Nunning le Rianṭuannak Tuahchunhnak Cauk caah Cherhchanmi
NOVEMBER 2-8
BAIBAL AH THUHMI RO HNA | EXODUS 39-40
“Moses Nih Lamhruainak Kha Ṭha Tein A Zulh”
(Ex. 39:32) Cuticun pumhnak thlam rian vialte cu liim an si. BAWIPA nih Moses a chimh bantuk te khan Israel mi nih cun an tuah.
Jehovah Nih Aan Hngal Maw?
13 Moses tu cu “vawleicung mi vialte lakah lungnem bik a si.” (Nam. 12:3) Jehovah lamhruainak a zulhnak thawngin lungnemmi le toidormi a si a langhter. (Ex. 7:6; 40:16) Anih cu Jehovah rianṭuan ning kong ah a lung a tling lo asiloah Jehovah nih tuah a fialmi ruangah a thin a hung timi Baibal ah a um lo. Tahchunhnak ah, Jehovah nih puanthlam sak tikah puan zei zawng hman ding a si le bing zeizat thlaih ding a si ti bantuk tiang, zulh ding a dikthliar in a chimh. (Ex. 26:1-6) Bu zohkhenhtu pakhat nih cutin khatin tuah ding tiah a dikthliar in aan chimh ahcun a caan ah na lung a rawk kho men. Jehovah cu a tlingmi a si nain a salle kha a zumh hna i rian a pek hna. Thil kong a dikthliar in a chimh hna cu a ruang a um caah a si. Jehovah nih lamhruainak a hmete tiang a chimh tikah Moses cu a thin a hung lo, Jehovah nih a ka upat lo i zalonnak zong a ka pe lo tiah a ruat lo. Pathian nih “a chimh bantuk te khan” Moses nih rianṭuantu pawl kha a tuahter hna. (Ex. 39:32) Zeitluk in dah aa toidor! Moses nih mah cu Jehovah rian a si le amah cu mah rian liim awkah hmanmi a si kha a hngalh.
(Ex. 39:43) An tuahmi vialte kha Moses nih ṭha tein a zoh i BAWIPA nih a chimh ning tein an tuah ti kha a hmuh. Cucaah Moses nih thluachuah a pek hna.
(Ex. 40:1, 2) BAWIPA nih Moses cu a thawh i, 2 “Thla khatnak thla, nikhatnak ni ah Pathian umnak thlam pumhnak thlam cu na dirter lai.
(Ex. 40:16) BAWIPA nih a fial bantuk tein zeizong vialte kha Moses nih a tuah dih.
Zei Zong Vialte Ah Zumhawktlak Na Si Maw?
3 Hebru 3:5 nih ‘Moses cu rianṭuantu zumhawktlak a rak si’ tiah a ti. Profet Moses cu zeinihdah zumhawktlakmi a rak siter? Puan biakinn sak tikah “BAWIPA nih a fial bantuk tein zeizong vialte kha Moses nih a tuah dih.” (Exodus 40:16) Jehovah a biatu hna in nawl ngaiin a rian kan ṭuannak thawngin zumhawktlakmi kan si kha kan langhter. A harmi hneksaknak ton tikah Jehovah cungah zumhfekmi si aa tel. Asinain, hneksaknak nganpi kan teinak lawnglawng hi zumhawktlak kan sinak biakhiaktu a si lo. “Thil hmete ah zumhawktlak a simi cu thli ngan zongah zumhawktlak an si tawn, thil hmete ah a hrokhrol mi cu thil ngan zongah an hrokhrol tawn.” (Luka 16:10) Thil hmete si dawh a simi hmanhah zumhawktlak kan si peng lai.
Thlaraulei Lungvar Hna kha Hlathlai
(Ex. 39:34) tuukawng phaw sii sen in buhmi in sermi a khuh, saphaw ṭha phun in sermi a khuh, phentu puanzar,
it-2 884 ¶3
Saphaw (Saihrem phaw)
Israel mi nih an hmuh khawh ning. Baibal ah taʹchash saphaw tiah a timi cu saihrem phaw a si ahcun Israel mi nih khoika in dah an lak timi biahalnak a chuak. Saihrem pawl cu Arctic le Antarctic hmun hna ah an um tawn nain cheukhat nih a lummi khuacaan kha an duh. Atu ah Mediterranean Rili le a dang a lumnak hmun hna ah saihrem cheukhat an um. Kumzabu tampi chungah minung ruangah saihrem cu a tlawm thluahmah cang. Baibal chan ahcun Mediterranean Rili le Rili Sen ah tampi um dawh an si. 1832 ah chuahmi Dictionary pakhat nih “Rili Sen, Sinai vawlei fonghlei pawngkam ah a ummi tikulh hmetete ah saihrem tampi hmuh khawh a si” tiah a ti.—Calmet’s Dictionary of the Holy Bible, cahmai 139.
(Ex. 40:34) Pumhnak thlam cu minmei nih a huh i BAWIPA sunparnak kha a chung cu a khat.
Na Rian A Hmutu Um Cu A Biapi Maw?
Puan thlam sak a dih tikah ‘pumhnak thlam cu Jehovah sunparnak in a khat.’ (Ex. 40:34) Mah nih Jehovah mithmai ṭha an hmu ti kha a langhter. Mah lioah Bezalel le Oholiab cu zeitindah an um lai? An tuahmi thilri hna cungah an min khenh a si lo nain an i zuamnak Pathian nih thluachuah a pek timi hngalhnak nih a lawmhter tuk hna lai. (Ptb. 10:22) Mah hnu kum saupi tiang an sermi thilri hna hman a simi an hmuh tik zongah an i lungsi tuk lai. Bezalel le Oholiab nih vawlei thar i an thawh ṭhan tikah puan biakinn cu a hmaanmi biaknak caah kum 500 hrawng hman a si ti an hngalh lai i an i lawm tuk lai!
