THIL MAN KAINAK TAWNGHTHAM KHAWH NING

Siannak Langhter

Thil man a kaimi kha tawnghtham naa harh ahcun aho cung hmanh ah siannak ka langhter kho lai lo tiah na ruah men lai. Asinain siannak na langhter ahcun ṭhatnak tampi na hmu kho. Tangka fimkhur tein na hman bu hmanh in midang cung ah siannak na langhter khawh.

ZEICAH A BIAPIT?

Thil hmete a si hmanh ah midang cung siannak kan langhtermi nih a kan nuamhter i mahle mah upatnak zong a kan ngeihter. Siannak langhternak nih pumsalei le lungthinlei in a kan ṭhathnemh khawh tiah siibawi cheukhat nih an ti. Tahchunhnak ah, lungretheihnak, thi kai le taksa fahnak ti bantuk hna kha a zorter khawh. Ṭha tein i hngilh awk zong ah a kan bawmh khawh.

“Hmuhlei nakin peklei ah lunglawmhnak a um deuh.”—Lamkaltu 20:35.

Tangkalei asiloah lam dang in midang cung siannak kan langhter ahcun kanmah theng bawmhnak kan herh tikah cohlan kan i fawih deuh lai. England ram ah a ummi Howard nih hitin a ti: “Kan nuva in midang bawmh ding le an cung ah siannak langhter ding in kan i zuam. Cucaah kannih zong bawmh kan herh caan ah midang ca thilrit kan si timi ruahnak kan ngei ti lo.”

“Midang thil pekṭhenh kha nan zia ah canter u law nanmah zong pekṭhenh nan si ve lai.”—Luka 6:38.

ZEIDAH NA TUAH KHAWH?

Na ngeihmi thil kha midang hrawm hna. Tlawmpal te lawng na ngeih hmanh ah midang cung ah siannak na langhter khawh. Tahchunhnak ah, nangmah he rawl eiṭi awkah na sawm khawh hna. Uganda ah a ummi Duncan te nuva kong hi aruat hmanh. An si a fak tuk ko nain siannak an langhter ṭhiamṭhiam. Duncan nih hitin a ti: “Zarhpi ni ah kanmah he rawl eiṭi ding in mi pakhatkhat kan sawm tawn hna. Midang he caan kan hmanṭimi cu a nuam tuk.”

Midang cung siannak na langhter tikah a tlarimi hmuhnak zong na ngeih a hau. Na chungkhar ca zeihmanh taang ti lo tiang in midang na pekṭhenh hna awk a si lo.—Job 17:5.a

Mah hi tuahchunh: A sawhsawh tein na timhmi rawl eiṭi awkah mi pakhatkhat kha na inn ah sawm khawh. Asiloah na hman ti lomi thil pakhatkhat cu na hawi asiloah na innpa nih a herh dingmi a si ahcun na pek khawh.

Lam dang in siannak langhter. A caan ah a ṭha bikmi laksawng cu tangka in cawk khawh lomi a si. Tahchunhnak ah, na caan le na thazaang pek in midang na bawmh khawh hna. Hnemhnak bia na chimmi te hmanh laksawng bantuk a si kho! Cucaah midang kha zeitluk in dah na dawt hna i na sunsak hna ti kha chim lengmang hna.

Mah hi tuahchunh: Midang kha inn rian pakhatkhat na ṭuanpiak khawh hna, an inn na remhpiak khawh hna asiloah thil na va cawkpiak khawh hna. Thazaang a pemi bia kha card ah na ṭial khawh asiloah ca na kuat khawh hna. Ka sia na herh timi bia hmanh an caah a ṭhahnem tuk lai.

Siannak langhter khawh ning na kawl tikah nuamhnak taktak na hmu kho.

“Ṭhatnak tuah le kan ngeihmi thil midang pekṭhenh kha philh hna hlah u sih.”—Hebru 13:16.

Nuva tuahkhat nih kum upa unaunu pakhat kha a inn vuang ah thing hnah an thianhpi. Kum upa unaunu nih din ding a lumsami te a put hna.

a Job 17:5 (NWT): Mi pakhat nih a ngeihmi kha a hawile a hrawmh hna. A fale tu cu an ṭamhal tuk i an mit a maw.