CAWN DINGMI 12
Baibal Hlathlai Peng Awkah Zeinihdah Aan Bawmh Lai?
Mi cheukhat caah cun Baibal hlathlai cu a fawi lo. Asinain cutin i zuam ruangah hmuhmi laksawng le thluachuah cu a phumi a si. A caan ah Baibal cu ka hlathlai kho peng hnga maw tiah na ruah men lai. Hlathlai peng awkah i zuam cu zeicah a phut? Harnak lakah hlathlainak tuah peng dingin zeinihdah aan bawmh khawh?
1. Baibal hlathlai cu zeicah man a ngeih?
“Pathian bia cu a nung i a ṭhawng.” (Hebru 4:12) Baibal ah na kong he aa tlaiin Pathian intuarnak le ruahnak hna aa tel caah Baibal cu man a ngei. Hngalhnak aan ngeihter lengah a hmaanmi fimnak le ruahchannak ngeih awk zongah aan bawmh. A biapi bikmi cu Baibal nih Jehovah he hawikom si awkah aan bawmhmi kha a si. Cucaah Baibal na hlathlai ahcun na nunnak cu a hung nuam deuh lai.
2. Baibal biatak man a ngeihnak kong hngalh cu zeicah a biapit?
Baibal biatak cu a man a sung tukmi lungvar bantuk a si. Cucaah Baibal nih “biatak kha vaa cawk law zuar ti hlah” tiah tha a kan pek. (Phungthlukbia 23:23) Baibal biatak man a ngeihnak kong kha kan ruah peng ahcun harnak kan ton hmanhah Baibal hlathlai peng awkah fakpi in kan i zuam lai.—Phungthlukbia 2:4, 5 rel.
3. Hlathlainak tuah peng awkah Jehovah nih zeitindah aan bawmh khawh?
Lianngan bik, aan Sertu le na Hawikom a simi Jehovah nih a kong hlathlai awkah bawmh aan duh. Pathian nih ‘tuah duhnak lungthin lawng si loin tuah khawhnak ṭhawnnak’ zong aan pek khawh. (Filipi 2:13, NW) Cucaah a caan ah hlathlainak tuah peng awk asiloah na cawnmi ningin zulh awkah thazaang na herh ahcun Jehovah nih aan bawmh khawh. Mah lengah harnak asiloah ralchanhnak tei khawh awk zongah aan bawmh khawh. Cucaah Baibal hlathlai peng khawh awkah Jehovah sinah thlacamnak in bawmhnak hal zungzal.—1 Thesalon 5:17.
TAM DEUH IN HLATHLAI
Na rian a tam tuk asiloah midang ralchanhnak na ton hmanhah zeitindah Baibal hlathlai peng khawh a si timi kong kha hlathlai. Cun Baibal na hlathlai peng khawh nakhnga Jehovah nih aan bawmh ning kong zong kha hlathlai.
4. Baibal hlathlainak cu na caah a biapi tukmi siter
A caan ah kan rian a tam tuk caah Baibal hlathlainak caah a caan kan ngei lo tiah kan ruah men lai. Cutin a si ah zeinihdah a kan bawmh khawh? Filipi 1:10 rel law mah biahalnak hna hi i ruah u:
Na nunnak ah ‘a biapi deuhmi thil’ cheukhat cu zeidah an si tiah na ruah?
Baibal hlathlainak cu na caah zeitindah a biapi tukmi na siter khawh?
Balṭin chungah thetse na rawn i lung na sanh ahcun lung cu aa tlum ti lai lo
Balṭin chungah lung na rawn hmasa ahcun thetse tampi aa tlum lai. Cu bantukin na nunnak ah ‘a biapi deuhmi thil’ kha pakhatnak ah na chiah ahcun mah hna kha hlawhtling tein na liim khawh lai i a dang thil pawl tuah awk zongah a caan na ngei lai
Baibal hlathlainak nih thlaraulei ah lungsi hnangamnak a kan pek i Pathian biak awk le hngalh awk zongah a kan bawmh. Matthai 5:3 rel law mah biahalnak hi i ruah u:
Baibal hlathlainak cu kan caah a biapi tukmi kan siter tikah zei ṭhathnemhnak dah kan hmuh?