Baibal Relnak
(Ex. 39:1-21) Tuuhmul a dum, a sendung le a senmi khan tlangbawi nih biakinn chung riantuannak ca i a hman ding puan kha an ser hna. BAWIPA nih Moses a chimh ning khan Aaron ca puan thiang cu an ser hna. 2 Angki thiang cu sui le tuuhmul a dum, a sendung le a sen a simi le khumla hrual hmangṭhia khan a ser. 3 Sui tlap kha pan tein an den i an riam hnuah tuuhmul a dum, sendung le a senmi le khumla hrual hmangṭhia in tahmi puan ah khan an tah chih hna i thawi in dawh tein an ṭamh. 4 Angki cu hnam a kap veve ah an sih i liang ah bah khawh a si. 5 Dawh tein tahmi taisawm cu angki he cun peh chih a si i cu taisawm cu angki ser bantuk khan ser a si ve, BAWIPA nih Moses a fial bantuk te khan ser a si ve, BAWIPA nih Moses a fial bantuk khan sui le tuuhmul a dum, sendung le a senmi le khumla hrual hmangṭhia khan ser a si. 6 Karnelian lungvar kha an ser hna i sui tlangkawm chungah khan an benh hna, min khenhnak bantukin an ṭial hna i an cungah cun Israel fapa hna an min kha an ṭial. 7 Tlangbawi angki liang bahnak hnam ah cun an benh hna. Cu lungvar cu Israel fapa hna caah khan lung pemtertu lungvar an si i BAWIPA nih Moses a chim bantuk te khan tuah a si. 8 Ṭangbenh cu, angki bantuk khan, dawh tein a ser. Sui le tuuhmul a dum, sendung le a senmi le khumla hrual hmangṭhia in an ser. 9 Tungvang palh in an ser i bil khawh ding a si; bil tikah a tung lehmah pakua a si i a vang lehmah pakua a si. 10 A cungah khan lungvar tlar li in an benh hna: a tlar hmasa bik ahcun rubi le topaz le karnet an si; 11 a tlar hnihnak ahcun emeral, safaiar le daimon an si; 12 a tlar thumnak ah jasin le agate le amethist an si, 13 a tlar linak ah beril le karnelian le jasper an si. Sui tlangkawm chungah ṭhutter an si. 14 lungvar cu hleihnih an si i an cungah Israel fapa hna min kha an i ṭial. Min khenhnak bantukin ser an si. Israel phun hleihnih hna chung min pakhat cio kha an cungah cun aa ṭial cio. 15 Hri bantukin hrualmi sui thiang in sermi cikcin kha ṭangbenh caah cun an ser. 16 Sui tlangkawm pahnih le sui kual pahnih kha an ser hna i cu sui kual pahnih hna cu ṭangbenh a cunglei tlang kil pahnih ah khan an thlaih hna. 17 Sui hri pahnih cu sui kual ah khan an ṭem hna i 18 sui hri khattelei an donghnak cu sui tlangkawm ah khan an hren veve hna i cuticun tlangbawi angki liang bahnak hnam pahnih hna hmailei ah khan an ṭem chih hna. 19 Sui kual pahnih an ser hna i ṭangbenh a tanglei tlang ki, angki a hun changtu a chunglei kam ah khan an thlaih hna. 20 Sui kual pahnih an ser ṭhan i angki liang bahnak hnam pahnih hna an hmailei tanglei ah khan an thlaih hna; cucu a tlang pawng te ah khan a si i angki ca taisawm ṭha tein tahmi cung te ah khan a si. 21 Ṭangbenh sui kual cu angki sui kual ah khan la dum in an ṭem chih hna i cuticun ṭangbenh cu taisawm cungah khan a um i a poih lo; cu ti an tuahmi cu BAWIPA nih Moses a chimh bantuk te khan a si.
NOVEMBER 9-15
BAIBAL AH THUHMI RO HNA | LEVITIKAS 1-3
“Raithawinak I Aa Tinhnak”
(Lev. 1:3) “A pekchanhnak cu cawrun chungin khangh thawinak a si ahcun, a tum do a tlami kha pek a si lai; BAWIPA hmaiah amah cu cohlan a si nakhnga tonnak thlam innka ahcun a pek lai;
(Lev. 2:1) “Ahohmanh nih changvut thawinak kha BAWIPA sin i thawinak ah a rak put tikah a pekchanhmi cu changvut dipmi te a si lai; chiti a toih lai i frankinsens a toih lai i
(Lev. 2:12) “Theitlai hmasa bik thawinak caah cun BAWIPA sinah nan rak put ko hna lai, sihmanhsehlaw rimthaw caah cun biakṭheng cungah nan khang hna lai lo.
it-2 525
Thawinak
Khangh thawinak. Khangh thawinak cu Pathian sinah a dihlak in pekmi a si. A petu nih a thawimi saram i a zeihmanh aa lak lai lo. (Biac. 11:30, 31, 39, 40 he tahchunh.) Jehovah nih a cohlan nakhnga asiloah khangh thawinak he thawi chihmi sual thawinak kha a cohlan nakhnga halmi a si. Jesuh Khrih nih “khangh thawinak” caah amahle amah kha a dihlak in aa pe.
it-2 528 ¶4
Thawinak
Changvut thawinak. Changvut thawinak cu daihnak thawinak, khangh thawinak le sual thawinak he hmunkhat ah pekchanhmi a si. Theitlai hmasa bik thawinak ca zongah an pekchanh. Caan dang zongah zalong tein pekchanh khawh a si. (Ex. 29:40-42; Lev. 23:10-13, 15-18; Nam. 15:8, 9, 22-24; 28:9, 10, 20, 26-28; dal 29) Pathian thluachuah cung i an i lawmhnak langhternak ca zongah pekchanhmi a si. Chiti le frankinsens he an cawh i an thawi tawn. Changvut thawinak cu changvut dip, vaireu, rawhmi changreu le u-kang in reumi changreu dar tete ti bantuk an si. Changvut thawimi a cheu kha biakṭheng cungah khangh a si. A cheu kha tlangbawi nih an ei. Daihnak thawinak caah pekchanhmi a si ahcun a petu zong nih an ei. (Lev. 6:14-23; 7:11-13; Nam. 18:8-11) Changvut thawinak ah thilnu telhmi khuaihliti (theipi asiloah thingthei he uammi) kha biakṭheng ah nan khang lai lo.—Lev. 2:1-16.
(Lev. 3:1) “Mi pakhatkhat nih a pekchanhmi cu daihnak thawinak pekchanhnak a si ahcun, cawrun chungin saṭil pakhatkhat, a pa siseh a nu siseh, a pekchanh ahcun, BAWIPA hmaiah dotla a pek awk a si lai.
it-2 526 ¶1
Thawinak
Daihnak thawinak. Jehovah cohlanmi daihnak thawinak nih amah he an i rem ti kha a langhter. A pechantu le a chungkhar nih (puan biakinn tual ah, phungphai ningin biakinn tual i puanzar chungah sakmi thlam ah le biakinn chungah timhpiakmi rawl-einak khaan ah) an ei. Rai a thawipiaktu tlawngbawi nih covo pakhat a hmuh i a dang rian a ngeimi tlangbawi pawl nih covo pakhat an hmuh ve. Jehovah caah a thau kha rimhmui in an khangh. Nunnak a aiawhmi thi kha Pathian an pek ṭhan. Cucaah tlangbawi pawl, rai a thawitu le Jehovah cu hmunkhat ah rawl an eiṭimi bantuk a si. A ṭhami pehtlaihnak an ngeih kha mah nih a langhter. A thiang lomi thil sining a tongmi (nawlbia nih a thiang lo a timi thil sining pakhatkhat) asiloah (khuacaan a lum ruangah sa a thut hnuah) a caan a luan hnuah a eimi cu a phun chungin hlawt a si lai. Anih cu a thiang lomi a sinak thawngin le Jehovah hmaiah fihnungmi sa a einak thawngin a thiangmi thil zei rel loin a um caah daihnak thawinak sa kha a thurhnawmhter.—Lev. 7:16-21; 19:5-8.
