Johan sin pekmi Biathlam

19 Mah hnuah vancung in mibu nganpi aw he aa lomi aw thangpi pakhat ka theih. “Jah kha thangṭhat u!* Khamhnak, sunparnak le ṭhawnnak cu kan Pathian ta a si. 2 Zeicahtiah a biaceihnak cu a hmaan i a ding. Nupa sualnak* in vawlei a rawhraltertu, a liannganmi hlawhhlangnu kha bia a ceih cang. Hlawhhlangnu kut in a thimi a salle caah phu a hlam cang” tiah an ti. 3 Cun “Jah kha thangṭhat u!* Hlawhhlangnu a kanghnak meikhu cu zungzal in zungzal tiang a kai” tiah a voihnihnak an chim colh.

4 Upa 24 le thilnung pali hna cu an khuk an i bil i bawiṭhutdan ah a ṭhumi Pathian kha an biak, cun “Amen! Jah kha thangṭhat u!”* tiah an ti.

5 Cun bawiṭhutdan in aw pakhat nih hitin a ti: “Nannih a salle hna, amah a ṭihmi mihme he, mingan he nan dihlak in Pathian cu thangṭhat u.”

6 Cu hnuah mibu nganpi aw, tisor nganpi thawng* le khuari thawng thangpi he aa lomi aw pakhat ka theih. “Jah kha thangṭhat u,* zeicahtiah A Ṭhawng Bik Jehovah* kan Pathian cu siangpahrang in uk hram a thawk cang! 7 I lawm u sih law i nuam u sih. Pathian kha sunparnak pe u sih. Zeicahtiah Tuufa ṭhitumnak puai cu aa thawk cang i monu zong timhcia a si cang. 8 Monu cu a thiang i a cer in a cermi khiangraang puan kha i thuamh awkah pek a si. Khiangraang puan nih mithiang mi hna i a dingmi tuahsernak kha a aiawh” tiah an ti.

9 Vancungmi nih “Ṭial tuah: Tuufa nupi ṭhit puai zanriah ah sawmmi hna cu lunglawmmi an si” tiah a ka ti. Cun “Hi bia cu Pathian chimmi bia taktak an si” ti zong in a ka ti. 10 Cu tikah amah biak awkah a kehram ah ka bawk. Asinain “I ralring tuah! Cutin tuah hlah! Kei zong Jesuh kong tehte khaan awkah rian a ngeimi nangmah le na unau hna salhawi pei ka si ve ko cu. Pathian tu kha bia! Chimchungbia hna i aa tinhnak cu Jesuh kong tehte khaan awkah a si” tiah a ka ti.

11 Cun van cu aa hung i rang raang pakhat kha ka hmuh. A cung i aa citmi cu Zumhawktlakmi le A Hmaanmi timi min a ngei, ding tein bia a ceih i ral a do. 12 A mit cu meizik bantuk a si i a lu cung ah bawiluchin tampi aa chinh. Amah dah ti lo cun ahohmanh nih an hngalh lomi min pakhat a pum cung ah aa ṭial. 13 Thi aa nehmi angki fual kha aa hruk i Pathian Bia timi min zong a ngei. 14 Vancung ralkapbu zong nih rang raang an i cit i an zulh. Annih cu a thiangmi khiangraang puan in an i thuam. 15 Miphun hna hrawhnak caah a kaa in a haarmi vainam sau a chuak. Miphun hna kha thir fung in a uk hna lai. Cun A Ṭhawng Bik Pathian thinlinhnak le thinhunnak mitsur nennak kha a nen lai. 16 A angki fual i a phei zawn ah siangpahrang vialte Siangpahrang le bawi vialte Bawi timi min aa ṭial.

17 Cun nika ah a dirmi vancungmi pakhat kha ka hmuh, vanlai ah a zuangmi va vialte kha aw thangpi in hitin a ti hna: “Hika ah ra u, Pathian zanriah nganpi ah rak i pum u. 18 Siangpahrang hna, ralbawi hna, miṭhawng hna, rang hna le a cung i aa citmi hna, miluat le sal hna, mihme le mingan vialte hna sa hi rak ei tuah u.”

19 Sahrang le vawleicung siangpahrang hna le an ralkap hna cu rang aa citmi le a ralkapbu doh awkah an i pumhmi kha ka hmuh. 20 Sahrang cu tlaih a si, sahrang hmelchunhnak a ngeimi le a milem a biami hna hlen awkah sahrang hmaiah hmelchunhnak a tuahtu profet deu zong tlaih chih a si. Annih cu kat mei alh tili ah a nung in paih an si. 21 A taangmi tu cu rang aa citmi kaa chung in a chuakmi vainam sau in thah an si. An sa cu va vialte nih khim tein an ei.