah hnuah rak ka zul” tiah a ti. 23 Mah bia a theih tikah a ngaih a chia ngaingai, zeicahtiah anih cu a rum tukmi a si.

24 Jesuh nih a hei zoh i, “Mirum mi caah Pathian Pennak chung luh cu a har tuk lai! 25 Pathian Pennak chung ah mirum mi luh nakin cun ṭhimkaa chung i kalauk luh hmanh a fawi deuh lai” tiah a ti. 26 Mah bia a theimi hna nih “Cutin a si ahcun khamhnak a hmu khomi an um ti lai maw?” tiah an hal. 27 Jesuh nih “Minung caah a si kho lomi thil hna cu Pathian caah cun a si kho ko” tiah a leh hna. 28 Asinain Peter nih “Kan ngeihmi kha kaltak in na hnu kan in zulh cang” tiah a ti. 29 Jesuh nih “Biatak kaan chimh hna lai, Pathian Pennak ruang ah nulepa, nupi, u le nau, fale, inn pakhatkhat a kaltakmi paoh cu, 30 tuchan ah a let tampi in a hmuh ṭhan lai i a ra dingmi chan* zong ah zungzal nunnak a hmuh rih lai” tiah a ti.

31 Mah hnuah Jesuh nih lamkaltu 12 kha anmah lawng in a auh hna i, “Atu Jerusalem khua ah kan kal lai, mi Fapa kong he aa tlaiin profet hna ṭialmi vialte cu a tling cang lai. 32 Mi Fapa kha miphun dang hna kut ah an chanh lai, nihchuak capo ah an saih lai, ningzak in an tuah lai i an cil an chak lai. 33 Fung in an tuk lai i an thah lai, asinain a nithumnak ni ah a nung ṭhan lai” tiah a ti hna. 34 Asinain a zultu hna nih a sullam kha an i fiang lo. Mah bia hna cu an sinin thuhkanh a si caah a chimmi kha an hngalthiam lo.

35 Jesuh cu Jeriko khua pawng a phanh tikah mitcaw pakhat cu lamkam ah a ṭhu i mi thil a rak hal hna. 36 Mibupi a pawng in an kalmi kha a theih tikah zeidah a cang tiah a hal hna. 37 “Nazareth khuami Jesuh a phan!” tiah an chimh. 38 Mah tikah “David Fapa Jesuh, ka zaangfah ko!” tiah a au. 39 Hmaiah a kalmi hna nih dai tein um awkah an sik nain “David Fapa, ka zaangfah ko!” tiah fakpi in a au chinchin. 40 Cu tikah Jesuh cu a dir i mitcaw pa kha a sinah ratpi ding in a fial hna. A pawng a rak phanh tikah Jesuh nih, 41 “Zeidah ka tuahpiak seh ti na ka duh?” tiah a hal i “Bawipa, ka mit khua ka hmuhter” tiah a nawl. 42 Jesuh nih “Khua hmu cang; na zumhnak nih aan damter cang” tiah a ti. 43 Cu caan te ah cun a mit khua a hmu ṭhan. Pathian kha a thangṭhat i Jesuh hnu kha a zulh. Mah thil a hmumi vialte zong nih Pathian kha an thangṭhat.