Daite In Dir Ko U Law Jehovah Khamhnak Kha Zoh Ko U!
“Nan um hmun kha i tlaih u law daite in dir ko u law nanmah ca i BAWIPA nih teinak an tuahpiak mi hna kha zoh ko u.”—2 CHANRELNAK 20:17.
1, 2. ‘Magog ram i Gog’ i a tlung dengmi dohnak cu ramkip he aa pehtlaimi zang-ennak nakin zeiruangah a fak deuh lai?
ZANG-ENNAK cu vawleimi hna lawng siloin fimnak nunphung hmanh kha a doh tiah cheukhat nih an chim cang. Cucaah, cu hronak kha a biapi in kan ruah awk a si. Khattalei in, vawleimi hna nih an ruah ballomi, a zualchin deuhmi dohnak dang pakhat a um. Mahcucu zeidah a si?
2 Mahcucu Ezekiel angan 38 ah Baibal nih a langhtermi ‘Magog ram i Gog’ dohnak a si. Hi dohnak cu ramkip he aa pehtlaimi zang-ennak hronak nakin a fak deuh tiah chim cu biaperhnak a si maw? A si lo, zeicahtiah Gog dohnak cu minung cozah hna dohnak lawng a si lo. Cu dohnak cu Pathian vancung cozah kha a dohmi a si! Asinain, an sining cu doh a si tikah thil tuahkhawhnak tlawmpal lawng a ngeimi minung bantuk siloin Sertu nih Gog i a fak ngaimi dohnak kha tlamtling in a tei khawh.
Pathian Cozah Kha Dohnak
3. 1914 in vawlei uktu hna cu zei tuah dingah dah sawm an si i, zeitindah an leh?
3 Pathian i atu uktu Siangpahrang le Satan ningcang ṭhalo cu vancung ah Pathian Pennak dirh a sinak kum 1914 in an rak i doh. Mah caan lioah minung uktu hna cu Pathian nih a thimmi Uktu kha tangdor awk ralrinpek an si. Sihmanhsehlaw, chimchung a si bantuk in an rak al: “An siangpahrang hna le an uktu bawi hna nih BAWIPA le BAWIPA nih a thimmi siangpahrang doh awk khua kha an khan. An i thawh i, ‘An kan ṭemnak hri kha chat u si law hlonh u sih, an ti.” (Salm 2:1-3) Pennak uknak dohdalnak cu Magog ram i Gog i tukdohnak caan chungah a sangbik ah a phan lai.
4, 5. Pathian i mithmuhkhawhlomi vancung cozah kha minung hna nih zeitindah an doh khawh?
4 Mithmuhkhawhlomi, vancung cozah kha minung hna nih zeitindah an doh lai tiah kan ruah men lai. Baibal nih a chimmi hi cozah cu “Tuufa,” Jesuh Khrih le ‘vawlei cungin tlanhmi thong zakhat le thong sawmli le thong li hna’ in dirhmi a si tiah Baibal nih a langhter. (Biathlam 14:1, 3; Johan 1:29) Vancung he aa pehtlaihmi mah cozah thar cu “van thar” taih auh a si i, vawlei ah a um hngami ramchungmi hna cu “vawlei thar” tiah auh a si. (Isaiah 65:17; 2 Piter 3:13) Khrih i uktu hawi 144,000 ah tamdeuh cu an vawlei nuncan a donghnak tiang zumhfehnak an langhter. Cucaah vancung i an ṭuanvo thar hna he an i tlak ti kha an langhter cang.
5 Asinain, 144,000 chung i a tangmi tlawmpal vawlei cungah an um rih. 2002 kum ah tuahmi Bawipa Zanriah ah aa telmi 15,000,000 hlei lakah 8,760 lawnglawng cu vancung ṭuanvo caah thimnak ruahchannak an ngei. Pathian Pennak ah aa tel hngami a tang rihmi hna kha a tuk ngammi poah cu angaitein Pathian Pennak kha an doh a si.—Biathlam 12:17.
