‘Pum Chung I Hling’ Kha Teinak

“Ka vel hi na caah a za ko.”​—⁠2 KORIN 12:⁠9.

1, 2. (a)Zeiruang ahdah kan tonmi hneksaknak le harnak hna nih zei tuah awk hngal lo tiang in a kan umter awk a si lo? (b) Zeiruangahdah hneksaknak kan ton ko nain zumhnak kan ngeih khawh?

“KRI JESUH he i pehtlai i Pathian nunning in nun a duhmi paoh cu hremnak an ing ko lai.” (2 Timote 3:12) Zeiruangah cutin a si? Zeicahtiah minung nih Pathian kha anmah ca ṭhatnak caah an biak tiah Satan nih a rak ti i, aa tinhmi kha a tlam a tlin nakhnga zeipaoh hung chuak ko seh timi lungput a ngeih caah a si. Jesuh nih zumh awk tlakmi a lamkaltu hna sinah voikhat cu hitin ralrin a rak pek: “Satan nih nannih cu nan dihlak in hneksaknak nawl kha a hmuh cang.” (Luka 22:31) A fakmi harnak kha hmangin kanmah kha hneksak awkah Satan cu Pathian nih nawl a awnh ti kha Jesuh nih fiang tein a rak hngalh. A ngai tein, mah nih cun nunnak ah kan tonmi harnak a dihlak hi Satan asiloah a khuachia hna sinin aa thawk ti nak cu a si lo. (Phungchimtu 9:11) Sihmanhsehlaw Satan cu kan zumhfehnak kha hrawh awkah a ṭhawnnak kha hman awkah aa zuam ngaimi a si.

² Hneksaknak kan inmi nih zei tuah awk hngal lo tiang in a kan umter awk a si lo tiah Baibal nih a kan chimh. Zeithil paoh kan cungah a tlun hmanhah, a um bal lomi asiloah kan i ruahchan lomi a si lo. (1 Piter 4:12) Angai tein, “vawlei cung khuazakip i a ummi zumhnak lei in [kan] unau a simi hna kha, cu bantuk temhnak cu an ing ve.” (1 Piter 5:⁠9) Nihin ah, Satan nih Pathian a sal le dihlak cungah hneksaknak fakpi a tlunter. Khuachia nih a si khawh chungin hling bantuk harnak tampi inter kha a kan duh. Cutin si awkah, ‘kan pum chungah hling’ a chaptu asiloah a zual tertu ah hi vawlei ningcang kha a hman. (2 Korin 12:⁠7) Zei a si zongah, Satan dohnak nih kan zumhfehnak kha a hrawh awk a si lo. Tukforhnak kha inkhawh awkah “chuah khawhnak lam” Jehovah nih a kan ser piak lai bantukin, kan pum chungah hling bantuk a simi harnak hna kha kan ton tik zongah cu ti cun a kan tuah piak lai.​—⁠1 Korin 10:⁠13.

Hling Teikhawhnak Lam

3. Paul nih a pum chung i hling kha lak piak awkah a rak nawl tikah Jehovah nih zeitindah a rak leh?

³ Lamkaltu Paul nih a pum chung i hling kha lak piak awkah Pathian kha a rak nawl. “Hi kong ah hin voi thum thliahmah Bawipa sinah thla ka cam i ka lak piak ko tiah ka nawl.” Jehovah nih Paul i fakpiin a rak halnak kha zeitindah a rak leh? “Ka vel hi na caah a za ko, zeicahtiah ka ṭhawnnak cu derthawmnak ah hin a lang [“a tlam a tling,” NW].” (2 Korin 12:​8, 9) Hi lehrulhnak hi ṭha tein hlathlai in fahnak a kan pemi hling bantuk harnak a zeipaoh hi tei khawh awkah zeitindah a kan bawmh ti kha kan zoh hmanh lai.

