Thesalon Pakhatnak

1 Paul, Silvanas* le Timote nih Pa Pathian le Bawipa Jesuh Khrih he lungthin khat tein a ummi Thesalonika khua i Khrihfabu sinah cakuat kan rak ṭial:

Pathian vel le daihnak cu nan cung ah um ko seh.

2 Nan dihlak ca i thla kan cam fatin Pathian sinah lawmhnak bia kan chim zungzal. 3 Zeicahtiah zumhawktlak tein le dawtnak in rian nan ṭuanmi, kan Bawipa Jesuh Khrih nan i ruahchan ruang ah harnak nan inkhawhmi kha kan Pa Pathian hmaiah kan philh bal lo. 4 Pathian dawtmi unau hna, nannih cu Pathian thimmi nan si ti kha kan hngalh. 5 Nan sin i thawngṭha kan chim tikah bia lawnglawng in kan chim lo. Thiang thlarau bawmhnak le a fekmi zumhnak he kan chim caah nan cung ah huham tampi a ngei. Nanmah ṭhatnak caah zei bantuk mi dah kan hung si ti kha nan hngalh ko. 6 Harnak tampi nan tong ko nain thiang thlarau nih a chuahtermi lawmhnak he Pathian bia kha nan cohlan. Cuticun kanmah le Bawipa aa zohchunhmi nan hung si. 7 Cucaah Masidonia ram le Akhaia ram i a ummi zumtu dihlak caah zohchunh awk ṭha nan hung si.

8 Nanmah thawng in Jehovah* bia cu Masidonia ram le Akhaia ram ah a karh. Cu lawng si loin Pathian nan zumhnak kong cu hmun kip ah a thang. Cucaah kanmah nih zeihmanh chim a herh lo. 9 Nanmah he kan i ton hmasa biknak kong le a nungmi le a hmaanmi Pathian sal si awkah siasal biaknak in Pathian sin nan i mernak kong kha anmah tu nih an chim zungzal. 10 Pathian sin nan i mermi cu vancung in a ra dingmi a Fapa Jesuh hngah awk zong ah a si. Amah cu Pathian nih thihnak in a thawhtermi, a ra liomi thinhunnak in a kan khamhtu kha a si.