Thih Ka Duh Lo

HLANLIO

Kei cu England ram London khua i minung an tam tuknak Paddington khua ah a chuakmi ka si. Mah ah ka nu le ka unule pathum he kan umṭi. Ka pa cu zu a ding tukmi a si caah a caan lawngah kan sinah a um.

Ka ngakchiat lioah zan fatin thlacam dingin ka nu nih a ka cawnpiak. Salm cauk lawng aa telmi Baibal fate pakhat ka rak ngei. Mah Baibal biafang hna kha sak khawh awkah hla aw hna ka ser. Ka rak relmi cauk pakhat chung i catlang pakhat kha ka lungthin chungah a cam peng. Mah ah “nikhatkhat ahcun thaizing timi hi a um ti lai lo” tiah aa ṭial. Mah bia hna ruangah zan ah hngilh khawh loin hmailei kong kha ka ruat. ‘Nunnak hi mahnak in sullam a ngei deuh hrimhrim lai, a ngeih lo ahcun zei caah dah ka nun’ tiah ka ruah. Thih ka duh lo.

Khuachia thiamnak kong kha hngalh ka duh tuk. Cucaah mithi pawl he i chawnh awkah kaa zuam, sianginn i ka hawile pawl he thlan ah kan kal, cun mithla kong video hna ka rak zoh. Mah cu lung cawlcangh awk ngai a si i ṭih zong a nung.

Kum 10 ka si in duh paoh in ka nung. Kuak hna ka zu i a rauhlan ah kuak nih a ka lem. A hnu ahcun kangza hna ka hun zu. Kum 11 ka si ah zu ka ding. Zu i a thawtnam kha cu ka duh lo nain rit kha ka duh. Music le lam zong kha ka duh tuk. Cucaah party le nightclub hna ah a zungzal ti awk in ka kal. A thli tein zan ah inn in ka chuak i khua dei hlanah ka ṭin ṭhan tawn. A thaizing ahcun ka baa tuk i sianginn ka kai kho lo. Sianginn ka kai zongah dinh caan ah zu ka ding.

Sianginn a hnu bik kum i ka mark cu a tlawm tuk. A hmasa ahcun ka duh paoh in ka nunmi kha ka nu nih a hngal lo nain ka mark a hmuh tikah ka sining kha a hngalh i a thin a hung tuk. Ka nu he kan i si, mah tikah inn in ka chuak i ka tlangvalpa Tony sinah ka va um. Anih cu sualnak a tuah tawn, ritnak sii zong a zuar i a sual tukmi pa tiah a min a thangmi a si. Kum 16 ka si ah fa ka pawi i fapa ka hrin.

BAIBAL NIH KA NUNNAK A THLEN NING

Aa ṭhium rih lomi nu hna le an fale hna umnak caah an timhtuahmi inn i ka um lioah Jehovah Tehte Hna he a voikhatnak kan rak i tong. Cozah nawlpeknak in mah inn i innkhaan pakhat ah ka um. Jehovah Tehte nu pahnih cu kan umnak i a dang nule pawl sinah an rak leng lengmang. Nikhat cu an biaruahnak ah kaa tel ve. A ruang cu an zumhnak cu a hmaan lo ti langhter ka duh caah a si. Asinain ka biahalnak paoh Baibal in fiang te le dai tein an ka leh. An langhtermi dawtnak le nemnak nih ka lung a ka suk tuk. Cucaah anmah he Baibal cawnṭi dingin ka hna a tla.

A rauhhlan ah ka nunnak a thlenter khomi thil cheukhat kha Baibal in ka hun hngalh. Ka ngakchiat lio tein thih lai kha ka ṭih tuk ko nain atu cu thawhṭhannak kong he aa tlaiin Jesuh cawnpiaknak kha ka hngalh cang. (Johan 5:​28, 29) Cun Pathian nih a ka zohkhenh ti zong kha ka hngalh. (1 Peter 5:7) Jeremiah 29:11 i a chimmi bia hi ka duh tuk. Hitin a ti: “Nan ca i kaa tinhmi cu keimah lawnglawng nih ka hngalh, tiah BAWIPA nih a ti. Cucu vanchiatnak si loin thluachuahnak a si lai i nan hnu i a rung um ding tefa tampi kong a si lai.” Vawleicung paradis ah zungzal nunnak ruahchannak ka ngei kho ti zong kha ka hun zumh.​—Salm 37:29.

