Jehovah Cu Ṭih Law A Nawlbia Kha Zul Hna
“Pathian cu ṭih law a nawlbia kha zul hna, zeicahtiah minung cu hi nawlbia hna tuah awk caah hin pei rak ser a si cu.”—PHUNGCHIMTU 12:13.
1, 2. (a) Ṭihnak nih zeitindah pumsa lei ah a kan huhphenh khawh? (b) A fim mi nu le pa hna nih a ṭhahnem mi ṭihnak kha an fale nih an ngeih nakhnga zeiruang ahdah an i zuam?
“RALṬHATNAK nih nunnak cungah harnak atlun ter bantuk in, ṭihnak nih mah kha a khamh,” tiah Leonardo da Vinci nih a chim. Ral i ṭhat ternak asiloah hruh ralṭhat i ralṭhatnak nih thil ṭihnung kha mi hmuh ter hlah hmanh sehlaw ṭihnak nih cun i ralrin awkah mi kha ralrin a pek. Tahchunhnak ah, lungpang a par kha kan naih i zeitluk tiang dah kan tlak khawh ti mi kha kan hmuh ahcun a tam deuh cu hnu lei ah kan i thawn hrimhrim lai. Cu bantuk in, a ṭhahnem mi ṭihnak nih Pathian he a ṭha mi pehtlaihnak kha a chuah ter lawng si loin hmasa article i kan rak cawn bantuk in harnak chung zong in a kan kilven.
2 Asinain atu chan thil ṭihnung hna hi kan hngalh a hau. Mino hna nih elektrik dah asiloah khuachung mawtaw tlunkalnak lam ṭih a nunnak hna kha an hngalh lo caah, thinphan awk khondennak pakhat kha fawi tein an tong kho.a A fim mi nu le pa hna nih an tefa hna kha a ṭhahnem mi ṭihnak an ngeih nakhnga an i zuam i pawngkam i thil ṭihnung hna kha atu le atu ralrin an pek hna. Nu le pa hna nih an fale nunnak kha hi ṭihnak nih ṭha tein a khamh ti kha an hngalh.
3. Zeiruang ah le zeitindah Jehovah nih thlarau lei ṭih a nung mi kong kha ralrin a kan pek.
3 Jehovah cu kan ṭhatnak caah cu bantuk in a thin a kan phan piak. Dawtu Pa pakhat bantuk in, a Bia le a bupi in kanmah ca a ṭhahnem mi kha a kan cawnpiak. (Isaiah 48:17) Hi a ṭhahnem mi cawnpiaknak cheubang ah thlarau lei tlaknak khor kong “atu le atu” ralrin a kan peknak aa tel caah cubantuk thil ṭihnung cung i ṭihnak a si mi angan a dam mi ṭihnak kha kan ṭhancho ter khawh. (2 Chanrelnak 36:15, NW; 2 Piter 3:1) Tuanbia dihlak ah thlarau lei rawhnak tampi cu hrialkhawh an si i ‘Pathian ṭih le a nawlbia hna ulh lungthin an ngeih mi kha an ṭhancho ter asi ahcun’ sifah harnak tampi cu hrial khawh a si. (Deuteronomi 5:29) Hi “ni hmanung bik” ni hna ah hin Pathian ṭihnak kha zeitindah kan ṭhancho ter khawh i thlarau lei thil ṭihnung kha zeitindah kan hrial khawh lai?—2 Timote 3:1.
Chiatnak In I Mer
4. (a) Krifa hna nih zeibantuk huatnak kha dah an ngeih awk a si? (b) Jehovah nih sualnak ziaza kha zeitindah a ruah? (Footnote kha zoh.)
4 Baibal nih “Jehovah ṭihnak ti mi cu ṭhatlonak huatnak kha a chim duh mi a si,” tiah a fianter. (Phungthlukbia 8:13, NW) Baibal sullam ṭialnak pakhat nih hi huatnak hi “aa ralkah mi, fihmi, zei rello mi le tonghtham asiloah pehtlaih duh lo mi minung le thil sin i lungthin putning” in a fianter. Cucaah Pathian ṭihnak ah Jehovah mithmuh i a ṭha lo mi dihlak kha chunglei in fihnak asiloah huatnak aa tel.b (Salm 97:10) Mah nihcun lungpang pakhat a par in kan i thawn bantuk in kan ṭihnak nih ralrin a kan pek tikah ṭhatlonak in i mer awkah a kan forh. “Jehovah ṭihnak in ṭhatlonak kha a mertak,” tiah Baibal nih a ti.—Phungthlukbia 16:6, NW.
