CAWN DINGMI 6

Baibal He Aa Pehtlaih Ning Kha Fiang Tein Langhternak

Johan 10:33-36

A TAWINAK: Baibal caang na rel dihle cangka a dang konglam thlen in chim ti bantuk kha tuah hlah. Na chimmi kong le Baibal caang aa pehtlaih ning kha a ngaitu hna nih fiang tein an hngalh khawh nakhnga bawm hna.

TUAH KHAWH NING:

A biapimi biafang hna kha thim. Baibal caang na rel dih tikah na chimmi kong he aa pehtlaimi biafang hna kha langhter. Mah biafang hna kha na chim ṭhan khawh. Asiloah a biapimi biafang hna hngalhthiam awkah biahalnak pakhat na tuah khawh.

Baibal caang nih a chim duhmi langhter awkah a dang biafang hna na hman ahcun a bik in na chim duhmi kong le Baibal caang ah aa telmi biafang an i pehtlaih ning kha fiang tein langhter.
Cinkenter na duhmi kong kha a hleiin chim. Baibal na relnak a ruang kha na chim ahcun Baibal caang ah a ummi a biapimi biafang le na chimmi kong an i pehtlaih ning kha fianter.

Baibal caang he aa tlaiin nan i ruah ahcun na Baibal kha khup hlah. Mah lawngah a ngaitu hna nih an Baibal kha an khup lai lo i Baibal in na fiantermi a si kha an hngalh lai.
Aa pehtlaih ning kha hngalh a fawimi lam in chim. A biapimi a kong he aa pehtlai lomi a kong tampi chim ti bantuk kha hrial. A ngaitu hna nih zeitluk tiang in dah an hngalh cang timi cungah i hngat in a konglam zeizat dah ka chim chap lai ti kha bia khiak. Mah lawngah a ngaitu hna nih a konglam kha fiang tein an hngalhthiam khawh lai.