Nunning le Rianṭuannak Tuahchunhnak Cauk caah Cherhchanmi
FEBRUARY 4-10
BAIBAL AH THUHMI RO HNA | ROM 1-3
“Na Chiaṭha Thleidanak Lungthin Kha Cawnpiak Peng”
(Rom 2:14, 15) Jentail mi nih Nawlbia cu an ngei lo, sihmanhsehlaw Nawlbia nih, tuah u, a ti mi kha anmah lungtho tein an tuah chel pauh ah, Moses nawlbia cu ngei hmanh hna hlah sehlaw, cu hna cu an caah nawlbia an si ko. 15 Nawlbia nih, tuah u, a timi cu an lung chungah aa ṭial ko ti kha an ziaza in an langhter. Cun anmah lungthin lila nih a zeimaw caan ah sual a phawt hna i a zeimaw caan ah thiam a coh hna caah, an lung chungah aa ṭial ko ti cu an chiaṭha thleidannak nih khan a langhter ko.
A Thiangmi Chiaṭha Thleidannak Lungthin
6 Jehovah a hngal lomi hmanh nih a ṭhami thil le a ṭhalomi thil a um ti kha an hngalh. Baibal nih hitin a ti: “Anmah lungthin lila nih a zeimaw caan ah sual a phawt hna i a zeimaw caan ah thiam a coh hna.” (Rom 2:14, 15) Tahchunhnak ah, mi nih lainawn le fir cu a palh ti kha an hngalh. Jehovah nih an lungthin chungah a chiahmi a ṭha le ṭhalo hngalh khawhnak, chiaṭha thleidannak lungthin hnu an zulhmi kha an hngal men lai lo. Cun a ṭhami biakhiahnak tuah khawh awkah Jehovah nih a kan pekmi a phunglam asiloah a hrampi biatak zong kha an zulh men lai.
(Rom 2:15) Nawlbia nih, tuah u, a timi cu an lung chungah aa ṭial ko ti kha an ziaza in an langhter. Cun anmah lungthin lila nih a zeimaw caan ah sual a phawt hna i a zeimaw caan ah thiam a coh hna caah, an lung chungah aa ṭial ko ti cu an chiaṭha thleidannak nih khan a langhter ko.
A Thiangmi Chiaṭha Thleidannak Lungthin
8 Chiaṭha thleidannak lungthin hnu zulh cu intuarnak hnu zulh a si tiah cheukhat nih an ruah. Anmah nih a ṭha tiah an ruahmi, an duhmi poah tuah khawh a si tiah an ruah. Asinain mitlinglo kan si caah kan intuarnak cu a palh kho. Kan intuarnak cu a ṭhawn tuk tikah kan chiaṭha thleidannak lungthin cungah huham a ngei kho. Baibal nih hitin a ti: “Lungthin hi zeizong vialte nakin a zer bik, aho nih dah minung lungthin hi a hngalh khawh lai?” (Jeremiah 17:9) Cucaah a hmaanlomi hmanh kha a hmaanmi in kan hun hmuh khawh. Tahchunhnak ah, Paul nih Khrihfa a si hlanah Pathian miphun kha fakpi in a hrem hna i a tuahmi thil cu a hmaanmi a si tiah a ruah. A thiangmi chiaṭha thleidannak lungthin a ngei. Asinain a hnuah hitin a chim: “Ka cung i bia a khiaktu cu Bawipa kha a si.” (1 Korin 4:4; Lamkaltu 23:1; 2 Timote 1:3) A tuahsernak cu Jehovah nih zeitindah a hmuh ti kha Paul nih a hngalh tikah thlennak tuah a hauh kha a hngalh. Thil pakhat kan tuah hlanah ‘Jehovah nih zeidah tuahter a ka duh?’ tiah kan i hal hmasa awk a si.
9 Mi pakhat kha na dawt tikah a ngaihchiatter kha na duh lai lo. Jehovah kha kan dawt caah a ngaih a chiatter hngami zeithil hmanh tuah kan duh lo. Jehovah a ngaih a chiat lai ding phan cu a herh hrimhrimmi a si. Mah kha Nehemiah kong in kan hngalh khawh. A nawl ngeihnak kha hmangin rum awkah aa zuam lo. Zeicah? “Pathian ka ṭih caah” a si tiah Nehemiah nih a ti. (Nehemiah 5:15) Nehemiah nih Jehovah a ngaih a chiatter hngami zeithil hmanh tuah a duh lo. Nehemiah bantukin thil ṭhalo pakhatkhat tuahnak thawngin Jehovah a ngaih a chiat lai kha kan phan awk a si. Baibal kan relnak thawngin Jehovah duhmi thil kha kan hngalh khawh.—A Donghnak I Fianternak 6 ah zoh.
Thlaraulei Lungvar Hna kha Hlathlai
(Rom 3:4) Si hrimhrim hlah. Minung hi kan dihlak in lihchim si hmanh u sih law Pathian cu zumh awk tlak a si ṭhiamṭhiam ko. Cathiang nih, “Bia na chim tikah na chim mi cu a hmaan ti kha a lang lai i taza cuai na si tikah na bia cu na tei lai,” tiah a ti bang khan a si.
