Johan Pakhatnak

3 Pathian nih zeitluk in dah a kan dawt ti kha ruat hmanh u. Pathian fale tiah auh kan si i a si zong kan si taktak. Cucaah hi vawlei nih a kan hngalh lonak cu Pathian kha a hngalh lo caah a si. 2 Ka dawtle hna, atu cu Pathian fale kan si cang nain hmailei ah zeidah kan lawh lai ti cu langhter a si rih lo. A hung langh tikah amah bantuk kan si lai ti kha kan hngalh. Zeicahtiah a sining taktak tein kan hmuh lai. 3 Hi ruahchannak a ngeimi paoh cu amah a thian bantuk in anmahle anmah an i thianter ve.

4 Sualnak a tuah pengmi cu nawlbia a buarmi a si, sualnak timi cu nawlbia buar kha a si. 5 Kan sualnak lakpiak awkah Jesuh cu a ra i sualnak a tuah bal lo ti kha nan hngalh. 6 Amah he lungthin khat tein a ummi cu sualnak a tuah peng lo; sualnak a tuah pengmi nih cun amah cu a hngalh zong a hngal lo i a zumh zong a zum lo. 7 Ka fale hna, ahohmanh i hlenter hna hlah u. Jesuh cu a dingmi a si bantuk in a dingmi thil a tuahmi cu miding a si. 8 Sualnak a tuahmi cu Satan lei ah a ṭangmi a si. Zeicahtiah Satan cu a hramthawk tein sualnak a tuahmi a si. Pathian Fapa a ratnak cu Satan rianṭuannak vialte hrawh awkah a si.

9 Pathian fa a simi nih cun sualnak kha a tuah peng lo. Zeicahtiah Pathian thiang thlarau* cu a sinah a um. Anih cu Pathian fa a si caah sualnak a tuah peng lo. 10 Pathian fa le Satan fa cu hitihin thleidan khawh an si: Dinnak a tuah peng lomi cu Pathian lei ah a ṭangmi a si lo, a unau a daw lomi zong cu bantuk ṭhiamṭhiam cu a si. 11 Pakhat le pakhat kan i dawt awk a si timi bia hi a hramthawk tein nan rak theih cang. 12 Miṭhalo pa lei ah a ṭang i a nau a thatmi Kain bantuk kan si awk a si lo. Zei ruang ah dah a nau cu a thah? A tuahsernak cu a ṭhalo, asinain a nau tuahsernak tu cu a din caah a si.

13 Unau hna, vawlei nih aan huat hna ahcun nan khuaruahhar hlah u. 14 A thimi bantuk kan rak si nain kan unau kan dawt hna caah atu cu a nungmi kan si cang ti kha nan hngalh. A unau a daw lomi cu a thimi a si rih ko. 15 A unau a huami cu lai a nawngmi a si. Lai a nawngmi cu zungzal nunnak an hmu lai lo ti kha nan hngalh. 16 Jesuh Khrih nih kan caah a nunnak a peknak thawng in dawtnak kong kha kan hun hngalh. Kannih zong kan unau hna caah kan nunnak pek ding in rian kan ngei ve. 17 Hi vawlei thilri chawva a ngei i a unau herhbaunak a hmu nain zaangfahnak a langhter lomi nih cun Pathian ka dawt tiah zeitindah a ti khawh lai? 18 Ka fale hna, hmur le kaa lawng si loin tuahsernak le biatak tu in kan i dawt awk a si.

19 Cuticun biatak lei ah a ṭangmi kan si ti kha kan hngalh lai i Pathian nih a kan dawt ti kha kan zumh lai. 20 Kan lungthin nih sual a kan phawt hmanh ah Pathian cu kan lungthin nakin a ngan deuh* i zeizong vialte a hngalh dih ti kha kan hngalh. 21 Ka dawtle hna, kan lungthin nih sual a kan phawt lo ahcun Pathian sinah zalong tein biachimnak nawl* kan ngei lai. 22 A nawlbia cu kan zulh i a duhmi thil kan tuah caah a sinah kan halmi paoh kan hmuh lai. 23 A nawlbia cu a Fapa Jesuh Khrih min zumh le nawl a kan pek ning in pakhat le pakhat i dawt hi a si. 24 Mah leng ah a nawlbia a zulmi cu Pathian he lungthin khat tein a ummi a si i Pathian zong amah he lungthin khat tein a um ve. A kan pekmi thiang thlarau thawng in Pathian cu kanmah he lungthin khat tein a um ti kha kan hngalh.