“Tahchunhnak Hmang Loin An Sinah Zeihmanh A Chim Duh Lo”

“Mi zapi kha a chimh hna tikah Jesuh nih cun tahchunhnak kha a hman hna; tahchunhnak hmang loin an sinah zeihmanh a chim duh lo.”​—⁠MATTHAI 13:⁠34.

1, 2. (a) Zeiruang ahdah hmual a ngeimi bianabia hna cu a fawi tein philh khawh an si lo? (b) Jesuh nih zeibantuk phun bianabia hna khadah a rak hman hna i, Jesuh hmanmi bianabia kong he aa tlai in zeibantuk biahalnak hnadah a chuak? (Thlaihhlei [footnote] kha zoh.)

ALUAN cangmi kum tampi lio i, mi zapi lakah chimmi, bianabia pakhat kha na hun ruat ṭhan kho maw? Hmual a ngei ngaimi bianabia hna cu fawite in philh khawh an si lo. Mah bianabia hna nih khan “an hna in an theihmi kha an mitthlam ah a hun cuanter i bia a ngaimi hna lung chungah a fiangmi hmanthlak a hung cuang kho,” tiah caṭialtu pakhat nih a ti. Zeitintiah lungchung in hmanthlak suainak cu hngalhthiam awkah a ṭhabikmi bawmtu a si caah, bianabia hna nih fawite in a sullam a kan purhter khawh. Bianabia hna nih biafang hna kha a fiangtein a sullam a hun kan hngalhter kho i kan thluak ah fekte in a camter.

² Vawlei cung i cawnpiaktu ahohmanh Jesuh nakin bianabia a hmang thiam deuhmi an um lo. Jesuh nih a rak hmanmi bianabia hna, asiloah tahchunhnak hna cu chim an si hnu kum thonghnih dengmang tiang ah fawite in i cinken an si rih.a Zeiruang ahdah hi cawnpiakning hi biatak tein a rak i bochan? Cun zeinihdah a bianabia hna kha a hmual a fahter khun?

Jesuh nih Bianabia Hmangin A Rak Cawnpiak hna nak Kong

3. (a) Matthai 13:​34, 35 ningin, Jesuh nih bianabia a hmannak a kong pakhat cu zeidah a si? (b) Hi cawnpiakning hna hi Jehovah nih man a sunter hrimhrim ti cu zeinihdah a langhter?

³ Jesuh nih bianabia a hmannak a kongah i chingchiah awktlak a kong pahnih kha Baibal nih a kan chimh. A pakhatnak ah, cutin a tuahnak nih chimchungbia kha a rak tlinter. Lamkaltu Matthai nih hitin a rak ṭial: “Mi zapi kha a chimh hna tikah Jesuh nih cun tahchunhnak [“bianabia,” NW] kha a hman hna; tahchunhnak hmang loin an sinah zeihmanh a chim duh lo. Hiti in a chimh hna cu, profet nih a rak chimmi tlinternak caah khan a si. Profet nih a rak chimmi cu: ‘An sin i bia ka chim tikah tahchunhnak bia ka hman lai; vawlei ser hramthawk in hngalh bal lomi thil cu ka chimh hna lai,’ ti hi a si.” (Matthai 13:​34, 35) Matthai nih a chimmi “Profet” cu Salm 78:2 a phuahtu kha a si. Salm caṭialtu nih Jesuh a chuah hlan kum zabu tampi lio in Pathian thiang thlarau thawchuah hnawhnak tangah a rak ṭialmi a si. Kum za tampi in rak chimchungmi, Jehovah nih a Fapa cu bianabia hmangin mi a cawnpiak te hna lai timi rikhiahnak a rak tuahmi cu khuaruahhar awk tlak ngaingai a si ko lo maw? Jehovah nih hi cawnpiakning hna kha a man a rak sunter hrimhrim hna ti cu a fiangtuk ko!

