Marka

6 Jesuh cu cuka hmun in a chuak i a umnak khualei a kal tikah a zultu hna nih an zulh. 2 Sabbath ni a phanh tikah pumhnak inn ah a cawnpiak hna. A bia a theimi tam deuh cu an khuaruah a har tuk i “Hi thil hna hi khoika in dah a lak hnga? Hi bantuk fimnak le khuaruahhar thil tuah khawhnak ṭhawnnak hi aho nih dah a pek hnga? 3 Anih cu lehtama a si lo maw? Mary fapa kha a si lo maw? Jeim, Joses, Judas le Simon hna i an u a si lo maw? A farle zong hika khua ah an um a si lo maw?” tiah an ti. Annih nih Jesuh kha an cohlang lo. 4 Jesuh nih “Profet cu mi upatnak kha a hmuh. Asinain a umnak khua, a inn ah le a chungkhat pawl lakah cun upatnak a hmu lo” tiah a ti. 5 Mizaw cheukhat cung lawng ah a kut a chuan i a damter hna. Cuka ah khuaruahhar thil a tuah duh ti lo. 6 Zumhnak an ngeih lo caah a khuaruah a har tuk. Mah hnuah khua khat hnu khua khat ah a kal i a cawnpiak hna.

7 Jesuh nih lamkaltu 12 kha a auh hna i pahnih pahnih in a thlah hna. Khuachia ṭhawl khawhnak ṭhawnnak zong a pek hna. 8 Cun khualtlawnnak caah ṭhiangṭhunh pakhat dah ti lo cu zeihmanh a kenter hna lo. Changreu le rawl i rawnhnak sawngkhoi i ken lo awk, an zal chung ah tangka* i sanh lo awk, 9 angki a hlei in i ken lo awk* le phanat tu cu i danh awkah a cah hna. 10 Cu leng ah “Inn pakhat i nan luh tikah cuka khua in nan chuah hlan tiang mah inn ah cun i ṭhum u. 11 An in cohlan hna lo i nan bia an ngaih lo ahcun cuka in nan chuah tikah nan ke i aa benhmi leidip kha va thing u. Mah cu an caah ralrin peknak a si lai” tiah a ti hna. 12 Mah hnuah a zultu hna cu an chuak i mi kha i ngaihchih awkah phung an chimh hna. 13 Khuachia tampi an ṭhawl hna, a zawmi tampi kha chiti an thuh hna i an damter hna.

14 Jesuh kong kha mikip nih an chim caah Siangpahrang Herod zong nih a rak theih ve. Mi nih “Tipil Petu Johan cu thihnak in a tho ṭhan cang, cucaah hi bantuk ṭhawnnak hna hi a langhter khawhmi a si” tiah an ti. 15 “Anih cu Elijah a si” tiah a timi an um bantuk in “Hlanlio profet pakhatkhat a si lai” tiah a timi zong an um. 16 Mah kha Herod nih a theih tikah “A lu ka rak tanmi Johan cu a nung ṭhan cang” tiah a ti. 17 Herod nih a u Filip nupi Herodias kha a ṭhit, Herodias ruang ah Johan kha mi a va tlaihter hna i thong ah a rak thlak. 18 Johan nih “Na u nupi cu na ṭhit awk a si lo” tiah a rak ti caah a si. 19 Cucaah Herodias nih Johan kha a lung chung in a uam i thah a duh, asinain a that kho lo. 20 Herod nih Johan cu miding le mithiang a si ti kha a hngalh caah amah kha a ṭihzah i a huhphenh. Johan chimmi bia a theih fatin zei tuah awk hngal loin a um ko nain a chimmi kha cu ngaih a duh.

21 Herod chuah ni a phanh tikah Herodias caah caanrem a hung chuak. Herod nih a bawi pawl, a ralbawi pawl le Galili ram i minthang pawl caah rawl danghnak puai a tuah. 22 Herodias fanu cu a rak lut i a laampiak hna tikah Herod le a sawmmi hna cu an lung a ton ngaingai hna. Cucaah siangpahrang nih “Na duhmi paoh ka hal law kaan pek lai” tiah a ti. 23 “Na ka halmi paohpaoh, ka ram hnarcheu tiang kaan pek lai” tiah chiatserh in bia a kamh. 24 Nute cu a nu sinah a va kal i “Zeidah ka hal lai?” tiah a ti tikah a nu nih “Tipil Petu Johan lu kha hal” tiah a ti. 25 Nute cu siangpahrang sinah khulrang in a va lut ṭhan i “Tipil Petu Johan a lu kha kheng in atu ah ka pe” tiah a hal. 26 Mah tikah siangpahrang cu a ngaih a chia ngaingai, asinain khual pawl hmaiah chiatserh in bia a kamh cangmi a si caah nute nih a halmi kha a al kho lo. 27 Cucaah siangpahrang nih runvengtu pakhat a thlah colh i Johan lu kha rak put ding in nawl a pek. Runvengtu cu thong chung ah a va kal i Johan lu cu a va tan. 28 Johan lu kha kheng in a rak put i nute kha a pek, nute nih cun a nu kha a pek chin. 29 Mah kong kha Johan zultu pawl nih an theih tikah a ruak kha an va lak i thlan ah an vui.