Rom Baibal Chungin Langhternak
3:4, NW. Minung bia cu Baibal ah Pathian nih a chimmi he aa dan tikah Baibal thawngṭha kha zum in Pathian duhnak he aa tlak in kan tuahnak thawngin ‘Pathian cu zumhawktlak kan siter.’ Pennak kong chimnak le zultu siternak ah teima tein kan i telnak thawngin Pathian a hmaannak kha midang nih an hmuh nakhnga kan bawmh khawh hna.
(Rom 3:24, 25) Sihmanhsehlaw kannih a kan tlantu Jesuh Khrih thawngin Pathian nih a vel cu a lak tein a kan pek i amah Pathian he cun a kan remter. 25 Jesuh Khrih cu Pathian nih thi in ngaihthiamnak sertu ah a tinhmi a si i cu ngaihthiamnak cu Jesuh Khrih zumhnak thawngin hmuh ding a si. Pathian nih cu bantuk in minung he remnak a tuah cu a dinnak kha langhter a duh caah a si. Cu a langhter ning cu hi ti hin a si: hlan lio ah cun a lung a sau caah mi nih an tuah mi sualnak kha i hmuhter duh lo in a um;
Rom Baibal Chungin Langhternak
3:24, 25—‘Khrih Jesuh tlanhnak’ nih tlanhnak man pek hlan i ‘hlan lio mi nih an tuahmi sualnak’ kha zeitindah a khuh khawh? Jesuh cu hremnak tung cungah thah a si tikah Genesis 3:15 i ṭialmi hmasa bik Messiah kong chimchung bia cu A.D. 33 kum ah a rak tling. (Gal. 3:13, 16) Asinain mah chimchung bia Jehovah nih a rak chim lio ah tlanhnak man cu pek a si cang tiin Pathian nih a hmuh khawh. Zeicahtiah Pathian aa tinhmi kha tling lo dingin zeihmanh nih a kham kho lo. Cucaah hmailei Jesuh Khrih pek dingmi raithawinak kha a hrampi ser in mah biakamnak cung ah zumhnak a langhtermi Adam tefa an sualnak kha Jehovah nih a ngaihthiam khawh hna. Cun tlanhnak man nih Khrihfa chan hlan i a thimi zong a thawhṭhanter khawh hna.—Lam. 24:15.
Baibal Relnak
(Rom 1:1-17) Khrih Jesuh sal le Pathian nih a thawngṭha chim awkah a thim i a auh mi lamkaltu keimah Paul nih ca kan kuat hna. 2 Cu thawngṭha cu Pathian nih hlanpi in a profet hna sinin a rak kan kamh i Cathiang chung i a rak i ṭial mi kha a si i 3 cucu a Fapa kan Bawipa Jesuh Khrih kong kha a si. Minung lei in ti ahcun David hrinsor a si, 4 thlarau lei in le a thiannak kong in ti ahcun, ṭhawnnak nganpi in thihnak in thawhter a si nak nih khan Pathian Fapa a si kha a langhter. 5 Amah thawngin Pathian lamkaltu sinak kha a ka pek i miphun kip chung mi kha zumhnak le Pathian nawlngaihnak i phakter awkah a ka fial; 6 cu hna lakah cun nannih, Rom khua ah a um i Pathian nih Jesuh Khrih ta si dingin a kawh mi hna zong nan i tel ve. 7 Cucaah Pathian nih a dawt i amah mi si dingah an kawh mi hna, Rom khua i a um mi nan dihlak in ca kan kuat hna: Pathian kan Pa le Bawipa Jesuh Khrih nih vel le daihnak cu in pe ko hna seh. 8 A hmasa bik ah, nan dihlak ruangah ka Pathian cu Jesuh Khrih thawngin ka thangṭhat; zeicahtiah vawlei khuazakip ah nan zumhnak thawng hi an rak theih dih cang. 9 Ka chim mi bia hi a hmaan tiah Pathian cu tehte ah kaa lak ngam—cu Pathian rian, a Fapa kong thawngṭha chim hi ka lungthin dihlak in ka ṭuan mi cu a si. 10 Thla ka cam fate nannih kan hngalh zungzal hna cu Pathian nih a hngalh ko. Cun Pathian sinah cun, annih cu zei maw ti tal in ka hmuhter ko hna ti in thla ka cam lengmang. 11 Zeicahtiah nanmah hmuh cu kaa ngaih hringhran i nanmah he thlarau thluachuahnak i hrawm i nanmah thazang pek cu ka duh ngaingai mi a si. 12 Ka chim duh mi cu, pakhat le pakhat kan i bawm cio hnga, ka zumhnak nih nannih an bomh hna hnga i nan zumhnak nih kei zong a ka bomh ve hnga, ti hi a si. 13 Ka u le ka nau hna, hihi rak ka hngalh piak u ti kan duh hna: nanmah tlawn hi voi tampi kaa tiim tawn, sihmanhsehlaw zei nih dik a ka donh zungzal. Jentail mi dang hna lak i lungthleng mi ka um ter hna bantukin nannih lak zong i lungthleng mi umter ve cu ka duh hringhran mi a si. 14 Miphun vialte hna sinah leiba ka ngei, a fim mi si hna seh, a hrut mi si hna seh, cathiam mi si hna seh, cathiam lo mi si hna seh, an dihlak cungah leiba ka ngei. 15 Cucaah cun nannih Rom khua i a um mi sin zong i thawngṭha chim ka duhnak cu a si. 16 Thawngṭha hi ka zumh hrimhrim ko, zeicahtiah a zummi vialte hna caah Pathian khamhnak hmual a si, Judah mi hna caah a si hmasa i cun Jentail mi hna ca zong ah a hung si. 17 Cucu zeitindah a hung si ti ahcun, thawngṭha nih cun Pathian nih zeitindah minung kha Amah he a remter hna ti kha a langhter i Cathiang nih, “Zumhnak thawngin Pathian he aa rem mi cu an nung lai,” a ti bang khan, Pathian he i remnak cu a hram in a dong tiang zumhnak thawngin a si.