4. Bianabia a hmannak a kong kha Jesuh nih zeitindah a fianter?

⁴ A pahnihnak ah, an lungthin nih lehrulhnak a ngei lomi hna kha fingrilh in rilh awkah bianabia hna kha ka hman hna ti in amah Jesuh theng nih a rak chim. “Mi zapi” sinah khan thlaici vorhtu bianabia a chimh hna hnu ah, a zultu hna nih hitin an rak hal: “Bia na chimh hna tikah zeicahdah bianabia na hman?” an ti. Jesuh nih hitin a rak leh hna: “Vancung Pennak kong biathli hngalhnak cu nannih cu pek nan si cang, sihmanhsehlaw hi hna cu pek an si lo. Annih sinah bianabia ka hmannak cu hihi a si: a zoh cu an zoh len ve ko, sihmanhsehlaw an hmu kho lo, a ngaih cu an ngaih len ve ko, sihmanhsehlaw an thei kho lo. Cucaah cun profet Isaiah nih a rak chimmi kha an kongah hin a tling. Zeitindah a ti ti ahcun, ‘A ngaih cu nan ngaih len ko lai, sihmanhsehlaw a sullam nan hngal lai lo; a zoh cu nan i zoh sek ko lai, sihmanhsehlaw nan hmu kho lai lo. Zeicah ti ahcun, hi mi hna hi an lung a khong cang.’ ”​—⁠Matthai 13:​2, 10, 11, 13-15; Isaiah 6:​9, 10.

5. Jesuh bianabia hna nih a bia a ngaimi lakin toidawrmi hna le mi lungpuammi hna kha zeitindah a rak thleidan hna?

⁵ Jesuh bianabia hna nih mi a ṭhencheu termi cu zeiruang ahdah a si? A kong cheukhat hna ah, a bia a ngaimi hna nih a chimmi a bia a sullam kha fiang tein an hngalhthiam khawh nakhga an purh cikcek. Toidawrmi kip nih a tam deuh in hngalh chap kha an duh. (Matthai 13:36; Marka 4:34) Jesuh bianabia hna nih mah Pathian biatak kha a ṭam a halmi hna sinah biatak cu a phuan; caan khat te ah, a bianabia hna nih khan mi lungpuammi hna caah cun biatak kha a thuh. Jesuh cu khuaruahhar awktlak in a thiammi cawnpiaktu a va si dah! A bianabia hna kha a hmual a fahter khunmi a kong cheukhat hna cu zoh hna hmanh u sih.

A Nekcok Hna Kha Thim in Hmannak

6-8. (a) Kum zabu pakhatnak i Jesuh a bia a ngaimi hna nih zeibantuk ṭhathnemnak dah an rak hmuh rih lo? (b) Jesuh nih a nekcok tete kha a hman tikah thimnak a ngei ti kha zeibantuk tahchunhnak hna nihdah an langhter?

⁶ Jesuh cawnpiaknak anmah theng nih a rak theimi kum zabu pakhatnak i zultu hna caah zeidah a lawh hnga tikha na ruat bal maw? Jesuh a biachimmi theihnak tinvo ṭha kha an ngei ko nain, a chimmi kha i cinken awkah ṭialmi ca ah zoh in hlathlai ṭhan awk kha an ngei rih lo. Mah nakin, Jesuh a bia hna kha an lungthin le an ruahnak ah an rak i chingchiah. Bianabia hna hman a thiamnak thawngin, a cawnpiakmi hna kha i cinken awkah a fawiter deuh. Zeitindah cuti cun a si?

⁷ Jesuh nih a nekcok tete kha thim in a hman. A nekcok tete cu tuanbia pakhat he aa pehtlaih tikah asiloah a fian deuh nakhnga hman a herh tikah, ralring tein a hman. Cucaah tuu khalpa nih a tlaumi a tuu pakhat a kawl lio ah pa zeizat dah kaltak an si, mitsurdum ah rianṭuantu hna nih suimilam pa zeizat chungdah an hlawh ti le, talent tangka zeizat dah pek an si timi hna kha a ning tein a rak chim.​—⁠Matthai 18:​12-14; 20:​1-16; 25:​14-30.

⁸ Caan khat te ah, bianabia i a sullam kha hngalthiam awkah a dawn khomi a herh lomi a nekcok tete hna kha cu a lanhtak. Tahchunhnak ah, zangfahnak a ngei lomi sal kong bianabia ah, leiba denarii tangka 60,000,000 pek awk zeitindah a ngei timi kha a rak fianter lo. Jesuh nih ngaihthiamnak a herhnak kong kha a biapi in a langhter. A biapimi cu, salpa nih leiba zeizat dah a ngeih ti kha a si lo i mah nakin, a leiba le amah kha zeitindah ngaihthiam an si, i kam khat lei ah, amah sinah leiba tlawmte a rak ba vemi pa kha zeitindah a rak lehrulh ti kha a si. (Matthai 18:​23-35) Cu he aa lo in, fapa tlaupa bianabia zongah, a nau deuh pa nih khan zeiruang ahdah ro kha a rannak in a hal i zeiruang ahdah a hlauh ti kha a fianter lo. Sihmanhsehlaw a fapa a lung aa thlen i inn ah a rak kir ṭhan tikah khan a pa i a lung chungah a intuarning kha le a rak lehrulhning kha Jesuh nih a dikhlir in a chim. A pa nih a lehrulhnak he aa tlai in cubantuk in a dikhlir in chimnak nih Jehovah cu “khulrang in” sual a ngaihthiam timi, Jesuh chimmi a kong caah khan a biapi tukmi a si.​—⁠Isaiah 55:7; Luka 15:​11-32.