5. (a) Zeitindah Pathian ṭihnak ah kan tha kan ṭhawn ter deuh khawh i ṭhatlonak kha kan huat deuh khawh? (b) Hi kong he aa tlai in Israel miphun hna tuanbia nih zeidah a kan cawnpiak?
5 Sualnak nih a chuahter hrimhrim mi hrawk kho tu a si mi thil kha ruahnak thawng in hi a ṭhahnem mi ṭihnak le a ṭhalo mi huatnak kha kan feh ter deuh khawh. Baibal nih pumsa asiah thlarau asi ah—kan tuh mi kha kan zun lai tiah bia a kan kamh. (Galati 6:7, 8) Cu ruangah Jehovah nih a nawlbia zeirellonak le a hmaan mi biaknak hlawtnak ruangah hmuh hrimhrim ding a si mi thil hna kha fiang tein a rak langhter. Pathian huhphenhnak loin cun, hi harnak a phan kho mi Isarel ram hmete hi a puar tuk hringhran mi le a ṭhawng ngai mi innpa hna i tuah mi paoh kha an in lai. (Deuteronomi 28:15, 45-48) Israel i nawl a ngaih lo nak a man ṭihnung kong cu “i ralrin nak ding caah” Baibal ah a tling tein ṭial an si, cucaah mah cu kan cawn khawh i Pathian ṭihnak kha kan ngei kho.—1 Korin 10:11.
6. Pathian ṭihnak kong cawnnak ah kan ruah khawh mi Baibal i zohchunh awk hna cheukhat cu zeidah an si? (Footnote kha zoh.)
6 Israel miphun phunkhat ningin an ton mi thil a cang mi hna lengah nahchuahnak, nuncan ṭhatlonak, hakkauhnak asiloah i uahnak hna nih a khuh mi hna i pumpak pakhat cio nunning taktak hmuhtonnak hna zong kha Baibal ah a um.c Hi mi hna lak i a cheukhat cu kum tampi chung Jehovah a rian kha a rak ṭuan mi an si, asinain atu an nunnak i a biapi ngaingai caan ah Pathian an ṭihnak cu a rak ṭhawn taktak lo caah ngeihchiat awk ngai a si mi theitlai kha an zuun. Cu bantuk Baibal tahchunhnak hna ṭha tein ruahnak nih cu he aa lo mi palhnak tuah lo awkah kan rikhiahnak kha a ṭhawn ter deuh khawh. Kan lungthin ah Pathian ruahnak cheuhnak kha kan i lak hlan ah ngaichiat awk a si mi thil kha pumpak in kan ton a si ahcun zeitluk ngaihchia dah a si lai! A tamdeuh zumh mi he aa ralchanh in, hmuhtonnak—a hlei in mah duhnak zulhnak—cu a ṭha bik mi cawnpiak tu a si lo.—Salm 19:7.
7. Jehovah nih langhternak a thlam ahkhan a hodah a kawh?
7 Pathian ṭihnak ngeihnak a dang kong pakhat cu Pathian he kan i pehtlaihnak kha kilven kan duh caah a si. Amah he i hawikomhnak kha a man kan sun ter ruangah Pathian a lung lawmh ter lai lo kha kan phang. Langhternak a thlam ah Pathian nih a hawi in a kawh hnga ding mi cu a ho kha dah a si lai? “Pathian nawl a zul i a hmaan mi thil a tuah zungzal i a bia bia hmaan” a si mi kha a si lai. (Salm 15:1, 2) A kan Sertu he a sung mi pehtlaihnak kan ngeihmi hi a man kan sun ter a si ahcun, a mithmuh ah palhnak ngeilo in kal awkah kan i ralring lai.
