Korin Pahnihnak

1 Pathian duhnak in Khrih Jesuh lamkaltu a simi keimah Paul le kan unau Timote nih Korin khua i Pathian Khrihfabu sin le Akhaia ram i a ummi mithiang mi vialte sinah ca kan in kuat hna:

2 Kan Pa Pathian le Bawipa Jesuh Khrih vel le daihnak cu nan cung ah um ko seh.

3 Kan Bawipa Jesuh Khrih i a Pa le a Pathian, zaangfahnak in a khatmi kan Pa, hnemhnak vialte i Pathian cu thangṭhat si ko seh. 4 Pathian nih harnak a phunphun kan ton tikah a kan hnemh.* Pathian sinin kan hmuhmi hnemhnak in harnak a phunphun a tongmi kha kan hnemh khawh ve hna. 5 Khrih zultu kan si caah harnak tampi kan ton bantuk in Khrih thawng in hnemhnak zong tampi kan hmu ve. 6 Harnak kan ton ahcun mah cu nanmah hnemhnak le khamhnak caah a si. Hnemh kan si ahcun mah cu nanmah hnemhnak caah a si. Mah nih kan tonmi harnak phun nan ton tikah inkhawh awkah aan bawmh hna lai. 7 Nan cung i kan ngeihmi ruahchannak cu a fek ko. Kan tonmi harnak kha nan i hrawm ve bantuk in kan hmuhmi hnemhnak zong nan i hrawm ve lai ti kha kan hngalh.

8 Unau hna, Asia peng i kan tonmi harnak kong kha hngalhter kan in duh hna. Mah thil hna cu kan caah a har tuk i kan inkhawh leng tiang a si caah nun lai hmanh kan rak i ruat lo. 9 Thi ding in biaceih kan si cang tiah kan rak ruah. Asinain mah cu kanmahle kanmah i bochan loin mithi a thawhtertu Pathian kha kan i bochan nakhnga caah a rak si. 10 Cu tluk in ṭih a nungmi thihnak chung in a kan khamh bantuk in hmailei zong ah a kan khamh lai i a kan khamh lengmang rih ko lai tiah a cung ah ruahchannak kan ngei. 11 Kan caah lungtak tein thla nan camnak thawng in nan kan bawmh khawh. Zeicahtiah mi tampi nih thla nan kan campiak ahcun Pathian nih a theih lai i a kan bawmh lai. Mah thawng in mi tampi nih Pathian cu an lawmh lai.

12 Kan i porhlawtnak cu mah hi a si: hi vawlei ah, a hleiin nan sin i kan um lioah vawlei fimnak kha i bochan loin Pathian vel tu kha kan i bochan, Pathian sinin a rami lungthin thiang le nunning thiang in kan nung ti kha kan chiaṭha thleidannak lungthin nih tehte a khaan ko. 13 Kan cakuat ah hin nan rel khawhmi* le nan hngalhthiam khawhmi kong lawng kan rak ṭial. Mah thil hna hi tling tein nan hngalhthiam lai tiah kaa ruahchan. 14 Kannih cu nan caah porhlawt awk kan si kha nan lak i cheukhat nih nan hngalhthiam cang. Bawipa Jesuh ni ah nannih zong kan caah porhlawt awk nan si te lai.

15 Mah kha ka zumh caah a voihnihnak nan i lawmh khawh nakhnga* nan sinah rat hmasa ka rak i tim. 16 Masidonia ka kal pah ah rak tlawn in ka kirlei zong ah rak luh pah ṭhan kaa tim. Mah hnuah Judea ram lei ah nan ka thlah te lai. 17 Cutin kaa timh tikah lungrep ngei loin kaa timhmi maw a si? Mah zawn lawng i ruat in “A si” ti thulh, “A si lo” ti thulh in maw ka chim? 18 Pathian cu zumhawktlakmi a si bantuk in kan bia zong zumhawktlakmi a si. “A si” kan ti hnuah “a si lo” tiah kan ti lo. 19 Keimah le Silvanus* le Timote nih nan sinah a kong kan chimmi Pathian Fapa, Jesuh Khrih cu “a si” ti hnuah “a si lo” tiah a timi a si lo. “A si” tiah a timi cu a zungzal in “a si” tiah a ti ko. 20 Pathian biakam cu zeitluk in a tam hmanh ah Khrih thawng in “a si” timi an hung si. Cucaah amah thawng in “Amen” tiah kan ti khawh i mah nih Pathian kha thangṭhatnak a hmuhter. 21 Asinain nanmah he, kanmah he Khrih ta kan si ti aamah a khangtu le chiti a kan thuhtu cu Pathian a si. 22 Pathian nih hmelchunhnak a kan khenh i a ra laimi thil caah aamah khaannak* a kan pek. Mah cu kan lungthin chung ah a ummi thiang thlarau kha a si.

23 Pathian kha tehte ah chia in ka chim ngam, Korin khua i ka rat rih lomi cu nan ngaih a chiat chin nakhnga lo caah a si. 24 Kannih cu nan zumhnak a ukmi kan si lo. Nan i lawmh nakhnga rian a ṭuanṭimi tu kan si. Zeicahtiah nan zumhnak thawng in fek tein nan dir ko.