Korin Pahnihnak
10 Khrih lungnemnak le zaangfahnak in keimah Paul thengte nih kaan nawl hna. Hmaitonh in cun a nem ngai nain a langhlat in cun a ral a ṭha tukmi in nan ka hmuh. 2 Vawlei ruahnak ning in an nung tiah a kan ruatmi hna cu ka phak tikah an rak i thleng cang lai tiah kaa ruahchan. An rak i thlen lo ahcun fakpi in sik an hau lai. 3 Hi vawlei ah kan um ko nain vawlei ruahnak ning in ral kan do lo. 4 Raltuknak ah kan hmanmi hriamnam cu hi vawlei hriamnam si loin Pathian pekmi, ṭhawnnak in a khatmi hriamnam a si. Mah nih fek tein a hram aa sihmi thil hna kha a hrawh khawh. 5 Pathian hngalhnak ah dawnkhantu a simi ruahnak le porhlawtnak vialte kha kan hrawh dih hna. Cun minung ruahnak vialte kha sal bantuk in kan tlaih i Khrih nawl kan ngaihter hna. 6 Nawlngaihnak tling tein nan langhterle cangka nawlngai lomi hna dantat awkah timhcia kan si.
7 Nannih nih lenglang lawng in thil kha nan zoh. Pakhatkhat nih Khrih ta ka si tiah amahle amah aa zumh ahcun Khrih ta a si bantuk in kannih zong kan si ve ti kha ruat ṭhan seh. 8 Nan zumhnak hrawh awkah si loin fehter awkah Bawipa nih a kan pekmi nawlngeihnak kong ah a hleihluat deuh in kaa porhlawt hmanh ah ka ning a zak lai lo. 9 A cakuat in a kan tlerh tiah ruahter kaan duh hna lo. 10 “A cakuat cu a bia a ciap i hmual a ngei ngai. Asinain a mipum cu a derthawm i a biachim zong zei pipa a si lo” tiah an ka ti. 11 Cutin a chimmi hna nih kan rak phanh tikah kan cakuat i kan chimmi ning in kan tuah lai ti kha hngal hna seh. 12 Mahle mah aa chimthiammi hna he aa tluk tein kan i chia ngam lo i kan i tahchunh ngam lo. Anmah sermi phunglam ning in cuai an i thlaimi le anmahle anmah an i tahchunhmi cu hngalhthiamnak an ngeih lomi a si.
13 Asinain kannih cu pek kan simi rian leng in kan i porhlaw lai lo. Pathian pekmi rian i kan hlawhtlinnak lawng ah kan i porhlaw lai. Kan rian ning in phung kan chimhmi hna lakah nanmah zong nan i tel. 14 A tak ti ahcun nan sin kan rat tikah Pathian nih a kan fial lomi zei rian hmanh kan ṭuan lo. Kannih cu nan sinah Khrih kong thawngṭha a chim hmasa bikmi kan si. 15 Rian pek kan simi leng lonh in midang an hlawhtlinnak cung ah kan i porhlaw lo. Nan zumhnak a ṭhawn chin bantuk in rian pek kan simi hmunhma chung ah rian kan ṭuanmi zong a ṭhangcho lai tiah kan i ruahchan. Cuticun kan rianṭuannak hmunhma cu a kau chin lai. 16 Cun nan hmunhma pin ah thawngṭha kan chim khawh lai. Hmun dang i midang an hlawhtlinnak cung ah kan i porhlaw lai lo. 17 “Asinain aa porhlawmi cu Jehovah* ah i porhlaw ko seh.” 18 Zeicahtiah Jehovah* nih amahle amah aa thangṭhatmi kha si loin Amah nih a thangṭhatmi kha a cohlan hna.