Lamkaltu
11 Miphun dang zong nih Pathian bia an cohlannak kong kha Judea ram i a ummi lamkaltu hna le unaupa hna nih an theih. 2 Cucaah Peter cu Jerusalem khua a phak tikah miphun dang zong an cuarpar i tan hna seh ti a duhmi hna nih an rak mawhchiat i, 3 “Cuarpar tan lomi hna inn ah na lut i an sinah rawl na ei” tiah an ti. 4 Cucaah Peter nih thil sining vialte kha a dikthliar in hitin a chimh hna:
5 “Joppa khua i thla ka cam lioah langhnak pakhat ka hmuh. Mah langhnak ah a ki kili a ummi puan phak kaupi bantuk thil pakhat cu van in a rung tla i ka hmaiah a rak phan. 6 Mah kha ṭha tein ka zoh tikah ke pali a ngeimi saram hna, sahrang hna, a lawn in a lawnmi thilnung hna le van va hna kha ka hmuh. 7 Cun ‘Tho tuah, Peter, that hna law ei tuah!’ timi aw thawng kha ka theih. 8 Asinain ‘Ka ei lai lo, Bawipa. A thurhnawmmi le a thiang lomi zeihmanh ka ei bal lo’ tiah ka leh. 9 Mah tikah ‘Pathian nih a thianter cangmi thil cu a thur tiah ti ti hlah’ timi aw kha a voihnihnak ka theih ṭhan. 10 Mah aw kha a voithumnak ka theih hnuah mah thil vialte cu van ah lak ṭhan an si. 11 Cu caan te ah cun Sisaria khua in thlahmi mi pathum cu kan umnak inn hmaiah an rak dir. 12 Thiang thlarau nih lungawṭawm lo tein va zul hna tiah a ka ti. Hi unau paruk zong nih an ka zulh i Kornelias innchung ah cun kan lut.
13 “Anih nih a inn ah vancungmi pakhat a hmuhnak kong kha a kan chimh. Vancungmi nih ‘Joppa khua ah mi hei thlah hna law Peter tiah auhmi Simon kha va auhter hna. 14 Nangmah le na innchungkhar nih zeitindah khamhnak nan hmuh khawh ti kha amah nih aan chimh hna lai’ tiah a rak ti. 15 Phung ka hun chim tikah a hlan i kan cung ah thiang thlarau a tlun bantuk in an cung ah a tlung ve. 16 Mah tikah ‘Johan nih ti in tipilnak a pek. Nannih tu cu thiang thlarau in tipil pek nan si lai’ tiah Bawipa nih a rak chim tawnmi kha ka lung ah a hung chuak. 17 Pathian nih Bawipa Jesuh Khrih a zummi kannih kha mah laksawng a kan pek bantuk in annih zong a pek ve hna ahcun keimah cu ahodah ka si i Pathian cu ka dawnh khawh lai?”
18 Mah bia an theih tikah Peter kha an al ti lo.* “Pathian nih miphun dang zong nunnak an hmuh nakhnga i ngaihchihnak caanṭha a pek cang hna” tiah Pathian kha an thangṭhat.
19 Steven thah a si hnu in a chuakmi hremnak ruang ah aa ṭhekmi hna cu Foinisia ram, Saipras tikulh le Antiok khua tiang an phan. Asinain Judah mi lawng kha phung an chimh hna. 20 An lakah Saipras tikulh mi le Sairin rammi cheukhat zong an i tel. Annih cu Antiok khua ah an ra i Greek holh a hmangmi hna kha Bawipa Jesuh kong thawngṭha an chimh hna. 21 Jehovah* nih a bawmh hna caah mi tampi cu zumtu an hung si i Bawipa hnu kha an hun zulh.
22 Mah thawng kha Jerusalem khua i Khrihfabu nih an theih tikah Barnabas kha Antiok khua tiang an hei thlah. 23 A va phanh tikah Pathian velngeihnak kha a hmuh i aa lawm tuk. Bawipa cung ah zumhawktlak tein um zungzal ding in bia khiak u tiah an dihlak in a forh hna. 24 Barnabas cu miṭha a si i thiang thlarau le zumhnak in a khatmi a si. Cucaah Bawipa a zummi cu tampi an i chap. 25 Barnabas cu Saul kha a hmuh hlan lo kawl awkah Tarsas khua ah a kal. 26 A hmuh tikah Antiok khua ah a ratpi. Kumkhat chung cuka Khrihfabu mi hna he an i pum i mi tampi kha an cawnpiak hna. Pathian lamhruainak thawng in zultu hna cu Antiok khua ah Khrihfa tiah auh hmasa bik an rak si.
27 Cu lioah cun profet cheukhat cu Jerusalem khua in Antiok khua ah an rak phan. 28 An lak i pakhat, Agabas timi pa cu a tho i vawleicung pumpi ah a fak ngaimi mangṭam a tlung lai tiah thiang thlarau lamhruainak in a chimchung. Mah mangṭam cu Klaudias chan ah a rak tlung taktak. 29 Cucaah Judea ram i unau pawl sinah an ti khawh tawk in har tongmi bawmhnak kuat awkah zultu hna nih bia an khiah. 30 An biakhiahnak ning in an tuah i Barnabas le Saul sinin upa hna sinah an kuat.