Hebru

1 Hlanlio ah Pathian nih profet hna hmang in kan pupa hna sinah voi tampi le lam tampi in bia a rak chim. 2 Hi chan donghnak caan ah cun zeizong vialte rocotu ah a thimmi Fapa hmang in kan sinah bia a chim. Amah thawng in van le vawlei i a ummi thil* kha a ser hna. 3 Fapa cu Pathian sunparnak a langhtertu, Pathian muikeng taktakmi a si. Ṭhawnnak in a khatmi bia thawng in zeizong vialte kha a umter. Kan sualnak kha a thianh hnuah vancung ah a ummi a Liannganmi Pathian orhlei kam ah a ṭhu. 4 Anih cu vancungmi hna nakin a ṭha deuhmi min kha a hmuh caah anmah nakin a ngan deuhmi a hung si.

5 Tahchunhnak ah, “Nangmah cu ka fapa na si; nihin ah keimah cu na pa ka hung si,” “Keimah cu a pa ka hung si lai i anih cu ka fapa a hung si lai” tiah Pathian nih aho vancungmi kha dah a ti bal? 6 Asinain a Fater kha vawlei ah a thlah ṭhan tikah “Pathian vancungmi vialte nih amah cu kunpiak hna seh” tiah a ti.

7 Cun Pathian nih vancungmi hna he aa tlaiin “Vancungmi kha a ṭhawngmi thlarau* a siter hna. A rianṭuantu kha meizik a siter hna” tiah a ti. 8 Asinain a Fapa he aa tlaiin cun hitin a ti: “Pathian cu zungzal in zungzal tiang na bawiṭhutdan a si. Na Pennak bawifung cu dinnak bawifung a si. 9 Dinnak kha na duh i ṭhatlonak kha na huat. Cucaah Pathian, na Pathian nih chiti aan thuh i na hawile nih an hmuhmi nakin a ngan deuhmi lunglawmhnak aan pek.” 10 Cun “Maw Bawipa, a hramthawk ah vawlei hram kha na dirh, vancung cu na kut rianṭuannak an si. 11 Cu hna cu an rawk lai, asinain nang tu cu na hmun ko lai. Cu hna cu puan bantuk in an hlun lai. 12 Cun puan bantuk in na bil hna lai i thil bantuk in na thlen hna lai. Asinain nang tu cu naa thleng bal lo. Na chan cu zeitik hmanh ah a dong lai lo” ti zong in a ti.

13 “Na ral pawl kha na ke tang ah ka chiah dih hna hlan tiang ka orhlei kam ah hin ṭhu” tiah Pathian nih aho vancungmi kha dah a ti bal? 14 Vancungmi hna cu Pathian rian a ṭuanmi thlarau an si lo maw? Khamhnak a hmu dingmi hna bawmh awkah Pathian nih a thlahmi an si lo maw?