4. Paul nih a phut lomi Jehovah a vel inkhan zeitilam indah ṭhatnak a hmuh?

⁴ Kri hmangin a sinah a rak pekchanh cangmi a phut lomi velngeihnak kha lawmh awkah Pathian nih Paul kha tha a rak pek. A hmaan tein, Paul cu lam tampi in thluachuah nganpi pek a rak si. Jesuh hnu zultu pawl kha a rak ralchanh tu a si ko nain Jehovah nih zultu sinak tinvo ṭha kha dawtnak in a rak pek. (Lamkaltu 7:58; 8:3; 9:​1-4) Cuti cun Jehovah nih Paul kha lungthawh awk a simi rian le tinvo kha velngeihnak he a rak pek. Kan caah i zohchunh awk cu a fiang ko. A chiabikmi caan hna hmanhah, kan lawmh awk a simi thluachuahnak tampi kan ngei. Hneksaknak kan inmi nih Jehovah a ṭhatnak duhdim kha zeitikhmanh ah a kan philhter awk a si lo.​—⁠Salm 31:⁠19.

5, 6. (a) ‘Dernak ah hin a tlam a tlin’ termi Pathian ṭhawnnak kong kha Jehovah nih zeitindah Paul kha a cawnpiak? (b) Zeitindah Paul a nunnak nih Satan cu milih a si ti kha a langhter?

⁵ Kan phut lomi Jehovah velngeihnak cu lam dang pakhat in a za ko. Pathian ṭhawnnak cu hneksaknak kan inmi a kan bawm khawh leng a si. (Efesa 3:20) Jehovah nih Paul kha Amah a ṭhawnnak cu “derthawmnak ah hin a lang [“a tlam a tling,” NW],” mi a si tiah a rak cawnpiak. Zeitindah? Paul kha hneksaknak a inmi a tei khawh nakhnga a herhmi thazang dihlak kha a rak pek. Phundang incun, Paul inkhawhnak le Jehovah kha a dihumnak in aa bochannak nih Pathian ṭhawnnak cu hi thazang a dermi le misual mi hna teinak a petu a si ti kha Krifa dihlak sinah a langhter. Atu ah minung nih Pathian cu an nun a nomh tikah le harnak an tonlo tik lawngah an biak tiah a titu Khuachia cungah a tlungmi kong kha ruat hmanh. Paul zumhfehnak nih cu bantuk thangchiatu kha a bengh bantuk a si!

⁶ Hmasa ah Pathian a dotu in Satan he a rak ṭuanṭi mi, Krifa hna kha puarhrang ngaiin a rak hremtu, a rak i zuam ngaimi Farasi pakhat a simi Paul cu mi rummi pakhat in hrin a rak si caah a nun a rak i nuam ngai. Atu ah Paul cu “lamkaltu vialte hna lakah nauta bik” in Jehovah le Jesuh rian a ṭuan. (1 Korin 15:⁠9) Pathian rianṭuantu pakhat in, kum zabu pakhatnak Krifa uktu bu nawlngeihnak kha toidor tein a rak ngai. A pum chungah hling nih a rak chunh ko nain zumh awk tlak tein a rak in. Nunnak i hneksaknak hna nih Paul aa zuamnak kha a zorter lo caah Satan cu a ing a puang ngaingai. Kri vancung a Pennak chungah kaa tel ve te lai ti a ruahchannak kha zeitikhmanh ah a rak thlau lo. (2 Timote 2:12; 4:18) Zei harnak a si ah, hling nihkhan aa zuamnak kha a rak ṭhum kho lo. Cubantuk in, kan i zuamnak cu a thaṭhawnter chin u sih! Hneksaknak i thazang ṭhawngin kan inkhawhnak nih Satan cu milih pakhat in langhter awkah caanṭha kha Jehovah nih a kan pek.​—⁠Phungthlukbia 27:⁠11.

Jehovah Bawmhnak Abiapi

7, 8. (a) Nihin ah Jehovah nih ami hna kha zeitindah thazang a pek hna? (b)  Kan pum chungah a ummi hling kha kan tei khawh nakhnga nifate Baibal relnak le cawnnak cu zeiruang ahdah a biapi?

