Lamkaltu

10 Sisaria khua ah Kornelias tiah auhmi pa pakhat a um. Anih cu Italy ralkapbu* i ralbawi* pakhat a si. 2 Biaknaklei ah aa zuam ngaimi a si i amah he, a chungkhar he Pathian a ṭihzahmi an si. Misifak a bawmmi le Pathian sinah thla a cam zungzalmi zong a si. 3 Nikhat cu zanlei suimilam 3* hrawng ah langhnak pakhat a hmuh. Pathian vancungmi cu a sinah a rak phan i “Kornelias!” tiah a auh. 4 Kornelias nih vancungmi kha thinphang ngai in ngang ko in a zoh. “Zeidah tuahter na ka duh, Bawipa?” tiah a hal tikah vancungmi nih “Na thlacamnak kha Pathian nih a theih i misifak na bawmhmi hna zong a hmuh. 5 Cucaah atu Joppa khua ah mi hei thlah hna law Peter tiah auhmi Simon kha va auhter hna. 6 Anih cu rilikam i saphaw sertu Simon inn ah aa ṭhum” tiah a ti. 7 A sinah bia a chimtu vancungmi a kalle cangka Kornelias nih a sinum pahnih le amah a zohkhenhtu hna lakin Pathian a ṭihzah ngaimi ralkap pakhat kha a auh hna. 8 Annih kha thil sining vialte a chimh hna i Joppa khua ah a thlah hna.

9 A thaizing, Joppa khua an phanh lai, chun laicer suimilam 12* hrawng ah Peter cu thlacam ding in inncung ah a kai. 10 Asinain a paw a hung ṭam i rawl ei a duh. Rawl an ser lioah langhnak pakhat a hmuh. 11 Van aa hung i puan phak kaupi bantuk a ki pali a ummi thil pakhat vawlei ah thlak a simi kha a hmuh. 12 A chung ah cun vawlei ah a tlongmi ke pali a ngeimi saram hna le a lawn in a lawnmi thilnung hna le van va a phunphun an um. 13 Mah hnuah “Tho tuah, Peter, that law ei tuah hna!” timi aw thawng a theih. 14 Asinain Peter nih “Ka ei lai lo, Bawipa, a thurhnawmmi le a thiang lomi zeihmanh ka ei bal lo” tiah a ti. 15 Mah tikah “Pathian nih a thianter cangmi thil cu a thur tiah chim ti hlah” timi aw kha a theih ṭhan. 16 Mah aw kha voithum tiang a theih hnuah puan he aa lomi thil cu van ah lak ṭhan colh a si.

17 Peter nih a hmuhmi langhnak cu zei sullam dah a si hnga tiah a ruah lengmang lioah Kornelias thlahmi hna nih Simon inn kha an rak hal hna i kutka hram ah an rak phan. 18 An hei auh hna i hi inn ah Peter tiah auhmi Simon aa ṭhum maw tiah an hal hna. 19 Peter nih langhnak kong a ruah lengmang lioah thiang thlarau nih “Zoh hmanh! Mi pathum nih an in kawl. 20 Cucaah tho law va ṭum tuah. Annih cu keimah nih ka thlahmi an si caah lungawṭawm lo tein va zul hna” tiah a ti. 21 Peter cu a va ṭum i “Nan kawlmi cu keimah ka si. Zeidah nan herh?” tiah a hal hna. 22 “Kannih cu ralbawi Kornelias thlahmi kan si. Anih cu miding, Pathian a ṭihzahmi le Judah mi vialte nih an chimthiam ngaimi a si. Pathian nih a thiangmi a vancungmi hmang in nangmah kha a inn i sawm awk le na chimmi bia ngaih awkah a fial” tiah an leh. 23 Cucaah Peter nih innchung ah a auh hna i a riahter hna.