8. Malakhi chan i Israel mi hna nih Pathian he i hawikomhnak kha zeitindah an rak i lak?
8 Ngaihchiat awk cu, Malakhi chan i Israel mi hna cu Pathian he i pehtlaihnak kha a man an rak sun ter lo. Jehovah kha ṭihnak le upatnak pek can ah, a zaw mi le a bei mi saram tu kha biakṭheng ah an pek. Pathian ṭihnak an ngeih lo nak kha ṭhitumhnak kong i an lungputning zongah an langhter. Mino nu pawl ṭhit awk caah an no lio i an nupi le kha a kong hmete ruangah an mak hna. Jehovah nih “mak” a huat ti kha Malakhi nih a chimh hna i mi hlen a hmang mi an ruahning nih Pathian sinin a hlat ter hna. An biakṭheng cu an hlawt mi an nupi le hna i mitthli in langhternak in a khuh tikah zeitindah an khanghthawinak cungah Pathian nih mithmai ṭha he a zoh khawh lai? Cubantuk langhngan in a nunphung an upat lo nak ruangah Jehovah nih hitin biahalnak a tuah: “Khuazei ahdah nan ka ṭihnak cu a si?”—Malakhi 1:6-8; 2:13-16.
9, 10. Zeitindah Jehovah he i hawikomhnak a man kan sun ternak cu kan langhter khawh?
9 Nihin ah, vale le pale asilole nupi hna le nu le hna hmanh nih mahzawn ruat in an nuncan a ṭhatlo ruangah hrawh a simi palhnak a ngei lo mi innchung hna le ngakchia hna i an lungkuainak kha Jehovah nih a hmuh. Mah nihkhan a ngaih a chiat ter ngaingai. Pathian hawikom pakhat nih cun Pathian hmuhning in a hmuh i aa ṭhitumhnak kha a fehchin nakhnga fak piin aa zuam lai, ṭhitumhnak a biapit ning kha zei ah a rel lo mi vawlei ruahnak kha a hlawt i “nu le pa sualnak” kha a zamtak lai.—1 Korin 6:18.
10 Ṭhitumhnak le kan nunnak i kaa dang dang hna zong ah, Jehovah mit ah a ṭhalo mi dihlak kha hua in, amah he i hawikomhnak kha a man kan sun ter nak nih Jehovah mithmai ṭha kha a kan hmuh ter lai. Lamkaltu Piter nih fek tein hitin a chim: “Atu cu Pathian nih mi vialte kha aa ruangte in a zoh hna ti kha ka hngalh. Mi zei miphun chung mi hmanh a si ah, amah a ṭih mi paoh le dinnak a tuah mi paoh cu a cohlan ko hna.” (Lamkaltu 10:34, 35) A har mi thil umtuning a phunphun ah a hmaan mi kha tuah awkah Pathian ṭihnak nih pumpak pakhat cio kha zeitindah a kan forh ti a langhter mi Baibal ah i zohchunh awk tampi kan ngei.
Pathian a ṭih mi minung Pathum
11. Zeibantuk thil umtuning tang ahdah Abraham nih “Pathian ṭihnak” kha a rak thanh?
11 Baibal ah Jehovah thengte nih kan pu Abraham kha a hawi in a rak langhter. (Isaiah 41:8) Abraham kha Pathian nih a fapa ngeihchunh, amah thawngin Abraham tefa cu miphun nganpi ah an i chuah lai tiah Pathian nih a biakam nak kha a tlin ter lai mi, Isak kha raithawi awkah a rak hal tikah Pathian a ṭihnak cu hneksak a rak si. (Genesis 12:2, 3; 17:19) “Jehovah a hawi” nih hi harnak a pe mi hneksaknak hi a rak tei hnga maw? (Jeim 2:23, NW) Abraham nih Isak kha thah awkah a nam kha a hun hliar le cangka ahkhin Jehovah vancung mi nih hitin a rak chim: “Ngakchia pa kha fahnak zeihmanh pe hlah, a cungah zeihmanh zong tuah fawn hlah. Fapa pakhat lawngte na ngeih mi hmanh pek sianlo in na ka um lo caah Pathian nawl ngaih cu na duh ngaingai [“Pathian na ṭih,” NW] ti kha ka hngalh.”—Genesis 22:10-12.
