Luka

16 Mah hnuah Jesuh nih a zultu pawl kha hitin a ti hna: “Mirum pakhat nih thilri zohkhenhtu a ngei. Mah thilri zohkhenhtu nih a bawipa thilri kha a vaivuanh tiah sual an puh. 2 Cucaah a bawipa nih a auh i, ‘Na kong ka theihmi hi zeidah a si? Na tuahmi cazin pawl kha rak ka pe. Atu thawk in thilri zohkhenhtu na si ti lai lo’ tiah a ti. 3 Mah tikah thilri zohkhenhtu nih ‘Zeitindah ka tuah lai? Ka bawipa nih thilri zohkhenhnak rian in a ka phuah cang lai. Lo rian ṭuan awkah le thazaang ka ngei lo. Mi thil hal awkah le ka ning a zak fawn. 4 Thilri zohkhenhnak rian in phuah ka si tikah mi nih an inn ah an ka cohlan nakhnga zeidah ka tuah lai ti kha ka hngalh cang’ tiah a ti. 5 Cucaah a bawipa sinah lei a bami hna kha pakhat hnu pakhat in a auh hna. A hmasa bik pa kha ‘Ka bawipa sinah zeizat dah na bat?’ tiah a hal. 6 Anih nih ‘Oliv chiti pung 100’* tiah a ti. Thilri zohkhenhtu nih ‘Na cahren kha i lak law ṭhu, cun pung 50 tiah ṭial zokzok’ tiin a ti. 7 A dang pakhat kha ‘Nang tah zeizat dah na bat?’ tiah a hal. Anih nih ‘Changvut rel 100’* tiah a ti. Thilri zohkhenhtu nih ‘Na cahren kha i lak law 80 tiah ṭial’ tiin a ti. 8 Thilri zohkhenhtu cu a dingfel lo nain fimkhur tein thil a tuah caah a bawipa nih a thangṭhat. Cucaah ka chim duhmi cu atu chan mi* hna i an thil ti ning cu ceunak mi hna nakin an fim deuh.

9 “Kaan chimh hna lai: Nannih zong a ding lomi chawva kha hmang in hawikom i ser u. Chawva a dih tikah annih nih zungzal a hmunmi inn ah an in cohlan hna lai. 10 Thil hmete ah zumhawktlak a simi cu thil ngan zong ah zumhawktlak an si lai. Thil hmete ah a dingfel lomi cu thil ngan zong ah an dingfel lai lo. 11 Cucaah a ding lomi chawva hmanh ah zumhawktlak nan si lo ahcun chawva taktak cu aho nih dah aan kenter hna lai? 12 Midang thil cung ah zumhawktlak in nan um lo ahcun nanmah caah timhpiakmi laksawng cu aho nih dah aan pek hna lai? 13 Ahohmanh bawi pahnih sal an si kho lo. Pakhat kha a dawt deuh lai i pakhat kha a huat deuh ko lai. Pakhat cung ah zumhawktlak in a um lai i pakhat kha cu zei ah a rel lai lo. Nannih zong voikhat te ah Pathian le Chawva sal nan si kho lai lo.”

14 Tangka a duhmi Farasi mi hna nih Jesuh bia kha an theih tikah an nihsawh. 15 Cucaah Jesuh nih hitin a ti hna: “Nannih cu mi hmaiah miding bantuk in nan i umter nain Pathian nih nan lungthin kha a hngalh. Minung mithmuh ah thangṭhat awk tlak a simi cu Pathian mithmuh ah fihnung a si.

16 “Nawlbia le Profet bia* hna cu Johan chan tiang chim a rak si. Asinain atu thawk in cun Pathian Pennak kong thawngṭha kha chim a si cang. Mikip nih Pennak chung an luh khawh nakhnga fakpi in an i zuam. 17 Nawlbia chung i cafang pakhat, a deh te pakhat hmanh tlin loin um nakin cun van le vawlei tlau hmanh hi a fawi deuh lai.

18 “A nupi kha a ma i nu dang a ṭhitu cu a zuangzammi a si, a va nih a makmi nu a ṭhitu zong a zuangzammi a si.

19 “Mirum pakhat cu maimaw rong puan ṭhaṭha kha aa thuam i nifatin nun nuam tein khua a sa. 20 A pumpaluk hma in a khat i mi thil a halmi Lazaruh kha a innka hram ah mi nih an rak chiah tawn. 21 Lazaruh nih mirum pa cabuai in a tlami rawl ṭilṭawt kha ei a duh ngaingai. Cun uico kha an ra i a hma kha an liahpiak tawn. 22 Nikhat cu Lazaruh cu a thi i vancungmi nih Abraham pawng ah* an kalpi.

“Mirum pa zong a thi ve i an vui. 23 Anih cu Thlan* ah temtuar ngai in a um lioah cunglei kha a zoh i lam hlapi ah Abraham le a pawng ah a ummi Lazaruh kha a hmuh hna. 24 Mah tikah ‘Ka pa Abraham, ka zaangfah ko. Lazaruh kha ka sinah rak thlah, a kutdong par te kha ti ah hnimter law ka lei a daih nakhnga dorkhat tein rak ka thla seh. Hi meizik chung ah ka tem tuk hringhran’ tiah a nawl. 25 Abraham nih ‘Ka fapa, na nun chung ah thilṭha phun kip na co nain Lazaruh tu cu sifak ngai in a rak um ti kha philh hlah. Atu anih cu hika ah hnangam tein a um cang. Nang tu cu temtuar ngai in na um. 26 Mah leng ah nangmah le kanmah karah horkuang nganpi a um. Hika in nangmah sinah duh paoh in kal khawh a si lo. Nangmah sin zong in hikalei ah duh paoh in rat khawh a si lo’ tiah a ti. 27 Mah tikah mirum pa nih ‘A si ahcun ka pa, Lazaruh kha ka pa inn ah thlahpiak ding in kaan nawl. 28 Unau panga ka ngei i temhnak ka innak hika hmun ah an rat ve nakhnga lo Lazaruh nih ralrin va pe hna seh’ tiah a ti. 29 Abraham nih ‘Moses le Profet hna ṭialmi cathiang an ngei ko cu ta. Mah cathiang bia hna kha va ngai ko hna seh’ tiah a ti. 30 Mirum pa nih ‘A si lo, ka pa Abraham, thihnak in a tho ṭhanmi pakhatkhat an sin i a kal lawng ah an i ngaichih lai’ tiah a ti. 31 Abraham nih ‘Moses le Profet hna ṭialmi cathiang bia hmanh an ngaih lo ahcun thihnak in a tho ṭhanmi nih a chimh hna zong ah an ngai hlei lai lo’ tiah a ti.”