Thlaraulei Lungvar Hna kha Hlathlai
(Lev. 2:13) “Nan changvut thawinak vialte cu cite nan phulh hna lai; nan Pathian he biakamnak cite cu nan changvut thawinak vialte chungin nan bauter lai lo; nan pekmi vialte sinah cite nan pek chih lai.
(Ezek. 43:24) BAWIPA hmaiah khan na pekchanh hna lai; tlangbawi nih cite an phulh hna lai i BAWIPA ca i khanghthawinak caah an thawi hna lai.
Levitikas Cauk Chungin Hrilhfiah
2:13—‘Thawinak vialte’ ah zeicah cite phulh a herh? Cutin an tuahmi cu raithawimi a thawt deuh nakhnga caah a si lo. A thut nakhnga lo caah cite kha vawlei pumpi i mi hna nih an hman. Cite nih rawhnak le thutnak kha a kham khawh ti a langhter caah raithawinak hna ah cite an phulhmi si dawh a si.
(Lev. 3:17) Thau siseh thi siseh nan ei lai lo, mah hihi nan chan chung vialte, nan umnak hmun kip ah, zungzal nawlbia a si lai.”
it-1 813
Thau
Nawlbia pek a sinak a ruang. Nawlbia biakamnak ah thi le a thau cu Jehovah lawng pek awkah hal an si. Jehovah lawng nih a kan pek khawhmi nunnak cu thi ah a um. Cucaah thi cu Jehovah ta a si. (Lev. 17:11, 14) Saram thau cu a ṭha bikmi a pum cheubang in hmuh a si. Saram thau pekchanhmi nih a ṭha bikmi zawn cu Jehovah ta a si ti kan cohlan kha a langhter. Siang ngaiin a kan petu Jehovah kha a ṭha bikmi pek kan duh ti kan langhtermi zong a si. Mah cu Israel mi nih Jehovah kha lungthin dihlak in an biak ti a langhtertu hmelchunh a si. Cucaah Jehovah caah “rawl” le “rimthaw” in biakṭheng cungah khanghmi a si tiah a ti. (Lev. 3:11, 16) Cucaah a thau ei cu Pathian caah a dang tein chiahmi kha phung ning loin fir le Jehovah ta chuh a si. Thau a eimi cu thih dan pek an si. Asinain thi he aa lawh lonak cu a thimi saram le sahrang nih seh ruangah a thimi saram i a thau cu a dang tinhnak caah hman khawh a si.—Lev. 7:23-25.
Levitikas Cauk Chungin Hrilhfiah
3:17. A thau cu a ṭhat biknak asiloah a thawt biknak zawn in hmuh a si caah mah kha ei lo dingin thlauh a sinak cu a ṭha bikmi cu Jehovah ta a si ti kha Israel mi nih an i cinken nakhnga caah si dawh a si. (Genesis 45:18) Mah nih Jehovah kha a ṭha bik kan pek awk a si ti a kan hngalhter.—Phungthlukbia 3:9, 10; Kolose 3:23, 24.
Baibal Relnak
(Lev. 1:1-17) BAWIPA nih Moses cu a kawh i tonnak thlam chungin a chawnh i hi bangin a ti: 2 “Israel mi hna sinah cun chim law, annih sinah, Nannih lakah ahohmanh nih BAWIPA sinah pekchanhnak nan tuah tikah saṭil pekchanhnak cu cawrun chungin siseh, tuurun chungin siseh, nan rak put lai, ti hna. 3 “A pekchanhnak cu cawrun chungin khanghthawinak a si ahcun, a tum do a tlami kha pek a si lai; BAWIPA hmaiah amah cu cohlan a si nakhnga tonnak thlam innka ahcun a pek lai; 4 amah nih khanghthawinak sa a lu cungah cun a kut a chiah lai i amah caah remnak tuahnak caah cohlanpiak a si lai. 5 Cun BAWIPA hmaiah cawtum kha a thah lai i Aaron fapa hna, tlangbawi hna nih khan, sa thi cu an pek lai i, tonnak thlam innka i a ummi biakṭheng kha a velchum in an theh lai. 6 Cun khanghthawinak sa cu a phaw a hawh lai i a can cikcek lai; 7 cun thlangbawi Aaron fapa hna nih cun biakṭheng cungah cun mei an kau lai i a ningcang tein mei cungah cun thing an chiah lai; 8 cun Aaron fapa hna tlangbawi hna nih cun biakṭheng cung mei cung thing cungah cun sazaam hna cu, a lu le a thau cu a ningcang tein an chiah hna lai; 9 sihmanhselaw a chungril hna le a ke hna cu ti in a ṭawl hna lai. Cun tlangbawi nih a dihlak in khanghthawinak caah biakṭheng cungah a khangh lai; mei in thawinak, BAWIPA caah rimthaw a si lai. 10 “Khanghthawinak ca i a pekchanhmi cu tuurun chungin siseh, meheh run chungin siseh a si ahcun, a tum dotla a si lai; 11 cun BAWIPA hmaiah a ummi biakṭheng chaklei kam ah a thah lai i Aaron fapa hna tlangbawi hna nih khan a thi cu biakṭheng kha a velchum in an theh lai. 12 Cun a can cikcek lai, a lu he a thau he, cun tlangbawi nih biakṭheng cung mei cung thing cungah cun a ningcang tein a chiah hna lai; 13 sihmanhselaw a chungril le a ke hna cu ti in a ṭawl hna lai. Cun tlangbawi nih a dihlak te cun a pek lai i biakṭheng cungah a khangh lai; khanghthawinak, mei in thawinak, BAWIPA caah rimthaw a si lai. 14 “BAWIPA sin i a pekchanhmi cu vate khanghthawinak a si ahcun, a pekchanhmi ṭhuro si hna seh laileng no si hna seh a rak put hna lai. 15 Cun tlangbawi nih biakṭheng ah a rak put lai i a lu cu cat lak in a merh lai i biakṭheng cungah a khangh lai; cun a thi cu biakṭheng sir ah cun a thlor lai; 16 cun a cok cu a hmul he a lak lai i biakṭheng pawng i nichuahlei kam vutcam chiahnak hmun ah cun a hlonh lai; 17 a thlaki a thlongh hna lai, sihmanhselaw a pum cu a cheu lai lo. Cun tlangbawi nih biakṭheng cungah cun, mei cung thing cungah cun a khangh lai; mah cucu khanghthawinak, mei in thawinak, BAWIPA caah rimthaw cu a si.