9, 10. (a) A bianabia hna ah aa telmi minung hna kha a langhter tik hna ah, zei kha dah Jesuh nih a hlei in a rak zoh? (b) Zeitindah Jesuh nih abia a ngaimi hna le midang hna kha bianabia hna fawi tein an i cinken nakhnga a rak tuah?

⁹ Jesuh cu a bianabia a hmanmi minung hna kong zongah ṭha tein aa ralring. A chung i a ummi minung hna i an langhning kha tlamtling tein fianternak nakin, zeidah an rak tuah timi asiloah a chimmi kong kha zeitindah an rak lehrulh timi kha Jesuh nih a bik in a chim tawn. Cucaah, Samaria innpa i a pumpak muisam langhning kha langhter loin, Jesuh nih a hlei in aa thleidangmi thil​—⁠Samaria mipa nih hma a ing i lam cungah a zaau komi Judah mipa kha zangfahnak he zeitindah a va bawmh tikha a fianter deuh. Kan rualchan cingla asiloah kanmah kan miphun hna lengah kan innpa asimi midang hna sin zongah dawtnak kauhter nak kong cawnpiak awkah a herhmi a nekcok tete hna kha Jesuh nih a rak hman.​—⁠Luka 10:​29, 33-37.

¹⁰ Jesuh nih a nekcok tete kha ralring tein a hman caah a chimmi bianabia hna cu a tawi te i a fiang peng. Mah ti khan kum zabu pakhatnak lio i amah a bia a ngaimi hna le​—⁠a hnu ah hi thawchuahhnawhmi Thawngṭha cauk a hun rel te hngadingmi rel cawk lomi midang hna kha​—⁠a rak cawnpiakmi hna a man a sungmi cawnpiaknak hna kha i cinkenter awkah a fawiter deuh.

Ni Fate Nunnak Chungin A Rak Lak

11. Jesuh bianabia hna cu Galili ah a rak ṭhan lio i a hmuhmi thil hna an si tikha tahchunhnak pe.

¹¹ Jesuh cu minung nunnak he aa pehtlaimi bianabia hna hmannak ah a thiamtuk mi a si. A tahchunhnak tampi hna cu Galili i a ṭhan lio ah a hmuhmi hna kha a si. A ngakchia lio kong kha vun ruat ta hmanh. A nu nih a hmasa i changreu a rak rawh lio ah a tangmi thilnu kha la in changvut ah a phulh i changreu a sermi kha atu le atu a rak hmuh ko lai. (Matthai 13:33) Ngatlaitu hna nih an sur kha Galili Tiva ti chungah an vorhmi kha atu le atu a rak hmuh ko hna lai. (Matthai 13:47) Chawdawrnak hmun ah lente aa celhmi ngakchia kha a rak hmuh ko hna lai. (Matthai 11:16) Jesuh nih bianabia ah hmuh a simi ​—⁠thlaici vorhnak, nupi ṭhit puai a nuamhnak, le nika thladem tangah a hminmi rawlfang kong hna timi hmun kip ah a cangmi thil hna zongkha Jesuh nih a rak i chingchiah ko lai.​—⁠Matthai 13:​3-8; 25:​1-12; Marka 4:​26-29.

12, 13. Rawlkung le belh bianabia ah khua le ram thil sining ṭha tein a rak theih ti kha Jesuh bianabia nih zeitindah a rak langhter?

¹² Cucaah, ni fate i a cangmi thil sining hna le thil umtuning hna cu Jesuh bianabia hna chung pumpi ah an i telcu khuaruahhar awk a si lo. Cucaah, hi cawnpiakning lam ah a hmanmi thiamnak hna hi a tamdeuh in hngalh awkah, Judahmi a simi a bia a ngaitu hna sinah a chimmi a bia hmual a ngeihning ruahnak nih a kan bawmh lai. Tahchunhnak pahnih in kan zoh hmanh lai.