⁷ Nihin ah, Jehovah nih zumh awk tlakmi Krifa hna kha a thiang thlarau, a Bia le kan Krifa unau rual sinak in tha a kan pek. Lamkaltu Paul bantukin, kan thilrit kha Jehovah sinah thlacamnak in kan chiah khawh. (Salm 55:22) Asinain Pathian nih hneksaknak kan inmi kha a kan hloh piak men lai lo, a hleiin in awkah a harmi hneksaknak hna kha teinak dingah fimnak tu kha a kan pek khawh. Jehovah nih​—⁠in khawh awkah​—⁠“a si tawnmi leng thil ti khawhnak ṭhawnnak” kha a kan peknak in a kan bawmh.​—⁠2 Korin 4:​7, NW.

⁸ Cu bantuk bawmhnak cu zeitindah kan hmuh? A hnemhnak kan hmuh taktak hnga ding caah, Pathian Bia kha teima tein kan cawn hrimhrim awk a si. (Salm 94:19) Pathian bawmhnak an rak hal tik i Pathian salle hna i mi lungthin a phanmi an biafang tete kha Baibal chungah kan rel. Hnemhnak bia aa telmi Jehovah lehrulhnak hna fak piin ruahnak awk an si. ‘A si tawn ning leng thil ti khawhnak ṭhawnnak hi kanmah ta si loin Pathian ta a si,’ caah Pathian Bia cawnnak nih kan thazang a ṭhawn ter lai. Ṭhannak caah le thazang caah nifate pumsa rawl ei kan herh bantukin, Pathian bia kha a hmaan tein kan ei ve hrimhrim awk a si. Mah cu kan tuah maw? Kan tuah asiahcun, atu ah a kan chun kho menmi zeibantuk langhternak hling paoh kha inkhawh awkah ‘a si tawnmi leng thil ti khawhnak ṭhawnnak’ kan hmu ti kha kan hngalh lai.

9. Zeitindah krifa upa hna nih harnak a tongmi hna kha an bawmh khawh hna?

⁹ Pathian a ṭihmi Krifa upa hna cu lungretheihnak “thlitu a hran tikah dornak” le harnak “thlichia a hran tikah i thuhnak hmun bantuk” an si khawh. Thawchuahhnawhmi he aa tlak ning tein um a duhmi Krifa upa hna cu sifah harnak a ingmi kha aa tlakmi bia in zeitindah leh awk a si ti kha an hngalh nakhnga toidornak le lungtak tein Jehovah sinah ‘chim awk kha ka cawnpiak’ tiah an hal. Krifa upa an bia cu nunnak ah harnak kan ton caan ah a nemmi ruahti bantuk in lungdaihnak le hnangamnak an si kho. An pum ah hling nih a chunh hna caah a uai i a lung a dong mi hna, thlarau lei an unau hna kha “thazang a dermi kha bawmh [“hnangamter,” NW]” nak bia an chimh hna nak thawngin krifa upa hna cu bawmtu an si taktak.​—⁠Isaiah 32:2; 50:4; 1 Thesalon 5:⁠14.

10, 11. Pathian salle hna nih a harmi hneksaknak a ingmi hna kha zeitindah tha an pek khawh hna?

¹⁰ Jehovah a salle dihlak cu lung aa rualmi a Krifa innchungkhar ah an i tel dih. A si, kannih cu “pakhat le pakhat kan i pehtlaih dih” i “pakhat le pakhat kan i dawt ve awk a si.” (Rom 12:5; 1 Johan 4:11) Hi rian cu zeitindah kan tlinter lai? 1 Piter 3:8 ah a chim bantukin, kan zumhnak aa hrawmmi dihlak sinah “ruahnak khat le lungthin khatin um . .  in u le nau bantukin i dawt . . [in] pakhat le pakhat i zangfah le toidor tein” kan umnak thawngin a si. Pum chungah a fakmi hlingchunhnak kha a teimi tar an si ah no an si ah kan dihlak in a hleiin zawn kan ruah khawh hna. Zeitindah?