12. Zei nihdah Abraham kha Pathian ṭih awkah a rak forh i zeitindah cu bantuk thinlung cu kan langhter khawh?
12 Abraham nih Jehovah a ṭih mi pakhat a sinak kha a hlanlio ah a rak langhter cang ko nain cu caan lio ah lang ngaiin Pathian a ṭihnak kha a rak langhter. Isak kha raithawi awkah timh cia tein a umnak cu upatnak le nawlngaihnak langhternak men men a si lo. Abraham nih a herh a si ahcun vancung a Pa nih Isak kha thawhter ṭhannak in A biakam nak kha a tlin ter lai tiah a tling mi zumhnak nih a rak forh. Paul nih a rak ṭial bantuk in, Abraham nih ‘Pathian nih bia a kamh mi cu a tuah khawh hrimhrim lai ti kha fiang tein a zumh.’ (Rom 4:16-21) A ngan mi sunghnak kha a kan hal tik hmanh ah Pathian duhnak kha tuah awkah timh cia kan si maw? Jehovah nih “amah a kawl mi cu laksawng a pek hna,” ti kha hngal in cu bantuk nawlngaihnak nih caan saupi tiang ṭhatnak a chuah ter ti kha na zum taktak maw? (Hebru 11:6) Mah cu Pathian ṭihnak taktak a si.—Salm 115:11.
13. Zeiruang ahdah Josef nih amah le amah kha ‘a hmaan mi Pathian a ṭih’ mi pakhat in aa tlak ning tein a rak langhter khawh?
13 Pathian ṭihnak a langhter mi a dang zohchunh awk pakhat a si mi Josef kong kha zoh hmanh u sih. Potifar innchungkhar ah sal pakhat a si lio ah, Josef cu ni fate nu le pa sualnak tuah awkah hneksaknak kha a rak ton. Ziaza ṭhatlonak kha tuah awkah a tu le atu a leem mi a bawipa nupi kha hrial khawh ding dawh a rak si lo. A donghnak ah, “a rak tlaih” tikah “a lek tak i leng ah a chuak.” Ṭhatlonak in khulrang tein i mer awkah zei nihdah a hnek? A biapi bik mi a kong cu Pathian ṭihnak, ‘thil ṭhalo tuah in Pathian cungah sualnak’ tuahnak kha hrial awkah duhnak a ngeihnak a si ti cu a fiang. (Genesis 39:7-12) Josef nih amah tein ‘a hmaan mi Pathian a ṭih mi’ pa pakhat asi nak kha fiang tein a rak langhter khawh.—Genesis 42:18.
14. Zeitindah Josef i a zangfahnak ngeihnak nih a hmaan mi Pathian ṭihnak kha a rak langhter?
14 Kum tampi hnu ah Josef nih amah kha zangfahnak ngei loin a rak zuar mi a u le hna he hmai ton tein an rak i tong. An herh ngaingai mi rawl kha caan ṭha ah la in a cung ah an rak tuah mi palhnak kha fawi tein tei rul a rak cham khawh ko hna. Sihmanhsehlaw mi namneh nak cu Pathian ṭihnak langhter nak a si lo. (Levitikas 25:43) Cucaah, Josef nih a u le an lungthin an i thlennak kha a za in a rak hmuh tikah, zangfahnak he a rak ngaihthiam hna. Josef bantuk in, Pathian kan ṭihnak nih ṭhatlonak kha ṭhatnak in tei awkah a kan forh i tukforhnak ah tlak nak zong in a kan kir ter ṭhan khawh.—Genesis 45:1-11; Salm 130:3, 4; Rom 12:17-21.
15. Zeiruang ahdah Job a ziaza nih Jehovah a lung kha a rak lawmh ter?
15 Job cu Pathian a ṭih mi i zohchunh awkah a ṭha ngai mi a dang pakhat a si. Khuachia sinah Jehovah nih hitin a rak ti: “Ka sal Job hi na ruat bal maw? Vawlei cungah hin amah bantuk soisel awk um lo, miding, Pathian a ṭih i ṭhatlonak a mer tak mi hi an um lo.” (Job 1:8) Kum tampi hnu ah, Job i mawhchiat awk a um lo mi a ziaza nih vancung a pa a lung kha a rak lawmh ter ngai ngai. Job nih Pathian a ṭihnak a kong cu hi cu tuah awkah aa tlak mi a si ti le nunnak ah a ṭha bik mi lam a si ti kha a hngalh caah a si. “Zohhmanh, Pathian ṭih hi fimnak cu a si, ṭhatlonak hrial hi hngalhthiamnak cu a si,” tiah Job nih a rak thanh. (Job 28:28) Innchung a ngei mi Job nih nu no pawl sinah aa tlak lo mi lungthin a rak ngei lo i a lung chung ah nu le pa sual duhnak zong a rak chia lo. Mi rum pakhat a rak si nain, rumnak kha a rak i bochan lo i siasal biaknak phun paoh paoh kha a rak hrial.—Job 31:1, 9-11, 24-28.
