Marka

12 Cu hnuah Jesuh nih tahchunhnak hna hmang in mi kha a cawnpiak hna: “Mi pakhat nih mitsur dum a ser i hau a kulh. Mitsur nennak caah khor a cawh i parthlam a sak. Cun dum rianṭuantu pawl kha a hlanh hna i ramdang ah khual a tlawng. 2 Thei lawh caan a phanh tikah a hmuh dingmi thei lak awkah a sal pakhat kha dum rianṭuantu hna sinah a thlah. 3 Asinain dum rianṭuantu hna nih an tlaih, an velh i kut ro in an kirter. 4 A dang sal pakhat a thlah ṭhan tikah dum rianṭuantu hna nih a lu ah an tuk i ningzak in an rak tuah. 5 Cun a dang pakhat a thlah ṭhan i an rak thah. Cuticun sal tampi a thlah hna tikah a cheu kha an velh hna i a cheu kha an thah hna. 6 Dum ngeitu nih a dawt tukmi fapa pakhat a ngei. A donghnak ah ‘Ka fapa hi cu an upat ko lai’ tiah a ruah i a fapa kha a thlah. 7 Asinain dum rianṭuantu hna nih ‘Mah pa hi rocotu a si. Ra u, that u sih. Cuticun a ro cu kanmah ta a si lai’ tiah an i ceih. 8 Cucaah an tlaih, an thah i dum leng ah an hlonh. 9 Dum ngeitu nih zeidah a tuah lai? Amah theng mitsur dum ah a ra lai, dum rianṭuantu kha a thah hna lai i dum kha midang a hlanh hna lai. 10 Cathiang ah ‘Innsatu hna nih an hlawtmi lung cu lung santlai bik a kil lung* a hung si. 11 Mah lung cu Jehovah* sinin a rami a si i kan mithmuh ah khuaruahhar ngaingai a si’ tiah a timi kha nan rel bal lo maw?”

12 Phungbia cawnpiaktu le tlangbawi upa hna nih Jesuh chimmi tahchunhnak kha an theih tikah kanmah a kan chim hnawhmi a si ti kha an hngalh caah Jesuh kha tlaih an duh. Asinain mibu kha an ṭih hna caah an kaltak.

13 Cu hnuah Jesuh kha a bia in foih awkah Farasi mi cheukhat le Herod zultu pawl kha Jesuh sinah an thlah hna. 14 A sin an phak tikah “Saya, nang cu miding mi, mi mithmai a zoh lomi, lenglang a zoh lomi, Pathian kong biatak a hmaan ning tein mi a cawnpiaktu na si ti kha kan hngalh. Bia pakhat in hal kan in duh, Sizar* sinah ngunkhuai pek awk a si maw, a si lo? 15 Kannih tah ngunkhuai hi kan pe lai maw, pe lai lo?” tiah an hal. Jesuh nih a ṭhalomi an lungput kha a hngalh caah “Zeicahdah foih nan ka timh? Denarii* piakhat in rak pu u” tiah a ti hna. 16 Denarii piakhat cu an rak put. Jesuh nih “Hika ah aho mui le aho min dah a cuang?” tiah a hal hna tikah “Sizar” tiah an leh. 17 Jesuh nih “Sizar thil cu Sizar kha va pe u, Pathian thil cu Pathian kha va pe u” tiah a ti hna. Mah tikah an khuaruah a har tuk.

18 Thawhṭhannak a um lo tiah a timi Sadusi* mi hna cu Jesuh sinah an ra i, 19 “Saya, Moses nih ‘Mipa pakhat cu fa ngeih loin a thih ahcun a rohtakmi a nupi kha a unau nih a ṭhit lai i mithi pa caah tefa a hrinpiak lai’ tiah a rak ṭial. 20 Kan lakah unau pasarih an um. Upa bik cu nupi a ngei i fa ngeih loin a thi. 21 A pahnihnak nih taantakmi a nupi kha a ṭhit, amah zong fa ngeih loin a thi ve. A pathumnak zong cutin a si ve. 22 An pasarih ning in fa ngeih loin an thi dih. A donghnak ah mah minu zong a thi ve. 23 An unau pasarih ning in an ṭhit caah thawhṭhannak ah aho nupi dah a si lai?” tiah an hal. 24 Jesuh nih “Nan palh tuk cang. Cathiang bia zong, Pathian ṭhawnnak rian a ṭuan ning zong nan rak hngalthiam lo hi ta. 25 Mi cu thihnak in an thawh ṭhan tikah an i ṭhi, an i um ti lai lo. Vancungmi bantuk an si cang lai. 26 A alhmi burbuk kong Moses nih a ṭialmi kha nan rel bal lo maw? Mah ah ‘Kei cu Abraham Pathian, Isak Pathian, Jakob Pathian ka si’ tiah Moses kha Pathian nih a timi cu mithi mi hna an thawh ṭhan lainak kong a si. 27 Pathian cu mithi mi hna Pathian a si lo, a nungmi hna Pathian a si. Nan palh tuk cang” tiah a ti hna.