¹³ A pakhatnak ah, changvut le belh bianabia ah, Jesuh nih lo chungah rawl kung ṭha a tuh mipa le “ral” nih belh khat lakin a rak vorh piakmi kong kha a chim. Zeiruang ahdah i ralnak tuahsernak kong theng kha Jesuh nih a rak i thim? Galili Tiva pawngah mah bianabia kha a rak chim i, Galili mi hna nih an rak ṭuanbikmi rian cu lothlawh a si tikha na lung chungah i chia. Ral pakhat nih a thli tein a lo chungah rak luh in belh ṭhalo rak vorhpiak timi nakin a ṭhalo deuhmi cu lothlo pa caah a um kho ti hnga maw? Mah chan lio nawlbia phung hna nih kha bantuk thil hna a rak cang tawn tikha a langhter. A bia a ngaimi hna nih an theihthiam khawhmi thil singning kha Jesuh nih a rak hman ticu a fiang tuk ko lo maw?​—⁠Matthai 13:​1, 2, 24-30.

14. Samaria mi innpa kong bianabia ah, Jesuh nih a chimmi a kong fianternak caah “Jerusalem in Jeriko khua lei ah” a kalmi lam kong kha a rak hmanmi cu zeiruang ahdah a sullam a hlei in a um?

¹⁴ A pahnihnak ah, Samaria innpa tahchunhnak kha ruat ṭhan hmanh. Jesuh nih hitin a bia kha a rak thawk: “Voikhat cu mipa pakhat kha Jerusalem in Jeriko khua lei ah a vung kal: Cu a vung kal lio ah cun damiah nih an rak tlaih i a puan an phoih i an tuk i thilo nunglo in an kaltak.” (Luka 10:30) Jesuh nih a chimmi kong kha langhter awkah “Jerusalem in Jeriko khua lei ah” a kalmi lam kha a rak hmanmi cu a hlei in a sullam a um. Hi tahchunhnak kha a rak chim lio ah hin, amah cu Jerusalem in a hlat tuk lomi hmun, Judah ram ah a rak um lio a si; cucaah a bia a ngaimi hna nih a chimmi bianabia chung i a hmanmi lam kong kha fawite in an rak hngalh khawh lai. Mah lampi cu mi zapi theih in ṭih a nungmi a si, a hlei in mah pakhat lawngin khual a tlawngmi pakhat khat caah a si khun. A lam cu aa kual ngai i lam ṭengnge tampi a um, damiah pawl caah i thuhnak hmun tampi a um.

15. Samaria innpa kong bianabia ah tlangbawi le Levimi i an rak daithlanhnak kha zeiruang ahdah mi pakhat khat nih thiamh a coh kho hna lo?

¹⁵ Jesuh nih a chimmi “Jerusalem in Jeriko khua lei ah a vung kal” mi lam kong ah i chingchiah awktlak pakhat a um rih. Tuanbia ningin, a pakhatnak ah tlangbawi pakhat, cun Levimi pakhat cu mah lam in khan khual an tlawng ve nain​—⁠fahnak a ingmi kha an pahnih in an bawm veve lo. (Luka 10:​31, 32) Tlangbawi pawl cu Jerusalem biakin ah a rak ṭuanmi an si i, Levimi hna nih an rak bawmh hna. Tlangbawi tampi le Levimi hna cu biakinn ah rian an rak ṭuan lo caan ah, Jeriko ah an um, zeitintiah Jeriko cu Jerusalem in meng 14 lawnglawng aa hlat. Cucaah mah lam inkhan khual an tlawng tawn ticu zumh lo awk a um lo. Tlangbawipa le Levimi cu “Jerusalem in” an rak i thawh, cu asi caah biakinn in an rak chuak ti kha ruat hmanh.b Himi hna nih an rak daithlanhmi kha ahohmanh nih, ‘Hma a pumi pa an hrialmi cu a thi hnga ding dawh a si cu ta, miruak kha an tongh a si ahcun caan tlawmpal chung biakinn ah rian an ṭuan kho lai lo cu ta,’ ti in thiamh an coh kho lo. (Levitikas 21:1; Nambar 19:​11, 16) Jesuh a bianabia hna cu amah a bia a ngaimi hna nih an theihhngalhmi thil hna an si tikha a fiang tuk ko lo maw?