FEBRUARY 11-17
BAIBAL AH THUHMI RO HNA | ROM 4-6
“Pathian Nih A Kan Dawt Kha A Langhter”
(Rom 5:8) Asinain Pathian nih cun zeitluk in dah a kan dawt kha hi ti hin a langhter: kannih cu misual kan si ko rih lio ah hin Khrih cu kan caah a thi.
(Rom 5:12) Sualnak cu mipa pakhat thawngin vawlei cungah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.
Pathian Nih A Kan Dawt Kha A Langhter
5 Paul nih mah kong kha hitin chim: “Sualnak cu mipa pakhat thawngin vawlei cungah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) Minung nunnak zeitindah aa thawk kha Pathian nih a ṭialter hna caah misual kan hung sinak kong kan hngalh. Jehovah nih Adam le Evi a ser hna. Sertu cu a tlingmi a si i a kan hringsortu Adam le Evi zong mitling an si. Pathian nih nawlbia pakhat a pek hna i mah nawlbia nan buar ahcun nan thi lai tiah a ti hna. (Gen. 2:17) Asinain a tlarimi Pathian lamhruainak an zulh lonak thawngin Nawlbia Petu le Cungnung bik kha an hlawt.—Deut. 32:4, 5.
(Rom 5:13, 14) Nawlbia a um hlan ah khan vawlei cungah hin sualnak a rak um ko, sihmanhsehlaw nawlbia a rak um lo nak hmun ah khan cun sualnak cu sual ah relpiak an si lo. 14 Asinain Adam caan in Moses caan tiang thihnak nih mi vialte kha a uk dih hna. Adam nih Pathian nawlbia a buarnak thawngin a tuah mi sualnak bantuk a tuah lo mi zong kha a uk ko hna. Adam cu a ra lai ding mi hmanthlak a rak si.
Pathian Nih A Kan Dawt Kha A Langhter
6 Adam cu sualnak a tuah hnu lawng ah fa a ngeih caah a tefa vialte cu misual an si dih. Annih cu Pathian nih Adam a pekmi nawlbia bantuk pek an si lo, nawlbia zong an buar lo. (Gen. 2:17) Asinain, Adam tefa nih sualnak ro an co. Cucaah sualnak le thihnak nih a uk hna, Pathian nih Israel mi nawlbia a pek hna tikah misual an si fiangte in an hun hngalh. (Rom 5:13, 14 rel.) Sualnak cu nulepa sinin comi zawtnak bantuk a si. Asinain, chungkhar ah nulepa ngeihmi zawtnak kha fale dihlak nih cun an co lo, nain sualnak tu cu mikip nih kan co. Cucaah thihnak cu hrial khawh a si lo. Sualnak ro kan comi hin luatnak lam a um maw?
(Rom 5:18) Cucaah cun sualnak pakhat tuahmi nih mi vialte kha sual a phawt hna bantuk in dinnak pakhat tuahmi nih mi vialte kha a luatter hna i nunnak a pek hna.
(Rom 5:21) Cucaah sualnak nih cun thihnak kha hmang in a kan uk bantuk in Pathian vel nih cun dinnak kha hmangin a kan uk i Jesuh Khrih kan Bawipa thawngin zungzal nunnak ah a kan kalpi.
Pathian Nih A Kan Dawt Kha A Langhter
9 ‘Miding tiah a ti hna’ tiin lehmi Greek biafang cu zei sullam dah a ngeih? Mah kong kha Baibal lettu pakhat nih hitin a ṭial: “Mah bia cu biaceihnak i hmanmi bia he aa pehtlai . . . Mi pakhat cung i Pathian hmuhning aa thlenmi khi a si. Mah biafang cu a ding lo tiah sualphawtmi pa cu Pathian nih bia a ceih tikah a luatter timi phun sullam a ngei.”
10 Ding tein “vawleicung dihlak bia a ceihtu” nih a dinglomi pa kha zei thawng in dah a luatter? (Gen. 18:25) Pakhat cu Pathian nih a fapa ngeihchunte vawlei ah a thlahmi thawngin a si. Jesuh cu tukforhnak, nihsawhnak le serhsatnak a tong nain a Pa duhnak tling tein a tuah. Tung cung i thlai a si tiang zumhfek tein a um. (Heb. 2:10) Jesuh nih a tlingmi a nunnak a peknak thawngin Adam tefa kha sualnak le thihnak in a tlanh hna.—Matt. 20:28; Rom 5:6-8.