Siangpahrang Nih Tlamtling In a Tei
6. Jehovah le Khrih nih Pathian mi hna cungah dohdalnak kha zeitindah an ruah?
6 Pathian nih a dirhmi Pennak an dohdalmi Jehovah nih a lehrulnak kong kha hitin chimchung a si: “BAWIPA nih vancung i a bawiṭhutdan cung khin a run nih hna i capo ah a saih hna. Thinhung ngai in an sinah bia a chim i a thinhunnak nih cun an thin a phanter hna. Aa thawh i, ‘Zion ka tlang thiang cungah ka siangpahrang cu ka chiah cang,’ a ti.” (Salm 2:4-6) Jehovah lamhruainak tang ah Khrih cu “tei awkah aa thawh” lainak caan a phan cang. (Biathlam 6:2) Donghnak teinak caan ah Jehovah miphun hna dohdalnak kha Jehovah nih zeitindah a ruah? Pathian le uktu Siangpahrang dohnak tiah a ruah. ‘Nanmah an tawngtu hna cu keimah ka mit falai a ka tawngmi an si,’ tiah Jehovah nih a ti. (Zechariah 2:8) Cun Jesuh zong nih thlarau chiti thuhmi a nau hna cungah minung nih an tuahmi, asilole tuah awk an tlorhmi cu a cungah an tuah, an tlorh ti in a ruah tiah fakkhun in a rak chim.—Matthai 25:40, 45.
7. Biathlam 7:9 ah langhtermi “mibu nganpi” cu Gog i thinhunnak kha zei kong ruangah dah an in?
7 Angaitein, thlarau chiti thuhmi a tangrihmi hna kha lungtho ngaiin a ṭanhmi hna cu Gog i thinhunnak an ton lai. Mah Pathian i “vawlei thar” ah a um hngami hna cu “phun kip, ram kip, holh kip le hrin kip chungin a rami” “mibu nganpi” an si. (Biathlam 7:9) Annih cu “bawi ṭhutdan hmai le Tufa hmai ah cun an dir i puan rang an i aih” tiah a ti. Cucaah, annih cu Pathian le Khrih Jesuh hmai ah mithmaiṭha an hmu. “Tum hnah kha an i put” i Jehovah kha universe nawlngeitu in an thangṭhat i a uknak kha Siangpahrang Jesuh Khrih, “Pathian tuufa” uknak nih a aiawh.—Johan 1:29, 36.
8. Gog tuknak nih Khrih kha zeidah a tuahter lai i, zei thil dah a chauk lai?
8 Gog i tuknak nih Pathian Siangpahrang i biaceihnak le Armageddon raldohnak kha a chuahter lai. (Biathlam 16:14, 16) Jehovah i nawlngeihnak kha a cohlanlomi hna cu hrawh an si lai. Khattaleiah, Pathian Pennak cungah zumhfeknak an langhter ruangah sifahharnak a tongmi hna cu zungzal luatnak an hmu lai. Mah he pehtlaiin lamkaltu Paul nih hitin a ṭial: “Hi nih hin Pathian biakhiahnak a dinning cu a langhter. Sifahnak nan in hnawhchanmi Pathian Pennak he khan aa tlakmi an siter hna lai. Pathian nih a hmaanmi thil kha a tuah lai. Sifahnak nan cungah a tluntertu hna cungah khan sifahnak a tlunter ve lai i sifah a ingmi nan cung le kanmah cung zong ah damnak a tlunter lai. Bawipa Jesuh cu a vancungmi mi ṭhawng hna le meizik he, Pathian a hngal lomi hna le Bawipa Jesuh kong Thawng Ṭha a ngai duhlomi hna dantat awkah, a rung ṭum tikah dingte in a tuah lai.”—2 Thesalon 1:5-8.
9, 10. (a) Jehovah nih Judahmi hna kha zeitindah ṭih a nungmi ral kha a teiter? (b) Nihin Khrihfa hna cu zeidah an tuah peng lai?
9 Armageddon ah a dongh laimi, a ra zaumi sifahharnak nganpi chungah Khrih nih thilṭhalo vialte kha a tuk lai. Sihmanhsehlaw, a zultu hna cu raldoh awk a herh lai lo, a luanciami kum 2,900 nak tamdeuh lio i Judah miphun phunhnih ram chungmi hna nih raldoh awk a herh lo bantuk khan a si lai. Raldohnak cu Jehovah ta a si i, teinak nawl a pek lai. Hitin rel a si: “BAWIPA nih Ammon, Moab le Seir Tlangmi, Judah tuk awk i a rami hna kha lamhruang a ahter hna i cucaah an sung dih. Zeitintiah Ammonmi le Moabmi hna nih khan Seir Tlangmi kha an thawh hnawh hna i an hloh cikcek hna, cun Seir i a ummi hna cu an thah hna hnuah anmah cu pakhat le pakhat an i nawng dih. Judahmi cu ramlak i ralvennak innsang kha an phak tikah, mi bupi cu an hei zoh hna i zohhmanh, annih cu an thi i vawlei ah khan an ril liangluang ko; pakhat hmanh an luat lo.”—2 Chanrelnak 20:22-24.
