Korin Pakhatnak
10 Unau hna, kan pupa hna cu minmei tang ah an kal i Rili Sen an tan ti kha hngalhter kaan duh hna. 2 An dihlak in minmei tang ah an kal i rili an tan lioah Moses zultu in tipil an ing. 3 An dihlak in aa khatmi thlarau rawl kha an ei. 4 An dihlak in aa khatmi thlarau ti kha an din. An sin i a kal lengmangmi thlarau lungpi in a chuakmi ti kha an din. Mah lungpi cu Khrih kha a si. 5 Asinain an lak i tam deuh cung ah Pathian cu a lung a tling lo, cucaah ramcar ah an rak thi.
6 Mah thil vialte cu kan caah ralrin petu an si. Thil ṭhalo an duh bantuk in kan duh ve nakhnga lo caah a si. 7 Siasal bia hlah u, an lak i cheukhat cu siasal an rak bia. An kong he aa tlaiin cathiang ah “Mi pawl cu an ei, an ding i nuam tein an um” tiah aa ṭial. 8 Nupa sualnak* kha hrial hna u sih, an lak i cheukhat cu nupa sualnak* an tuah caah nikhat te ah mi 23,000 an rak thi. 9 Jehovah* kha hneksak hna hlah u sih, an lak i cheukhat nih an hneksak caah rul nih a cuk hna i an rak thi. 10 Phunzai hna hlah u sih, an lak i cheukhat cu an phunzai caah hrawktu kut in an rak thi. 11 Mah thil vialte an cung i a tlunmi cu kanmah cawnpiaknak caah a si. Hi chan* donghnak caan ah a nungmi kan caah ralrin peknak in ṭial an si.
12 Cucaah ka dir kho ko tiah aa ruatmi cu a tluk sual nakhnga lo i ralring seh. 13 Tukforhnak nan tonmi hi midang zong nih an ton ciomi a si ko. Asinain Pathian cu zumhawktlakmi a si caah nan inkhawh leng tiang in tukforhnak ton awkah aan awnh hna lai lo. Mah leng ah tukforhnak nan ton tikah nan inkhawh nakhnga chuah khawhnak lam zong aan serpiak hna lai.
14 Cucaah ka dawtle hna, siasal biaknak kha zamtak u. 15 Nannih cu thleidan thiamnak a ngeimi nan si; ka chimmi a hmaan, hmaan lo ti kha nanmah tein biakhiak ko u. 16 Thluachuahnak hrai caah Pathian kan lawmh tikah Khrih thisen kan i hrawmmi a si ko lo maw? Changreu kan cheu tikah Khrih pum kan i hrawmmi a si ko lo maw? 17 Changreu hlumkhat lawng a um. Kan dihlak in mah changreu hlumkhat kha kan ei caah kan tampi ko nain pumkhat kan si.
18 Israel mi kong kha ruat hmanh u: Biakṭheng ah pekchanhmi an eimi cu Pathian he an eiṭimi bantuk a si lo maw? 19 Cutin ka chimmi cu siasal le siasal sinah raithawimi thil hna cu an biapi ka ti duhnak maw a si? 20 Si hlah! Ka chim duhmi cu miphun dang hna nih rai an thawi tikah Pathian sinah si loin khuachia sinah an thawimi a si. Nannih cu khuachia he pehtlaihter kaan duh hna lo. 21 Jehovah* hrai le khuachia hrai kha nan din kemh kho lai lo; “Jehovah* cabuai” le khuachia cabuai ah nan ei kemh kho lai lo. 22 Asiloah ‘Jehovah* kha a nahchuak seh tiin maw kan tuah’? Amah nakin maw kan ṭhawn deuh?
23 Zeizong vialte hi tuah khawh a si ko, asinain zeizong vialte hi an ṭhahnem dih lo. Zeizong vialte hi tuah khawh a si ko, asinain zeizong vialte hi thazaang petu an si lo. 24 Ahopaoh kanmah ca ṭhatnak kha kawl loin midang ca ṭhatnak tu kawl hna u sih.
25 Sa zuarnak ah an zuarmi paoh kha va ei ko u. Nan chiaṭha thleidannak lungthin ruang ah bia va hal len hna hlah u. 26 Zeicahtiah cathiang nih “Vawlei le a chung i a ummi vialte cu Jehovah* ta an si” tiah a ti. 27 Zumlotu pakhat nih rawl ei aan sawm i kal na duh ahcun aan hunhmi paoh kha va ei ko. Na chiaṭha thleidannak lungthin ruang ah bia va hal len hlah. 28 Asinain pakhatkhat nih “Mah hi siasal sinah pekchanhmi a si” tiah aan ti ahcun aan chimtu pa ruang ah le chiaṭha thleidannak lungthin ruang ah va ei hlah. 29 Nangmah chiaṭha thleidannak lungthin kha si loin amah chiaṭha thleidannak lungthin kha ka chim duhmi a si. Zalonnak cu ka ngei ko nain midang chiaṭha thleidannak lungthin nih sualphawt ding cu ka duh lo. 30 Pathian sinah lawmhnak bia chim in ka eimi a si hmanh ah midang soisel awk a si ahcun cutin tuah cu a ṭha hnga maw?
31 Cucaah nan ei ah siseh, nan din ah siseh, zei nan tuah hmanh ah, nan tuahmi kip kha Pathian thangṭhatnak caah siter ko u. 32 Judah mi siseh, Greek mi siseh, Pathian Khrihfabu siseh tlukrilhtertu si hlah u. 33 Kei zong ka tuahmi kip ah mi vialte lungton ding in kaa zuam. Khamhnak an hmuh nakhnga keimah ca ṭhatnak kha kawl loin mi vialte ṭhatnak tu kha ka kawl.