Baibal Na Cawnpiak Lioah Mah Hna Hi Hrial

Tam Tuk Bia Chim: Nangmah lawng nih zei paoh kha ka chim dih lai tiah ruat hlah. Mi nih khua an ruah khawh nakhnga le a hmaanmi biakhiahnak an tuah khawh nakhnga bawmh awkah Jesuh nih biahalnak hna kha a hman. (Matt. 17:24-27) Biahalnak hna nih Baibal na cawnpiakmi nih a hngalhthiammi le a zumhmi kong kha hngalh khawh awkah aan bawmh khawh. (be-BU 253 ¶3-4) Biahalnak na tuah tikah lungsau tein a phi kha hngak. Baibal na cawnpiakmi nih a phi a pekmi a palh ahcun a hmaanmi a phi kha chim canah a dang biahalnak hna kha hal in a hmaanmi a phi a pek khawh nakhnga bawm. (be-BU 238 ¶1-2) Baibal a cawngmi nih ruahnak thar a ngeih khawh nakhnga duhsah tein chim.—be-BU 230 ¶4.

Hngalh Harter: Cawnmi kong he aa tlaiin na hngalhmi paoh chim tibantuk kha hrial. (Johan 16:12) Catlangbu chung i a biapi bikmi kong kha ruat. (be-BU 226 ¶4-5) A kong dihlak cu hngalh duh awk a si hmanhah chim dih ahcun a biapi bikmi kong a tlau kho. (be-BU 235 ¶3) A biapi bikmi kong kha a theihthiam hnu lawngah catlangbu a dang ah kal.

A Rannak In Cawnpiak: Kan i tinhmi cu Baibal a cawngmi lungthin suk khawh kha a si. A konglam kha a rannak in cawnpiak sawhsawh lawng a si lo. (Luka 24:32) Nan cawnmi capar ah aa telmi a biapimi Baibal caang hna kha a hleiin nan i ruahṭinak thawngin Pathian Bia a ṭhawnnak kha hmang. (2Kor. 10:4; Heb. 4:12; be-BU 144 ¶1-3) Hngalh a fawimi tahchunhnak hna kha hmang. (be-BU 245 ¶2-4) Baibal na cawnpiakmi nih a tonmi harnak le a zumhnak kha ruahpiak law na cawnpiakning kha thleng. Mah biahalnak hna hi hal: “Atu kan cawnmi kong he aa tlaiin zeitindah na ruah? Kan cawnmi in Jehovah kong zeidah na hngalh? Mah ruahnak cheuhnak hi na nunnak ah na hman ahcun zei ṭhathnemhnak dah ka hmuh lai tiah na ruah?”—be-BU 238 ¶3-5; 259 ¶1.