NOVEMBER 16-22
BAIBAL AH THUHMI RO HNA | LEVITIKAS 4-5
“Jehovah Kha A Ṭha Bik Pe”
(Lev. 5:5, 6) Hi thil pakhatkhat cungah a mawh ahcun, sualnak a tuahmi kha a phuan lai i 6 sualnak a tuahmi caah khan BAWIPA sinah phungbuar thawinak a rak put lai, tuurun chungin a nu, tuufa siseh meheh siseh, sual thawinak caah a si lai; cun tlangbawi nih a sualnak caah remnak a serpiak lai.
it-2 527 ¶9
Thawinak
Sual thawinak. Sual thawinak timi cu zei bantuk sualnak paoh caah thawimi a si. Sual thawinak pek awkah a hleiin a herhmi sualnak a um. Ngaihthiam a si nakhnga, tinvo a hmuh ṭhan nakhnga caah thawimi a si i a dang sual thawinak he tlawmte aa dang. Mah cu Jehovah asiloah a thiangmi a mi pawl cungah sualnak tuahmi kha a si kho. Jehovah nih a sualnak a ngaihthiam nakhnga asiloah aa ngaichihmi sualnak a tuahtu nih tinvo pawl a hmuh ṭhan nakhnga, dantatnak in a luat nakhnga caah sual thawinak kha pek a si.—Isa. 53:10 he tahchunh.
(Lev. 5:7) “Sihmahsehlaw tuufa kha a ngeih nih a tlinh lo ahcun, sualnak a tuahmi caah khan phungbuar thawinak caah ṭhuro pahnih siseh laileng no pahnih siseh BAWIPA sinah a rak put lai, pakhat cu sual thawinak caah a si lai i pakhat cu khangh thawinak caah a si lai.
w09 6/1 26 ¶3
Pathian Nih Ri Kan Ngeihnak Cungah Zawnruahnak A Langhter
Jehovah ngeihmi zawnruahnak kha mah Nawlbia nih a langhter: “Sihmahsehlaw tuufa kha a ngeih nih a tlinh lo ahcun, sualnak a tuahmi caah khan phungbuar thawinak caah ṭhuro pahnih siseh laileng no pahnih siseh BAWIPA sinah a rak put lai.” (Caang 7) “A ngeih nih a tlinh lo ahcun” timi biafang kha “a pek khawh lo ahcun” ti zongin leh khawh a si. Israel mi pakhat nih tuu a pekchanh khawh lo caah a pek khawhmi ṭhuro pahnih asiloah laileng no pahnih a pek tikah Jehovah nih a cohlan.
(Lev. 5:11) “Sihmanhsehlaw ṭhuro pahnih siseh laileng no pahnih siseh a ngeih nih a tlinh lo ahcun, sualnak a tuahmi thawinak caah khan, sual thawinak caah changvut dip ephah cheu hra cheu khat a rak put lai; chiti a toih lai lo, frankinsens zong a toih lai lo, zeitintiah mah hi cu sual thawinak a si.
w09 6/1 26 ¶4
Pathian Nih Ri Kan Ngeihnak Cungah Zawnruahnak A Langhter
Mah va pahnih hmanh kha a pek khawh lo ah tah zeitin? “Sual thawinak caah changvut dip ephah cheu hra cheu khat [hrai riat asiloah hrai kua] a rak put lai,” tiah Nawlbia nih a ti. (Caang 11) Jehovah nih a si a fak tukmi pakhat caah thi aa tel lomi sual thawinak hmanh pek awkah a awnh. Cucaah Israel ram ah sifah ruangah sual thawinak in ṭhatnak hmuhnak asiloah Pathian he i remnak tinvo a sungmi an um lo.
Thlaraulei Lungvar Hna kha Hlathlai
(Lev. 5:1) “Ahohmanh nih thil a hmuhmi ah siseh, a hngalhmi ah siseh, hngaltu a si i zapi hmaiah chiatserter tu aw a theih zongah a chim duh lo ahcun, a sual a ṭhatlonak kha amah nih a in lai.
Zumhawktlak a simi Jehovah Salle sinin Cawng
14 Dawtnak langhternak thawngin Jehovah le midang cungah zumhawktlak tein na um kho. Tahchunhnak ah, unau pakhat nih sualnak ngan a tuahmi kha na hngalh hei ti u sih. A hleiin anih cu na hawikom asiloah na chungkhar mi a si ahcun a cungah zumhawktlak tein um na duh men ko lai. Asinain Jehovah cungah zumhawktlak tein um cu a biapi bikmi a si ti zong na hngalh. Cucaah Nathan bantukin dawtnak ngei, cun ralṭha tein rian ṭuan. Khrihfa upa sinah bawmhnak hal awk le i phuan awkah tha pe. Asinain cutin a tuah lo ahcun nangmah nih Khrihfa upa pawl kha chim hna. Cuticun Jehovah cung zumhawktlak tein na um le amah na dawt kha langhter. Zeicahtiah Khrihfa upa pawl nih Jehovah he an i pehtlaihnak a ṭhat ṭhan nakhnga an bawmh khawh caah a si. Anih nih nemnak tein an chimhhrinh lai.—Levitikas 5:1; Galati 6:1 rel.
(Lev. 5:15, 16) “Ahohmanh nih phung a buar i BAWIPA thil a thiangmi pakhatkhat cungah hngalh loin a sual ahcun, BAWIPA sin i phungbuar thawinak caah tuurun chungin tuukawng pakhat dotla a rak put lai; hmunthiang i shekel ning khan ngun shekel zeizat man a si kha na tuak lai; mah cucu phungbuar thawinak a si. 16 A thiangmi thil ah a palh sualnak caah cun rulhnak a tuah lai i a cheu nga cheu khat a chap lai i tlangbawi kha a pek lai; cun tlangbawi nih phungbuar thawinak tuukawng khan remnak a serpiak lai i ngaihthiam a si lai.
it-1 1130 ¶2
Thiannak
Saram le Theipar. Caw fater, tuu fater le meheh fater cu Jehovah caah a thiangmi an si i tlanh khawh an si lo. Raithawinak caah hman an si i a cheubang cu tlangbawi pawl caah chiah a si. (Nam. 18:17-19) Biakinn rianṭuannak ah pekmi raithawinak le laksawng vialte cu an thian bantukin theipar hmasa le cheuhra cheukhat cu a thiangmi an si. (Ex. 28:38) Jehovah caah a thiangmi thil hna cu a sunglawimi an si caah a sawhsawh in ruah asiloah zei rel loin hman awk a si lo. Mah kha cheuhra cheukhat he aa tlaimi nawlbia ah hmuh khawh a si. Mi pakhat nih cheuhra cheukhat a chiahmi changvut kha amah asiloah a chungkharmi pakhatkhat nih rawl chuannak ti bantuk caah a hman sual ahcun a thiangmi thil upat ding timi Pathian nawlbia a buar a si. Cucaah Nawlbia nih a hmanmi zat lengin cheunga cheukhat a chap lai i a rulh lai, cun phungbuar thawinak caah tuukawng pakhat dotla a rak put lai tiah a ti. Cucaah Jehovah ta a simi a thiangmi thil kha upat awk an si.—Lev. 5:14-16.
