Jeim

5 Mirum mi hna, ka bia hi ngai tuah u. Nan cung ah a tlung dingmi sifah harnak ruang ah ṭap u law aihram ko u. 2 Nan chawva cu an thu dih cang i nan thilpuan cu rungrul nih a ei dih cang. 3 Nan sui le nan ngun cu cirik nih a ei dih cang. Nan taksa a ei dingmi mah cirik nih nan palhnak kha a langhter lai. Nan khonmi chawva hna cu ni hmanung bik ni ah mei bantuk an si lai. 4 Nan lo i rian a ṭuanmi hna cu an nihlawh nan pek hna lo caah an ṭap lengmang. Rianṭuantu hna nih bawmh hal in an au thawng kha ralkapbu Bawipa Jehovah* nih a theih cang. 5 Hi vawleicung ah nunnuam ngai in le duhtling ngai in nan nung. Thah an si lai ni tiang cenhmi saram bantuk in nan i cenh. 6 Miding mi kha sual nan phawt i nan thah. Cucaah amah nih aan ralchanh hna, a si ko lo maw?

7 Cucaah unau hna, Bawipa a rat tiang lungsau tein um ko u. Lothlopa nih a lo in a vuimi theitlai sunglawi kha hmuh awkah ruah hmasa le ruah hmanung a sur tiang lungsau tein a hngah tawn. 8 Nannih zong lungsau tein um u. Lung ṭhawng in um u. Zeicahtiah Bawipa ratnak cu a nai cang.

9 Unau hna, biaceih nan si nakhnga lo pakhat le pakhat i mawhchiat hlah u. Biaceihtu cu innka hram ah a dir cang. 10 Unau hna, Jehovah* min in bia a chimmi profet hna i an temhinnak le an lungsaunak kha i zohchunh hna u. 11 Inkhawhnak a ngeimi cu mi lunglawm* ah kan ruah hna. Job inkhawhnak kong kha nan theih i Jehovah* nih thluachuah a peknak kong zong nan theih. Jehovah* cu zawnruahnak* le zaangfahnak in a khatmi a si.

12 Unau hna, chiatserh hmang ti hlah u. Van chalh in siseh, vawlei chalh in siseh, a dang thil pakhatkhat chalh in siseh chiatser hlah u. Biaceih nan si nakhnga lo a simi kha “A si,” a si lomi kha “A si lo” ti lawng chim ko u.

13 Nan lakah harnak a tongmi nan um maw? Nan um ahcun thlacam peng ko hna seh. A lung aa lawmmi nan um maw? Nan um ahcun salm hla kha sa ko hna seh. 14 Nan lakah a zawmi* nan um maw? Nan um ahcun Khrihfa upa kha au hna seh law thla campiak hna seh. Cun Jehovah* min in chiti thuh hna seh. 15 Zumhnak he thlacamnak nih a zawmi* kha a damter lai i Jehovah* nih a thawhter lai. Sualnak a tuah ahcun Pathian nih a ngaihthiam lai.

16 Cucaah nan sualnak kha pakhat le pakhat i phuang u, pakhat le pakhat thla i campiak u. Cuticun damnak nan hmuh ṭhan lai. Miding mi hna lungtak tein thlacamnak cu a ṭhawng i hmual a ngei. 17 Elijah cu kanmah bantuk in intuarnak a ngeimi mi sawhsawh a si ve ko. Asinain ruah sur lo ding in lungtak tein thla a cam tikah kumthum le a cheu chung ruah a sur lo. 18 Cun thla a cam ṭhan tikah van in ruah a sur i vawlei in theitlai a chuak.

19 Unau hna, nan lak i pakhatkhat cu biatak in a pial i a dang pakhat nih a kirter ṭhan ahcun, 20 misual mi kha a pialnak lam in a kirter ṭhantu nih cu pa cu thihnak in a khamhmi a si. Cun cu pa i a sualnak tampi kha Pathian nih a ngaihthiam lai ti kha hngal u.