Hmailei ah zeidah a cang lai tiah na ruah?

BAIBAL CHIMMI

‘Pathian nih an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang a ti.’—Biathlam 21:3, 4.

MAH IN ZEI ṬHATNAK DAH NA HMUH KHAWH?

Lungsi hnangamnak le sullam a ngeimi rian.—Isaiah 65:21-23.

Zawtnak le sifah harnak a um ti lomi nunnak.—Isaiah 25:8; 33:24.

Chungkhar le hawikom hna he a zungzal in nuam tein umṭi khawhnak.—Salm 37:11, 29.

BAIBAL CHIMMI HI KAN ZUMH KHAWH

Zumh khawh a sinak a ruang pahnih a um.

• Pathian nih a biakam vialte a tlinter khawh. Jehovah Pathian a ṭhawnnak cu ri a ngeih lo caah amah lawnglawng kha “a lianngan bik” a si tiah Baibal nih a ti. (Biathlam 15:3) Cucaah vawlei thil sining hi ṭha deuh in kaan tuahpiak hna lai tiah bia a kan kamhmi ningin a kan tuahpiak khawh. “Pathian caah cun zeizong vialte hi a si kho ko” tiah Baibal nih a ti.—Matthai 19:26.

• Pathian nih a biakam ningin tuah a duh. Tahchunhnak ah, Jehovah nih a thiciami pawl thawhter ṭhan ding kha aa ngaih tuk.—Job 14:14, 15.

  Pathian Fapa Jesuh nih vawlei i a um lioah mizaw pawl kha a damter hna tiah Baibal nih a ti. Zeicah cutin a rak tuah? Zawtnak kha lohter a duh caah a si. (Marka 1:40, 41) Jesuh cu a Pa bantuk in mi bawmh duhnak lungthin a ngei. —Johan 14:9.

  Cucaah Jehovah le Jesuh nih a nuammi hmailei ruahchannak ngei hna seh ti a kan duhpiak kha kan zumh khawh.—Salm 72:12-14; 145:16; 2 Peter 3:9.