Hebru

13 Unau dawtnak in i daw zungzal u. 2 Khual dawtnak langhter* kha philh hlah u. Cutin a tuahmi cheukhat nih an hngalh loin vancungmi sin hmanh ah khual dawtnak an langhter. 3 Thong a tlami kha an sinah thong a tla vemi bantuk in philh hna hlah u. Taksa pum in a nung vemi* nan si caah hremnak a ingmi kha philh hna hlah u. 4 Ṭhitumnak kha mi vialte nih upat hna seh, ṭhitumnak kha thurhnawmhter hna hlah seh. Zeicahtiah Pathian nih nupa sualnak* a tuahmi le a zuangzammi kha bia a ceih hna lai. 5 Nan nunnak ah tangka duh tuknak kha hrial u, nan ngeihmi ah khan nan lungsi ko u. Zeicahtiah Pathian nih “Kaan kaltak bal hna lai lo i kaan hlaw bal hna lai lo” tiah a ti. 6 Cucaah “Jehovah* cu a ka bawmtu a si; zeihmanh ka ṭih lai lo. Minung nih cun ka cung ah zeidah an tuah khawh lai?” tiah ralṭha tein kan chim khawh.

7 Pathian bia a rak in chimtu, nan hruaitu pawl kha philh hna hlah u. An nunning nih a chuahpimi ṭhatnak kha ṭha tein ruat u law an zumhnak kha i zohchunh hna u.

8 Jesuh Khrih cu nizan, nihin le a zungzal in aa thleng bal lo.

9 Aa phundangmi cawnpiaknak a phunphun nih lam in pialter hna hlah seh. Rawl* si loin Pathian velngeihnak tu in nan lungthin kha fehter u. Rawl biapi tuk ah a chiami cu zei ṭhatnak hmanh an hmu lo.

10 Biakṭheng pakhat kan ngei. Asinain puan thlam ah a thiangmi rian a ṭuanmi hna cu mah biakṭheng ah pekchanhmi kha einak nawl an ngei lo. 11 Tlangbawi ngan nih sual thawinak caah saram thi kha A Thiang Bikmi Khaan ah a luhpi i a pum tu cu riahhmun leng ah khangh a si. 12 Cucaah Jesuh zong a thisen in mi an thian nakhnga khua hauka leng ah temhinnak tuar in a thi. 13 Cucaah riahhmun leng ah amah sinah kal in a inmi ningzahnak kha ing ve hna u sih. 14 Hika ah kan caah a hmunmi khua a um lo, a ra dingmi khua tu kha lungtho tein kan hngak. 15 Jesuh thawng in Pathian kha thangṭhat raithawinak pe zungzal hna u sih. Mah cu kan kaa in zapi sinah Pathian min kong kan phuanmi kha a si. 16 Cu leng ah ṭhatnak tuah le kan ngeihmi thil midang pekṭhenh kha philh hna hlah u sih. Zeicahtiah cu bantuk raithawinak cu Pathian duhmi a si.

17 Nan hruaitu hna kha an nawl ngai hna u law an tang ah i dor u. Annih nih an in zohkhenh hna. A tak ti ahcun an rian ṭuan ning he aa tlaiin Pathian nih bia a ceih hna lai. An rian kha lunglawm tein si loin thawpi chuah buin an ṭuan ahcun nan caah ṭhathnemhnak zeihmanh a um lai lo.

18 Kan caah thla kan campiak zungzal u. Zeizong kip ah dingfel tein um kan duh caah a thiangmi chiaṭha thleidannak lungthin kan ngei ti kha kan zumh. 19 Nan sinah tuan deuh in ka phak khawh nakhnga thla rak ka campiak u tiah a hleiin nawl kaan duh hna.

20 Daihnak Pathian nih a liannganmi tuukhal, kan Bawipa Jesuh kha zungzal a hmunmi biakamnak thisen he thihnak in a thawhter. 21 Pathian nih a duhnak tuah awkah thilṭha phun kip kha in pe ko hna seh. A lung a lawmhtermi thil tuah awkah Jesuh Khrih thawng in, in forh ko hna seh. Pathian cu zungzal in zungzal tiang sunparnak hmu ko seh. Amen.

22 Unau hna, mah thazaang peknak bia hi lungsau tein ngaih awkah kaan forh hna, zeicahtiah ka ca cu a tawite ko. 23 Kan unau Timote cu thong in a luat cang ti kha hngalhter kaan duh hna. A rauhhlan ah nan sin a rat ahcun ka ra ve te lai.

24 Nan hruaitu dihlak le mithiang mi dihlak kha an kut ka tlaihpiak hna u. Italy ah a ummi hna zong nih nan kut an in tlaih hna.

25 Pathian vel cu nan dihlak cung ah um ko seh.