Zeitindah Ka Thawk Lai?

Baibal kha lungtak tein rel awk le mah in ṭhathnemhnak hmuh awkah zeitindah ka tuah khawh? Mi tampi caah a ṭhahnemhmi ruahnak cheuhnak panga kha zohhmanh.

A ṭhami pawngkiang kha i thim. A daimi hmun kha kawl. Hnahnawhnak a um lo lawngah na relmi kong kha lungthin na pek khawh lai. Ceunak le thli thiang hna na hmuh ahcun na relmi zong a tlam a tling deuh lai.

A ṭhami lungput ngei. Baibal cu vancung kan Pa sinin a rami a si caah nulepa sinin cawn duhnak a ngeimi ngakchia pakhat bantuk lungput na ngeih ahcun ṭhatnak tampi na hmu lai. A ṭha lomi lungput le na rak cohlan cangmi a ṭha lomi ruahnak hna na ngeih ahcun mah kha hloh khawh awkah i zuam.​—Salm 25:4.

Na rel hlanah thlacam. Baibal cu Pathian ruahnak a si caah na hngalhthiam khawh nakhnga Pathian bawmhnak na herh. Pathian nih “thiang thlarau a halmi cu” ka pek hna lai tiah a ti. (Luka 11:13) Thiang thlarau nih Pathian ruahnak kha hngalthiam awkah a kan bawmh khawh. Mah lengah “Pathian nih aa tinhmi a thukmi hmanh kha” hngalhthiam awkah na lungthin kha aan hunpiak khawh.​—1 Korin 2:​10.

Hngalhthiam dingin rel. A kong pakhat kha rel sawhsawh in rel hlah. Na relmi kong kha hngalthiam awkah i zuam. Cun hitin i hal: ‘Ka relmi chung i mi pakhat nih zei sining hna dah a ngeih? Mah kha ka nunnak ah zeitindah ka hman khawh?’

Cuset khaset timi hmuitinh ngei. Na nunnak ah ṭhathnemhnak aan pe khomi kong hna cawn ding timi hmuitinh na ngeih ahcun Baibal na rel tikah ṭhathnemhnak tampi na hmu lai. A tanglei hmuitinh hna hi na chiah khawh: ‘Pathian kong tam deuh hngalh awkah cawn ka duh.’ ‘A ṭha deuhmi mi pakhat, nupi ṭha asiloah va ṭha si awkah kaa zuam lai.’ Cun mah hmuitinh hna phanh awkah aan bawm khomi Baibal kong hna kha i thim law rel.a

Mah Baibal ruahnak cheuhnak panga nih Baibal rel awkah aan bawmh lai. Asinain Baibal relnak ah naa nuamh deuh nakhnga zeidah na tuah khawh rih. Mah kong kha a hnu capar ah a fianter lai.