5. Ralchanhnak lakah hlathlainak tuah peng
A caan ah midang nih Baibal hlathlainak ah na lung a dongh nakhnga an i zuam men lai. Francesco kong hi ruathmanh. VIDEO kha piah, cun a tanglei biahalnak hna hi i ruah u.
Mah video ah Francesco nih a cawnmi kong kha a hawile le a chungkhar a chimh hna tikah zeitindah an lehrulh?
Teima tein a hlathlai peng caah zeitindah ṭhatnak a hmuh?
2 Timote 2:24, 25 rel law mah biahalnak hna hi i ruah u:
Na chungkhar le na hawile nih na cawnmi kong he aa tlaiin zeitindah an ruah?
Mah Baibal caang ningin Baibal na hlathlaimi kha pakhatkhat nih an duh lo ahcun zeitindah na lehrulh awk a si? Zeicah?
6. Jehovah bawmhnak kha i bochan
Jehovah he kan i naih deuh tikah a duhnak tuah kha kan duh deuh. Asinain Pathian phunglam ningin nun awkah thlennak tuah cu kan i harh kho men. Cutin a si ahcun na lungdong hlah. Jehovah nih aan bawmh lai. VIDEO kha piah, cun a tanglei biahalnak hna hi i ruah u.
Mah video ah Jim nih Jehovah lunglawmhter awkah zei thlennak dah a tuah?
A kong he aa tlaiin zeinihdah na lung aan suk?
Hebru 11:6 rel law mah biahalnak hna hi i ruah u:
Jehovah nih “amah a kawlmi,” phundang in cun amah hngalh awk le a lunglawmhter awkah aa zuammi hna kha zeidah a tuahpiak hna lai?
Baibal hlathlainak tuah awkah naa zuammi kha Jehovah nih a hmuh tikah zeitindah a intuar timi kong he aa tlaiin mah Biabal caang nih zeidah aan chimh?
MI PAKHAT HALMI: “Jehovah Tehte Hna he zeicah Baibal na hlathlai?”
Zeitindah na leh lai?
A TAWINAK
Baibal hlathlai peng cu a fawi lo nain cutin tuahnak nih na nunnak kha zungzal in a nuamhter khawh. Jehovah kha i bochan peng law laksawng aan pek lai.
I Ruahṭi Ṭhannak
Baibal biatak cu na caah zeicah a sunlawi tuk?
Baibal hlathlai cu na caah a biapi tukmi a si ti kha zeitindah na langhter khawh?
Baibal na hlathlai peng khawh nakhnga zeicah Jehovah sinah bawmhnak na hal awk a si?
HLATHLAI CHAP
Lam phunli nih an caan fimkhur tein hman awkah mi tampi a bawmh hna ning kha hlathlai.
“Fimkhur Tein A Caan Hman Khawh Ning” (2014, February, I Hlau!)
A vapa nih a hngalhthiampiak lo nain Pathian mithmai ṭha hmuh awkah aa zuammi nu pakhat Jehovah nih a bawmh ning kha hlathlai.
Kan Thilrit Phorh Awkah Jehovah Nih Thazaang A Kan Pek (5:05)
A nupi nih teima tein aa zuam peng caah ṭhathnemhnak a hmumi pa pakhat kong kha hlathlai.
A caan ah Jehovah Tehte Hna cu chungkhar a ṭhencheutertu an si tiah sualphawt an si. Asinain mah cu a hmaan maw?
“Jehovah Tehte Hna cu Chungkhar A Ṭhencheutertu Maw An Si, A Dirhtu Dah?” (Website capar)