Johan

17 Mah kong kha Jesuh nih a chim dih hnuah van a zoh i hitin thla a cam: “Ka Pa, a caan a phan cang. Na Fapa nih sunparnak kaan pek nakhnga na Fapa cu sunparnak ka pe ko. 2 Na ka pekmi vialte hna kha zungzal nunnak ka pek khawh hna nakhnga mi vialte cung ah nawlngeihnak na ka pek cang. 3 Zungzal nunnak timi cu pakhat lawng a simi, a hmaanmi Pathian nangmah hngalh le nangmah nih na thlahmi Jesuh Khrih hngalh kha a si.* 4 Vawleicung ah na sunparnak cu ka langhter cang, na ka pekmi rian cu ka liim cang. 5 Ka Pa, vawlei ser hlan i na pawng ah ka rak hmuhmi sunparnak phun kha atu ah ka pe ṭhan ko.

6 “Hi vawlei chung in na thim i na ka pekmi hna sinah na min cu ka langhter cang. Annih cu nangmah ta an si i keimah na ka pekmi an si. Cun annih nih na bia kha an ngaih. 7 Na ka pekmi thil vialte cu nangmah sinin a rami a si ti kha atu an hngalh cang. 8 Zeicahtiah na ka chimhmi vialte kha ka chimh hna caah a si. Mah bia kha an cohlan i nangmah aiawh in a rami ka si ti kha an hngalh. Cun nangmah thlahmi ka si zong kha an zumh. 9 An caah thla ka campiak hna. Hi vawlei caah si loin na ka pekmi hna caah ka cammi a si. Zeicahtiah annih cu nangmah ta an si. 10 Ka ngeihmi vialte cu nangmah ta an si i na ngeihmi vialte zong keimah ta an si. Anmah thawng in sunparnak ka hmu.

11 “Kei cu na sinah ka rat cang lai caah vawlei ah ka um ti lai lo. Asinain annih cu an um rih lai. A Thiangmi ka Pa, i laknak nawl ka hmuhmi na min thawng in annih cu zohkhenh ko hna. Cuticun nangmah le keimah cu lungthin khat tein kan um bantuk in annih zong lungthin khat tein an um kho ve lai.* 12 I laknak nawl ka hmuhmi na min thawng in an sin ka um lioah ka zohkhenh hna i ka huhphenh hna. Rawhralnak fapa dah ti lo cu a tlaumi pakhat hmanh an um lo. Mah cu cathiang bia a tlin nakhnga caah a si. 13 Asinain atu cu na sinah ka ra cang lai. Ka ngeihmi lunglawmhnak kha tling tein an ngeih khawh ve nakhnga hi vawleicung ka um lioah mah bia hi ka chimmi a si. 14 Na bia cu an sinah ka chim cang. Kei cu vawlei ta ka si lo bantuk in annih zong vawlei ta an si lo caah vawlei nih a huat hna.

15 “Hi vawlei hin la hna tiah kaan nawlmi a si lo, miṭhalo pa sin khan huppheng ko hna tiah kaan nawlmi a si. 16 Kei cu vawlei ta ka si lo bantuk in annih zong vawlei ta an si lo. 17 Biatak thawng in thianter ko hna,* na bia cu biatak a si. 18 Vawlei ah na ka thlah bantuk in kei zong nih vawlei ah ka thlah ve hna. 19 An caah keimahle keimah kaa thianter. Mah lawng ah annih zong biatak thawng in an thiang ve lai.

20 “Anmah ca lawng ah thla ka cammi a si lo, an chimmi bia thawng in a ka zum dingmi hna ca zong ah ka cam. 21 An dihlak in lungthin khat tein an um khawh nakhnga caah a si. Ka Pa, keimah he lungthin khat tein na um i kei zong nangmah he lungthin khat tein ka um bantuk in a si. Mah lawng ah annih zong kanmah he lungthin khat tein an um kho ve lai i vawlei zong nih nangmah thlahmi ka si kha a hun zumh lai. 22 Nangmah le keimah lungthin khat tein kan um bantuk in annih zong an um khawh ve nakhnga na ka pekmi sunparnak kha ka pek hna. 23 Anmah he lungthin khat tein ka um i nang zong keimah he lungthin khat tein na um caah annih zong lungthin khat tein an um kho taktak lai. Mah tikah nangmah thlahmi ka si ti le na ka dawt bantuk in anmah zong na dawt hna ti kha vawlei nih a hngalh lai. 24 Ka Pa, na ka pekmi hna hi ka umnak hmun ah umter ka duh hna. Mah lawng ah vawlei hramthawk* hlan in na ka dawt caah na ka pekmi sunparnak kha an hmuh khawh lai. 25 A Dingmi ka Pa, hi vawlei nih cun aan hngal lo nain kei nih cun kaan hngalh. Cun na ka pekmi hi mi hna nih nangmah thlahmi ka si kha an hngalh. 26 Na min cu annih kha ka hngalhter cang hna i ka hngalhter lengmang rih hna lai. Mah lawng ah ka cung ah dawtnak na langhter bantuk in midang cung ah dawtnak an langhter khawh ve lai i anmah he lungthin khat tein ka um kho lai.”