CAWN AWK CAPAR 44
HLA 33 Na Thilrit Kha Jehovah Sinah Ṭhum
Dinlonak Tawnghtham Khawh Ning
“Ṭhatlonak kha i teiter hlah u, ṭhatnak tu in ṭhatlonak kha tei zungzal ko u.”—ROM 12:21.
A BIK IN LANGHTERMI
A ding loin pehtlaih kan si tikah thil sining a chiat chin nakhnga lo zeitindah kan lehrulh khawh?
1-2. Ahote nih dah a ding loin a kan pehtlaih khawh? Fianter.
NUHMEI nu pakhat nih ding tein biaceihpiak awkah biaceihtu sin a nawl lengmangmi kong bianabia kha Jesuh nih a chim. Jesuh chan ah mi tampi cu a ding loin pehtlaih an rak si caah mah bianabia kha a zultu pawl nih an hngalhthiam lai ti cu a fiang ko. (Luka 18:1-5) A caan ah kannih zong a ding loin pehtlaih kan si ve caah mah bianabia cu kan ca zong ah sullam a ngei.
2 Tuchan vawlei cu thleidannak, i ruan lonak le namnehnak in a khat. Cucaah a ding loin pehtlaih kan si tikah kan khuaruah a har lo. (Pct. 5:8) A hleiin unau pakhatkhat nih a ding loin a kan pehtlaih tikah kan lung a dong kho men. Asinain unau pawl cu biatak a ralchanhmi an si lo. Mitlinglo an si ca tu ah a si. Ṭih a nungmi ralchanhtu pawl nih a ding loin an pehtlaih tikah Jesuh nih a lehrulh hna ning in tampi kan cawn khawh. Ralchanhtu hna nih a ding loin a kan pehtlaihmi hmanh kha lungsau tein kan in ahcun unau pawl cung ah zeitluk in dah kan lung a sau chinchin awk a si! A ding loin a kan pehtlaihtu hna cu unau an si ah, midang an si ah Jehovah nih zeitindah a ruah? Mah cu Jehovah caah a poi maw?
3. A ding loin pehtlaih kan simi kha Jehovah nih biapi ah a chia maw, zeicah?
3 Midang nih an kan pehtlaih ning kha Jehovah nih biapi ah a chiah. “A hmaanmi [a dingmi, NWT] thil kha BAWIPA nih a duh.” (Salm 37:28) A caan a phanh tikah Jehovah nih ‘khulrang in dinnak he bia a ceih hna lai’ tiah Jesuh nih fiang tein a chim. (Luka 18:7, 8) A rauhhlan ah Jehovah nih sifah harnak le dinlonak ruang ah a chuakmi ngaihchiatnak vialte kha a hloh dih cang lai.—Salm 72:1, 2.
4. Tuchan ah Jehovah nih zeitindah a kan bawmh?
4 Harnak vialte a tawnghtham lai caan a phanh hlan tiang dinlonak kan inkhawh nakhnga Jehovah nih a kan bawmh. (2 Pet. 3:13) A ding loin pehtlaih kan si tikah thil sining a chiat chin nakhnga lo zeitindah lehrulh ding a si ti kha a kan cawnpiak. Mah cu a Fapa nih a ding lomi pehtlaihnak a lehrulh ning kha Baibal ah a ṭialter hnanak thawng in a si. Mah leng ah a ding loin pehtlaih kan si tikah kan zulh khawhmi ruahnak cheuhnak zong a kan pek.
Dinlonak Na Lehrulh Ning kha i Ralring
5. A ding loin pehtlaih kan si tikah kan lehrulh ning kha zeicah kan i ralrin awk a si?
5 A ding loin pehtlaih kan si tikah kan lung a fak i kan lung a dong kho men. (Pct. 7:7) Job le Habakkuk ti bantuk zumhfekmi pawl zong cutin an rak intuar ve. (Job 6:2, 3; Hab. 1:1-3) Cu bantuk intuarnak cu a phung a si ko, asinain kan lehrulh ning kha kan i ralrin a hau. Kan i ralrin lo ahcun palhnak kan tuah kho.
