Johan

15 “Keimah cu mitsur ruang taktak ka si i ka Pa cu a zohkhenhtu a si. 2 Ka sinah thei a tlai lomi a nge vialte cu a saam dih hna lai, thei a tlaimi a nge tu cu an tlai chin nakhnga a thianhpiak hna lai. 3 Nan sinah ka chimmi bia ruang ah nannih cu nan thiang cang. 4 Keimah he lungthin khat tein um u, kei zong nanmah he lungthin khat tein ka um ve lai. Mitsur nge cu mitsur ruang he aa peh lo ahcun thei a tlai kho lo. Cu bantuk in nannih zong keimah he lungthin khat tein nan um lo ahcun thei* nan tlai kho ve lai lo. 5 Keimah cu mitsur ruang ka si i nannih cu a nge nan si. Mi pakhat cu keimah he lungthin khat tein a um ahcun kei zong amah he lungthin khat tein ka um ve lai, anih cu thei tampi a tlai lai. Keimah he nan i hlat ahcun zeihmanh nan tuah kho lai lo. 6 Keimah he lungthin khat tein a um lomi paoh cu hlonh a si i a carmi nge bantuk an si. Mah nge pawl kha an khawmh i mei chung ah an paih tikah an kang dih. 7 Keimah he lungthin khat tein nan um i ka bia nan ngaih ahcun nan duhmi paoh hal u law nan hmuh lai. 8 Thei tampi tlai u law ka zultu nan si kha langhter u, cuticun ka Pa sunparnak cu a lang lai. 9 Ka Pa nih a ka dawt bantuk in nannih zong kaan dawt ve hna; ka dawtnak chung ah khan hmun ko u. 10 Ka Pa nawlbia kha ka zulh i a dawtnak chung ah ka hmunh bantuk in ka nawlbia nan zulh ahcun ka dawtnak chung ah nan hmun ve lai.

11 “Ka ngeihmi lunglawmhnak kha nannih nih tlamtling tein nan hmuh khawh nakhnga mah kong kha kaan chimhmi hna a si. 12 Mah hi ka nawlbia a si, Keimah nih kaan dawt hna bantuk in pakhat le pakhat i daw u. 13 Mi pakhat nih a hawile caah a nunnak* a pekmi nakin a ngan deuhmi dawtnak a um ti lo. 14 Ka nawlbia nan zulh ahcun nannih cu ka hawile nan si. 15 Nannih cu sal tiah kaan au ti hna lai lo, zeicahtiah sal nih cun a bawipa tuahmi kha a hngal lo. Asinain kei nih cun ka Pa sinin ka theihmi vialte kha kaan chimh dih hna caah ka hawile ti tu in kaan auh hna lai. 16 Nanmah nih nan ka thim lo, keimah nih kaan thim hna. Thei nan tlai peng nakhnga le a thei pawl an hmunh peng nakhnga rian kaan pek hna. Cucaah ka min in ka Pa sinah nan hal ahcun nan halmi paoh aan pek hna lai.

17 “Pakhat le pakhat nan i dawt khawh nakhnga cutin nawl kaan pekmi hna a si. 18 Vawlei nih aan huat hna ahcun nanmah aan huat hna hlanah keimah a rak ka huat hmasa ti kha hngal u. 19 Hi vawlei ta nan si ahcun vawlei nih amah ta nan si caah aan dawt ko hna lai. Asinain keimah nih hi vawlei hin kaan thim hna i amah ta nan si lo caah vawlei nih aan huat hnanak cu a si. 20 Ka chimmi bia hi i cinken u: Sal cu a bawipa nakin a ngan deuh lo. Keimah an ka hrem ahcun nannih zong an in hrem ve hna lai. Ka bia an ngaih ahcun nan bia zong an ngaih ve lai. 21 Asinain ka min ruang ah hi thil vialte hi nan cung ah an tuah lai. Zeicahtiah a ka thlahtu kha an hngalh lo caah a si. 22 An sinah ra in rak chim hlah ning law sualnak an ngei hnga lo; asinain atu cu an sualnak caah i silhnalh khawh a si ti lo. 23 Keimah a ka huami paoh nih ka Pa zong an huat ve. 24 Ahohmanh nih an tuah bal lomi khuaruahhar thil kha an hmaiah rak tuah hlah ning law annih cu sualnak an ngei hnga lo, asinain atu cu an ka hmuh i an ka huat, ka Pa zong an huat. 25 Mah cu ‘A ruang zeihmanh um loin an ka huat’ tiah Phungbia cauk ah aa ṭialmi bia a tlin nakhnga caah a si. 26 Pa sinin a rami bawmtu* kha nan sinah ka thlah lai, anih cu biatak a langhtermi thiang thlarau kha a si. Pa sinin a rami a si i ka kong kha tehte a khaan lai. 27 Nannih zong a hramthawk tein ka sinah nan um caah keimah kong kha tehte nan khaan ve lai.