16. (a) Zeitilam indah Job nih zangfahnak kha a rak langhter? (b) Job cu ngaihthiamnak a ngei mi a si ti kha zeitindah a rak langhter?
16 Asinain, Pathian ṭihnak cu ṭhatnak kha tuah in ṭhatlonak lei zongah i mer lonak kha a chim duh mi a si. Cucaah, Job nih mitcaw, kebei, le sifak hna cungah zawnruahnak a rak ngei. (Levitikas 19:14; Job 29:15, 16) Job nih “mah le hawi cung i zangfahnak a ngei lo mi cu Lian Ngan Bik a hlaw mi a si,” ti kha a rak hngalh. (Job 6:14) Zangfah lo nak ah ngaihthiam lonak asilole lungthli i uamnak an i tel kho. Pathian lamhruainak in, Job nih a cung ah lungfahnak nganpi a chuah ter mi a hawi le pathum caah thla a rak cam. (Job 42:7-10) Lamkhat khat in kan lung a kan fah ter mi zumtu hawi hna sinah cu bantuk ngaihthiamnak lungthin cu kan langhter kho ve hnga lo maw? A kan do tu caah titernak um loin thlacam piaknak nih lungfahnak kha a tei khawh. Pathian a ṭihnak ruangah Job nih thluachuahnak a rak hmuh nak nih ‘amah a ṭih tu hna caah Jehovah nih a chiah mi thil ṭha’ i a thlam kha a kan hmuh ter.—Salm 31:19; Jeim 5:11.
Pathian Ṭihnak a Pin ah Minung Ṭihnak
17. Minung ṭihnak nih zeidah a kan tuah ter khawh i, sihmanhsehlaw cu bantuk ṭihnak cu zeiruang ahdah hmuhnak bi a si?
17 Pathian ṭihnak nih a hmaan mi kha tuah awkah a kan forh i, minung ṭihnak nih kan zumhnak kha a hrawh khawh. Hi ruangah hin, Jesuh nih lamkaltu hna kha aa zuam ngai mi thawngṭha chimtu si dingin tha a rak pek hna lio ah hitin a rak ti: “Pum cu a that kho ko nain thlarau a that kho lo mi cu va ṭih hlah u; hel chungah pum he thlarau he a that khotu kha va ṭih u.” (Matthew 10:28) Minung nih hmailei kan i ruahchannak kha an hrawh khawh lo caah minung ṭihnak cu hmuhnak bi a si tiah Jesuh nih a fianter. Cu lengah, Pathian i upat awk a tlak mi a ṭhawnnak kha kan hngalh caah amah kha kan ṭih, cun mah he khan tahchunh ahcun miphun dihlak ṭhawnnak cu pakpalawng a si. (Isaiah 40:15) Zumhawk a tlak mi a sal le kha a thawhter ṭhan khawh mi Jehovah ṭhawnnak cu Abraham bantukin kan zumh taktak. (Biathlam 2:10) Cucaah zumhfek tein hitin kan chim: “Pathian cu kanmah lei ah a ṭan ahcun a ho nihdah an kan doh khawh lai?”—Rom 8:31.