30 Lamkaltu pawl cu Jesuh sinah an i pum i an tuahmi le an cawnpiakmi hna kong vialte kha an chimh. 31 Jesuh nih “Hmunking ah kal u sih law chikkhat i din u sih” tiah a ti hna. Zeicahtiah an sinah a rami cu an tam tuk caah dinhnak caan le rawl einak caan hmanh an ngei lo. 32 Cucaah anmah lawng in hmunking ah cun lawng i cit in an kal. 33 An kalmi kha mi nih an hmuh hna tikah anmahle an khua cio in an ke in an dawi hna i anmah hlanah an rak phan. 34 Jesuh cu lawng in a ṭum tikah khaltu a ngei lomi tuu bantuk a simi mibu kha a hmuh hna i a zaang an fak ngaingai. Cucaah thil tampi a cawnpiak hna.

35 Zanlei sang a phak tikah a zultu hna cu Jesuh sinah an ra i “Hika hi hmunking a si, khua zong a tlai cang. 36 Mi hi ṭinter cang hna law pawngkam khua ah rawl va cawk hna seh” tiah an ti. 37 Jesuh nih “Nanmah nih dang ko hna u” tiah a ti hna tikah “Denarii* 200 man in changreu kan va cawk lai i kan dang hna lai maw?” tiah an hal. 38 Jesuh nih “Changreu pa zeizat dah nan ngeih? Va zoh tuah u!” tiah a ti hna tikah an va zoh i “Changreu hlum nga le nga pahnih” tiah an ti. 39 Jesuh nih mizapi kha ramhring cung ah a bu tete in a ṭhutter hna. 40 Cucaah 100 phu, 50 phu tiin an ṭhu. 41 Jesuh nih changreu hlum nga le nga pahnih kha a lak, van a cau i thla a cam.* Changreu kha a cheu i a zultu pawl kha a pek hna, a zultu pawl nih cun mibu kha an phawt hna, nga pahnih zong kha a cheu i an dihlak in a phawt hna. 42 An dihlak in khim tein an ei dih hnuah, 43 a taangmi kha an khawmh tikah changreu lawng in sei 12 a khat, nga zong a taang rih. 44 A eimi cu pa 5,000 an si.

45 Mah dih cangka in Jesuh nih a zultu pawl kha rili khattalei ral i Bethsaida khua ah lawng in a kalter chung hna, mibu zong a tlunter hna. 46 Mibu a tlunter hna hnuah Jesuh cu thlacam ding in tlang cung ah a kai. 47 Zanlei sang a phanh tikah lawng cu rili laifang a phan cang, Jesuh tu cu tlang cung ah amah lawng in a um. 48 Khuadei lai* ah thli fakpi in a hrang i a zultu pawl nih lawng zah an i harhmi kha a hmuh, mah tikah an sinah ti cung in a kal; asinain an pawng in lanhtak a timh hna. 49 Ti cung in a kalmi kha an hmuh tikah zultu hna cu an ṭih tuk i “Zoh hmanh u, zeipi dik a ra!” tiah thinphang ngai in an au. 50 Jesuh kha an hmuh tikah an ṭih tuk. Asinain Jesuh nih a hei chawnh colh hna i “Nan thinphang hlah u! Keimah ka si; ṭih hlah u” tiah a ti hna. 51 Lawng cung a kai tikah thli cu a dai. A zultu hna cu an khuaruah a har ngaingai. 52 Changreu danghnak khuaruahhar thil i a sullam kha an hngalthiam rih lo, an lung a pem rih lo.

53 Mah hnuah rili khattalei ral ah an kal i Genesaret an phanh tikah an lawng kha tikam ah an hren. 54 Lawng in a ṭumle cangka Jesuh kha mi nih an rak hngalh colh. 55 Cuka hmun i a ummi hna sinah an va tli i thawng an thanh hna caah a zawmi hna kha Jesuh umnak hmun ah laang in an ratpi hna. 56 Khuapi siseh, khuate siseh a luhnak hmun paoh ah a zawmi hna kha chawdawrnak hmun ah an ratpi hna. Jesuh kha a puanki tawnghter awkah an nawl. A tawngmi paoh cu an dam.