Luka

13 Mah lio caan ah mi cheukhat an rak phan i raithawinak a tuahmi Galili mi cheukhat Pilat nih a thah hnanak kong kha Jesuh cu an chimh. 2 Jesuh nih “Mah Galili mi hna cu a dang Galili mi hna nakin an sual deuh caah cu bantuk thil cu an tonmi a si tiah maw nan ruah? 3 Kaan chimh hna lai, a si hrimhrim lo. Nannih zong nan i ngaihchih lo ahcun cu bantuk in hrawh nan si ve lai. 4 Asiloah Siloam innsang a cimh ruang ah a thimi minung 18 kha tah zeitindah nan ruah? Jerusalem ah a ummi hna nakin an sual deuh tiah maw nan ruah? 5 Kaan chimh hna lai, a si hrimhrim lo. Nannih zong nan i ngaihchih lo ahcun cu bantuk in hrawh nan si ve ko lai” tiah a ti hna.

6 Mah hnuah Jesuh nih tahchunhnak pakhat a chimh hna: “Mi pakhat cu a mitsur dum chung ah theipi kung pakhat a um, thei a tlai hnga maw tiah a va zoh tikah a tlai pakhat hmanh a hmu lo. 7 Mah tikah dum cawngtu kha ‘Hi theipi kung ka rak zohnak hi kum thum a si cang. A thei pakhat hmanh a tlai lo caah hau ko! Zeicah vawlei kha ka sawksam lai?’ tiah a ti. 8 Dum cawngtu nih ‘Bawipa, tukum cu zuah rih ko, a kung velchum kha ka cawh lai i nawn ka toih rih lai. 9 Hmailei ah a tlai ahcun a ṭha ko, a tlai lo ahcun na hau te lai’ tiah a ti.”

10 Sabbath ni ah Jesuh nih pumhnak inn pakhat ah a cawnpiak hna. 11 Cuka ah khuachia nih a tuahmi nu pakhat a um, khuachia nih kum 18 chung a zawtter caah a keng a kul i ding tein a dir kho lo. 12 Jesuh nih a hmuh tikah a auh i “Minu, na zawtnak in na luat cang” tiah a ti. 13 A cung ah a kut a chuan tikah ding tein a dir kho colh i Pathian kha a thangṭhat. 14 Sabbath ni ah Jesuh nih mizaw a damter hna caah pumhnak inn haotu cu a thin a hung tuk i “Rian ṭuan ni, niruk a um ko cu ta; dam nan duh ahcun mah ni hna ah ra u. Sabbath ni ahcun ra ti hlah u” tiah mi kha a ti hna. 15 Mah tikah Bawipa Jesuh nih “Mi depde hna, Sabbath ni ah nan caw le nan laa hna kha an kawm in nan thlah hna i ti dinh awkah nan kalpi tawn hna a si lo maw? 16 Abraham fanu a simi hi minu hi kum 18 chung Satan nih a ṭemṭawn cang, Sabbath ni ah mah ṭemṭawnnak in ka luatter awk a si ko lo maw?” tiah a ti hna tikah, 17 Jesuh a ralchanhtu hna cu an ning a zak tuk, asinain mizapi tu cu Jesuh tuahmi khuaruahhar thil ruang ah an i lawm.

18 Cucaah Jesuh nih “Pathian Pennak cu zei he dah aa lawh, zei he dah ka tahchunh lai? 19 Pathian Pennak cu mi pakhat nih a lo ah a tuhmi anṭam ci* he aa lo, anṭam ci cu dum i vorh tikah a hun ṭhang i thingkung bantuk a hung si, a nge ah a zuangmi va pawl nih bu an i ser” tiah a ti.

20 Mah leng ah Jesuh nih “Pathian Pennak kha zei he dah ka tahchunh lai? 21 Pathian Pennak cu thilnu he aa lo, nu pakhat nih thilnu kha aa lak i changvut rel* thum chung ah a phulh i a cawh tikah a ningpi in a thawhter” tiah a ti.

22 Mah hnuah Jesuh cu Jerusalem khualei a kal pah in khuapi he, khuate he a pal pah i mi kha a cawnpiak hna. 23 Mi pakhat nih “Bawipa, khamh a si dingmi cu an tlawmte lai maw?” tiah a hal tikah Jesuh nih, 24 “Kutka bi chung luh awkah fakpi in i zuam u. Kaan chimh hna lai, mi tampi cu luh awkah an i zuam nain an lut kho lo. 25 Inn-ngeitu nih kutka a khar hnuah a lenglei in kutka nan kingh i ‘Bawipa, kutka rak kan onh’ tiah nan ti lai. Asinain inn-ngeitu nih ‘Nannih cu khoika in dah nan rat kha ka hngal lo’ tiah aan ti hna lai. 26 Nannih nih ‘Nangmah he kan ei, kan dingṭi i zatlang lam hna ah na rak kan cawnpiak bal ko cu ta’ tiah nan ti lai. 27 Asinain amah nih ‘Khoika in dah nan rat kha ka hngal lo. A ding lomi hna, ka hmaika hin chuak tuah u!’ tiah aan ti hna lai. 28 A leng ah hlonh a simi nannih nih Pathian Pennak ah Abraham, Isak, Jakob le profet hna kha nan hmuh hna tikah nan ṭap lai i nan hacang nan rial lai. 29 Nichuahlei, nitlaklei, thlanglei, chaklei in a rami hna cu Pathian Pennak ah an ṭhu lai i an ei, an ding lai. 30 Hmanung bik a simi hna cu hmasa bik an si lai, hmasa bik a simi hna cu hmanung bik an si lai” tiah a ti.

31 Mah lio caan ah Farasi mi cheukhat an rak phan i “Herod nih thah aan duh caah hika hmun hin chuak law kal” tiah an ti. 32 Jesuh nih “‘Nihin le thaizing cu khuachia kha ka ṭhawl hna lai i a zawmi kha ka damter rih ko hna lai, a nithumnak ni ahcun ka rian kaa liim ko lai’ tiah mah cenghngia kha va chim u. 33 Nihin, thaizing le kiptuh cu khual ka tlawn rih a hau, zeicahtiah profet cu Jerusalem khua leng ah thah phung a si lo. 34 Jerusalem, Jerusalem, nang cu profet pawl a thatmi khua, Pathian nih a thlahmi pawl lung in a chepmi khua na si. Arpi nih a fale kha a thla tang ah a pumh hna bantuk in na fale kha pumh awkah atu le atu kaa zuam! Asinain na duh lo. 35 Na inn cu kaltak a si cang lai. Kaan chimh lai, ‘Jehovah* min in a rami cu thluachuah hmu ko seh!’ tiah na chim hlan tiang na ka hmu ti lai lo” tiah a ti.