Thlaraulei Lungvar Hna kha Hlathlai
(Rom 6:3-5) Khrih Jesuh he i pehtlaihnak chung i kan i hnim ah khan a thihnak he i pehtlaihnak chungah kan i hnim ti kha nan philh dahra? 4 Ti chung i hnim kan vung si ah khan amah he vuiṭi kan si a si i a thihnak ah khan kan thi ve; cu bantuk ṭhiamṭhiam in Khrih cu Pa sunparnak nih a thawhter bang khan kannih zong nunnak thar ah kan nung ve lai. 5 A thihnak ah amah he kan thihṭi ahcun, nunnak i thawhter a si nak ah kannih zong thawhṭi ter kan si ve lai.
Rom Baibal Chungin Langhternak
6:3-5, NW—Khrih Jesuh chungah tipil in le a thihnak chungah tipil in a sullam cu zeidah a si? Jehovah nih Khrih zultu pawl kha thiang thlarau in chiti a thuh hna tikah Jesuh he an i kom i Khrih Lu a sinak, Khrih pum a simi Khrihfabu chungmi an hung si. (1 Kor. 12:12, 13, 27; Kol. 1:18) Mah hi Khrih Jesuh chungah tipil in timi sullam a si. Chiti thuhmi Khrihfa hna ‘[Khrih] thihnak chungah tipil an ing’ ti tikah an nunnak ah mah ṭhatnak hlaw in an nung i vawlei cung zungzal nunnak an hlawt kha a chim duhmi a si. Cucaah an thihnak cu tlanhnak man ca pekmi thihnak a si lo nain Jesuh a thihnak bantukin raithawinak phun khat a si ve. Khrih thihnak chungah tipil an inmi cu an thih tikah a tlin cang caah van nunnak ah an thoṭhan.
(Rom 6:7) Cucu zeitindah a si ti ahcun minung cu a thih tikah cun sual ṭhawnnak chung khan a luat.
w14 6/1 11 ¶1
A Thi Cangmi Pupa Hna Caah Zei Ruahchannak Dah A Um?
Mithi pawl an thawhṭhan tikah an thih hlan i an tuahsernak ningin biaceih an si lai maw? An si lai lo. Rom 6:7 nih hitin a ti: “Cucu zeitindah a si ti ahcun minung cu a thih tikah cun sual ṭhawnnak chung khan a luat.” A ding lomi hna cu an sualnak ruangah an thi cang. Cucaah an thih hlan ah an rak tuahmi cungah si loin an thawhṭhan hnuah an tuahmi cungah i hngat in biaceih an si lai. Zei ṭhatnak dah an hmuh lai?
Baibal Relnak
(Rom 4:1-15) A kan hringsortu kan pu Abraham kong kha tah zeitindah kan ti kun lai? Zeitindah a rak si kha? 2 A tuah mi thil hna thawngin Pathian he remnak a hmuh a si ahcun, i porhlawt awk a ngei hnga. Sihmanhsehlaw Pathian hmai ah cun zeihmanh i uan awk a ngei lo. 3 Cathiang nih, “Abraham nih khan Pathian a zumh i cu a zumhnak ruangah cun Pathian nih miding bantuk in a cohlan,” tiah a ti. 4 Rian a ṭuan mi cu ṭuan man pek a si tawn; a nihlawh cu laksawng a si tiah ti piak a si bal lo, a ṭuan man i a hmuh mi a si. 5 Sihmanhsehlaw rianṭuannak si lo in zumhnak tu a ngei mi nih cun, Pathian nih a sual mi cu a sual lo ah a chiah hna tiah a zumh i cu a zumhnak cu Pathian nih amah he remternak caah a lak piak mi cu a si. 6 Pathian nih rianṭuannak tel lo in, mi ding bantuk ah a cohlan mipa aa lawmhnak kong David nih a chim tikah, hihi pei a sullam a chim duh mi cu a rak si cu: 7 “Pathian nih an ṭhatlonak a ngaihthiam i an sualnak a khuhpiak mi hna cu an va lawm dah! 8 Pathian nih sualnak a tuah mipa, a sualnak sual i a rel piak lo mipa cu a va lawm dah!” 9 David nih a chim mi lunglawmhnak hi cuarpar tan mi hna ca lawng ah maw a si? Si hlah. Cuarpar tan lo mi hna ca zong ah a si ko. “Abraham nih Pathian a zumh i cu a zumhnak ruangah cun Pathian nih miding bantuk in a cohlan,” ka ti mi kha ka nolh rih lai. 10 Cucu zeitik ah dah a rak si? Abraham kha cuarpar aa tan hlan ah maw aa tan hnu ah dah? Aa tan hlan ah a si, aa tan hnu ah a si lo. 11 A cuarpar aa tan cu a hnu ah a si, Abraham nih a cuarpar aa tannak cu a zumhnak ruangah Pathian nih cuarpar aa tan hlan in miding in a cohlan cang ti hmelchunhnak caah a si. Cucaah Abraham cu, Pathian a zum i an cuarpar an i tan lo nain Pathian nih mi ding in a cohlan mi vialte hna thlarau lei an pa a si. 12 Cun cuarpar tan mi hna pa zong a si ve ko, cuarpar an i tan ruangah si lo in kan pu Abraham nih cuarpar aa tan hlan i a zulh mi nunning, zumhnak nunning khan an nun ve caah a si. 13 Pathian nih Abraham le a tefa hna cu, vawlei hi Abraham ta a si lai, ti in bia a kamh hna. Hi ti in bia a kamh hna cu Abraham nih khan Nawlbia kha a rak zulh caah a si lo, sihmanhsehlaw Pathian kha a zumh i Pathian nih miding in a cohlan ca tu ah khan a si. 14 Zeicahtiah Nawlbia a zul mi lawng kha rocotu an si a si ahcun, zumhnak cu a kawlawngpi men a si ko hnga i biakamh mi thil cu pakpalawng men a si ko hnga, 15 Nawlbia nih cun Pathian thinhunnak lawng kha a chuahpi ko; nawlbia a um lo nak hmun ah cun nawlbia buar zong a um kho ve lo.