Baibal Relnak
(Lev. 4:27–5:4) “Zaran chungin pakhatkhat nih BAWIPA nih tuah lo awk i nawl pekmi thil pakhatkhat tuah in, hngalh lo i sualnak a tuah i a mawh a si ahcun, 28 sualnak a tuahmi kha a hngalh tikah aa thawinak caah meheh pakhat, a nu dotla, a tuahmi a sualnak caah cun a rak put lai. 29 Cun sual thawinak lu cungah cun a kut a chuan lai i sual thawinak cu khanghthawinak hmun ah khan a thah lai. 30 Cun tlangbawi nih a thi cu tlawmpal in a kutdong in a lak lai i khanghthawinak biakṭheng ki ah khan a thuh hna lai i a taangmi a thi cu biakṭheng hram ah cun a thlet lai. 31 Cun a thau vialte cu daihnak thawinak chungin a thau lak a si bang khan a lak dih lai i tlangbawi nih biakṭheng cungah BAWIPA ca i rimthaw ah a khangh lai; cun tlangbawi nih a caah remnak a tuahpiak lai i ngaihthiam a si lai. 32 “Sual thawinak ca i a pekchanhmi ah tuufa a rak put ahcun, a nu dotla a rak put lai i 33 sual thawinak lu cungah cun a kut a chuan lai i sual thawinak caah khanghthawinak an thahnak hmun ah khan a thah lai. 34 Cun tlangbawi nih sual thawinak sathi cu tlawmpal in a kutdong in a lak lai i khanghthawinak biakṭheng ki ah cun a thuh hna lai i a taangmi a thi cu biakṭheng hram ah a thlet lai. 35 Cun a thau vialte cu daihnak thawinak ca i pekchanhmi tuufa chungin a thau lak a si bantuk khan a lak lai i, tlangbawi nih biakṭheng cungah, BAWIPA sinah mei in pekchanhmi hna cungah khan, a khangh lai. Cun tlangbawi nih sualnak a tuahmi caah khan remnak a serpiak lai i ngaihthiam a si lai.”
5 Ahohmanh nih thil a hmuhmi ah siseh, a hngalhmi ah siseh, hngaltu a si i zapi hmaiah chiatserter tu aw a theih zongah a chim duh lo ahcun, a sual a ṭhatlonak kha amah nih a in lai. 2 Cun ahohmanh nih a thiang lomi thil, a thiang lomi saram ruak siseh, a thiang lomi saṭil ruak siseh, a thiang lomi a lawnmi ruak siseh a tawngh i amah nih a hngalh lo i aa buar ahcun, amah nih a hun hngalh cangka in a mawh lai. 3 Cun ahohmanh nih minung thianlonak, zei bantuk thianlonak phun hmanhin thianglo si ai kun, cun amah nih a hngalh lo i a buar ahcun, amah nih a hun hngalh tikah a mawh lai. 4 Cun ahohmanh nih ṭhatlonak tuah awk siseh, ṭhatnak tuah awk siseh, i ruat cungcang loin a hmur in zei bantuk chiatsernak hmanh si ai kun, a ser i amah nih a hngalh lo ahcun, a hun hngalh tikah hi chiatsernak pakhatkhat cungah a mawh lai.
NOVEMBER 23-29
BAIBAL AH THUHMI RO HNA | LEVITIKAS 6-7
“Lawmhnak Langhternak”
(Lev. 7:11, 12) “Cun mah hihi mi nih BAWIPA sinah an pek awk daihnak thawinak pekchanhnak phungbia cu a si. 12 Lawmhnak ca i pek a si ahcun, lawmh thawinak he cun thilnu telh lo changreu chiti he cawhmi, thilnu telh lo changper tete chiti thuhmi le, chiti he ṭha tein cawhmi changvut dip cu a pekchanh chih lai.
Levitikas Baibal Cauk In Kan Cawn Khawhmi
9 Cawn khawhmi pahnihnak: Jehovah cungah kan i lawmh caah a rian kha kan ṭuan. Mah kong kha hngalhthiam awkah Israel mi hna nih an tuahmi daihnak thawinak kong i ruah hna u sih. Levitikas Baibal cauk ah Israel mi pakhat nih ‘lawmhnak caah’ daihnak thawinak a pekchanh khawh ti kha kan hmuh. (Lev. 7:11-13, 16-18) Anih nih mah thawinak kha tuah a hauh caah si loin tuah a duh caah a pekchanhmi a si. Cucaah mah cu Jehovah Pathian a dawt caah amah lungtho tein a pekchanhmi a si. Raithawinak a petu, a chungkhar le tlangbawi pawl nih raithawinak sa kha an ei lai. Asinain rai an thawimi sa i a cheukhat zawn kha cu Jehovah sinah a dang tein an pekchanh. Mah cu zei zawn dah a si?
(Lev. 7:13-15) Lawmhnak ca i daihnak thawinak a pekchanhmi ah cun, thilnu telhmi changreu zong a rak put chih lai. 14 Cun mah cu chung cun thawinak kip chungin changreu pakhat a thawi lai, BAWIPA sin i thawinak caah; mah cucu daihnak thawinak hna thisen a thehtu tlangbawi ta kha a si lai. 15 Cun lawmhnak ca i daihnak thawinak pekchanhmi sa cu thawinak a tuah ni ah cun ei a si lai; a thaizing tiang in zeihmanh a taanter lai lo.
w00 8/15 15 ¶15
Pathian Cohlanmi Raithawinak
15 Mah lungtho tein pekmi raithawinak pakhat cu Levitikas dal 3 ah langhtermi daihnak thawinak a si. Mah kha “daihnak pekchanhmi thil thawinak” ti zongin leh khawh a si. “Daihnak” tiah lehmi Hebru biafang cu raldohnak asiloah hnahnawhnak in luat sawhsawh lawng kha a chim duhmi a si lo. Studies in the Mosaic Institutions timi cauk nih “Baibal nih cutin a langhter lengah Pathian he i remnak, hlawhtlinnak le nuamhnak sining zong kha a langhter” tiah a ti. Cucaah daihnak thawinak cu Pathian hlemh bantukin amah he remnak sernak caah si loin amah cohlanmi sinak in hmuhmi Pathian he i remnak cungah an i lawmhnak langhternak ca asiloah thangṭhatnak caah pekmi a si. A thi le a thau an pekchanh hnuah tlangbawi le rai a thawitu hna nih thawimi sa kha an ei. (Levitikas 3:17; 7:16-21; 19:5-8) An karlak ah a ummi daihnak hmelchunh in rai a thawitu, tlangbawi le Jehovah Pathian cu langhternak in hmunkhat ah rawl an eiṭi.
