Judas

1 Jesuh Khrih sal le Jeim nau a simi Judas nih Pa Pathian dawtmi hna le Jesuh Khrih caah kilvenmi, thimmi hna nan sinah cakuat ka rak ṭial:

2 Zaangfahnak, daihnak le dawtnak cu nan cung ah karh chin ko seh.

3 Ka dawtle hna, Pathian nih kan dihlak in zeitindah a kan khamh lai timi kong ṭial kha ka duh tuk. Asinain mithiang mi hna sinah voikhat ah zungzal ca in pekmi zumhnak kha runven awkah fakpi in i zuam ding in forhfialnak ca kha ṭial hmasa a herh tiah ka ruah. 4 A ruang cu Cathiang nih hlanliopi in a chimchungmi, biaceih a si hnga dingmi mi cheukhat cu nan lakah a thli tein an lut cang. Annih cu Pathian a ṭih lomi, Pathian velngeihnak kha caanṭha i lak in zah hngal loin thil a tuahmi,* a kan tlanhtu le pakhat lawng a simi Bawipa Jesuh Khrih cung ah zumhawk a tlak lomi an si.

5 Hi kong hi ṭha tein nan hngalh cangmi a si ko nain hngalhter ṭhan kaan duh hna. Jehovah* nih a miphun cu Izipt ram in a chuahpi hna hnuah zumhnak a ngei lomi kha a rak hrawh ṭhan hna. 6 Cun an dirhmun le an umhmun a kaltakmi vancungmi hna kha a liannganmi biaceihnak ni caah a muihnak hmun ah zungzal in a hren hna. 7 Cu bantuk in Sodom le Gomorrah le a pawngkam khua hna cu fih a nung tukmi nupa sualnak* kha an tuah i phung ning a si lomi pumsa duhnak hnu kha an zulh; annih cu zungzal mei in dantat an si. Mah cu kan caah ralrin peknak a si.

8 Asinain annih cu a ṭhalomi thil kha an ruat peng, pum kha an thurter, nawlngeihnak kha zei ah an rel lo i upat awk a simi kha an serhsat hna. 9 Vancungmi bawi bik Mikhael tu cu Moses ruak kong ah Satan he bia an i al tikah serhsatnak bia in bia a ceih ngam lo. “Jehovah* nih bia in ceih ko seh” ti tu in a ti. 10 Asinain annih nih a konglam dihlak kha ṭha tein hngal loin serhsatnak bia an chim. Annih cu tuaktan khawhnak a ngei lomi saram bantuk an si, an i chuahpimi hngalhnak lawng in thil an tuah i anmahle anmah kha an i hrawk.

11 An caah ṭihnung a va si dah! Zeicahtiah Kain nih a zulhmi lam kha an zulh i a miak hmuh duh ah Balaam zulhmi a ṭhalomi lam kha khulrang in an zulh, Korah bantuk in ralchanhnak bia an chim caah hrawh an si. 12 Annih cu hawikomhnak rawl dumṭi tikah rili ti tang ah a ummi, ṭih a nungmi lungtum bantuk an si. Ningzah hngal loin mah pawkhimnak lawng a ruatmi tuukhal bantuk; thli nih khatlei khatlei ah a choihmi, a chung ah ruahti a um lomi minmei bantuk; amahle a caan te ah thei tlai loin a car i* a hram in phoimi thingkung bantuk an si. 13 Ṭih a nungmi rili tilet nih buanbara a chuahter bantuk in an tuahsernak nih an ning a zahter hna lai. Annih cu kalnak lam a ngei lomi arfi bantuk an si. A muih biknak hmun ah zungzal in an um lai.

14 Adam chan in chan sarihnak a simi Enok zong nih an kong he aa tlaiin hitin a chimchung: “Zohhmanh u! Jehovah* cu a thiangmi vancungmi tampi he a ra lio i, 15 mi vialte kha bia a ceih hna lai. Pathian zei rel loin an tuahmi ṭhatlonak vialte le Pathian ralchanh in an chimmi ṭihnungmi bia vialte ruang ah misual hna cu sualphawt an si lai.”

16 Annih cu an nunnak he aa tlaiin an phun, an zai i anmah duhnak lawng kha an zulh. Uangthlar ngai in an i thangṭhat i anmah ṭhatnak caah midang kha an faak hna.

17 Ka dawtle hna, nannih tu cu kan Bawipa Jesuh Khrih i a lamkaltu hna nih an rak chimmi bia kha i cinken u. 18 An chim tawnmi cu, “Ni hmanung bik caan ah thilṭha a nihsawhtu an chuak lai i a ṭhalomi anmah duhnak lawng kha an zulh lai” ti a si. 19 Cu hna cu ṭhencheunak a chuahtertu, saram lungput a ngeimi, Pathian thlarau a ngei lomi an si. 20 Asinain ka dawtle hna, nannih tu cu a thiang bikmi nan zumhnak kha fehter chin u law thiang thlarau lamhruainak in thlacam u. 21 Cuticun zungzal nunnak hmuh ding in kan Bawipa Jesuh Khrih zaangfahnak nan hngah lioah Pathian dawtnak aan hmuhter khomi hna thil kha nan tuah khawh peng lai. 22 Lunghrinnak a ngeimi mi cheukhat cung zong ah zaangfahnak langhter peng u. 23 Annih kha mei chung in chuah hna u law khamh hna u. Mi cung ah zaangfahnak langhter peng u. Asinain ṭihnak ngei u. Zaangfahnak nan langhter tikah an pumsa duhnak ruang ah a thurhnawmmi an hnipuan kha cu hlatpi in hrial u.

24 Nan tluk nakhnga lo aan veng khotu hna, sunparnak in a khatmi Pathian hmaiah soi awk um loin lunglawmhnak he aan dirter khotu hna, 25 Bawipa Jesuh thawng in a kan Khamhtu, pakhat lawng a simi Pathian i a sunparnak, a lianhngannak, a ṭhawnnak le a nawlngeihnak cu a liamcia caan vialte in, atu in zungzal tiang hmun ko seh. Amen.