Luka

21 Jesuh nih khua a hei zoh i mirum pawl nih thawhlawm kuang chung ah thawhlawm an sanhmi kha a hmuh. 2 A si a fak ngaimi nuhmei nu pakhat nih a man a tlawmmi phaisa sen pahnih* a sanhmi zong kha a hmuh. 3 Mah tikah Jesuh nih “Biatak kaan chimh hna lai, a si a fakmi mah nuhmei nu nih a sanhmi hi midang vialte nih an sanhmi nakin a tam deuh. 4 Zeicahtiah midang nih cun an ngeihmi a hleivuang kha an sanh. Hi nuhmei nu tu cu a si a fak ko nain a nunnak ca i a ngeihmi kha a dihlak in a sanh” tiah a ti.

5 Mah hnuah mi cheukhat nih biakinn kha lung dawhdawh le pekchanhmi thil hna in zeitindah ṭamh a si timi kong an i ceih tikah, 6 Jesuh nih “Atu nan hmuhmi vialte hi nikhatkhat ah chimh dih an si lai. Lungrualmi pakhat hmanh a taang lai lo” tiah a ti hna. 7 Annih nih “Saya, mah thil hna cu zeitik ah dah a si lai, hi thil vialte a can lai ah zei hmelchunhnak hna dah a um lai?” tiah an hal. 8 Jesuh nih “Lam nan pial nakhnga lo i ralring u. Mi tampi nih ka min kha hmang in ‘Keimah hi Khrih ka si’ an ti lai i ‘Rikhiahmi caan cu a nai cang’ tiah an ti lai. An hnu kha va zul hna hlah u. 9 Mah leng ah raltuknak thawng le buaibainak thawng hna nan theih tikah nan thinphang hlah u. Mah thil hna cu a um hmasa awk a si ko, asinain donghnak cu a phan colh rih lai lo” tiah a ti hna.

10 Mah hnuah Jesuh nih “Miphun pakhat le pakhat, ram khat le ram khat an i do lai. 11 Li fakpi in aa hnin lai. Hmun khat hnu hmun khat ah mangṭam le pulrai a tlung lai. Thil ṭihnung hna nan hmuh lai. Van ah hmelchunhnak nganpipi an lang lai.

12 “Mah thil hna a tlun hlanah an in tlaih hna lai i an in hrem hna lai. Pumhnak inn ah an in chuahpi hna lai i thong an in thlak hna lai. Keimah min ruang ah siangpahrang le uktu hna hmaiah an in chanh hna lai. 13 Cuticun an sinah tehte khaannak caanṭha nan hmu lai. 14 Cucaah mah hi nan lungthin ah i cinken u: zeitindah kan leh hna lai ti kha a hlankan in nan i ruahcia a hau lai lo. 15 Nan chim dingmi bia le nan herhmi fimnak kha kaan pek hna lai. Nanmah aan ralchanhtu vialte hna an i fonh dih hmanh ah an in do kho hna lai lo i an in al kho hna lai lo. 16 Mah leng ah nulepa, u le nau, rualchan le hawikom hmanh nih biaceihnak zung ah an in chanh hna lai caah nan lak i cheukhat cu thah nan si lai. 17 Keimah min ruang ah mikip nih an in huat hna lai. 18 Asinain nan lu cung samfa fakhat hmanh a rawk lai lo. 19 Inkhawhnak nan ngeih ahcun nunnak nan hmu lai.

20 “Jerusalem khua kha ralkap nih an kulhmi nan hmuh tikah hi khua cu a rawk cang lai ti kha hngal u. 21 Cu caan ah cun Judea ram i a ummi cu tlang cung ah zam u. Khua chung ah a ummi cu khua leng ah chuak u. Lo ah a ummi zong khua chung ah lut ti hlah u. 22 Zeicahtiah cu caan cu Cathiang ah aa ṭialmi vialte tlinter awkah Pathian nih mi pawl bia a ceih hna lai caan kha a si. 23 Cu caan cu fapawi le nauno a ngeimi nu hna caah a har chinchin lai! Hi ram chung ah harnak nganpi a tlung lai i hi mi hna cu dantat an si lai. 24 Annih cu vainam in hrawh an si lai. Ramdang ah sal in kalpi an si lai. Miphun dang hna caah rikhiahmi caan a tlin hlan tiang Jerusalem khua cu miphun dang hna nih an naan lai.

25 “Nika, thlapa le arfi hna ah hmelchunhnak an lang lai. Vawleicung i miphun vialte cu lungrethei in an um lai i rili le tilet awnh thawng nih khuaruahhar vansang in a umter hna lai. 26 Mi cu vawleicung ah a cang dingmi thil kong ah lungrethei in an um lai i an ṭih tuknak ah mah hngal loin an um lai, zeicahtiah van ṭhawnnak cu an i hnin lai. 27 Cu hnuah mi Fapa cu van khuadawm lakin ṭhawnnak le a liannganmi sunparnak he a ratmi kha an hmuh lai. 28 Mah thil vialte um hram aa thawk tikah nan lu tung u law cunglei kha zoh u. Zeicahtiah nan luatnak cu a nai cang” tiah a ti hna.

29 Jesuh nih mah he aa tlaiin tahchunhnak pakhat a chimh hna: “Theipi kung le thingkung dang vialte khi zoh hmanh u. 30 Hnah no an corhmi nan hmuh tikah ṭhal caan a nai cang ti kha nan hngalh. 31 Cu bantuk in mah thil hna an hung ummi nan hmuh tikah Pathian Pennak a nai cang ti kha hngal u. 32 Biatak kaan chimh hna lai, hi thil vialte a tlun dih hlanah atu chan mi* hna cu an thi dih rih lai lo. 33 Van le vawlei cu an rawk lai, asinain ka bia cu zeitik hmanh ah a rawk lai lo.

34 “A hleihluat tuk in einak le dinnak, nunnak ca lungretheihnak hna nih nan lungthin aan nenh sual hna nakhnga lo i ralring u. Cu ni cu ruahlopi in a ra lai i, 35 rap foih in aan foih sual hna lai. Cu ni cu vawleicung i a ummi, mi vialte cung ah a tlung lai. 36 Cucaah hliphlau tein um u law thlacam zungzal u. Mah lawng ah hi thil hna a tlun tikah nan luat kho lai i mi Fapa hmaiah nan dir kho lai.”

37 Jesuh nih chun ah biakinn ah a cawnpiak hna, zan ah Oliv Tlang ah a kal i cuka ah a va riak tawn. 38 Mizapi cu Jesuh bia ngaih awkah zingka tein biakinn ah an ra tawn.