(Lev. 7:20) Sihmanhsehlaw thian lonak a cung i a um lioah BAWIPA daihnak thawinak pekchanhmi sa a eimi cu, cu mi cu a miphun sinin hlawt a si lai.
w00 8/15 19 ¶8
Pathian Cohlanmi Thangṭhat Raithawinak
8 Raithawinak a petu he aa tlaiin tah zeitin? Nawlbia nih Jehovah hmaiah a rami paohpaoh an thian awk a si tiah a ti. Mah kha mi pakhat nih a buar sual ahcun Jehovah hmaiah a thiangmi dirhmun a hmuh ṭhan nakhnga sual thawinak a pek hmasa a hau, mah lawngah khangh thawinak asiloah daihnak thawinak a pekmi kha Jehovah nih a cohlan lai. (Levitikas 5:1-6, 15, 17) Jehovah hmaiah a thiangmi dirhmun ngeih peng a biapitnak kha kan hngalthiam maw? Kan biaknak kha Pathian nih cohlang seh ti kan duh ahcun Pathian nawlbia buarnak kha khulrang in kan ngol a hau. Pathian nih a kan pekmi ‘Khrihfabu chung i kum upa pawl’ le “sual ngaihthiam kan sinak,” Khrih bawmhnak kha khulrang in kan cohlan awk a si.—Jeim 5:14; 1 Johan 2:1, 2.
Thlaraulei Lungvar Hna kha Hlathlai
(Lev. 6:13) Biakṭheng cungah cun mei alhter a si thluangthluan lai; a mih awk a si lai lo.
it-1 833 ¶1
Mei
Puan thlam le biakinn he aa pehtlaimi mei. Puan thlam le a hnuah sakmi biakinn i biaknak he aa tlaimi rian hna ṭuannak ah hmanmi mei a si. Zingfate le zanlei sang paohah tlangbawi ngan nih rimhmui khanghnak biakṭheng cungah rimhmui kha a khangh. (Ex. 30:7, 8) Biakṭheng cungah mei a alh zungzal lai tiah Pathian nawlbia nih a ti. (Lev. 6:12, 13) Biakṭheng cung i mei aa thawknak cu khuaruahhar lam in Pathian nih a chuahtermi a si tiah Judah mi nih an zumh nain mah zumhnak a fehtermi Baibal caang a um lo. Jehovah nih Moses a pekmi lamhruainak ningin Aaron fapale nih ‘thing an tih lai i a cungah khangh thawinak cu a ningcang tein an chiah lai.’ (Lev. 1:7, 8) Aaron tefa hna kha tlangbawi rian pek an si hlan le pek an si hnuah rai kha an thawi. Cutin an tuah hnuah Jehovah nih mei (puan thlam cungah a ummi minmei tom chungin a si kho) a tlakter i biakṭheng cung i raithawimi kha a kangh dih. Mah nih khuaruahhar a simi mei cu thing in a alh hmasami si loin ‘biakṭheng cung i khangh thawinak le thau hna a kanghmi’ a si ti kha a langhter. Cu hnu cun biakṭheng cung i mei cu a alh zungzal. Mah mei cu biakṭheng cung i a umciami mei le Pathian sinin a tlami mei aa cawhmi a si. (Lev. 8:14–9:24) Cu bantukin biakinn pekchanh lioah Salomon nih thla a cam dihle cangka Jehovah sinin mei a rak tla i raithawimi kha a kangh dih.—2 Chan. 7:1; Jehovah nih khuaruahhar mei in a salle raithawimi a cohlan ti a langhternak kong kha Biac. 6:21; 1 Si. 18:21-39; 1 Chan. 21:26 zongah zoh.
(Lev. 6:25) “Aaron le a fapa hna sinah hi bangin chim tuah, Mah hihi sual thawinak phungbia a si. Khangh thawinak thahnak hmun ah khan sual thawinak cu BAWIPA hmaiah thah a si lai; mah cucu a thiang bik a si ve.
si 27 ¶15
Baibal Cauk Nambar 3—Levitikas
15 (3) I hngalh loin sualnak a tuahmi asiloah palhnak in a sualmi hna caah sual thawinak kha hal a si. A pek dingmi saram cu sual ngaihthiamnak a herhmi hi tlangbawi maw, Israel mi dihlak maw, hruaitu maw a si asiloah mi sawhsawh dah a si timi cungah aa hngat. Daihnak thawinak cu mah lungtho tein pekmi a si nain sual thawinak tu cu pek hrimhrimmi a si.—Lev. 4:1-35; 6:24-30.