6. Absalom kong nih zeidah a kan cawnpiak? (Hmanthlak zong zoh.)
6 Pakhatkhat nih kanmah asiloah kan dawtmi hna cung ah a ding loin thil a tuah tikah teirul cham kan duh men lai. Asinain cutin kan lehrulh ahcun thil sining a chia chin lai. Siangpahrang David fapa Absalom kong kha ruat hmanh. Pa khat nu dang a upa Amnon nih a farnu Tamar a tlaihhrem ti a theih tikah Absalom cu a thin a hung tuk. Moses Nawlbia ning in Amnon cu thih awkah aa tlak. (Lev. 20:17) Absalom a thinhunmi cu a palh lo nain Amnon a thahmi tu cu a palh.—2 Sam. 13:20-23, 28, 29.
A farnu Tamar nih dinlonak a ton ruang ah Absalom cu a thin aa sum kho lo (Catlangbu 6 zoh)
7. Salm caṭialtu pa nih dinlonak a hmuh tikah zeitindah lehrulh?
7 Dinlonak a tuahtu hna cu dantatnak a tong lo dingmi an lawh tikah a hmaanmi thil tuah cu a phu lo tiah kan ruah khawh men. Miṭhalo pawl nih miṭha pawl kha a ding loin an pehtlaih ko hna nain miṭhalo pawl nuam tein an nunmi kha Salm caṭialtu pa nih a hmuh. Cucaah “Miṭhalo mi cu hi bantuk hi an si ko. Thil tampi an ngei i an ngei chin luaimai” tiah a ti. (Salm 73:12) Dinlonak a hmuh tikah a ngaih a chia i Jehovah rianṭuan cu a phu lo tiah a ruah. Cucaah “Hihi hngalhthiam awkah kaa zuam ko nain ka lung a buai zungzal” tiah a ti. (Salm 73:14, 16, NWT) Cun “Kei cu ka rak tlu dengmang, ka rak nal dengmang” ti hmanh in a rak ti. (Salm 73:2) Alberto tiah auhmi unaupa pakhat nih cu bantuk thil sining kha a rak ton ve.
8. A ding loin pehtlaihnak nih unaupa pakhat kha zeitindah a hnorsuan?
8 Alberto cu Khrihfabu thawhlawm a fir tiah a hmaan loin sualpuhnak a rak tong. Cucaah Khrihfa upa rian in dinhter a si i Khrihfabu i unau tampi cu a cung ah upatnak an ngei ti lo. “Ka thin a hung i ka lung zong a dong” tiah a ti. A intuarnak nih Jehovah he an i pehtlaihnak kha a hnorsuan i kum nga chung a cawlcang ti lomi a hung si. Mah hmuhtonnak nih a ding loin pehtlaih kan si tikah kan thinhunnak kan i sum lo ahcun zeidah a cang kho ti kha a langhter.
Jesuh nih Dinlonak a Tawnghtham Ning kha i Zohchunh
9. Jesuh nih zei bantuk dinlonak hna dah a rak ton? (Hmanthlak zong zoh.)
9 A ding loin pehtlaih kan si tikah zeitindah kan lehrulh ding a si timi kong he aa tlaiin Jesuh nih zohchunh awk ṭha a kan chiahpiak. Jesuh cu a chungkharmi pawl i telin mi tampi nih a ding loin an rak pehtlaih. Zumlotu a simi a chungle nih a hrut cang tiah sual an puh i biaknaklei hruaitu hna zong nih khuachia he aa pehtlai tiah sual an puh. Cun Rom ralkap pawl nih an nihsawh, an ralchanh i a donghnak ah an rak thah. (Mar. 3:21, 22; 14:55; 15:16-20, 35-37) Jesuh cu dinlonak tampi a tong ko nain teirul a cham bal lo. Mah in zeidah kan cawn khawh?
Jesuh nih dinlonak tawnghtham ning he aa tlaiin zohchunh awk ṭha a chiah (Catlangbu 9-10 zoh)
10. Jesuh nih dinlonak kha zeitindah a tawnghtham? (1 Peter 2:21-23)
10 Peter Kuatkhatnak 2:21-23 rel.a A ding loin pehtlaih kan si tikah Jesuh kha kan i zohchunh awk a si. Jesuh nih biachim caan le dai tein um caan kha ṭha tein a hngalh. (Matt. 26:62-64) Amah kong he aa tlaiin a hmaan loin an chim tik paoh ah a let dih hna lo. (Matt. 11:19) A hremtu pawl a leh hna tikah a serhsat hna lo i a ṭhihphaih hna lo. “Ding tein bia a ceihtu Pathian tu kha aa bochan” caah Jesuh cu a thin aa sum kho. Jehovah hmuhnak cu a biapi bikmi a si ti kha a hngalh. Jehovah nih dinlonak kha amahle caan te ah a tawnghtham lai ti kha Jesuh nih a zumh.