¹¹ An sifah harnak kha ṭha tein hngalhthiam piak awkah kan i zuam awk a si. Kan lung a hah, a kih, asiloah zeirel loin kan um ahcun, ruahlopi in an sifahnak a zualter chintu kan si sual lai. Hneksaknak an inmi kha ṭha tein kan hngalhnak nih kan chimmi, kan chimning le kan tuahning hna kha a kan ralrin ter awk a si. A ṭhatnak in a hmu thiammi kan sinak le kan thazang peknak nih an inmi zei hling paoh i a chunh hna nak a fahnak kha tuar khawh deuh awkah a bawmh khawh hna. Mah ti cun kannih cu an thaṭhawnnak kan si kho lai.​—⁠Kolose 4:⁠11.

Cheukhat Nih Hlawhtling Tein An Teining

12-14. (a) Krifa pakhat nih khensa kha in khawh awkah zeidah a rak tuah? (b) Mah minu kha zeitindah thlarau lei unau hna nih an bawmh i tha an rak pek?

¹² Hi donghnak caan a donghnak kha kan naih bantuk in, “nauchuah lai nganfah” bantuk a simi hna cu nifate kha a karh chin lengmang. (Matthai 24:⁠8) Cu caah vawlei cung minung vialte kha, a hleiin amah duhnak tuah aa zuammi, Jehovah zumh awk tlakmi a salle hna kha hneksaknak nih a tlun hnawh khun hna. Tahchunhnak ah, caantling phungchimnak rian a ṭuanmi Krifa pakhat kong hi ruat hmanh. Khensa zawtnak a ngei ti an hngalh hnu ah cil le taksa chung in ti a chuahter tu thil [Gland] hna kha an chuah piak. Mah zawtnak cu a ngei tiah an nuva in an hun hngalh tikah, Jehovah sinah an i mer colh i nawlpatnak thla kha saupi an cam. Ahnu ah a chimmi cu zumhkhawhlomi daihnak cu an sinah a rak phan tiah a ti. A sining cu a ṭhat chel a zual chel a si ko nain, a hleiin si aa thlawmpnak in a chuakmi harnak hna kha a rak ton.

¹³ A sining kha inkhawh awkah, mah unau nu nih khensa kong kha a si khawh chungin hngalh awkah aa zuam. Sibawi hna he an i ruah. Vennak Innsang, I hlau! le adang Krifa cauk hna ah, hi zawtnak he aa tlaiin thinlung leiin zeitindah an rak tei ti a langhtermi pumpak tuanbia kha a hmuh. Jehovah nih a mi hna kha harnak caan ah a bawmh khawh hna ning a langhtermi Baibal cang hna le adangmi a bawmngaimi hngalhternak hna zong kha a rel hna.

¹⁴ Lungrawhnak teinak he aa tlaimi article pakhat nih mah fimnak bia hna hi a rak ṭial chih: “Midang he aa rem lomi cu amah duhnak lawng zulh a duhmi a si.” (Phungthlukbia 18:⁠1) Cucaah article nih hitin ruahnak a kan cheuh: “Mahte lawng umnak kha Do.”a Unau nu nih hitin a peh: “Mi tampi nih ka caah thla an cam ti kha an ka chimh; adang zong nih ṭelifuung in an ka chawnh. Krifa upa pahnih nih a caan hmaan tein ka sining kha an ka hal. Pangpar hna le biakchonhnak catlap (card) ka hmuh. Acheu nih rawl an ka coih. Si kaa thlawmhnak ah mi tampi nih lungtho tein an ka zulh.”

15-17. (a) Ruahlo piin i khonden sualnak in a hmuhmi harnak hna kha Krifa pakhat nih zeitindah a rak tei? (b) Krifabu chung i a ummi hna nih zei bawmhnak dah an rak pek?

