Johan Pathumnak

1 Kum upa* a simi keimah nih ka dawt taktakmi Gaius, na sinah cakuat ka rak ṭial.

2 Ka dawt, atu bantuk in zeizong kip ah na tlam a tlin nakhnga le na ngan a dam nakhnga thla kaan campiak. 3 Biatak chung ah na um zungzal bantuk in atu zong ah biatak naa tlaihnak kong kha unau pawl nih an ka chimh caah kaa lawm tuk hringhran. 4 Ka fale biatak chung ah an um ti thawng theihnak nakin a ka lawmhter deuhmi zeihmanh a um lo.

5 Ka dawt, na caah mising a simi unau pawl bawmh awkah na tuahmi in zumhawktlak na sinak kha na langhter. 6 Annih nih na dawtnak kong kha Khrihfabu sinah an chim. An khuallam an peh ṭhan tikah Pathian duhnak ning in rak bawm ko hna. 7 Zeicahtiah annih cu miphun dang hna sinin bawmhnak zeihmanh la loin Pathian min kong chim awkah khual a tlawngmi an si. 8 Cu bantuk mi hna cung ah khual dawtnak langhter ding in rian kan ngei. Cuticun biatak caah rianṭuanṭi hawi kan si kho lai.

9 Khrihfabu sinah cakuat ka rak ṭial. Asinain Khrihfabu ah a biapi bik si a duhmi Diotrefes nih kan chimmi zei bia hmanh kha upatnak in a cohlang duh lo. 10 Cucaah ka rat tikah kan kong he aa tlaiin bia ṭhalo a chimmi vialte kha ka phuan dih te lai. Cutin a chimmi kha i lungsi rih loin unau pawl kha upatnak he a cohlang duh hna lo. Cohlan a duhmi zong kha a thlauh hna i Khrihfabu in chuah a timh hna.

11 Ka dawt, thil ṭhalo kha i cawn hlah, thilṭha kha i cawn. Thilṭha a tuahmi cu Pathian lei ah a ṭangmi a si. Thil ṭhalo a tuahmi cu Pathian a hngal lomi a si. 12 Demetrias cu unau vialte hmaiah minṭha a ngeimi a si i a nunning cu biatak he aa tlak. Kanmah zong nih kan thangṭhat vemi a si i kan thangṭhatmi cu a hmaan ti kha nan hngalh ko.

13 Na sinah caṭial ding tampi ka ngei ko nain cafung le cahang in cun ṭial ka duh lo. 14 A rauhhlan ah kan i tong lai tiah kaa ruahchan, kan i ton tikah hmaitonh tein bia kan i ruah te lai.

Na cung ah daihnak um ko seh.

Hika i a ummi kan hawile nih na kut an in tlaih. Khika i a ummi kan hawile pakhat cio zong kha an kut ka tlaihpiak hna.