11. Kan biachim kha zeiti lam in dah kan i sum khawh? (Hmanthlak zong zoh.)
11 A ding loin pehtlaih kan si tikah kan biachim kan i sumnak thawng in Jesuh kha kan i zohchunh khawh. Dinlonak cheukhat cu a poi tuk lomi an si caah zeirel loin kan um kho. Asiloah thil sining a chiatter chin dingmi bia kan chim sual nakhnga lo dai tein kan um kho. (Pct. 3:7; Jeim 1:19, 20) A caan ah a ding loin pehtlaih a simi pakhatkhat kilven awk asiloah kan zumhnak kilven awkah bia kan chim a herh caan a um kho men. (Lam. 6:1, 2) Cu bantuk caan ah a si khawh chung in lungdai te le upatnak tein kan chim awk a si.—1 Pet. 3:15.b
Dinlonak kan ton tikah Jesuh i zohchunh in zeitik ah le zeitindah bia kan chim lai ti kha fimkhur tein bia kan khiah awk a si (Catlangbu 11-12 zoh)
12. Zeitindah “ding tein bia a ceihtu Pathian” kha kan i bochan khawh?
12 Kannih zong “ding tein bia a ceihtu Pathian” kan i bochannak thawng in Jesuh kha kan i zohchunh khawh. Midang nih a ding loin bia an kan ceih tik asiloah a ding loin an kan pehtlaih tikah Jehovah nih a cang taktakmi a hngalh ti kha kan zumh khawh. Mah nih a ding loin pehtlaihnak kha inkhawh awkah a kan bawmh lai. Zeicahtiah Jehovah nih ding tein a tawnghtham lai ti kan hngalh caah a si. Kan tonmi thil kha Jehovah kut ah kan ap ahcun midang cung ah kan thin a hung lai lo i kan hua hna lai lo. Midang cung ah kan thin a hun peng ahcun a hleihluat in kan lehrulh kho, kan i lawmhnak a tlau kho i Jehovah he kan i pehtlaihnak zong a rawk kho.—Salm 37:8.
13. Dinlonak kha inkhawh awkah naa harh ahcun zeidah na zumh khawh?
13 Jesuh kha tling tein kan i zohchunh kho lai lo ti cu a fiang ko. A caan ah kan i ngaichih dingmi bia kan chim i thil kan tuah tawn. (Jeim 3:2) Hi vawlei kan nunchung paoh cu dinlonak ruang ah pumsalei le lungthinlei in fahnak kan ing men lai. Asinain Jehovah nih na tonmi thil a hmuh dih ti kha na zumh khawh. Jesuh zong a ding loin pehtlaih a rak si ve caah na intuarnak a hngalhthiam ti kha na zumh khawh. (Heb. 4:15, 16) Dinlonak kan tawnghtham khawh nakhnga Jehovah nih zohchunh awk ṭha a simi Jesuh thawng in le Baibal lamhruainak thawng in a kan bawmh. Rom Baibal chung i cacaang pahnih kha i ruah hna u sih.
“Pathian Thinhunnak tu nih Mah cu Tuah ko Seh”
14. “Pathian thinhunnak tu nih mah cu tuah ko seh” timi cu zei sullam dah a si? (Rom 12:19)
14 Rom 12:19 rel. Lamkaltu Paul nih Khrihfa pawl kha “Pathian thinhunnak tu nih mah cu tuah ko seh” tiah a forh hna. Jehovah nih bia a ceih lai caan kan hngahnak thawng in le bia a ceih ning kan cohlannak thawng in mah ruahnak cheuhnak kha kan zulh khawh. A ding loin pehtlaih a si tikah Unaupa John nih hitin a ti: “Dinlonak kha keimah tein tawnghtham ka duh tikah ka thinhunnak kha kaa sum a hau. Mah cu a fawi lo nain Rom 12:19 nih Jehovah kha lungsau tein i bochan awkah a ka bawmh.”