A thaizing ah a tho i anmah he cun a kal. Joppa khua i unau cheukhat zong nih an zulh. 24 A thaizing ah Sisaria khua kha an phan. Cuka ah Kornelias nih a rualchan pawl le a hawikom pawl kha a sawm hna i an rak hngah ko. 25 Peter a luh tikah Kornelias nih a rak don. A kehram ah a bawk i upatnak a pek.* 26 Asinain Peter nih a kut in a thawh i, “Tho tuah; keimah zong minung pei ka si ve ko cu” tiah a ti. 27 Bia an i ruah pah in innchung a luh tikah mi tampi an rak i pumhmi kha a hmuh hna. 28 Cucaah Peter nih “Judah mi pakhat caah miphun dang he i hawikomh le an sin i va len, va kai cu nawlbia buar a si ti kha nan hngalh ko. Asinain ahohmanh kha a thurmi le a thiang lomi in hmuh awk a si lo ti kha Pathian nih a ka hmuhsak cang. 29 Cucaah na ka sawm tikah al lo tein ka ratmi a si. Zeicah na ka sawm ti kha ka chim tuah” tiah a ti.

30 Mah tikah Kornelias nih “A luancia nili, atu bantuk caan, zanlei suimilam 3* hrawng ah ka innchung ah thla ka cam. Mah lioah a cer ngaimi puan aa aihmi mi pakhat cu ka hmaiah a rak dir. 31 Amah nih ‘Kornelias, na thlacamnak kha Pathian nih a theih i misifak na bawmhmi hna zong a hmuh. 32 Cucaah Joppa khua ah mi hei thlah hna law Peter tiah auhmi Simon kha va auhter hna. Anih cu rilikam i saphaw sertu Simon inn ah aa ṭhum’ tiah a ka ti. 33 Cucaah na sinah mi ka rak thlah colh hna. Na rat khawh caah kan i lawm tuk. Jehovah* nih chim ding ah aan fialmi vialte ngaih ding in Pathian hmaiah atu bantuk in kan i pumhmi a si” tiah a ti.

34 Mah tikah Peter nih hitin a ti: “Pathian cu thleidannak a ngei lo ti kha fiang tein ka hngalhthiam cang. 35 Zei miphun a si hmanh ah amah a ṭih i a hmaanmi thil a tuahmi paoh cu a cohlan ko hna. 36 Mi vialte Bawi a simi Jesuh Khrih thawng in hmuh laimi daihnak kong thawngṭha kha Pathian nih Israel mi sinah a rak pek hna. 37 Johan nih tipil innak kong a chim hnuah Galili ram thawk in Judea ram vialte ah a thang dihmi kong kha nan theih. 38 Mah cu Nazareth khuami Jesuh kong kha a si. Pathian nih a thiang thlarau in chiti a thuh i ṭhawnnak a pek. Pathian cu a sinah a um caah ram chung dihlak ah a kal i ṭhatnak a tuah. Satan nih a hremmi vialte zong a damter hna. 39 Judah ram le Jerusalem khua i a tuahmi vialte he aa tlaiin kannih cu a hmutu tehte kan si. Asinain annih nih tung cung ah an thlai i an thah. 40 A nithumnak ni ah Pathian nih a thawhter i mi kha a hmuhter hna. 41 Asinain mi vialte kha si loin thihnak in a thawh ṭhan hnuah amah he a ei, a dingmi kanmah lawng kha a kan hmuhter. Kannih cu tehte caah Pathian nih a thim chungmi kan si. 42 Anih cu a nungmi he, a thimi he biaceih awkah Pathian nih rian a pekmi a si ti kha mi sinah chim awk le felfai tein tehte khaan awkah a kan fial. 43 Amah a zummi paoh cu a min thawng in sual ngaihthiam an si lai tiah profet vialte nih tehte an rak khaan.”

44 Peter nih mah kong a chim lengmang lioah Pathian bia a ngaimi vialte nih thiang thlarau an hmuh. 45 Miphun dang zong nih thiang thlarau laksawng an hmuh caah Peter a rak zulmi, cuarpar tanmi zumtu hna cu an khuaruah a har tuk. 46 Miphun dang zong nih holh dangdang in an holh i Pathian an thangṭhatmi kha an theih caah a si. Cucaah Peter nih, 47 “Hi mi hna zong kanmah bantuk in thiang thlarau an hmuh ve cang caah tipil an in awk a si lo tiah aho nih dah a chim khawh lai?” tiah a ti. 48 Cun Jesuh Khrih min in tipil in awkah a fial hna. Annih nih Peter kha ni tlawmpal in caam rih awkah an nawl.