Lamkaltu

12 Mah lio caan ah siangpahrang Herod nih Khrihfabu i mi cheukhat kha a hun hrem hna. 2 Johan a u Jeim zong kha vainam in a thahter hna. 3 Mah nih Judah mi pawl an lung a lawmhter hna ti kha Herod nih a hngalh tikah Peter zong a tlaihter hna. (Mah cu Thilnu Phulh Lo Changreu Puai caan ah a si.) 4 Peter kha a tlaih i thong ah a thlak. Ralkapbu buli nih aa changchang in an cawngh. Bukhat ah ralkap pali an um. Lanhtak Puai hnuah zapi hmaiah biaceih te ding in aa tim. 5 Peter thong i a um lioah Khrihfabu nih a caah lungtak tein Pathian sinah thla an campiak.

6 Herod nih chuahpi a timh lai zan ah Peter cu thir cikcin pahnih in an hren buin ralkap pahnih karlak ah aa hngilh. Thong kutka hmai in ralvengtu zong nih an cawngh. 7 Mah lioah Jehovah* vancungmi cu a hung lang i thonginn cu a ceu dih. Vancungmi nih Peter cu a hninh i a ṭhangh. Cun “Tho zokzok!” tiah a ti. Peter a kut i thir cikcin hna cu an tla. 8 Vancungmi nih “Na thil kha i tim law phanat kha i danh” tiah a ti caah Peter nih cutin a tuah. Cun “Na puan kha i aih law rak ka zul” tiah a ti. 9 Peter cu a chuak i a zulh. Asinain vancungmi nih a tuahmi cu a taktak a si ti awk a hngal lo i langhnak ka hmuh tiah a ruah. 10 Ralvengtu hna umnak a pakhatnak le a pahnihnak an lonh hnuah khua chung luhnak thir kutka kha an phan. Kutka cu amah tein aa hung i an rak chuak, cun lam pakhat an hun zulh lioah vancungmi nih Peter cu ruahlopi in a kaltak. 11 Peter nih a cang taktakmi a si ti kha a hun hngalh tikah “Jehovah* nih a vancungmi kha a rak thlah i Herod kut in le Judah mi nih tonter an ka duhmi thil ṭhalo vialte chung in a ka khamh ti kha ka hngalh cang” tiah a ti.

12 Thil sining kha a hun hngalh hnuah Peter cu Marka tiah auhmi Johan i a nu Mary inn ah a va kal. Cuka ah zultu cheukhat cu an i pum i thla an rak cam. 13 Peter nih innka a kingh tikah Roda timi sinum nute cu innka hun awkah a rak ra. 14 Peter aw a si kha a hngalh tikah aa lawmh tuknak ah innka hun loin innchung tu ah a va tli ṭhan i innka hmaiah Peter a phan tiah a chimh hna. 15 Annih nih “Na hrut ma?” tiah an ti. Asinain a si hrimhrim ko tiah a ti peng caah “A vancungmi a si lai” tiah an ti. 16 Peter nih innka cu a kingh lengmang caah an va hun. Peter kha an hmuh tikah an khuaruah a har tuk. 17 Peter nih dai tein um awkah a kut in a hmuhsak hna i thonginn in Jehovah* nih a chuahter ning kong kha a dikthliar in a chimh hna. Mah hnuah “Mah kong hi Jeim le unau pawl kha va chim hna u” tiah a cahtak hna i hmun dang ah a kal.

18 Khua a hun dei tikah ralkap pawl cu Peter khoika ah dah a um ti an hngalh lo caah an i tuai-ur len ko. 19 Herod nih Peter kha a kawlter chih hna nain an hmuh lo tikah ralvengtu pawl kha a kherhhlai hna i dantat ding in nawl a chuah. Mah hnuah Judea ram in Sisaria khua ah a va kal i cuka ah caan tlawmpal a um.

20 Voikhat cu Tair le Sidon mi hna cung ah Herod cu a thin a hung ngaingai. Cucaah cuka khuami hna cu lungkhat tein an ra i siangpahrang inn uktu Blastas bawmhnak in Herod kha daihnak ser awkah an nawl. Zeicahtiah siangpahrang ram in a chuakmi rawl kha an ram nih an i bochan caah a si. 21 Mizapi an i pumh ni ah Herod cu siangpahrang thilthuam kha aa thuam i biaceihnak ṭhutdan cung ah a ṭhu. Cun mizapi hmaiah bia a hun chim. 22 Aa pummi hna cu “Mah hi minung aw a si lo, pathian aw a si!” tiah an au. 23 Herod nih Pathian kha thangṭhatnak a pek lo caah Jehovah* vancungmi nih chikkhat te ah a zawtter. Kuut nih a chunglei kha a ei i a thi.

24 Jehovah* bia cu a karh chin lengmang.

25 Barnabas le Saul cu Jerusalem i har tongmi bawmhnak rian kha an liim hnuah an rak kir. Marka tiah auhmi Johan kha an i ratpi.