18. Zeiti lam indah Jehovah nih amah a ṭih mi kha laksawng a pek hna?
18 A kan do tu cu innchungkhar mi asiloah sianginn i a puarhrang ngai mi pakhat a si ah, “Jehovah ṭihnak cu a ṭhawngmi bochan awk a si’ ti kha kan hmuh lai. (Phungthlukbia 14:26) Pathian nih a theih lai ti kha hngal in ṭhawnnak caah Pathian sinah thla kan cam khawh. (Salm 145:19) Jehovah nih amah a ṭih mi hna kha zeitikhmanh ah a philh hna lo. A profet Malakhi hmangin hitin a kan ti: “Khi tikah BAWIPA a ṭih mi hna cu bia an i ruah i BAWIPA nih an bia cu a theih piak hna i a ngaih piak hna. Amah a ṭih mi hna le an lung chung in a min aa cinken mi hna cu a hmaika i cazin chungah an min kha khumh a si.”—Malakhi 3:16.
19. Zeibantuk ṭihnak dah a dong lai i, sihmanhsehlaw zeibantuk khadah a zungzal in a tang lai?
19 Vawlei cung mi vialte nih Jehovah kha biak in minung ṭihnak loh lai nak caan cu a nai te cang. (Isaiah 11:9) Mangṭam, zawtnak, ṭhatlonak, le ral ṭihnak hna zong an lo cang lai. Sihmanhsehlaw vancung ah le vawlei cungah zumhawktlak mi a sal le nih amah kha upatnak, nawlngaihnak le hmaizahnak an langh ter peng lai caah Pathian ṭihnak cu a tang zungzal lai. (Biathlam 15:4) Mah karlak ah, kan dihlak in Solomon i thawchuah hnawh mi fimchimhnak hi kan lung ah i chiah hna u sih: “Misual kha tluk i zuam hna hlah, ni fate in BAWIPA a ṭih mi bel kha hngar ko hna; Cu bantuk in na tuah ahcun hmailei ah ceunak na hmuh lai i na nun khua zong a sau lai.”—Phungthlukbia 23:17, 18.
[A Tanglei Fianternak Hna]
a Upa cheukhat cu an rian nih ṭih awk a si mi thil he aa pehtlaih peng tikah ṭihnung mi ṭihnak kha an thlau. Lehtama tampi hi zeicah an kutdong a um lo tiah biahalnak tuah a si tikah, zungthiam pa pakhat nih, “a hmual a fak mi elektrik hluah hna ah ṭihnak an ngei ti lo caah,” a si tiah fiang tein a leh.
b Jehovah theng nih hi fihnak hi a ngei ve. Tahchunhnak ah, Efesa 4:29 [NW] nih a thurhnawm mi holh kha “athu mi bia,” tiah a fian ter. Krik biafang ah “thutnak” tiah timi biafang hi a ca ning in cun thingthei, nga, asiloah sa a thu mi khi a chim duh mi a si. Mah biafang nih hin volhpamhnak asiloah a thurhnawm mi holh kha kan huat ding a si ti kha fiang tein a langhter. Cu bantuk in, Baibal ah siasal hna kha atu le atu ‘saram ek’ in a langhter tawn. (Deuteronomi 29:17, NW; Ezekiel 6:9, NW) Saram ek, asiloah ek kha kokek tein kan fihnak nih zeibantuk siasal biaknak phun hmanh siseh Pathian a fihnak kha hngalhthiam awkah a kan bawmh.
c Tahchunhnak ah, Kain (Genesis 4:3-12); David (2 Samuel 11:2–12:14); Gehazi (2 Siangpahrang 5:20-27); le Uzziah (2 Chanrelnak 26:16-21) hna kong kha ruat hmanh.
Na Cinken Maw?
• Zeitindah a ṭha lo mi huat cu kan cawn lai?
• Malakhi chan i Israel mi cheukhat nih Jehovah he i hawikomhnak kha zeitindah zei rel loin an um?
• Abraham, Josef le Job sinin Pathian ṭihnak kong zei kha dah kan cawn khawh?
• Zeibantuk ṭihnak kha dah a hmun zungzal lai i, zeiruang ahdah?
[Cahmai 12nak i Hmanthlak]
Vulgata Latina, 1795 Baibal lehnak in
A fim mi nu le pa hna nih a ṭhahnem mi ṭihnak kha an tefa hna lungthin ah an khumh
Ṭihnak nih ṭihnung mi thil in a kan mer ter bantuk in, Pathian ṭihnak nih a ṭhalo mi sinin a kan mer ter
Job cu hawi dik a si lo mi pathum hna he hmaiton tein an i ton lio hmanh ahkhan Pathian kha a rak ṭih peng