28 An i ceihmi kong a rak ngaimi phungbia cawnpiaktu pakhat nih hmualngei tein Jesuh nih a lehmi hna kha a theih tikah “Nawlbia lakah hin zeidah a biapi bik?” tiah a hal. 29 Jesuh nih “‘Israel mi hna, ngai tuah u. Jehovah* cu kan Pathian a si i Jehovah* cu pakhat lawng a um. 30 Jehovah* na Pathian cu na lungthin dihlak, na nunnak dihlak, na ruahnak dihlak le na thazaang dihlak in na dawt lai’ timi nawlbia cu a biapi bikmi a si. 31 A pahnihnak cu ‘Na minunghawi kha nangmah naa dawt bantuk in na dawt lai’ timi nawlbia kha a si. Mah nakin a biapi deuhmi nawlbia a um ti lo” tiah a leh. 32 Phungbia cawnpiaktu nih “Saya, na chimmi cu a hmaan tuk. ‘Pathian cu pakhat lawng a si. Amah bantuk Pathian dang an um lo.’ 33 Pathian kha kan lungthin dihlak, kan ruahnak dihlak, kan thazaang dihlak in dawt le kan minunghawi kha kanmah kan i dawt bantuk in dawt cu khangh thawinak le raithawinak vialte nakin a biapi deuh” tiah a ti. 34 Jesuh nih a bialehnak cu a ṭha ngai ti kha a hngalh caah “Nang cu Pathian Pennak he naa hlat lo” tiah a ti. Jesuh kha ahohmanh nih bia an hal ngam ti lo.

35 Biakinn ah a cawnpiak hna lioah Jesuh nih “Phungbia cawnpiaktu hna nih Khrih kha zeicah David fapa tiah an auh? 36 ‘Jehovah* nih “Na ral pawl kha na ke tang ah ka chiah dih hna hlan tiang ka orhlei kam ah hin ṭhu” tiah ka Bawipa kha a ti’ tiin thiang thlarau forhfialnak in David thengte nih a rak chim. 37 David thengte nih Bawipa tiah a auh ahcun Khrih cu zeitindah David fapa cu a si khawh lai?” tiah a ti.

Mibu nih Jesuh chimmi kha lunghmui ngai in an ngaih. 38 Jesuh nih “Phungbia cawnpiaktu kha i ralring hna u. Annih cu angki fualpi i hruk in i chawh kha an duh. Chawdawrnak hmun ah upatnak he chawnhbiak kha an duh. 39 Pumhnak inn i a hmai bik ah le rawl danghnak puai i a langhnak bik hmun ah ṭhut kha an duh. 40 Nuhmei inn kha an ei, an hmuar hna i an chuh tawn hna. Mi hmuhnak ah thla saupi in an cam tawn. Cucaah a fak deuhmi dantatnak an ing te lai” tiah a cawnpiak hna.

41 Jesuh cu thawhlawm kuang hna a langhnak hmun ah a ṭhu i mi nih thawhlawm an sanhmi kha a zoh hna. Mirum tampi nih tangka tampipi in an sanh. 42 Mah lioah a si a fakmi nuhmei nu pakhat a ra i a man a tlawmmi phaisa sen pahnih* kha a sanh. 43 Jesuh nih a zultu pawl kha a auh hna i “Biatak kaan chimh hna lai, a si a fakmi mah nuhmei nu nih a sanhmi hi midang vialte nih an sanhmi nakin a tam deuh. 44 Zeicahtiah midang nih cun an ngeihmi a hleivuang kha an sanh. Hi nuhmei nu tu cu a si a fak ko nain a nunnak ca i a ngeihchunte kha a dihlak in a sanh” tiah a ti.