Lamkaltu

24 Ninga hnuah tlangbawi ngan Ananias cu Sisaria khua ah a rak phan. Paul kong kha uktu bawi Felix sin chuahpi awkah sihni Tertullas le upa cheukhat kha aa ratpi hna. 2 Tertullas kha biachimnak nawl an pek tikah Paul sualphawtnak bia kha hitin a chim:

“A Liannganmi Felix, nangmah thawng in dai tein khua kan sa kho i fimkhur tein na uk caah hi miphun chung ah ṭhanchonak hna a um. 3 Mah thil vialte ruang ah kan i lawm tuk hringhran. 4 Asinain na caan tam tuk in ka lak sual nakhnga lo a tawinak in ka chim lai. Zaangfahnak in kan ngaihpiak ko tiah kaan nawl. 5 Hi pa hi vawleicung khuazakip ah a ummi, Judah mi hna ralthawh ding in a forhtu, hnahnawhnak a chuahtertu* a si ti le Nazareth bu hruaitu a si ti kha kan hun hngalh. 6 Biakinn zong thurter ding in aa zuam caah kan tlaih. 7* —— 8 Nangmah tein na kherhhlai ahcun sual kan phawtnak vialte a hmaan ti kha na hngalh ko lai.”

9 Judah mi zong nih mah sualphawtnak hna cu a hmaan tiah an hun chim ve. 10 Uktu bawi nih biachim ding in a lu a sukpiak tikah Paul nih hitin a ti:

“Nang cu kum tampi chung hi miphun hna biaceihtu na si ti kha ṭha tein ka hngalh caah runvennak bia kha lunglawm tein ka chim lai. 11 Pathian biak awkah Jerusalem i ka kalnak hi ni 12 hrawng lawng a si rih. Mah kha nangmah tein na hlat khawh ko. 12 Biakinn ah pakhatkhat he bia kan i almi le pumhnak inn ah siseh, khua chung ah siseh mibu kha hnahnawhnak chuahter ding in ka forhmi hna kha an ka hmu bal lo. 13 Atu i sual an ka puhnak zong hi a hmaan ti an langhter kho lo. 14 Asinain hi pakhat belte hi cu ka tuah ko, Nawlbia le Profet cauk hna ah aa ṭialmi vialte kha ka zumh caah bu thar tiah an auhmi lam ning in pupa hna Pathian kha ka biak. 15 Pathian nih a dingmi he, a ding lomi he thihnak in a thawhter ṭhan hna lai tiah hi mi hna nih an i ruahchan bantuk in kei zong nih kaa ruahchan ve. 16 Cucaah Pathian hmai le minung hmaiah a thiangmi chiaṭha thleidannak lungthin ka ngeih khawh nakhnga kaa zuam zungzal. 17 Kum tampi hnuah ka miphun pawl bawmhnak tangka pek awk le Pathian sin raithawinak pek awkah Jerusalem ah ka kal ṭhan. 18 Mah thil hna ka tuah lioah mibu zong an um lo i hnahnawhnak zong zeihmanh a um lo. Moses Nawlbia ning in ka thian hnuah biakinn ah an ka hmuhmi a si. Asinain Asia peng in a rami Judah mi cheukhat tu cu an um. 19 Sualphawt awk an ka ngeih ahcun anmah cu pei na hmaiah an rak chuah awk a si cu. 20 Asiloah Judah Biaceihnak Zungpi i bia an ka ceih lioah zei ka sualnak dah an hmuh ti kha hika i a ummi hna nih chim hna seh. 21 Mah lioah ‘Mithi an tho ṭhan lai timi ruahchannak ka ngeih caah atu bantuk in biaceih ka simi hi a si!’ ti belte ka rak chim.”

22 Felix nih Bawipa Lam kong kha ṭha tein a hngalh ko nain “Ralkapbu haotu Lisias a phanh tikah mah kong hi bia ka khiah te lai” tiah a ti i a ṭinter hna. 23 Cun Paul kha thong ah zalong deuh in na chiah lai i a mi pawl nih a herhbaumi an tuahpiakmi kha na thlauh hna lai lo tiah ralbawi pa cu nawl a pek.

24 Ni tlawmpal hnuah Felix cu a nupi Drusilla he an ra. A nupi cu Judah mi a si. Paul kha a auhter hna i Jesuh Khrih zumhnak kong a chimmi kha an ngaih. 25 Asinain Paul nih dinnak, i sumnak le a ra laimi biaceihnak kong hna a chim tikah Felix cu a thin a phang i “Atu cu va kal rih ko. A caan ka ngeih tikah kaan auh ṭhan te lai” tiah a ti. 26 Mah leng ah tangka a ka pe hnga maw timi ruahchannak he Paul kha atu le atu a auh i bia a ruah lengmang. 27 Kumhnih hnuah Felix cu Porsias Festas nih a hun chaan. Asinain Felix nih Judah mi kha an lungton a duh hna caah Paul kha thonginn ah a chiah rih ko.