FEBRUARY 18-24
BAIBAL AH THUHMI RO HNA | ROM 7-8
“‘Ngangngan Ngaiin Na Hngak’ Maw?”
(Rom 8:19) Pathian nih a fale a phuan hna lai cu sermi thil vialte nih ngangngan ngaiin an hngak ko.
Luatnak taktak Hmuh Awkah Jehovah i hruaiter
17 Jehovah nih vawleicung i a ummi a miphun a pek hna laimi luatnak kong kha Paul nih a ṭial. Hitin a ṭial: “Pathian nih a fale a phuan hna lai cu sermi thil vialte nih ngangngan ngaiin an hngak ko.” Hiti zong in a ṭial: “Sermi thil vialte hi thutnak sal sinak khan luatter an si lai i Pathian fale hna luatnak a sunglawimi kha an i hrawm te lai.” (Rom 8:19-21) “Sermi thil vialte” cu vawleicung zungzal nunnak aa ruahchan i chiti thuhmi “Pathian fale hna” phuan an sinak in ṭhatnak a hmu hnga dingmi kha an si. Pathian nih a fale a phuan hna lai caan cu Khrih le chiti thuhmi hna nih mi ṭhalo vialte an hrawh hna i “mibu nganpi” kha vawlei thar i an luhpi hna tikah aa thawk te lai.—Biat. 7:9, 14.
(Rom 8:20) Sermi thil vialte cu anmah duh caah si loin Pathian nih si u a ti hna thawngin santlailo pakpalawng ah an cang dih, asinain ruahchannak cu a um zungzal ve ko.
Kan I Ruahchanmi Ah I Lawmhnak
11 Jehovah nih minung kha biakammi ‘tefa’ thawng in Satan Khuachia kut in kaan luatter hna lai tiah bia a kamh hna lio ah “ruahchannak” a pek hna. (Gen. 3:15; Biat. 12:9) “Tefa” ah a biapi bik cu Jesuh Khrih a si. (Gal. 3:16) Jesuh thihnak le thawhṭhannak nih minung kha sualnak le thihnak in luat ding ruahchannak a ngeihter hna. Mah ruahchannak cu van ah a ummi Pathian fale, chiti thuhmi pawl ‘phuan an si lainak’ he aa pehtlai. Annih cu tefa a pahnihnak an si. Satan vawlei ṭhalo Khrih nih a hrawhmi an bawmh tikah Khrih he siangpahrang rian an ṭuanṭi kha phuan a si lai. (Biat. 2:26, 27) Satan vawlei hrawh a si tikah harnak nganpi chung in a luatmi tuudang cu khamhnak an hmu lai.—Biat. 7:9, 10, 14.
(Rom 8:21) Cu ruahchannak cu zeidah a si tiah, ni khatkhat cu sermi thil vialte hi thutnak sal sinak khan luatter an si lai i Pathian fale hna luatnak a sunglawimi kha an i hrawm te lai.
Kan I Ruahchanmi Ah I Lawmhnak
12 Khrih kum thongkhat uknak ah luatnak taktak kan hmu lai. Mah caan chungah “Pathian fale” cu phun dang in phuan an si ṭhan lai. Khrih he tlangbawi an ṭuanṭi lai i minung kha tlanhnak man in ṭhatnak hmuh awk an bawmh hna lai. Pathian Pennak nih vawlei a uk tikah nawlngaimi minung cu duhsah in “thutnak sal sinak khan luatter an si lai.” Cu tikah sualnak le thihnak in an luat cang lai. Kum thongkhat chung le kum thongkhat dih hnu hneksaknak ah zumhfek tein an um ahcun, an min cu “nunnak cauk” ah zungzal in aa ṭial lai. “Pathian fale hna luatnak a sunglawimi” kha an hmu lai. (Biat. 20:7, 8, 11, 12) Mah cu a ṭha tukmi ruahchannak a si.
Thlaraulei Lungvar Hna kha Hlathlai
(Rom 8:6) Nan lungthin cu minung sining nih a uk ahcun a phichuak cu thihnak a si; nan lungthin cu thlarau nih a uk ahcun a phichuak cu nunnak le daihnak a si.
Naa Cinken Maw?
‘Minung sining nih a ukmi’ le ‘thlarau nih a ukmi’ cu zeitindah an i dan? (Rom 8:6)
Minung sining nih a ukmi nih pumsa duhnak kha biapi ah a chiah i mah kong lawngte kha a chim. Thlarau nih a ukmi nih cun Pathian he aa pehtlaimi le Pathian ruahnak kha biapi ah a chiah. Thlarau nih a ukmi Khrihfa pakhat nih thiang thlarau lamhruainak kha a zulh. Minung sining nih a uk ahcun a phichuak cu thihnak a si. Thlarau nih a uk ahcun a phichuak cu nunnak le daihnak a si.—w16.12, pp. 15-17.