¹⁵ New Mexico, U.S.A. ah Jehovah rian saupi a rak ṭuanmi pakhat nih ruahlopi in mawṭaw lei i khondennak pahnih a rak ton. A hngawng le a liang ah hma a rak pu i, kum 25 leng a rak inmi hliahhlok fah zawtnak cu a zual chin. Mah minu nihcun hitin a ti: “Ka lu kha tun awkah kaa harh tuk i pawng nga leng a ritmi zeihmanh kha ka phawr kho lo. Asinain lungthin tak tein Jehovah sinah thlacamnak nih tampi a ka bawmh. Kan cawn cangmi Vennak Innsang article nih tampi a ka bawmh. Article pakhat ah Mikah 6:8 kha a fianter, Pathian he toidor tein kalṭi ti cu chamhbaunak kan ngeihmi i hngalh kha a si a ti. Mah nihkhan ka lungduhmi nakin caan tlawm deuh lawng phungchimnak rian ah ka hman ko nain ka tha a chiat awk a si lo ti kha a ka hngalhter. A biapi bikmi cu lungthin thiang tein amah a rian ṭuan kha a si.”

¹⁶ Hitin a ti rih: “Krifa upa hna nih pumhnak kainak ah le lohmun rianṭuannak kal awkah kaa zuamnak kha a kan thangṭhat zungzal. Mino hna nih an ka kuh i an ka biakchonh. Hmaikal rian a ṭuanmi hna cu ka cungah an lung a sau tuk i ka zawt a zual caan ah an khuakhannak kha atu le atu an remhchunh ṭheu tawn. Khuacan a ṭhatlo tikah, keimah kha an ka zangfah i an lennolh ah a kan kalpi asiloah Baibal cawnpiaknak ah ṭhut awkah an ka sawm. Phungchimnak rian ah ka kal tikah cauk sanhnak zal kha ka bei khawh lo caah thawngthanhtu dang hna nih ka ca pawl kha an zal ah an ka sanh piak.”

¹⁷ Hling bantuk a simi an damlonak kha mah unau nu hna pahnih nih tei awkah Krifa bu chung i upa hna le zumtu hawi hna nih an rak bawmh hna ti kha i chingchiah. Thlarau lei, pumsa lei, thinlung lei herhbaunak ah an tuahsernak thengin, zangfahnak in an rak bawmh hna. Harnak a tongmi unau dang hna kha bawmh awkah mah nihkhan tha an pe lo maw? An pum chungah hling nih a chunhmi na krifabu chungmi hna kha mino a simi nangmah zong nih na bawmh khawh ve hna.​—⁠Phungthlukbia 20:⁠29.

18. Vennak Innsang le I hlau! magazine hna ah aa ṭialmi nunnak tuanbia chungin zei thapeknak dah kan hmuh khawh?

¹⁸ Vennak Innsang le I hlau! magazine hna ah harnak kha a rak tei cangmi le a tei lio lengmang mi Jehovah Hngaltu hna nunnak tuanbia kong tampi le hmuhtonnak kha kan hmuh. Cubantuk article cu hmaantein na rel tikah, vawlei cung pumpi thlarau lei unau hna nih hunchonak lei harnak, rawhralnak ruangah dawtmi pakhat sunghnak le ral tuk lio caan i ṭihnunnak hna a rak ingmi hna kong kha na hmuh lai. Adang cu zeihmanh tuah kho loin zawtnak he an nung. A dammi nih zei ah an rel lomi a fawite mi hmanh kha an tuah kho lo. A hleiin an lung duh in Krifa rianṭuannak ah an i tel khawh lo tikah an zawtnak cu a fak ngaimi hneksaknak a si. Annih cu an unau, tar le no hna nih an bawmh hnanak le an pekchanh hnanak kha a man an sun ter!

