Lamkaltu

4 Peter le Johan nih mi sin i bia an chim lioah tlangbawi hna le biakinn haotu le Sadusi mi* hna cu an rak phan. 2 Lamkaltu hna nih mi an cawnpiak hna caah le thihnak in Jesuh a tho ṭhan timi kong kha hlangfang tein an chim caah an thin a hung. 3 Cucaah an tlaih hna i zanlei sang a si cang caah a thaizing tiang thong ah an thlak hna. 4 Asinain an chimmi bia a ngaimi lakin mi tampi cu zumtu an hung si i pa lawng te 5,000 hrawng an si.

5 A thaizing ah an hruaitu hna, upa hna le phungbia cawnpiaktu hna cu Jerusalem khua ah an i pum. 6 Tlangbawi upa Annas, Kaiafas, Johan, Alexander le tlangbawi upa i a rualchan pawl zong an i tel. 7 Peter le Johan kha an lai ah an dirter hna i “Zei nawlngeihnak le aho min in dah hi thil hi nan tuah?” tiah an hal hna. 8 Mah tikah thiang thlarau in a khatmi Peter nih hitin a ti hna:

“Hruaitu hna le upa hna, 9 nihin ah a ke a beimi pa cung ah thilṭha tuah a sinak kong le aho nih dah a damter timi kong kha hngalh nan duh ahcun rak kan kherhhlai ko u. 10 Nannih vialte le Israel mi vialte nih mah hi hngal ko u, Nazareth khuami Jesuh Khrih min in le amah Jesuh thawng in hi pa hi nan hmaiah dam tein a dir khawhmi a si. Amah Jesuh cu tung cung ah nan thlai i nan thah nain Pathian nih thihnak in a thawhter ṭhan cang. 11 ‘Nannih innsatu hna nih zei ah nan rel lo nain lung santlai bik a kil lung* a hung simi’ cu amah hi a si. 12 Mah leng ah amah dah ti lo nih cun ahohmanh nih a kan khamh kho lo, zeicahtiah kanmah khamh awkah vawleicung ah Pathian nih a thimmi cu amah min lawng hi a si. A dang zei min hmanh a um lo.”

13 Peter le Johan cu fimthiamnak a ngei lomi* le mi sawhsawh men an si ko nain cutin ralṭha tein an chimmi kha an hmuh tikah an khuaruah a har. Mah tikah annih cu Jesuh he a rak um balmi an si kha an hun hngalh ṭhan. 14 An damtermi pa cu Peter le Johan sinah a dirmi kha an hmuh caah zei bia hmanh an chim kho lo. 15 Mah tikah lamkaltu hna kha Judah Biaceihnak Zungpi* in an chuahter hna i anmah lawng in an i ceih. 16 “Hi mi hna hi zeitindah kan tuah hna lai? Khuaruahhar thil an tuahmi kha Jerusalem i a ummi vialte nih an hngalh dih cang, kanmah zong nih kan al kho fawn lo. 17 Mah thawngpang a karh chin ti nakhnga lo amah min in aho sin hmanh ah chim ti hlah u tiah kan tlerh hna lai” tiah an ti.

18 Mah hnuah lamkaltu hna kha an auh ṭhan hna, Jesuh min in zeihmanh chim ti lo awk le cawnpiak ti lo awkah nawl an pek hna. 19 Asinain Peter le Johan nih “Pathian bia ngaih nakin nanmah bia ngaih cu Pathian hmaiah a hmaan deuh hnga maw ti kha nanmah nih bia khiak ko u. 20 Kannih tu cu kan hmuhmi le kan theihmi kha chim loin kan um kho lo” tiah an ti. 21 Anmah dantat awkah a ruang an hmu lo, mi zong nih a cangmi thil ruang ah Pathian kha an thangṭhat caah mi kha an ṭih hna. Cucaah Peter le Johan kha an tlerhkhonh ṭhan hna i an thlah hna. 22 Khuaruahhar in an damtermi pa cu kum 40 leng a si cang.

23 Peter le Johan cu an luat hnuah zumtukhat pawl sinah an kal i tlangbawi upa hna le Judah mi hruaitu hna nih an chimmi vialte kha an chimh ṭhan hna. 24 Mah kha an theih tikah Pathian sinah lungkhat tein thla an cam.

“Lianngan Bik Bawipa, nang cu van le vawlei le rili le an chung i a ummi thil vialte a sertu na si. 25 Thiang thlarau hmang in kan pupa, na sal David sinah hitin na rak chim: ‘Miphun hna cu zeicah an thin a hun i zeicah mi nih pakpalawng in khua an khan? 26 Jehovah* le amah nih chiti a thuhmi kha* ralchanh awkah vawleicung i siangpahrang hna le uktu hna cu an i pum.’ 27 Chiti na thuhmi a thiangmi na sal Jesuh kha ralchanh awkah Herod le Pontius Pilat cu miphun dang hna le Israel mi hna he hika khua ah an i pum. 28 Na chimchungmi ning in tuah awkah an i pum, na ṭhawnnak le na duhnak ruang ah mah thil hna hi a ummi a si. 29 Jehovah,* an kan tlerhkhonhnak bia hi kan theihpiak ko, na salle nih na bia kha ralṭha tein kan chim khawh nakhnga kan bawm ko. 30 Zawtnak damter awkah na ṭhawnnak kha langhter rih ko, a thiangmi na sal Jesuh min hmang in khuaruahhar thil le hmelchunhnak hna tuah khawhnak nawl kan pe rih ko” tiah thla an cam.

31 Cutin lungtak tein thla an cam dih hnuah an i pumhnak hmun cu aa hnin, an dihlak in thiang thlarau in an khat i Pathian bia kha ralṭha tein an chim.

32 Mah hnuah zumtu dihlak cu lungkhat thinkhat tein an um i ahohmanh nih keimah thil, nangmah thil ti thleidannak um loin an ngeihmi vialte kha an i hrawm dih. 33 Lamkaltu hna zong nih Bawipa Jesuh thawhṭhannak kong kha hmualngei tein tehte an khaan, an dihlak in Pathian velngeihnak tampi an hmu. 34 An lakah a chambaumi pakhat hmanh an um lo, inn le lo a ngeimi hna nih an inn le an lo kha an zuar i an hmuhmi tangka kha an rak put. 35 Cun lamkaltu pawl kha an pek hna, lamkaltu hna nih mikip kha a herh ning in an phawt cio hna. 36 Saipras tikulh ah a chuakmi, Josef tiah auhmi Levi mi pakhat a um. Lamkaltu hna nih amah kha Barnabas (a sullam cu “Hnemhnak Fapa” tinak a si) tiah an auh. 37 Anih nih a ngeihmi lo pakhat kha a zuar i a hmuhmi tangka kha lamkaltu pawl a pek hna.