Johan

16 “Nan tlukrilh sual nakhnga lo mah kong hna hi kaan chimh hna. 2 Mi nih pumhnak inn in an in ṭhawl hna lai. Cun nanmah thah hi Pathian rian ṭuan a si tiah an ruah caan a phan lai. 3 Annih nih cutin an tuahmi cu ka Pa zong, keimah zong an kan hngalh lo caah a si. 4 Mah thil pawl a tlin caan a phanh tikah nan i cinken ṭhan nakhnga mah kong hi kaan chimhmi hna a si.

“A hramthawk tein kaan chimh lomi hna cu nan sinah ka um rih caah a si. 5 Atu cu a ka thlahtu sinah ka kal cang lai, asinain ‘Khoika ah dah na kal lai?’ tiah ahohmanh nih nan ka hal lo. 6 Mah kong hi kaan chimh hna caah nan ngaih a chia. 7 Asinain biatak kaan chimh hna lai, ka kalmi cu nanmah ṭhatnak caah a si. Ka kal lo ahcun bawmtu* cu nan sinah a ra lai lo, ka kal lawng ah amah cu nan sinah ka rak thlah khawh lai. 8 Amah a rat tikah sualnak kong, dinnak kong le biaceihnak kong kha hi vawlei ah fiang tein a langhter lai. 9 A hmasa bik ah sualnak kong kha a langhter lai, zeicahtiah annih nih keimah an ka zumh lo caah a si. 10 Cun dinnak kong kha a langhter lai, zeicahtiah ka Pa sinah ka kal lai i nan ka hmuh ti lai lo caah a si. 11 Mah hnuah biaceihnak kong kha a langhter lai, zeicahtiah hi vawlei uktu cu biaceih a si cang.

12 “Nan sinah chim ding tampi ka ngei rih, asinain atu ah cun nan hngalthiam kho cawk lai lo. 13 Bawmtu a simi, biatak a langhtermi thiang thlarau a rat tikah lam aan hruai hna lai, biatak kha tling tein nan hngalhthiam nakhnga aan bawmh hna lai. Amah nawl in a chim lai lo, Pathian sinin a theihmi kong hna kha a chim lai. A cang dingmi kong kha nan sinah a langhter lai. 14 Mah bawmtu nih ka sinin a theihmi vialte kha nan sinah a langhter lai, cuticun sunparnak a ka hmuhter lai. 15 Ka Pa nih a ngeihmi vialte cu keimah ta an si dih. Cucaah bawmtu nih ka sinin a theihmi vialte kha nan sinah a langhter lai tiah ka tinak a si. 16 Atu hnu tlawmpal ah nan ka hmu ti lai lo, asinain a rauhhlan ah nan ka hmuh ṭhan lai.”

17 Mah tikah a zultu cheukhat nih “‘Atu hnu tlawmpal ah nan ka hmu ti lai lo, asinain a rauhhlan ah nan ka hmuh ṭhan lai,’ cun ‘ka Pa sinah ka kal lai’ a timi hi zei sullam dah a si hnga?” tiah pakhat le pakhat an i ceih. 18 “‘A rauhhlan ah’ tiah a timi hi zei sullam dah a si hnga? Zei kong dah a chim ti kan hngalh ṭung lo” tiah an ti. 19 Jesuh nih bia hal an ka duh ti kha a hngalh tikah a zultu kha hitin a ti hna: “‘Atu hnu tlawmpal ah nan ka hmu ti lai lo, asinain a rauhhlan ah nan ka hmuh ṭhan lai’ tiah ka timi kong maw pakhat le pakhat nan i ceih? 20 Biatak kaan chimh hna lai, a hmaan tein kaan chimh hna lai, nannih cu nan ṭap nan ai lai, asinain hi vawlei cu aa lawm lai. Ngaihchia in nan um lai, asinain nan ngaihchiatnak cu lunglawmhnak ah aa thleng lai. 21 Nu pakhat nih fa a hrin lai caan a phanh tikah nganfahnak a tuar, fa a hrin hnuah cun hi vawlei ah ngakchia pakhat a hun chuah caah aa lawm tuk i a nganfahnak kha a philh dih. 22 Cu bantuk in nannih zong atu ah cun nan ngaih a chia lai nain kan i ton ṭhan lai caah nan lung aa lawm lai. Nan i lawmhnak cu nan sinin ahohmanh nih an in lakpiak kho hna lai lo. 23 Cu ni ah cun zeihmanh nan ka hal ti lai lo. Biatak kaan chimh hna lai, a hmaan tein kaan chimh hna lai, ka min in ka Pa kha zeipaoh nan hal ahcun aan pek ko hna lai. 24 Atu tiang ka min in zeihmanh nan hal rih lo. Nan i lawmhnak a tlin khawh nakhnga hal u law nan hmuh lai.

25 “Mah kong hna hi tahchunhnak hmang in kaan chimh hna. Asinain tahchunhnak hmang loin ka Pa kong kha hlangfang tein ka chim caan a phan te lai. 26 Mah caan a phanh tikah ka min in ka Pa kha nan hal te lai, asinain keimah nih kaan halpiak hna lai ka ti duhnak cu a si lo. 27 Nannih nih nan ka dawt i Pathian aiawhtu in a rami ka si ti kha nan zumh, cucaah ka Pa zong nih aan dawt hna. 28 Kei cu ka Pa aiawhtu in hi vawlei ah ka ra. Atu cu hi vawlei hi ka kaltak lai i ka Pa sinah ka kal cang lai.”

29 Mah tikah a zultu hna nih “Atu ah tahchunhnak hmang loin hlangfang tein pei na chim ko hi. 30 Zeizong vialte kha na hngalh dih, mi pakhat nih bia aan hal hlan in hal aan duhmi kha na hngalh. Cucaah nang cu Pathian sinin a rami na si ti kha kan zumh” tiah an ti. 31 Jesuh nih “Atu nan zum taktak cang maw? 32 Asinain keimah lawng nan ka kaltak lai i nan umnak cio ah nan i ṭhek dih lai caan cu a ra lio. A tak ti ahcun mah caan cu a phanh hmanh a phan cang. Asinain keimah lawng ka si lo, zeicahtiah ka Pa nih a ka umpi ko. 33 Keimah thawng in daihnak nan hmuh nakhnga mah kong hi kaan chimhmi hna a si. Hi vawlei ah sifah harnak nan tong lai, asinain nan ralṭha ko u! Hi vawlei cu ka tei cang” tiah a ti.