Baibal Relnak
(Lev. 6:1-18) BAWIPA nih Moses sinah hi tin a ti, 2 “Ahohmah nih, a innpa kha chawva kennak kong ah siseh ṭilva zohkhenhnak kong ah siseh a hlen i, ramhnak in siseh, a innpa kha hremnak in siseh, 3 thiltlau kha a hmuh i cu kong ah lihchimnak le ding loin chiatsernak in siseh, BAWIPA cungah a sual i phung a buar ahcun mah hi thil vialte minung nih an tuah tawnmi hna chungah hin 4 pakhatkhat ah a sual i a mawh tikah, a firmi siseh, hranhram in a lakmi siseh, amah an ken termi siseh, thiltlau a hmuhmi siseh, 5 ding loin chiat a ser hnawhmi zei thil paoh siseh a rulh lai; tling tein a rulh lai i a cheu nga cheu khat a chap lai i a phungbuar thawinak ni ah a ngeitu sinah khan a pek ṭhan lai. 6 Cun tlangbawi sinah BAWIPA sin i a pekchanhmi phungbuar thawinak cu a rak put lai, tuurun chungin tuukawng pakhat dotla, nangmah nih phungbuar thawinak caah a man a za na timi a si lai; 7 cun tlangbawi nih cun BAWIPA hmaiah remnak a serpiak lai i, a mawhnak thil a tuahmi paohpaoh kong ah ngaihthiam a si lai.” 8 BAWIPA nih Moses sinah hi bangin a ti, 9 “Aaron le a fapa hna cu hi bangin nawl pe hna: Mah hihi khanghthawinak phungbia a si. Khanghthawinak cu biakṭheng cung tappi ahcun zan khua dei zinglei tiang a um lai i biakṭheng mei cu a alh camcin lai. 10 Cun tlangbawi nih a puan hmangṭhia cu aa hruk lai i a pum cungah a puan hmangthia tawhrolh cu aa hrolh lai i, biakṭheng cung i mei nih a kangh dihmi khanghthawinak vutcam cu a lak lai i biakṭheng kam ah a chiah hna lai. 11 Cun a puan kha aa phoih hna lai i puandang aa aih lai i vutcam cu riahbuk leng hmunthiang ah a kalpi lai. 12 Biakṭheng cung i mei cu alhter camcin a si lai, a mih awk a si lai lo; zing fatein tlangbawi nih a cungah thing a tih lai i a cungah khanghthawinak cu a ningcang tein a chiah lai i, a cungah daihnak thawinak hna thau cu a khangh lai. 13 Biakṭheng cungah cun mei alhter a si thluangthluan lai; a mih awk a si lai lo. 14 “Cun mah hihi changvut thawinak phungbia a si. Aaron fapa hna nih BAWIPA hmaika ah biakṭheng hmaiah an pekchanh lai. 15 Cun pakhat nih changvut thawinak changvut dip cu pei khat in a lak lai, changvut thawinak cung i a ummi chiti le frankinsens vialte he, cun mah hihi hngalh camcinnak caah BAWIPA ca i rimthaw ah biakṭheng cungah a khangh lai. 16 Cun a taangmi cu Aaron le a fapa hna nih an ei lai; hmunthiang ah thilnu telh loin an ei lai; tonnak thlam tual chungah an ei lai. 17 Thilnu he reu a si lai lo. Mei in keimah sin i thawinak hna chungin anmah vo ah ka pek cang hna; a thiang bikmi thil a si ve, sual thawinak le phungbuar thawinak bantuk khan. 18 Aaron tefale hna chungin pa paohpaoh nih an ei lai; BAWIPA sinah mei in thawinak hna chungin nan tefa chan tiang in zungzal nan vo a si lai; cu thil a tawngmi hna paoh cu thleidan an si lai.”
NOVEMBER 30–DECEMBER 6
BAIBAL AH THUHMI RO HNA | LEVITIKAS 8-9
“Jehovah Thluachuah A Langhtertu”
(Lev. 8:6-9) Cun Moses nih Aaron le a fapa hna cu a ratpi hna i ti in a kholh hna. 7 Cun angki leng cu a hruk i, taisawm a sawmh i, tlangbawi angki fual a hruk i, tlangbawi angki a aih i, dawh tein tahmi tlangbawi angki hri in a sawmh, mah hri cun a ṭem chih. 8 Cun ṭangbenh kha a cungah a benh i ṭangbenh chungah cun Urim le Thummim kha a chiah hna. 9 Cun lupawng a ponh i a lupawng cungah, hmailei ah, sui kheng, a thiangmi bawiluchin cu, a benh; Moses nih BAWIPA nih nawl a pek bang khan a tuah.
(Lev. 8:12) Cun thuhnak chiti cu tlawmpal in Aaron lu ah a toih i a thuh i a thianter.
it-1 1207
Rian Peknak
Moses nih Aaron le Aaron fapale a simi Nadab, Abihu, Eleazar le Ithamar kha biakinn tual ah a ummi dar um chung i ti in a kholhter hna. Cun Aaron kha sunparnak in a khatmi tlangbawi ngan angki a hrukter. (Nam. 3:2, 3) Mah angki aa hrukmi Aaron cu a angki nih a aiawhmi sining le rian hna kha phungning tein ṭuannak nawl a ngei cang. Cun Moses nih puan biakinn le mah ah hmanmi thilri, raithawinak biakṭheng, um le mah he aa tlaimi thilri vialte kha chiti a toih i a pekchanh. Cutin a tuahmi nih mah thilri hna cu Pathian biaknak ca lawng i hman awkah a dang tein chiahmi, a thiangmi thil a si ti kha a langhter. A donghnak ah Moses nih Aaron lu cungah chiti a toih i chiti thuhmi a hung si.—Lev. 8:6-12; Ex. 30:22-33; Salm 133:2.
(Lev. 9:1-5) Ni riat ni ah Moses nih Aaron le a fapa hna le Israel upa hna kha a auh hna i 2 Aaron sinah, “Cawtum no pakhat in sual thawinak caah, cun khanghthawinak caah tuukawng pakhat, dotla veve, la hna law, BAWIPA hmaiah thawi hna. 3 Cun Israel mi hna sinah, ‘Sual thawinak caah meheh tum pakhat le, khangh thawinak caah cawfa pakhat le tuufa pakhat, kum khat veve a si i dotla veve a simi le, 4 daihnak thawinak hna caah cawtum pakhat le tuukawng pakhat la hna law, BAWIPA hmaiah thawi hna, cun chiti he cawhmi changvut thawinak zong; zeitintiah nihin ah BAWIPA cu nannih sinah a lang lai,’ tiah ti hna,” tiah a ti. 5 Cun Moses nih nawl a pekmi cu tonnak thlam hmaiah an hun hruai hna i aa pummi nih an dihlak in an hun naih i BAWIPA hmaiah an dir.
it-1 1208 ¶8
Rian Peknak
A ni riatnak ni ah tling tein rian pek a simi tlangbawi hna nih (Moses bawmhnak tel loin) Israel mi kha a voikhatnak in sual thawinak an tuahpiak hna. Tlinlonak ruangah a chuakmi sualnak ca lawngah a si lo. Naiah sui cawfa an sernak thawngin Jehovah a thin an hunter i nawl an ngaih lo caah sual ngaihthiam halnak ca zongah a si. (Lev. 9:1-7; Ex. 32:1-10) Rian pekka a simi tlangbawi pawl i a hmasa bik an rianṭuannak a dih tikah Jehovah nih an tuahsernak a cohlan kha khuaruahhar mei a tlakternak thawngin a langhter. Mah mei cu puan thlam cungah a ummi minmei tom in a chuakmi a si kho i biakṭheng cungah a ummi raithawimi vialte kha a kangh dih.—Lev. 9:23, 24.
(Lev. 9:23, 24) Cun Moses le Aaron cu tonnak thlam chungah an lut i an hung chuah tikah mizapi kha thluachuahnak an pek hna i, BAWIPA sunparnak cu mi vialte sinah cun a lang. 24 Cun BAWIPA hmaika in mei a hung chuak i biakṭheng cung i khangh thawinak le thau cu a kangh hna; cun mi vialte nih khan an hmuh tikah an au i an bawk.
