Tlanhnak Man Thawngin Hmuhmi Thawhṭhannak Ruahchannak

Ruahnolhnak Puai nih tlanhnak man thawng­in hmuhmi hmailei thluachuah kong hna kha a kan ruahter ṭhan. Mah ah thawh­ṭhannak ruahchannak zong aa tel. Jehovah nih minung hi thih dingin a kan sermi a si lo. Cucaah kan dawtmi pakhat a thih tikah kan ngaih a chiat tuknak a si. (1 Ko 15:26) Lazaruh a thih caah a zultu hna an ṭahmi kha Jesuh nih a hmuh tikah a ngaih a chia. (Joh 11:33-35) Jesuh cu a Pa kha tling tein aa zohchunhmi a si. Cucaah kan dawtmi hna an thih ruangah kan ngaih a chiatmi kha Jehovah nih a hmuh tikah a ngaih a chia ve lai ti cu a fiang ko. (Joh 14:7) Jehovah nih a salle a thawhter ṭhan hna lai caan kha lungthawhnak nganpi he a hngah. Kannih zong cutin kan hngah ve awk a si.​—Job 14:14, 15.

Jehovah cu ningcang tein thil a tuahtu Pathian a si caah mithi kha ningcang tein a thawhter hna lai ti kha zumh khawh a si. (1 Ko 14:33, 40) Ruakvui pumhnak tuah canah a thoṭhanmi hna donnak program lawng a um cang lai. Cucaah ngaihchiat lio caan ah thawhṭhannak kong kha na ruat maw? (2 Ko 4:17, 18) Tlanhnak man a kan timhpiak caah le thawhṭhannak ruahchannak kong Baibal in a kan chimh caah Jehovah cungah naa lawm maw?​—Kol 3:15.

• Vawlei thar ah hmuh na duh bikmi na rualchan le na hawikom hna cu ahote dah an si?

• Vawlei thar ah biaruah na duh bikmi Baibal ah an kong ṭialmi hna cu ahote dah an si?