Korin Pakhatnak
9 Miluat ka si lo maw? Lamkaltu ka si lo maw? Kan Bawipa Jesuh a hmumi ka si lo maw? Nannih cu Bawipa rian ka ṭuannak i a theitlai nan si lo maw? 2 Midang caah lamkaltu ka si lo hmanh ah nanmah caah cun ka si hrimhrim ko! Zeicahtiah nannih cu Bawipa lamkaltu ka sinak a langhtertu tehte nan si.
3 Keimah a ka kherhhlaitu hna sin i kaa runvennak bia cu hitin a si: 4 Einak le dinnak nawl kan ngei, a si ko lo maw? 5 Lamkaltu dang le Bawipa naule le Sefas* bantuk in kannih zong zumtu a simi nupi kha i kalpinak nawl kan ngei ve ko lo maw? 6 Asiloah Barnabas le keimah lawng hi maw pawcawmnak caah rian a ṭuan pah dingmi cu kan si? 7 Amah tein a paw aa cawmmi ralkap an um maw? Mitsur dum a tuah i a thei a ei lomi an um maw? Tuukhal a si i tuu hnuk a ding lomi an um maw?
8 Mah cu minung hmuhnak in ka chimmi maw a si? Nawlbia zong nih cutin a chim, a si ko lo maw? 9 Moses Nawlbia ah “Facang a cil liomi cawtum kha a hmur va ṭem hlah” tiah aa ṭial. Pathian nih cutin a chimmi cu cawtum caah maw a si? 10 Asiloah kanmah caah dah a si? A tak ti ahcun kanmah ṭhatnak caah cathiang ah cutin aa ṭialmi a si. Lei a thuangmi nih ka zun lai timi ruahchannak he a thuan awk a si i facang a cilmi zong nih fang ka ei lai timi ruahchannak he a cil awk a si.
11 Nan lakah thlaraulei thil kha kan tuh ahcun nan sinin pumsalei thil kan zunmi cu kan luan tuk maw? 12 Midang hmanh nih nan sinin cutin hmuhnak nawl an ngeih ahcun kannih cu kan ngei chinchin lo maw? Asinain mah kha kan hmang lo. Khrih kong thawngṭha kha lam khatkhat in kan dawnh sual nakhnga lo zeizong vialte kha kan in. 13 A thiangmi rian a ṭuanmi hna nih biakinn in rawl an hmuh i biakṭheng ah rian a ṭuan zungzalmi hna nih biakṭheng i pekchanhmi in covo an hmuh ve ti kha nan hngal lo maw? 14 Cu bantuk in thawngṭha a chimtu hna cu thawngṭha in an paw an i cawm awk a si timi Bawipa nawl peknak a um.
15 Asinain mah timhtuahnak hna kha pakhat hmanh ka hmang lo. A tak ti ahcun cutin tuahpiak ka duh caah ka ṭialmi a si lo. Kaa porhlawtnak a ruang kha pakhatkhat nih lakpiak nakin cun thih hmanh ka caah a ṭha deuh! 16 Thawngṭha ka chim ruang ah i porhlawt awk a ruang zeihmanh ka ngei lo, chim ding in pei rian pek ka si cu. Thawngṭha chim loin ka um ahcun zeitluk in dah ka caah ṭihnung a si hnga! 17 Lungtho tein ka ṭuan ahcun laksawng ka hmuh lai. Asinain ka lung a thawh lo hmanh ah pek ka simi rian cu ka ṭuan a hau ko. 18 Cu a si ah ka laksawng cu zeidah a si? Man loin thawngṭha ka chimmi hi a si. Cuticun thawngṭha chimtu pakhat in ka ngeihmi nawlngeihnak ningcang loin hman kha ka hrial khawh.
19 Kei cu aho sal hmanh ka si lo nain mi tam khawh chung tam ka lak khawh hna nakhnga mikip sal ah kaa ser. 20 Judah mi kha ka lak khawh hna nakhnga Judah mi sinah Judah mi bantuk in ka um. Nawlbia tang ah a ummi kha ka lak khawh hna nakhnga nawlbia tang ah ka um lo nain nawlbia tang ah a ummi sinah nawlbia tang ah a ummi bantuk in ka um. 21 Kei cu Pathian nawlbia a zulmi le Khrih nawlbia tang ah a ummi ka si ko nain nawlbia a zul lomi kha ka lak khawh hna nakhnga nawlbia a zul lomi sinah nawlbia a zul lomi bantuk in ka um. 22 A derthawmmi kha ka lak khawh hna nakhnga a derthawmmi sinah a derthawmmi bantuk in ka um. A si khawh chung in mi cheukhat tal ka khamh khawh hna nakhnga mi a phunphun kha bawmh awkah ka tuah khawhmi zeipaoh ka tuah. 23 Midang sinah thawngṭha ka chim khawh nakhnga thawngṭha caah ka tuah khawhmi zeipaoh ka tuah.
24 Tlikzuamnak ah mi tampi an i zuam nain pakhat lawng nih laksawng a hmuh ti kha nan hngal lo maw? Cucaah laksawng hmu ding tein tli u. 25 Zuamnak ah aa telmi kip nih zei thil paoh ah mahle mah i sumnak an ngeih a hau. Cutin an i summi cu a rawk khomi lukhimh hmuh awkah a si. Kannih tu cu a rawk kho lomi lukhimh hmuh awkah cutin kan i summi a si. 26 Cucaah ka tlik tikah tinhnak ngei loin ka tli lo; ka thongh tikah thli a thongmi bantuk in ka thong lo. 27 Midang sinah phungchim ṭung i keimah theng lam khatkhat in hlawtmi ka si nakhnga lo* ka pum kha ka hrem* i sal bantuk in ka uk.