(Rom 8:26, 27) Cu bantuk ṭhiamṭhiam cun, a der ngaingaimi kan si caah, thlarau zong cu kanmah bawmh awkah khan a ra. Zeiti hin dah thla kan cam awk a si ti hmanh kan hngalh lo caah bia in chim khawh lomi hramainak in thlarau nih Pathian cu a kan nawlpiak. 27 Thlarau nih cun Pathian cu a mi hna aiawh le amah Pathian duhning khan a nawl caah, minung lungchung a hmutu Pathian nih cun thlarau ruahnak cu zeidah a si ti kha a hngalh.
w09 11/15 7 ¶20
Na Thlacammi Nih Na Kong Zeidah A Chim?
20 Khua caan ah pumpak thlacam tikah cam awk kan hngal men lai lo. Paul nih hitin a ṭial: “Zeiti hin dah thla kan cam awk a si ti hmanh kan hngalh lo caah bia in chim khawh lomi hram-ainak in thlarau nih Pathian cu a kan nawlpiak . . . minung lungchung a hmutu Pathian nih cun thlarau ruahnak cu zeidah a si ti kha a hngalh.” (Rom 8:26, 27) Jehovah nih thlacamnak tampi kha Baibal ah a ṭialter hna. Baibal chung thlacamnak kha kan thlacamnak in a cohlan i a kan leh. Pathian nih a kan hngalh lengah a thlarau lamhruainak in Baibal a ṭialmi hna an ṭialmi a sullam kha a hngalh. Thlarau nih kan caah a kan “nawlpiak” tikah Jehovah nih kan thlacamnak kha a kan leh. Baibal kha ṭha tein kan hngalh tlukin thlacam awk kha kan lungah a hung chuak lai.
Baibal Relnak
(Rom 7:13-25) Cu ti ti tikah cun a ṭha mi nih ka thihnak a tlunter ti a si hnga maw? Si hlah. Thihnak a tluntertu cu sualnak a si. Sualnak nih cun, sualnak a si ning taktak kha a langh nakhnga ṭhatnak kha i hman riangmang in ka cungah thihnak kha a tlunter. Cucaah nawlbia thawng khan sualnak a sual zia cu a lang chinchin. 14 Nawlbia cu thlarau lei thil a si, cucu kan hngalh ko. Sihmanhsehlaw kei cu ka si lo, sualnak sal ah a zorh in zorh mi tu ka si. 15 Ka tuah mi hi a sullam ka hngal kho hna lo, zeicahtiah tuah ka duh mi kha ka tuah hna lo i tuah ka duh lomi tu kha ka tuah hna. 16 Tuah ka duh lo mi ka tuah tikah hin, Nawlbia cu a hmaan ko ka ti ve ti kha ka langhter. 17 Cucaah cu thil a tuahtu ngaingai cu keimah kha si lo in ka chung i a um mi sualnak tu kha a si. 18 Ka chungah hin ka minung sining ah hin ṭhatnak a um lo ti kha ka hngalh. Zeicahtiah ṭhatnak tuah duhnak kha ka chungah um hmanhsehlaw ṭhatnak cu ka tuah kho lo. 19 Tuah ka duh mi ṭhatnak kha tuah lo in tuah ka duh lo mi ṭhatlonak tu kha ka tuah tawn. 20 Tuah ka duh lo mi kha ka tuah ahcun, cu nih cun cu thil a tuahtu cu keimah kha si lo in ka chung i a um mi sualnak tu kha a si, ti kha a langhter. 21 Cucaah thil umtuning cu hi ti hin a si ti kha ka hngalh: a ṭha mi thil tuah ka duh tikah khan kaa thim khawh mi cu ṭhatlonak lawng kha a si ko. 22 Ka chunglei mi cu Pathian phung ah khan aa lawm; 23 sihmanhsehlaw ka chung i phung dang a rak um ve kha ka hngalh—cu phung cu ka lung nih a ṭha a timi phung a rak dohtu kha a si. Cu phung nih cun, ka pum chung i rian a ṭuanmi sualnak phung sal ah khan a ka ser. 24 Mi lungrethei ka va si dah! Thihnak i a ka kalpitu pum chung hin aho nih dah a ka khamh lai? Pathian lawnglawng nih kan Bawipa Jesuh Khrih thawngin a ka khamh lai. 25 Pathian cu lawm ko u sih. Cucaah ka sining cu hihi a si ko: keimah lawngin i ti ahcun, ka lung lawng in Pathian nawl cu ka zulh khawh, ka minung sining tu cu sualnak phung kha a zul ko.
FEBRUARY 25–MARCH 3
BAIBAL AH THUHMI RO HNA | ROM 9-11
“Oliv Kung Tahchunhnak”
(Rom 11:16) Changreu hlum khat chung i a dar hmasa bik cu Pathian sinah pek a si ahcun, changreu cu a hlum ningin amah ta a si; cun thingkung a hram hna cu Pathian sinah pek an si ahcun a nge zong amah ta an si.
‘Pathian Fimnak Hi A Va Thuk Hringhran Dah!’