Jehovah Tehte hna nih ka cungah dawtnak taktak an langhter. An i pumhnak i a voikhatnak kaa pumh Iioah pakhat le pakhat lungtho tein an i conglawmhmi nih ka lung a ka suk tuk. (Johan 13:34, 35) Church i mi an pehtlaih hna ning he cun aa dang tuk. Jehovah Tehte Hna nih cun ka sining an hngalh ko nain lunglawm tein an ka conglawmh. A caan an ka pek, an ka zohkhenh i ka herhmi zong an ka bawmh. Dawtnak in a khatmi chungkhar mi pakhat bantukin kaa ruah.

Baibal ka hlathlainak thawngin Pathian i a sangmi phunglam ningin nun awkah ka nunnak thlen a hau ti kha ka hun hngalh. Asinain kuak i phiat kha kaa harh tuk. Cheukhat music hna nih kangza zuk a ka duhter chin. Cucaah ka ngaihmi hla hna kha ka thlen. Zu rit loin um ka duh caah zu din awkah a ka lemsoi khotu party le nightclub kal ti bantuk hna kha ka hrial. Cun nunning thar in nun awkah a ka bawm khomi le ka cungah a ṭhami huham a ngei khomi hawikom thar pawl kha ka kawl hna.​—Phungthlukbia 13:20.

Mah caan chungah Tony zong Jehovah Tehte Hna he Baibal an hlathlaiṭi ve. Jehovah Tehte Hna nih bia a halmi hna paoh Baibal in an leh caah mah hi biatak a si ti kha a hun zumh. Mah tikah a nunning kha a thlen, a puarhrangmi hawikom pawl he aa kom ti lo, sualnak zong a tuah ti lo i kangza zong a zu ti lo. Jehovah lungton awkah ziaza ṭha lo thlen a hau ti le kan fapa caah a ṭhami pawngkam ser a hau ti kha kan hun hngalh. Cucaah 1982 ah ṭhitumnak kan tuah.

Ka nunnak thlen ka duhmi ningin an nunnak a thlengmi hna i an kong ṭialmi hna kong Vennak Innsang le I Hlau!a ah ka kawlmi kha kaa cinken rih. An kong nih thazaang tampi a ka ngeihter. Cun i zuam peng awk le lungdongh lo awk zongah thazaang a ka ngeihter. Ka lung a dongh nakhnga lo Jehovah sinah thla ka cam peng. Tony he 1982, July ah tipil kan ing.

ṬHATHNEMHNAK KA HMUH NING

Jehovah he hawikom sinak nih ka nunnak a ka khamh. Tony he harnak kan ton chungah Jehovah Pathian bawmhnak kan hmu. Pathian i bochan awkah mah harnak hna in kan cawn. Jehovah nih kan chungkhar a kan bawmh peng ti kha kan hngalh.​—Salm 55:22.

Keimah nih Jehovah ka hngalh bantukin ka fale zong nih an hngalh nakhnga cawnpiaknak caan ṭha ka hmuh caah kaa lawm tuk. Atu ah an fale nih Pathian an hngalh i an ṭhachomi ka hmuh caah kaa lungsi tuk.

Hmailei kong le thihnak kong ruah in i hngilh khawh loin ka um ti lo. Kan nuva in zarhkhat hnu zarhkhat Jehovah Tehte Hna i Khrihfabu hna ah tlawn in thapek khawhnak caan ṭha kan hmu. Jesuh nan zumh nan langhter ahcun zungzal nunnak nan hmu lai timi kong midang cawnpiaknak rian ah kan pahnih in kan i tel.