Peter Pahnihnak

2 Israel miphun lakah a hmaan lomi profet an rak um bantuk in nanmah lak zong ah a hmaan lomi cawnpiaktu an um ve lai. Annih nih bu a ṭhencheutertu kha a thli tein an ratpi hna lai. Cun anmah a tlantu* hmanh kha an hlawt caah khulrang in an rawk lai. 2 Mah leng ah zah hngal loin thil an tuahmi* kha mi tampi nih an i cawn lai. Anmah ruang ah biatak lam kha mi nih an thangchiat lai. 3 Cun an hak a kauh caah lihbia hmang in nanmah hlen awkah an i zuam lai. Asinain an ca i biaceihnak cu hlanliopi in biakhiah a si cang, a tlai lai lo i an rawk hrimhrim lai.

4 Sualnak a tuahmi vancungmi hna kha Pathian nih dantat loin a um hna lo. Mah vancungmi hna kha Tartarus* ah a hlonh hna i biaceih an si hlan tiang muihnak khor chung ah a hren hna. 5 Hlanlio vawlei zong kha Pathian nih biaceih loin a rak um lo. Pathian zei i a rel lomi hna in a khatmi vawlei ah tilian a tlunter tikah dinnak kong a chimtu Noah le a dang pasarih cu a khamh hna. 6 Cun Sodom le Gomorrah khua zong vutcam ah a canternak thawng in dan a tat hna. Mah nih Pathian zei i a rel lomi hna nih hmailei ah an ton dingmi kha a langhter. 7 Asinain nawl a buarmi hna nih zah hngal loin thil an tuahmi* ruang ah a lung a rawk tukmi miding Lot cu Pathian nih a khamh. 8 Miding Lot cu an lak i a rak um lioah a ṭhalomi an tuahsernak a hmuhmi le a theihmi ruang ah nifatin lung sivang in a rak um. 9 Jehovah* nih amah lei i aa pechanmi hna cu harnak chung in zeitindah khamh ding an si ti kha a hngalh. Asinain miding lomi cu biaceihnak ni ah hrawh ding in a zuah hna. 10 A hleiin an pumsa duhnak kha zul in midang pum thurter awkah aa zuammi le nawlngeihnak zei ah a rel lomi kha an si.

Annih cu an ral a ṭha, an ruam a kai i upat awk a simi hna kha an serhsat ngam hna. 11 Anmah nakin vancungmi cu ṭhawnnak le thazaang a ngei deuhmi an si ko nain Jehovah* an upat caah a hmaan lomi cawnpiaktu hna kha serhsatnak bia in sual an phaw hna lo. 12 Asinain annih tu cu an hngalh lomi kong ah serhsatnak bia an chim tawn. Tlaih in thah awk men ah a chuakmi, i chuahkehpimi hngalhnak lawng in thil a tuahmi, tuaktan khawhnak a ngei lomi saram he an i lo. Annih cu a ṭhalomi an tuahsernak ruang ah hrawh an si lai. 13 Fahnak a pemi anmah tuahsernak lila ruang ah fahnak an ing lai.

Chun laipi ah pumsa duhnak diriamhter kha a nuammi in an hmuh. Annih cu a thurhnawmmi le soisel awk a ummi an si. Cun puai ah nanmah he an eiṭi tikah a hmaan lomi cawnpiaknak in mi an hlenmi hna kha an i nuam. 14 An mit cu nupa sual duhnak in a khat, sualnak tuah loin an um kho lo i a zumhnak a dermi kha an lem hna. An lungthin cu hakkauhnak in a khat i chiatserhmi fale an si. 15 Lam ding kha an kaltak i lam an pial cang. A miak hmuh a duh caah thil ṭhalo a tuahmi Beor fapa Balaam zulhmi lam kha an zulh. 16 Asinain Balaam cu nawl a buar ruang ah chimhhrinh a si. Holh a thiam lomi laa nih minung pakhat bantuk in bia a chim i profet Balaam nih hrut ngai in a tuahmi kha a kham.

17 Annih cu a reu cangmi cerh le thlichia nih a choihmi tichum bantuk an si. An caah a muih biknak hmun kha chiahpiak an si. 18 Annih nih sullam a ngei lomi bia sangsang kha an chim. Sualnak lam ah khua a sami hna kut in a luatkami hna kha pumsa duhnak le zah hngal loin thil tuahnak* in an lem hna. 19 Miluat si awkah bia an kamh hna nain anmah lila cu rawhralnak sal an si. Mi pakhat nih pakhatkhat kha aa teiter ahcun mah i a sal a si. 20 Kan Bawipa le Khamhtu Jesuh Khrih kong a hmaanmi hngalhnak thawng in vawlei thurhnawmhnak in an luat hnuah cu thil hna kha an tuah ṭhan i an i teiter ṭhan ahcun an donghnak cu an hramthawknak nakin a zual deuh lai. 21 Dinnak lam kong hmaan tein an hngalh hnuah an hmuhmi, a thiangmi nawlbia kha mertak ṭhan nakin cun mah lam kong kha hngalh loin rak um lawlaw hna seh law an caah a ṭha deuh hnga. 22 “Uico nih a luak a ei ṭhan tawn, vok zong kholh hnuah nawncek ah aa bual ṭhan tawn” timi phungthluk a hmaan kha an sining nih a langhter.