10 Jehovah nih a chimchung bantuk tein a rak cang: “Hi i tuknak chungah hin nannih nih nan tuk a hau lai lo.” (2 Chanrelnak 20:17) Jesuh Khrih nih “tei awkah aa thawh” tikah Khrihfa hna zul ding phung kha a chiahtak. Hi caan lioah annih cu ralthuam taktak hna in si lo in, thlarau ralthuam in thilṭhalo kha an doh. Cuticun “ṭhatnak tu in ṭhatlonak kha [an] tei.”—Rom 6:13; 12:17-21; 13:12; 2 Korin 10:3-5.
Gog Dohnak Kha Ahonihdah A Hruai?
11. (a) Gog nih a dohnak caah ahopawl dah a hman lai? (b) Thlarau lei hliphlaunak ah zeidah aa tel?
11 Magog ram i Gog cu 1914 kum in niamter a si cangmi Satan a si tiah hngalhthiam khawh a si. Thlarau mipa pakhat in dairek in a tuk khawh lai lo, sihmanhsehlaw minung hna kha hmang in a tuk lai. Hi minung hna cu aho te pawl dah an si lai? Baibal nih a dikthlir in a chim lai lo nain, a kan theihthiamtermi langhternak cheukhat kha an kan pek. Baibal chimchungmi hna vawlei cungah a tling chinchin bantukin fiang deuh in kan hngalh khawh chinchin lai. Jehovah miphun hna nih ruahchungnak te hna kha an hrial ko nain, thlarau lei ah an i hliphlau, Baibal chimchungbia a tlinnak chungah a rak cangmi nainganzi le biaknak sining vialte kha fiangte in an hngalh.
12, 13. Profet Daniel nih Pathian miphun chungah a tlung hngami hmanungbik tuknak kong kha zeitindah a chimchung?
12 Pathian miphun dohnak hmanungbik kong kha profet Daniel nih hitin a ṭial: “Mi tampi kha thah awk le hloh awkah thinhung ngaiin a chuak lai. A bawi puaninn cu rili le tlang thiang, tlang vialte lak i aa dawh bikmi karlak ah cun a phun lai, sihmanhsehlaw ahohmanh bawmtu ngei lo in a donghnak kha a phan lai.”—Daniel 11:44, 45.
13 Baibal i ahnu hmai bia ningin “rili” cu Rili Ngan” asilole meditarenia rili a si, cun “tlang thiang” cu Zion tlang a si, mah kong he pehtlaiin Jehovah nih hitin a ti: “Zion ka tlang thiang cungah ka siangpahrang cu ka chiah cang.” (Salm 2:6; Joshua 1:4) Cucaah, ‘rili ngan le tlang thiang lak i’ hmun cu thlarau lei in thlarau chiti thuhmi Khrihfa i thlarau lei an rumnak kha a aiawh. Annih cu Pathian he aa hlatmi minung rili ah an i tel ti lo i, vancung Pennak ah Jesuh Khrih he uk awk an hngah lio a si. Cucaah, Daneil profet chimchung ningin chaklei siangpahrang nih fakpi in a tuk tikah Pathian i thlarau chiti thuhmi sal hna le mibu nganpi chung i zumhfekmi hawi hna cu a hmuichonh an si lai.—Isaiah 57:20; Hebru 12:22; Biathlam 14:1.
Pathian Salle Hna Nih Zeitindah An Lehrul Lai?
14. Tuk an si tikah Pathian miphun hna nih zeithil pathum dah an tuah lai?
14 Pathian salle hna cu tuk an si tikah zeidah an tuah lai tiah kan ruahchan khawh? Jehoshaphat chan ah Pathian miphun i lehrualning nih phung a chiahtak ṭhiamṭhiam. Mah khuami hna cu hithil pathum kha tuah awk nawlpek an si tikha philh hlah: (1) hmun an i lak, (2) daite in an dir i (3) Jehovah i khamhnak kha an zoh. Hi bia hna ningin nihin Pathian miphun nih zeitindah an tuah lai?—2 Chanrelnak 20:17.
15. Jehovah miphun hna hmun an i lak ti cu zei sullam dah a si?
15 Hmun an i lak: Pathian miphun hna cu Pathian Pennak kha lungtho thanuam in an ṭanh peng lai. Khoikalei hmanh ṭanh lo in an um peng lai. Annih cu Jehovah rian kha ‘fekte in, ṭhial kho lo in’ an ṭuan i Jehvoah dawtzangfahnak kong kha mi zapi sinah an thanh peng lai. (1 Korin 15:58; Salm 118:28, 29) Atu ah, asilole hmailei ah an ton dingmi zeibantuk hneknak hmanh siseh an ngeihmi Pathian mithmaiṭha hmumi sining in a pialter khawh lai lo.
