Cawnnak 4
Rulhreu Cu Ahodah A Si?
Satan Rulhreu—khoika in dah a chuah? (1, 2)
Zeitindah Satan nih mi kha a hlen hna? (3-7)
Zeitindah Rulhreu cu na doh lai? (7)
1. “Rulhreu” timi bia cu mi dang kongah a ṭha lo mi lihbia a chimtu tinak a si. “Satan” ti cu ral asiloah ralchantu tinak a si. Hi min hna cu Pathian ral ngan bik sin ah pekmi min an si. A hmasa ahcun, amah cu Pathian sin ah a tlingmi vancungmi pakhat in vancung ah a rak um. Asinain, amah le amah kha sang tukin aa rak i ruat i Pathian lawng nih hmuh awk a simi biaknak kha hmuh a rak duh.—Matthai 4:8-10.
2. Hi vancungmi, Satan nih, rul pakhat hmangin, Evi sinah bia a rak chim. Lihbia a chimnak thawngin, Pathian nawl ngaih lo awk ah a rak hruai khawh. Cuticun Satan nih Pathian “cungnung bik” sinak asiloah a Sang Bik a sinak kha a rak doh. Satan nih Pathian hi aa tlakmi lam in le A uk mi hna ṭhatnak bik in a uk hna hnga maw tiah biahalnak a rak tuah. Minung aho tal hi Pathian sinah zumh awk tlak in an hmun hnga maw tiah Satan nih biahalnak a rak tuah rih. Hi ti atuahnak thawngin, Satan nih amah le amah cu Pathian ral ah aa canter. Hi ruang ah hin amah cu Satan Rulhreu tiah auh a si.—Genesis 3:1-5; Job 1:8-11; Biathlam 12:9.
3. Satan nih minung kha amah biak awk ah hlen aa zuam. (2 Korin 11:3, 14) Minung a hlennak hna lam pakhat cu a hmaan lomi biaknak thawng in a si. Biaknak pakhat nih Pathian kong ah lihbia a cawnpiak ahcun Satan duhnak tu a tuah a si ko. (Johan 8:44) A hmaan lomi biaknak i a ummi minung hna nih a hmaanmi Pathian kan biak tiah a tak tak in an ruah ko lai. Sihmanhsehlaw a ngaingai ti ahcun Satan tu an biakmi a si ko. Amah cu ‘hi vawlei pathian’ a si.—2 Korin 4:4.
4. Khuachia thiamnak hi Satan nih amah nawlngeihnak tang i minung a chiahnak hna lam pakhat a si ve. Mi dang harnak pek awk, hmailei kong chimchung awk, le khuaruahharnak rian ṭuan awk ah khuachia kha an auh men hna lai. Satan cu hi tuahsernak vialte hnulei in a ummi a ṭha lomi ṭhawnnak a si. Pathian lung lawmhter awk ah, khuachia thiamnak paohpaoh cu kan hrial dih awk hrimhrim an si.—Deuteronomi 18:10-12; Lamkaltu 19:18, 19.
5. Satan nih minung kha mah miphun i porhlawtpi tuknak le nainganzi he aa tlaimi bu biaknak zongin a hlen hna. Mi cheukhat nih anmah phun le hram hi mi dang phun le hram nakin a ṭha deuh tiah an ruah. Sihmanhsehlaw cucu a hmaanmi a si lo. (Lamkaltu 10:34, 35) Mi dang nihcun nainganzi he aa tlaimi bu hna kha minung harnak teipiak awk ah an bochan hna. Hitian tuahnak thawng hin Pathian Pennak kha an hlawt. Pathian Pennak lawng hi kan harnak vialte a kan teipiak kho hnga dingmi cu a si.—Daniel 2:44.
6. Satan nih minung a hlennak hna lam dang pakhat cu sualnak tuah duhnak in tukforhnak a si. Harnak an kan pek lai ti kha a hngalh caah, Jehovah nih sualnak ziaza vialte cu hrial awk ah a kan chimh. (Kalati 6:7, 8) Mi cheukhat nih cubantuk tuahsernak ahcun an sin ah i tel ve seh ti an in duh ko lai. Asinain, hi thil hna tuah seh ti an duh taktaktu cu Satan a si ko ti kha philh hlah.—1 Korin 6:9, 10; 15:33.
7. Jehovah na hlawtnak ding caah Satan nih hremnak asiloah ralchannak zong a hman khawh. Baibal na cawn ruangah na dawtmi a cheukhat cu an thin a hung ngaingai ko lai. Mi cheu nihcun an in nihsawh men lai. Sihmanhsehlaw na nunnak caah aho sin ah dah leiba na ngeih? Jehovah kong cawn na ngol nak hnga Satan nih nangmah cu an ṭhihphaih lai. Satan cu i teiter hlah! (Matthai 10:34-39; 1 Piter 5:8, 9) Rulhreu kha dohnak thawngin Jehovah kha a lung na lawmhter khawh i, nawl ngeitu ngan bik a sinak na zumhnak kha na langhter khawh lai.—Phungthlukbia 27:11.
[Caption on page 9]
A hmaan lo mi biaknak, khuachia thiamnak, miphun ṭanhnak in mi a hlen hna
[Caption on page 9]
Satan kha doh law Jehovah akong kha cawngchin ko