Inkhawhnak Nih Lunglawmhnak A Chuahter

19. Zeiruang ahdah Paul cu hling bantuk a simi hneksaknak le thazang dernak kha a rak in ko nain a rak i nuam khawh?

¹⁹ Pathian nih tha a rak pek ning kha a hmuh tikah Paul cu a rak i lawm. Hitin a ti: “Kri ṭhawnnak nih a ka huhphenh ti kha ka hngalh nak hnga, ka derthawmnak ah hin lunglawm te in kaa porhlaw cang. Ka derthawmnak ah siseh, nihsawhnak le harnak le hremnak le temh innak ka hmuhmi ah siseh, kri ruangah kaa lawm ko; zeicahtiah ka derthawm tikah hin ka ṭhawn a rak si.” (2 Korin 12:​9, 10) A pumpak hmuhtonnak ruangah Paul nih hitin zumhfek tein a rak chim khawh: “An ka hramkau lo, ti ruahnak ka ngeih caah hihi ka chimmi a si fawn lo, zeicahtiah ka ngeihmi paoh ah lungsi tein um ding kha ka thiam cang. Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah kkhuazei ka hmanh ah, zeitik caan paoh ah, ka paw a khim ah siseh ka rawl a ṭam ah siseh, tamtuk ka ngeih ah siseh, tlawmtuk ka ngeih ah siseh, lungsi hnangam tein um kha ka thiam cang. Kri nih ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.”​—⁠Filipi 4:​11-13.

20, 21. (a) Zeiruangahdah “hmuh khawh lomi” thil hna fakpiin ruahnak ah lunglawmhnak cu kan hmuh khawh? (b) Vawlei Paradis i hmuh awkah naa ruahchan mi “hmuh khawh lomi” thil cheukhat hna cu zeidah an si?

²⁰ Cucaah, kan pum chungah langhternak a simi zei hling hmanh um seh law, kan innak thawgin, kan dernak ah Jehovah ṭhawnnak nih a tlam a tlinnak kha mikip sinah a langhternak in lunglawmhnak nganpi kan hmuh khawh. Paul nih hitin a rak ṭial: “Hi ruangah hin pei kan lung a dongh bal lonak cu a si cu. . . . kan thlarau sinak cu nikhat hnu nikhat a thar chin lengmang. Cun harnak hmete can tawite kan inmi nih hin, hi harnak nakin a let tampi in a ngan deuhmi zungzal sunparnak cu a kan pek lai. Kannih nih kan i zohchihmi cu hmuh khawhmi thil hi si lo in hmuh khawh lomi thil khi a si. . . . sihmanhsehlaw hmuh khawh lomi thil cu zungzal in a hmun.”​—⁠2 Korin 4:​16-18.

²¹ Nihin Jehovah a mi tamdeuh nih vawlei cung Paradis ah nun in a kamhmi hna thluachuahnak hna hmuh kha an i ruahchan. Cubantuk thluachuahnak cu kan caah “hmuh khawh lo” in ruahmi an si kho men. Asinain, kan mit thengin mah thluachuahnak hna kan hmuh lainak caan cu a ra lio, a si, mah ka ah cun a zungzal in kan i nuam lai. Hling bantuk harnak he zeitikhmanh ah nung ti loin mah thluachuahnak nih a kan luatter cang lai! Pathian Fapa nih “Khuachia rianṭuannak [kha a] hrawh” lai i “thihnak cung i nawl a ngei tu . . . a hrawh” lai.​—⁠1 John 3:8; Hebru 2:⁠14.

22. Zeibantuk zumhfehnak le biakhiahnak hna dah kan ngeih awk a si?

²² Cucaah, nihin ah kan pum chungah zei hling hmanh nih kan chun hmanhsehlaw mah kha tei peng ko u sih. Paul bantuk in, ṭhawnnak kha siang ngaiin a kan petu Jehovah thawngin cutin tuah awkah thazang kan ngei ko lai. Vawlei cung Paradis ah kan um tikah, kanmah aiawh ah a tuahmi khuaruahhar thil vialte caah nifate Jehovah kha kan lawmh lai.​—⁠Salm 103:⁠2.

[A Tanglei Fianternak]

Zeitindah Na Leh Lai?

• Zeiruangah le zeitindah a hmaanmi Krifa hna zumhfehnak kha hrawh awkah Khuachia nih aa zuam?

• Zeitindah Jehovah ṭhawnnak cu ‘derthawmnak ah hin a tlam a tlin’?

• Harnak nih fahnak a pekmi hna kha krifa upa le midang hna nih zeitindah tha an pek khawh hna?

[Cahmai 19nak i Hmanthlak]

Paul nih a pum chung i hling kha lak piak awkah voithum khel Pathian sinah thla a rak cam