Sermi Thil Hna In Hmannak

16. Jesuh cu sermi thil hna he naih tein aa theihngalmi a si ti cu zeiruang ahdah khuaruah har awk a si lo?

¹⁶ Jesuh bianabia le tahchunhnak hna nih thingkung kong, saram kong, le thil a cangmi kong a hngalhning kha an langhter. (Matthai 6:​26, 28-30; 16:​2, 3) Cubantuk hngalhnak cu khoika indah a rak hmuh? Galili ah a rak ṭhan lio ah, Jehovah thil sermi kha rak zoh awkah caanṭha tampi a rak ngei. Mah lengah, Jesuh cu “Pathian fater” a si i, Jehovah nih amah kha thil vialte sernak ah “rian thiam ngaimi” bantuk in a rak hman. (Kolose 1:​15, 16; Phungthlukbia 8:​30, 31) Jesuh cu sermi thil hna he naihtein aa rak i theihngalmi a si ti cu khuaruah har a si maw? Hi hngalhnak hna hi a cawnpiaknak ah thiam ngaiin a rak hmanning hna kha kan zoh hmanh hna lai.

17, 18. (a) Johan a ngan 10 ah aa ṭialmi Jesuh a bia nih zeitindah Jesuh cu tuu konglam a thei ngaimi a si tikha a langhter? (b) Tuukhal hna le an tuu hna karlak i a fekmi pehtlaihnak kong kha Baibal ram a zohmi hna nih zeitindah an rak hmuh?

¹⁷ Jesuh i nun a nem bikmi bianabia hna lakah pakhat cu Johan angan 10 ah aa ṭialmi kha a si, amah le a zultu hna karlak i a ṭhami pehtlaihnak kha tuukhal le a tuu hna karlak i pehtlaihnak he a rak tahchunh. Jesuh cu zuatmi tuu hna sining ṭha tein a theihngalmi a si ti zong kha a bia nih a langhter. Tuu hna cu mi nih lam an hruaimi hna kha a duh ngaimi an si ti le, an khaltu pa kha zumhawktlak tein an zulh tikha a rak langhter. (Johan 10:​2-4) Tuukhal le tuu karlak i a ummi a fekmi i tlaihchannak cu khuaruahhar a si tikha Baibal chung i ram hna a tlawngtu hna nih an rak hmuh. Kum zabu 19 nak ah, thil kokek sining a hngal ngaimi H. Tristram nih hitin a rak ṭial: “Tuukhal pakhat nih a tuurun hna he lente aa celhmi kha voikhat ka rak zoh. Aa hei i tlikter chunh; tuu nih khan an rak dawi i an rak kulh. . . . A donghnak ah tuu dihlak nih khan an kulh dih, an but hnawh i heh tiah an hawh.”

¹⁸ Zeiruang ahdah tuu nih an tuukhal kha an zulh? “A aw kha an hngalh caah,” a si tiah Jesuh nih a rak ti. (Johan 10:⁠4) Tuu nih an tuukhal pa aw kha an hngal taktak maw? Amah pumpak theng hmuhnak thengin, George A. Smith nih A Thiangmi Ram i Tuanbia Khuaram Kong timi a cauk ah hitin a rak ṭial: “A caancaan ah Judah ram i tikhor pakhat khat ah khan chun ah kan i din tawn, mah ka ahcun tuukhal pathum, pali cu an tuurun hna he an rak ra tawn. Tuurun cu pakhat le pakhat an i cawh dih i, tuukhal pakhat cio nih anmah an tuu kha zeitin an hngalh khawh hna lai tiah kan thin a phang. Asinain ti an dinhmi le lente an i celhmi a dih tikah, tuukhal hna cu pakhat hnu pakhat nelrawn ka dangdang lei ah khan an kal tikah, pakhat nih anmah le an aw cio in an hun auh hna; an tuu nih anmah le an tuukhal hna sinah khan an hun i ṭhen i, tuurun nih anmah le an ratnak lam lei cio ah khan a ningcang tein an kalpi ṭhan hna.” Jesuh nih a chimmi a kong kha a ṭhabikmi lam in a rak langhter. A cawnpiaknak kha kan cohlan i kan ngaih, a lamhruainak kha kan zulh hna a si ahcun, “tuukhal ṭha” i dawtnak le nemnak he zohkhenhnak tangah kan um kho.​—⁠Johan 10:⁠11.

Amah A Bia A Ngaimi Hna Nih An Rak Hngalhmi Thil Ningcang In Hmannak

19. A hman lomi ruahnak kha hlawt awkah, Jesuh nih zeitindah khua le ram i a cangmi thawngpang chia kha a hmannak in hmual a rak ngeih ter?