13 Lamkaltu Paul nih Abraham tefa a si hngami kha langhternak oliv kung nge he a tahchunh hna. (Rom 11:21) Cinmi oliv kung nih Pathian nih Abraham he biakamnak a tuah lio i aa tinhmi a tlinnak kha a langhter. Thingkung hram cu a thiang i, mah nih thlarau Israel nunnak a petu Jehovah kha a langhter. (Isa. 10:20; Rom 11:16, NW) A kungpi nih Abraham tefa i a biapi bik a simi Jesuh kha a langhter. A nge nih Abraham tefa a pahnihnak ah aa telmi hna kha a langhter.
(Rom 11:17) Cinmi oliv kung a nge cheukhat cu khiah an si i ramlak i amah khoh in a khomi oliv kung a nge kha cinmi kung ahcun peh a si cang. Cu ramlak oliv kung bantuk cu nannih Jentail mi hi nan si; atu cu Judah mi hna ṭhawnnak le nunning kha nan i hrawm ve cang.
(Rom 11:20, 21) Cucu a hmaan ko. Annih cu an zumh lo ruangah khiah an si, nannih cu nan zumh ruangah nan umnak hmun ah nan um. Sihmanhsehlaw cu kong ah nan lung puam sual hlah u; a ṭih in ṭih lehlam u. 21 Thingkung nge taktak bantuk a simi Judah mi cu Pathian nih a zuah hna lo ahcun nannih tah a kan zuah hlei hnga tiah nan i ruat maw?
‘Pathian Fimnak Hi A Va Thuk Hringhran Dah!’
15 Jehovah nih aa tinhmi tlinter awkah zeidah a tuah? Cinmi oliv kung i khiahmi a nge zaka ah ramlak oliv kung a nge kha peh an si tiah Paul nih a fianter. (Rom 11:17, 18 rel.) Tahchunhnak ah, Rom Khrihfabu i a ummi chiti thuhmi Jenṭail mi hna cu langhternak oliv kung ah pehmi an si. Cuticun Abraham tefa an hung si. Annih cu hlan ahcun ramlak oliv kung nge bantuk an rak si i Abraham biakamnak ah telnak nawl an hmu lo. Asinain thlarau Judah miphun an si khawh nakhnga Jehovah nih lam a hunpiak hna.—Rom 2:28, 29.
(Rom 11:25, 26) Ka u le ka nau hna, biathli pakhat nan hngalh awk i ka duhmi a um. Cu nih cun ka fim tiah i ruat loin an umter hna lai. Cu biathli cu hihi a si: Israel mi lung khohkhal i an um hi zungzal ca in a si lo, Jentail mi an dihlak in Pathian sin i an rat caan tiang ca lawng a si lai. 26 Cun Israel mi vialte khamh an si lai cu hitihin a si lai: Cathiang nih, “Zion in Khamhtu kha a ra lai i Jakob tefa hna chungin ṭhat lonak vialte kha a hloh lai.
‘Pathian Fimnak Hi A Va Thuk Hringhran Dah!’
19 Thlarau Israel mi he aa tlai in Jehovah tinhmi cu khuaruahhar in a tling. (Rom 2:29) Paul nih a chim bang in “Israel mi vialte khamh an si lai.” (Rom 11:26) Jehovah rikhiahmi caan ah “Israel mi vialte,” thlarau Israel miphun cu an dihlak in vancung ah siangpahrang le tlangbawi an ṭuan lai. Jehovah tinhmi tlin lo awkah zeihmanh nih a kham kho lo.
Thlaraulei Lungvar Hna kha Hlathlai
(Rom 9:21-23) A ngaingai ti ahcun um a sertu nih khan tlak cu a duhduh in hmannak nawl a ngei ko, tlak hlum hlum khat chung khan um pahnih a ser khawh ko hna, pakhat cu sawhsawh men i hman lo dingah a ser i pakhat cu sawhsawh men i hman awkah a ser ko. 22 Cu bantuk ṭhiamṭhiam in Pathian tuahmi zong cu a si ko. A thinhunnak le a ṭhawnnak kha langhter a duh. Cucaah hrawh awk a simi a thin a huntertu hna cungah khan lungsaunak a ngei. 23 Cun a sunglawimi a sunparnak zong kha langhter a duh i a kan zaangfahmi kannih cungah khan cu a sunparnak cu a kan toih, kannih cu a sunparnak hmu dingin a kan timhmi cu kan si.
Jehovah Sersiamnak Kha Cohlang
5 Mi pakhat cu a lung a khon i umsertu Jehovah sersiamnak a cohlan lo ah tah zeitin? Jehovah nih umsertu in a nawlngeihnak kha zeitindah a hman lai? Umsertu caah tlak cu a duhmi um phun in ser awkah a har ahcun a dang um ah a ser khawh asiloah a hlonh khawh. Umsertu nih tlak kha ṭha tein a sersiam lo caah cutin a si tawn. Jehovah tu nih cun minung kha ṭha tein a sersiam zungzal hna. (Deut. 32:4) Mi nih Jehovah sersiamnak kha an duh lo ahcun mah cu anmah palh a si ko. Mi nih an lehrulh ning cungah i hngat in Jehovah nih a sersiam hna ning kha a thlen. A nawl an ngaih ahcun a caah man ngeimi an hung si. Tahchunhnak ah, chiti thuhmi hna cu “zaangfahmi” um, a “sawhsawh men i hman lo dingah” sermi an si. Asinain Pathian cawnpiaknak a ngai lomi hna cu hman awk a tlak lomi “a thin a huntertu” um an si.—Rom 9:19-23.