16. Jehovah salle hna cu zeibantuk kong hna ahdah daite in an dir?
16 Daite in an dir: Jehovah salle hna cu anmah le anmah te in khamh si awk an i zuam lo i, Jehovah kha tlamtling in an bochan lai. Pathian pakhat lawng nih a salle hna kha vawlei buainak hna in a khamh khawh hna i, khamh dingah bia a kam. (Isaiah 43:10, 11; 54:15; Ṭahnak Hla 3:26) Jehovah bochannak ah a timhnak a tling nakhnga kum tampi a hman ti a langmi tuchan mithmukhawhmi lam kha bochannak aa tel. Cutikah, lamhruai awkah Jehovah le a siangpahrang hna nih nawlpekmi biatu hawi hna kha Khrihfa taktak hna in caan dang hna nakin an zumh lai. Hi zumhfekmi hna cu Pathian miphun kha lam an hruai lai. An lamhruainak kha an cohlan lonak nih rawhralnak a chuahter khawh.—Matthai 24:45-47; Hebru 13:7, 17.
17. Jehovah i zumhfekmi salle hna nih Jehovah i khamhnak kha zeiruangah an hmu lai?
17 Jehovah khamhnak kha zoh: An Khrihfa zumhfeknak kha aa tlaihchan i Jehovah nih luatnak a chuahter khawh ti aa bochanmi dihlak cu khamhnak laksawng an hmu lai. Annih cu donghnak suimilam tiang a si khawh chungin Pathian biaceihnak ni a phan deng cang tiah an thanh lai. Jehovah cu a hmaanmi Pathian a si i, zumhfekmi salle hna vawlei cungah an um tikha sermi vialte nih an hngalh lai. Jehovah i nawlngeihnak kong ah zeitik hmanh ah alnak a chuahter ti lai lo.—Ezekiel 33:33; 36:23.
18, 19. (a) Gog tuknak ah a luat hngami pawl i an lungruahnak kha Exodas angan 15 i teinak hla nih zeitindah a langhter? (b) Atu Pathian miphun nih zeidah an tuah awk aa tlak?
18 Pathian miphun hna cu vawlei thar ah thazang thar chuah in an lut lai i, teinak hla kha lungtho thanuam in an sak lai, rili sen kha tan i a luatmi hlanlio Israelmi hna zong cutin an rak tuah. Jehovah nih a khamh hna caah annih cu pakhat cio in siseh, bu in siseh zungzal in an lawmh lai tiah hlanlio ah sakmi hi biafang hna nih a langhter: “BAWIPA nih lianhngannak in a tei cang, . . . cucaah BAWIPA cu hla in ka thangṭhat lai. . . . Bawipa cu ralkap a si, a min cu BAWIPA a si. . . . BAWIPA, na orhlei kut . . . [nih] ral pawl kha a den cikcek hna. A ṭhawngmi na lianhngannak in na ral cu na tei hna i na thinhunnak cu a alh in a alh i capawl bangin a kangh dih hna. . . . Bia na kamhmi hna bantukte khan, na tlanhmi hna cu na hruai hna i na ṭhawnnak in lam na ṭhit hna i na inn thiang na phakpi hna. . . . Na mi cu na luhpi hna lai i na tlang cungah khan na phun hna lai, na umnak inn ca i na sermi hmun ah khan na phun hna lai maw BAWIPA, nangmah hrimhrim nih na sakmi biakinn ah khan na phun hna lai, Maw BAWIPA, BAWIPA cu zungzal in zungzal tiang siangpahrang a si lai.”—Exodas 15:1-19.
19 Atu caan cu caandang bantuk si lo in zungzal nunnak ruahchannak a rak fiang chinchin i, Pathian salle hna in Jehovah cungah an pumpeknak le langhter awk le Pathian kha an Siangpahrang in pumpek awk an biakhiahnak kha thazang thar chuahter chin awk caanṭha a si!—1 Chanrelnak 29:11-13.
Na Fianter Kho Maw?
• Gog nih thlarau chiti thuhmi hna le tuudang hna kha zeiruangah a tuk lai?
• Pathian miphun hna zeitindah hmun an i lak lai?
• Daite in dirnak a sullam cu zeidah a si?
• Pathian miphun hna cu Jehovah khamhnak kha zeitindah an zoh lai?
[Cahmai 12nak i Hmanthlak]