15. Jehovah nih buaibainak a tawnghtham lai caan hngah cu zeicah a ṭhat bik?
15 Jehovah nih buaibainak a tawnghtham lai caan kan hngah ahcun ṭhathnemhnak kan hmu lai. Kanmah tein tawnghtham kan i zuam ahcun kan lungre a thei lai i kan lung zong a dong lai. Asinain Jehovah kha kan hngah ahcun cu bantuk intuarnak kha kan hrial khawh lai. Jehovah nih kaan bawmh hna lai tiah bia aa kam. ‘Dinlonak kha ka sinah chia u. Kaan zohkhenh hna lai’ tiah a kan ti bantuk a si. “Keimah nih ka lehrulh ko lai” timi Jehovah biakam kha kan zumh ahcun a ṭha bikmi lam in a tawnghtham lai timi zumhnak he a kut ah kan ap khawh lai. Mah nih a hmasa ah langhtermi John zong a bawmh. Hitin a ti: “Jehovah kha ka hngah ahcun keimah nih ka tuah khawhmi nakin a let tampi ṭha deuh in a tawnghtham lai.”
“Ṭhatnak tu in Ṭhatlonak kha Tei Zungzal ko U”
16-17. Thlacamnak nih “ṭhatnak tu in ṭhatlonak kha tei zungzal” awkah zeitindah a kan bawmh? (Rom 12:21)
16 Rom 12:21 rel. Paul nih Khrihfa hna sinah “ṭhatnak tu in ṭhatlonak kha tei zungzal ko u” ti zong in a forh hna. Tlangcung Cawnpiaknak ah Jesuh nih hitin a ti: “Nan ral kha daw peng hna u law aan hremtu hna caah thla va campiak peng hna u.” (Matt. 5:44) Jesuh zong nih cutin a rak tuah. Rom ralkap pawl nih tung cung ah thir in an khenh lioah Jesuh nih harnak a rak inmi kha kan lung ah a chuak men lai. Puarhrang ngai in hrem le nehsawh a si lioah zeitluk in dah fahnak a in lai ti kha a ruah hmanh kan ruat kho lo.
17 Jesuh cu harnak tampi a tong ko nain zumhfek tein a um peng. Amah a hremtu ralkap pawl kha chiatserh loin hitin thla a campiak hna: “Ka Pa, ngaithiam ko hna, an tuahmi hi zei a si ti an hngal lo.” (Luka 23:34) A ding loin a kan pehtlaihtu hna kha thla kan campiak hna ahcun kan thinhunnak a zor lai i an cung ah kan hmuhnak zong aa thleng kho.
18. Thlacamnak nih Alberto le John kha dinlonak tawnghtham awkah zeitindah a bawmh hna?
18 Hi capar ah langhtermi unaupa pahnih cu dinlonak tawnghtham awkah thlacamnak nih a rak bawmh hna. Alberto nih hitin a ti: “A ding loin a ka pehtlaitu unaupa pawl kha thla ka campiak hna. Ka tonmi thil sining ruang ah thinhun lo awkah ka bawm ko tiah voi tampi Jehovah sinah thla ka cam.” Lunglawm awk ngai a simi cu Alberto nih Jehovah kha zumhfek tein a biak ṭhan cang. John nih hitin a ti: “A ding loin a ka pehtlaitu unaupa kha voi tampi thla ka campiak. A cung ah ka thin a hun nakhnga lo le bia ka ceih ti nakhnga lo Jehovah nih a ka bawmh. Cu bantuk thlacamnak nih lungdaihnak zong a ka pek.”
19. Hi chan a dongh hlan tiang zeidah kan tuah awk a si? (1 Peter 3:8, 9)
19 Hi chan a dongh hlan tiang cu zei bantuk dinlonak dah kan ton rih lai ti kha kan chim kho lo. Zei bantuk thil kan ton hmanh ah Jehovah sinah bawmhnak hal peng u sih. Cun Jesuh nih dinlonak a lehrulh ning kha i zohchunh u sih law Baibal phunglam kha zulh peng hna u sih. Cutin kan tuah ahcun Jehovah nih thluachuah a kan pek lai ti kha kan zumh khawh.—1 Peter 3:8, 9 rel.
HLA 38 Pathian nih Thazaang Aan Pek hna Lai
a Peter kuatkhatnak dal 2 le 3 ah a puarhrangmi bawile asiloah zumlotu a simi vale sinin a ding loin pehtlaihnak a tongmi kumzabu pakhatnak Khrihfa hna an kong a langhter.—1 Pet. 2:18-20; 3:1-6, 8, 9.
b Dawtnak Nih Daihnak Taktak A Hmuhter Ning timi video kha jw.org ah zoh.