¹⁹ Hmual a ngeimi bianabia hna ah cawn awk ṭha a simi hmuntonnak asiloah tahchunhnak hna kha an i tel kho. Voikhat ah, ngaihchiat awk asimi thil hna cu hmuh awk aa tlakmi hna cungah a tlung tiah a hmaan loin ruahnak kha rak al awkah Jesuh nih a rauhhlan i a cangmi thil pakhat kha a rak hman. Hitin a rak ti: “Siloam i innsang nih a pur tikah a nenh i a thimi pa hleiriat hna kha tah? Hi ti an thihnak nih hin annih kha Jerusalem khua chung i a ummi midang vialte hna nakin an sual deuh tiah a langhter tiah nan ruah maw?” (Luka 13:⁠4) Jesuh nih khaukhih cia sinak kong he aa tlaimi ruahnak kha fawituk in a rak al hna. Hi mi 18 hna nih Pathian a duh lomi sualnak cheukhat kha an rak tuah caah an thihmi a si lo. Angai tein, kha thihfak in an thihnak cu a caan le hmuh chung khawh lomi thil hna ruangah a si. (Phungchimtu 9:11) A bia a ngaimi hna nih ṭha tein an hngalhmi thil a cangmi kha langhter in a hman lomi cawnpiaknak kha a rak al.

20, 21. (a) Farasimi hna nih zeiruangah dah Jesuh a zultu hna kha sual an rak phawt hna? (b) Jehovah nih a Sabbath nawlbia kong he aa tlai in zeitikhmanh ah a luan tuk in a hal lo ti kha langhter awkah Jesuh nih zeibantuk Baibal konglam khadah a rak hman? (c) A hun zulmi capar ah zei kongdah kan i ruah hna lai?

²⁰ A cawnpiaknak ah, Jesuh nih Baibal he aa tlaimi tahchunhnak zong kha a rak hman. A zultu hna nih Sabbath ni ah lo chung i rawlfang an zun i an eimi kha Farasimi hna nih sual an rak phawt hna lio kong kha ruat ṭhan hmanh. Angai tein, zultu hna nih Pathian Nawlbia kha an buarmi a si lo, mah nakin Farasimi hna nih Sabbath ni ah tuah awk a si lo tiah an timi Farasi mi phung an buar tu kha a si. Pathian nih a Sabbath nawlbia ah aa dawhcah lo le a luantuk in kha bantuk hal awkah aa tim bal lo tikha langhter awkah, Jesuh nih 1 Samuel 21:​3-6 ah aa ṭialmi thil kong kha a rak chim. An rawl a ṭam tikah, David le a mi hna nih thlam chungah an rak lut i rak thlen cangmi, pekchanhmi changreu kha an rak ei. Changreu a hlun cu a phung ningin tlangbawi nih an ei awkah chiah a si. Asinain, thil sining ruangah, David le a mi hna cu an ei tikah sualphawt an rak si lo. I thleidang ngaiin, tlangbawi a si lomi nih changreu a hlun einak kong he aa tlai in Baibal ah hi kong lawnglawng hi aa ṭialmi a si. Jesuh nih hman awk a simi, a cangmi thil kong kha a hmaan tein a rak hngalh i, a bia a ngaimi Judahmi hna nih mah kong kha an theih ngaimi a si lai ti cu a fiang tuk ko.​—⁠Matthai 12:​1-8.

²¹ Biatak tein, Jesuh cu a Liannganmi Cawnpiaktu a si! A biapitukmi biatak kha a bia a ngaimi hna lungthin ah a phak khawh nakhnga tluk khawh lomi a thiamnak cu kan khuaruah a har taktak ko. Asinain, mi kan cawnpiaknak hna ah amah cu zeitindah kan i zohchunh khawh lai? Hi cu a hun zulmi capar ah kan i ruah te lai.

[A Tanglei Fianternak Hna]

Na Cinken Maw?

• Zeiruang ahdah Jesuh nih bianabia hna he a rak cawnpiak hna?

• Zei tahchunhnak nih dah kum zabu pakhatnak i a bia a ngaimi hna nih an theihthiammi bianabia kha Jesuh nih a rak hman tiah a langhter?

• Jesuh nih sermi thil kong i a hngalhnak kha a bianabia ah thiam ngai in zeitindah a rak hman?

• Jesuh nih a bia a ngaimi hna nih ṭha tein an hngalhmi thil a cangmi hna kha zeiti lam indah a rak hman hna?

[Cahmai 10nak i Hmanthlak]