(Rom 10:2) Pathian a ṭanh ngaingaimi an si cu tehte ka khan khawh, sihmanhsehlaw cu an ṭanhning cu palh ṭanh a rak si.
it-1 1260 ¶2
Nahchuakmi, Nahchuahnak
A Palhmi Lungthawhnak. A caan ah a kong pakhatkhat he aa tlaiin lungthawhnak asiloah nahchuahnak kan ngei men lai, asinain mah cu a palhmi a si i Pathian nih a duh lo. Kumzabu pakhatnak i Judah mi tampi cu cutin an rak si. Moses Nawbia an zulhnak thawngin dinnak kha an i ruahchan. Asinain a hmanmi hngalhnak an ngeih lo caah an lungthawhnak cu a palh tiah Paul nih a ti. Cucaah annih nih Pathian sinin a rami dinnak taktak kha an hmu lo. Annih nih an palhnak kha an hmuhthiam a hau, dinnak an hmuh nakhnga Khrih thawngin Pathian sinah an kir ṭhan a hau i zulh a hau ti lomi Nawlbia in an luat a hau. (Rom 10:1-10) Tarsas khuami Saul cu mah bantuk mi a rak si. Judah biaknak kha a ṭanh tuk caah ‘Pathian Khrihfabu kha a rak hrem hna i hrawh awkah fakpi in a rak i zuam.’ (Gal. 1:13, 14; Fil. 3:6) Asinain Judah biaknak cungah a ngeihmi lungthawhnak cu a palhmi a si. Paul nih a hmaanmi lungput a ngeih caah Jehovah nih Khrih hmangin a hmaanmi biaknaklei ah a merternak thawngin a cungah zaangfahnak a rak langhter.—1 Tim. 1:12, 13.
Baibal Relnak
(Rom 10:1-15) Ka u le ka nau hna, ka phun hawi mi hi khamh si hna seh ti cu ka lungthin dihlak in ka duh hringhran ko. An caah Pathian sinah thla ka cam lengmang. 2 Pathian a ṭanh ngaingaimi an si cu tehte ka khan khawh, sihmanhsehlaw cu an ṭanhning cu palh ṭanh a rak si. 3 Pathian nih zei lam in dah minung cu amah he a remter hna ti kha an hngal lo i anmah tu nih khan cu lam cu an i ser; cucaah Pathian nih minung cu amah he a remter hnanak lam kha an cohlang duh lo. 4 Zeicahtiah Khrih nih Nawlbia cu a donghnak a phakter cang i cucaah a zummi paoh nih cun Pathian he remnak kha an hmuh. 5 Moses nih Nawlbia zulhnak thawngin Pathian he remnak hmuhnak kong ah a chimmi cu hitihin a si: “Nawlbia nih tuah u a timi a tuahmi paoh cu, cu an tuahnak thawng cun an nung lai,” a ti. 6 Asinain zumhnak thawngin Pathian he i remnak kong ah cun hitihin ti a si: “Nangmah le nangmah cu, ‘Ahodah vancung ah khin a hung kai lai?’” i ti hlah (cu a sullam cu Khrih kha run ṭumpi awkah ti a si). 7 Cun, “‘Ahodah mithi khua ah a vung ṭum lai,’” ti zongah i ti fawn hlah (cu sullam cu Khrih kha mithi hna sinin hun kaipi awkah ti a si). 8 Zumhnak thawngin Pathian he i remnak kong ah chimmi cu hiti tu hin a si. “Pathian bia cu nan pawngte ah a um ko, nan lei cung le nan lung chungah a um ko,”—hi bia hi zumhnak bia a si kan timi bia cu a si. 9 Nan kaa in, “Jesuh cu Bawipa a si,” tiah nan ti i amah cu Pathian nih mithi hna sinin a thawhter tiah nan lung in nan zumh ahcun, khamh nan si lai. 10 Zeicahtiah kan lung in kan zumh i Pathian he i remnak kan hmuh; kan kaa in kan chim i khamh kan si. 11 Cathiang nih, “Amah a zummi paoh cu ningzahnak an ing lai lo,” tiah a ti. 12 A zummi paoh, a ti, zeicahtiah Judah mi le Jentail mi tiin i thleidannak zeihmanh a um lo; Pathian cu kan dihlak Bawipa a si ko i amah a au mi paoh cu thluachuahnak tampi in a pek ko hna. 13 Cathiang nih, “Bawipa min a aumi paoh cu khamh an si lai,” a ti bangin a si taktak ko. 14 Asinain, an zumh lo ahcun zeitindah a min cu an auh khawh lai? Cun bia kha an theih lo ahcun zeitindah an zumh khawh lai? Cun bia cu chimh an si lo ahcun zeitindah an theih khawh lai? 15 Cun lamkaltu kha an thlah hna lo ahcun zeitindah bia cu thanh a si khawh lai? Cathiang nih, “Thawngṭha a chimtu hna ke cu a vaa dawh dah,” a ti bantuk khan a si taktak.