Levitikas Baibal Cauk In Kan Cawn Khawhmi
13 Cawn khawhmi palinak: Jehovah nih vawlei lei a bupi kha thluachuah a pek. BC 1512, Sinai Tlang hram i Puan thlam chiah a si lioah a cangmi kong hi ruathmanh. (Ex. 40:17) Moses nih Aaron le a fapa pawl tlangbawi rian peknak caah puai pakhat a timhtuah. Israel mi pawl cu tlangbawi nih a voikhatnak saram rai an thawimi kha zoh awkah hmunkhat ah an i pum. (Lev. 9:1-5) Jehovah nih mah tlangbawi thar pawl a cohlan hna kha zeitindah a langhter? Aaron le Moses nih mi pawl kha thluachuah an pek hna tikah Jehovah nih mei a chuahter i biakṭheng cungah a tang rihmi raithawinak kha mei nih cun a kangh dih.—Levitikas 9:23, 24 rel.
Thlaraulei Lungvar Hna kha Hlathlai
(Lev. 8:6) Cun Moses nih Aaron le a fapa hna cu a ratpi hna i ti in a kholh hna.
Kan Thian awk a Sinak a Ruang
6 Israel tlangbawi pawl pumsalei thian an herhmi cu tuchan kan caah zei sullam dah a ngeih? Baibal kan cawnpiakmi tampi nih kan thianmi le kan biaknak hmun a thianmi kha an hmuh. Mah lengah Jehovah biak a duhmi hna cu ‘an lungthin a thian’ a hau. (Salm 24:3, 4 rel; Isa. 2:2, 3) Cucaah Jehovah kha lungthin thiang, ruahnak thiang le a thiangmi pum in kan biak a hau. Mah kongah kanmahle kanmah kan i check lengmang a hau. Thiang tein um khawh awkah thlennak nganpi tuah a herh caan a um men lai. (2 Kor. 13:5) Tahchunhnak ah, tipil a ing cangmi pakhat nih a thurhnawmmi hmanthlak a zoh ahcun ‘Thiang tein ka um maw?’ tiah aa hal awk a si. Cun mah a ṭhalomi tuahsernak kha ngol awkah bawmhnak a hal hna awk a si.—Jeim 5:14.
(Lev. 8:14-17) Cun sual thawinak cawtum cu a rak put i Aaron le a fapa hna nih sual thawinak cawtum lee cungah cun an kut an chuan. 15 Moses nih a thah i a thi cu a lak i biakṭheng ki hna ah cun a velchum in a kutdong in a thuh, cun biakṭheng ca i remnak ser awkah biakṭheng cu a thianter i a hram ah thi cu a thlet i a thianter. 16 Cun a chungril a tuamtu thau vialte le a thin tuamtu le a kal pahnih cu an thau he a lak hna i Moses nih biakṭheng cungah a khangh hna. 17 Sihmanhsehlaw cawtum cu a phaw le a sa le a ek he riahbuk lengah mei in a khangh, BAWIPA nih Moses kha nawl a pek bang khan.
it-2 437 ¶3
Moses
Pathian le Israel mi nih Nawlbia biakamnak an ser tikah Moses cu remnak sertu a si. Biakamnak thar i Remnak sertu, Jesuh Khrih dah ti lo cu amah bantukin Pathian he pehtlaihnak a ngeimi zei bantuk minung hmanh an um lo. Moses nih phu pahnih a simi Jehovah a aiawhmi biakamnak cauk le minung dihlak (kha a aiawhmi kum upa hna) cungah raithawimi saram thi kha a rak theh. Biakamnak cauk a relpiak hna tikah mi nih “BAWIPA nih nawl a kan pekmi vialte cu kan tuah dih lai; amah nawl cu kan zulh lai” tiah an ti. (Ex. 24:3-8; Heb. 9:19) Remnak sertu Moses cu puan thlam saknak, Pathian fialmi pungsan ningin puan thlam thilri hna sernak, tlangbawi rian peknak, puan biakinn pekchanhnak, Aaron kha a hleiin sermi chiti toihnak in tlangbawi ngan rian peknak ti bantuk rian hna tlangtlaknak tinvo a rak hmu. Cun rian pekka a simi tlangbawi hna nih phungning tein an ṭuan dingmi rian hna kha Moses nih a hruai hna i a voikhatnak an rak ṭuan.—Ex. dal 25-29; Lev. dal 8, 9.
Baibal Relnak
(Lev. 8:31–9:7) Cun Moses nih Aaron le a fapa hna cu, “Tonnak thlam innka ah sa kha chuang u law, cu ka ah sa le thleidannak thawinak bawm chung i a ummi changreu cu ei u, ‘Aaron le a fapa hna nih an ei lai,’ tiah nawl ka pek bang khan. 32 Cun sa le changreu a taangmi cu mei in nan khangh lai. 33 Cun tonnak thlam innka in ni sarih chung nan chuak lai lo, nanmah thleidannak ni hna a tlin hlan tiang, zeitintiah nanmah thleidannak caah ni sarih a herh lai. 34 Nihin i tuahmi bang hin, nannih ca i remnak ser awkah BAWIPA nih nawl a pek cang. 35 Tonnak thlam innka ah, chun zan in ni sarih chung nan um lai, BAWIPA nih aan fialmi hna tuah awkah, nan thih sual nakhnga lo; zeitintiah cu bang cun nawl pek ka si,” tiah a ti. 36 Cun BAWIPA nih Moses in nawl a pekmi tuah awk thil vialte cu Aaron le a fapa hna nih an tuah.
9 Ni riat ni ah Moses nih Aaron le a fapa hna le Israel upa hna kha a auh hna i 2 Aaron sinah, “Cawtum no pakhat in sual thawinak caah, cun khanghthawinak caah tuukawng pakhat, dotla veve, la hna law, BAWIPA hmaiah thawi hna. 3 Cun Israel mi hna sinah, ‘Sual thawinak caah meheh tum pakhat le, khanghthawinak caah cawfa pakhat le tuufa pakhat, kum khat veve a si i dotla veve a simi le, 4 daihnak thawinak hna caah cawtum pakhat le tuukawng pakhat la hna law, BAWIPA hmaiah thawi hna, cun chiti he cawhmi changvut thawinak zong; zeitintiah nihin ah BAWIPA cu nannih sinah a lang lai,’ tiah ti hna,” tiah a ti. 5 Cun Moses nih nawl a pekmi cu tonnak thlam hmaiah an hun hruai hna i aa pummi nih an dihlak in an hun naih i BAWIPA hmaiah an dir. 6 Cun Moses nih, “Mah hihi BAWIPA nih tuah awkah nawl an pekmi hna cu a si; cun BAWIPA sunparnak cu nannih sinah a lang lai,” tiah a ti. 7 Cun Moses nih Aaron sinah, “Biakṭheng cu hei naih law, na sual thawinak le na khanghthawinak cu thawi hna, cun nangmah le mi hna caah remnak ser tuah; cun mi hna thawinak cu rak pu law, an caah remnak ser tuah, BAWIPA nawl peknak bang khan,” tiah a ti.