Luka

15 Ngunkhuai kholtu le misual mi vialte cu a bia ngaih awkah Jesuh sinah an rak i pum. 2 Farasi mi le phungbia cawnpiaktu hna cu an phunzai i, “Hi pa nih misual mi kha a cohlan hna i an sinah rawl zong a ei” tiah an ti. 3 Cucaah Jesuh nih tahchunhnak hmang in hitin a ti hna: 4 “Nan lakah pakhatkhat nih tuu 100 a ngei i mah lakah pakhat cu a tlau hei ti u sih. A taangmi tuu 99 kha ramlak ah kaltak in a tlaumi tuu kha a hmuh hlan tiang a kawl lai a si ko lo maw? 5 A hmuh tikah a lung aa lawm tuk i a liang ah aa khinh. 6 Inn a phanh tikah a hawikom le a innpa pawl kha a auh hna i ‘A tlaumi ka tuu kha ka hmuh ṭhan cang, rak ka lawmhpi u’ tiah a ti hna. 7 Kaan chimh hna lai, cu bantuk in ngaihchih awk a ruang a ngei lomi, miding 99 nakin aa ngaichihmi misual pakhat ruang ah vancung ah lunglawmhnak tam deuh a um lai.

8 “Asiloah drachma* piahra a ngeimi nu pakhat nih drachma piakhat kha a thlau hei ti u sih. Mah tikah meiinn kha a van lai, inn kha a phiah lai i a hmuh hlan tiang ṭha tein a kawl lai a si ko lo maw? 9 A hmuh tikah a hawikom le a innpa pawl kha a auh hna i ‘Ka thlaumi drachma* piakhat kha ka hmuh ṭhan cang, rak ka lawmhpi u’ tiah a ti hna. 10 Kaan chimh hna lai, cu bantuk in misual pakhat aa ngaihchih tikah Pathian vancungmi hna lakah lunglawmhnak a um.”

11 Mah hnuah Jesuh nih hitin a ti: “Mipa pakhat nih fapa pahnih a ngei. 12 Ngakchia deuh pa nih ‘Ka pa, ka co dingmi ro kha rak ka pe’ tiah a hal. Cucaah a pa nih ro cu a cheuh hna. 13 Ni tlawmpal hnuah ngakchia deuh pa nih cun a ro vialte kha aa lak i ramdang ah a kal. Cuka ah a duhduh in khua a sa i a ngeihmi vialte kha a va sawksam dih. 14 Cuticun a ngeihmi vialte a hman dih tikah cuka ram ah mangṭam fakpi in a tlung i chambau ngai in a um. 15 Mah tikah cuka rammi pakhat sinah a va kal i a um hnawh caah mah pa nih cun vok cawngh ding in a lo ah a thlah. 16 Vok nih an eimi bekawng hmanh kha ei a duh, asinain ahohmanh nih ei awk zeihmanh an pe lo.

17 “A lung a hung pem tikah ‘Ka pa rianṭuantu pawl hmanh nih khim tein rawl an ei. Kei vial rawlṭam in hika ah ka thi cang lai! 18 Atu ka pa sinah ka kir lai i “Ka pa, vancung ah a ummi Pathian cung le nangmah cung ah ka sual cang. 19 Na fa tiin auh awk hmanh ah kaa tlak lo. Na sinah rianṭuantu in umnak nawl ka pe ko” ka ti lai’ tiah a ruah. 20 Cucaah a tho i a pa sinah a kal. A pa nih lamhlat in a hmuh tikah a zaang a fak tuk i a va tlik hnawh, cun a kuh i a hnamh. 21 A fapa nih cun ‘Ka pa, vancung ah a ummi Pathian cung le nangmah cung ah ka sual cang. Na fa tiin auh awk hmanh ah kaa tlak lo’ tiah a ti. 22 Mah tikah a pa nih a salle kha ‘Angki fual ṭha bik kha khulrang in rak pu u law hruk u. A kut ah kutdonghrolh kha hrolh u law a ke ah phanat kha danh u. 23 Cawfa thaumi kha rak hruai u law that u. Cun ei hna u sih law puai tuah hna u sih. 24 Zeicahtiah ka fapa cu thihnak in a nung ṭhan cang; a rak tlau i ka hmuh ṭhan cang’ tiah a ti i nuam tein an ei, an ding.

25 “A fapa upa deuh pa cu lo ah a rak um. A rak tlung i inn a phanh lai ah ringawn thawng le laam thawng kha a theih. 26 Cucaah sal pakhat kha a auh i a cangmi kong kha a hal. 27 Salpa nih cun ‘Na naupa a rak tlung ṭhan cang. Dam tein a rak phanh caah na pa nih cawfa thaute kha a thahpiak’ tiah a leh. 28 Mah tikah a thin a hung i innchung ah a lut duh lo. Cucaah a pa cu a rak chuak i a lem. 29 Upa deuh pa nih cun ‘Kum hi vialte chung sal bantuk in na sinah rian ka ṭuan. Na bia ngaih loin voikhat hmanh ka um bal lo. Asinain ka hawile he i nuamhnak caah meheh no pakhat hmanh na ka pe bal lo. 30 Hlawhhlangnu hna he na ngeihchiah vialte a va hlolak dihmi hi na fapa a kir tikah cun cawfa thaute kha na thahpiak’ tiah a ti. 31 A pa nih ‘Ka fapa, nang cu ka sinah na um zungzal i ka ngeihmi vialte cu nangmah ta an si dih. 32 Na naupa tu cu a rak thi i a nung ṭhan; a rak tlau i atu ah hmuh ṭhan a si. Cucaah nuam tein puai kan tuahpiakmi a si’ tiah a ti.”