Lamkaltu

14 Paul le Barnabas cu Ikonium khua an phanh tikah Judah mi pumhnak inn ah an lut i hmualngei tein an cawnpiak hna caah Judah mi le Greek mi tampi cu zumtu an hung si. 2 Asinain zumlotu Judah mi nih miphun dang hna kha Paul le Barnabas cung ah an thin a hun i an ralchanh hna nakhnga an forh hna. 3 Cuka ah caan sau nawn an caam i Jehovah* pekmi nawlngeihnak he ralṭha tein phung an chim. Pathian nih khuaruahhar thil le hmelchunhnak tuah khawhnak a pek hnanak thawng in an chimmi a velngeihnak kong a hmaan ti kha a langhter. 4 Asinain khuami tampi cu an i ṭhencheu; a cheu cu Judah mi lei ah an ṭang i a cheu cu lamkaltu hna lei ah an ṭang. 5 Miphun dang le Judah mi le an hruaitu hna nih lamkaltu hna kha puarhrangpi in pehtlaih awk le lung in cheh awkah an i tim. 6 Mah kong kha an theih tikah lamkaltu hna cu Likaonia ram ah a ummi Listra khua, Derbe khua le pawngkam khua hna ah an zam. 7 Cuka ah thawngṭha kha an va chim.

8 Listra khua ah a chuahka in a ke a bei i lam a kal kho bal lomi pa pakhat a um. 9 Anih cu a ṭhu i Paul phungchimmi kha a ngai. Paul nih ṭha tein a zoh i ka dam kho lai timi zumhnak a ngeih kha a hmuh tikah, 10 aw thangpi in “Dir tuah” tiah a ti. Cucaah mah pa cu a hun i hlawk i lam a hun kal. 11 Paul tuahmi kha mi nih an hmuh tikah “Minung bantuk in pathian hna cu kan sinah an rung ṭum!” tiah Likaonia holh in an au. 12 Barnabas cu Zeus tiah an auh i Paul cu a bik in bia a chimtu a si caah Hermes tiah an auh. 13 Khua luhnak ah a ummi Zeus biakinn i tlangbawi nih mibu he Paul le Barnabas sinah raithawinak pek a duh caah cawtum le pangpar ṭhirual hna kha khua hauka ah a rak put.

14 Mah kha lamkaltu Barnabas le Paul nih an theih tikah an puan kha an thleh i mibu lakah an va tli, cun hitin an au: 15 “Zeicahdah hi thil hna hi nan tuah? Kanmah zong nanmah bantuk minung sawhsawh pei kan si ve ko cu. Thawngṭha kan in chimh hnanak a ruang cu santlaihnak zeihmanh a ngei lomi hi thil hna hi hlawt in van le vawlei le rili le an chung i a ummi thil vialte a sertu, a nungmi Pathian kha biak awkah a si. 16 A hlanah Pathian nih mi vialte kha anmahle an lam cio zulh awkah a rak awnh hna. 17 Asinain Pathian nih van in ruah a surter, theitlai a chuahtermi khuacaan aan pek hna, rawl tampi aan pek hna i nan lungthin kha lawmhnak in a khahter. Cutin thilṭha a tuahnak thawng in ahodah a si kha a langhter.” 18 Mah bia an chim bu hmanh in mibu kha raithawinak pekchanh lo awkah har ngai in an thlauh hna.

19 Asinain Judah mi hna cu Antiok khua le Ikonium khua in an rak phan. Mibu kha an forh hna caah Paul kha lung in an cheh i a thi cang tiah an ruah caah khua leng ah an hnuh. 20 Zultu hna nih an hun but tikah Paul cu a tho i khua chung ah a lut ṭhan. A thaizing ah Barnabas he Derbe khua ah an kal. 21 Cuka khua ah thawngṭha an chim i mi tampi kha zultu ah an ser hna hnuah Listra khua, Ikonium khua le Antiok khua ah an kir ṭhan. 22 “Pathian Pennak chung luh awkah harnak tampi kan ton a hau” tiah an ti i zultu hna kha an zumhnak a feh nakhnga thazaang an pek hna i an forh hna. 23 Mah leng ah Khrihfabu kip ah Khrihfa upa kha an thim hna. Cun rawl ulh in thla an cam hnuah Jehovah* kut ah an ap hna, zeicahtiah mah Khrihfa upa hna nih Pathian kha an zumh caah a si.

24 Mah hnuah Paul le Barnabas cu Pisidia ram kha an tan i Pamfilia ram ah an phan. 25 Perga khua ah Pathian Bia an chim dih hnuah Attalia khua ah an vung kal. 26 Cuka in Antiok khua ah tilawng in an kal. Atu an liim cangmi rian caah Pathian vel an hmuh nakhnga unau pawl nih thla an rak campiak hnanak khua kha a si.

27 Antiok khua an phanh tikah Khrihfabu kha hmunkhat ah an pumh hna i anmah hmang in Pathian nih a tuahmi thil tampi kong le miphun dang caah zumhnak innka a hunpiak hnanak kong kha an chimh hna. 28 Mah hnuah zultu hna sinah caan sau nawn an caam.