A Kan Dawtu Sertu Nih A Kan Zohkhenh

1. A Kan Sertu nih Ni A Tlanter

Ni a tlan lo ahcun vawlei ah kan nung kho lai lo. Ni thawngin thingkung cu a hnah a corh, a par i thei a tlai, cun a ci zong a chuak. Mah lengah ni thawngin thingkung nih a hram in ti kha a dawp i a hnah tiang a phan, cun mah kha ti khu in thli lakah a kaiter.

2. A Kan Sertu Nih Ruah A Surter

Ruah cu Pathian sinin kan hmuhmi a sunglawi tukmi laksawng a si, mah nih vawlei kha ei awk ti rawl chuahter awkah a bawmh. Cun Pathian nih van in ruah a kan pek i a caan hmaante in thlaiti a kan pek, rawl kha a kan pek i lunglawmhnak in a kan khahter.

3. A Kan Sertu Nih Rawl le Hnipuan A Kan Pek

Pale tampi cu an chungkharmi nih hnipuan le rawl ei awk a za in an ngeih nakhnga an lungre a thei. Baibal chimmi hi i cinken: “A zuang lengmangmi va khi zoh tuah hna u: thlaici an tuh bal lo, rawl an ṭuan bal lo, buk zongah an rawn bal lo; sihmanhsehlaw vancung khua i a ummi nan Pa nih a zohkhenh ko hna. A si ah, nannih cu va nakin nan biapi deuh lo maw?”—Matthai 6:25, 26.

“Ramlak i a khomi pangpar khi zoh tuah hna ngat u . . . ; Sihmanhsehlaw hihi kaan chimh hna: Solomon hmanh kha, . . . pangpar pakhat tluk hmanh in aa dawhmi hnipuan a ngei lo. . . . ramlak ah a kho sawhsawhmi ram hmanh a thawmhtu cu Pathian. . . , nih cun nannih chinchin cu thuamh loin an um hna hnga maw?”—Matthai 6:28-30.

Pathian cu rawl le hnipuan a kan petu a si caah kan nunnak caah a dang a herhmi thil hna zong a kan pek lai tiah kan zumh khawh. Pathian duhnak kan tuah ahcun rawl caah fakpi in rian kan ṭuannak ah thluachuah a kan pek lai asiloah kan herhmi thil kan cawk khawh nakhnga rian hmuh awk zongah a kan bawmh lai.—Matthai 6:32, 33.

Nika, ruah, va le pangpar kong kan ruah tikah Pathian dawt awkah a ruang ṭha kan ngei. A hnu capar ah a kan Sertu nih minung he pehtlaihnak a tuah ning kong kha kan i ruah hna lai.