Lung Retheihnak Na Tawn Lioah Jehovah Kha Tling Tein I Bochan
“Pathian cu kan i dornak le kan thazang a si, harnak caan ah a kan bawm zungzal tu a si”—SALM 46:1.
1, 2. (a) Pathian kan i bochan ti lawngin a za lo tikha zei tahchunhnak nih dah a langhter? (b) Pathian kan i bochan ti lawngin zeiruang ah a zat lo?
PATHIAN kan i bochan ti cu phun khat a si i tuahsernak in langhter cu phun dang ngai a si ve. Tahchunhnak ah, “Pathian kan i bochan” timi bia hna cu U.S caku tangka le thir tangka nek ah hlan piin hmuh a rak si cang.a 1956 kum ah U.S. cozah chung i upadi sertu bu [congress] nih mah bia cu American miphun phunglam a si tiah upadi pakhat an an rak chuah. A sining cu, cu ram lawngah si loin—vawlei pumpi cung i minung hna nih—Pathian nak in tangka le chawva thilri tu kha an i bochan deuh.—Luke 12:16-21.
2 A hmaanmi Khrihfa a simi nih, Pathian kan i bochan ti chim lawng in a za lo. “Tuahnak aa tel lomi zumhnak cu a thih” bantuk in Pathian kan i bochannak zong tuahsernak in kan langhter lo ahcun sullam ngei lo a si ko. (Jeim 2:26, NW) Pathian sin i thla kan cam tikah, cun cathiang chung le a bupi sinin lamhruainak hna kan kawl tikah Jehovah kan i bochannak kan langhtermi a si ti kha hmasa capar ah kan rak cawn cang. Cu pathum hna cu lungretheihnak kan ton lioah zeitindah kan hman khawh tikha atu ruat hmanh u sih.
Rian In a Kan Chuah Tikah Asilole Hmuhmi Tangka a Tlawm Tikah
3. Hi “harnak caan” ah Jehovah salle hna nih zei khuasak harnak hna dah kan ton i Pathian nih bawmh a kan duh ti kha zeitindah kan hngalh?
3 Hi “harnak caan” ah, kan nih Khrihfa hna zong midang bantuk in khuasak harnak kan ton ve. (2 Timote 3:1) Cucaah, ruah lo piin rian in chuah kan si kho. Asiloah ṭuan caan a saupi nain ṭuanman a tlawmtemi rian zong kan ṭuan kho ko. Cubantuk sining ah, ‘chungkhar zohkhenh’ cu a har ko lai. (1 Timothy 5:8) A sang bikmi Pathian nih cu bantuk caan ah bawmh a kan duh maw? A duh taktak ko! Hi thil ningcang ah kan khuasak harnak vialte in Jehovah nih a kan khamh lo nain, amah kan i bochan ahcun, Salm 46:1 chung i “Pathian cu kan i dornak le kan thazang a si, harnakcan ah a kan bawm zungzal tu a si” timi bia a hmaannak kha kanmah theng nih kan hmuh ko lai. A si nain, khuasak harnak nih a kan nenh tikah kan lungthin dihlak in Jehovah kan i bochannak kha zeitindah kan langhter lai?
4. Tangka lei kan chambau tikah, zeica dah thla kan cam khawh, cu ti kan cam tikah Jehovah nih zeitindah a kan leh?
4 Jehovah i bochannak kan langhternak lam phunkhat cu thla camnak in a si. Zeica dah thla kan cam khawh? Tangka lei kan cham bau tikah, awi dang nakin hman a tlakmi fimnak kan herh khun. Khi tikah, cu fimnak ngeih awkah thlacam! Jehovah bia nih hitin fek tein a chim: “Sihmanhsehlaw fimnak a baumi nan um ahcun, Pathian sinah thlacam sehlaw Pathian nih a pek ko lai; Pathian nih cun aho paoh kha zangfah ngai in a pek ko hna.” (Jeim 1:5) A fimmi biakhiahnak le a hmaanmi thimnak tuahkhawh awkah—fimnak a simi—hngalhnak, hngalhthiamnak le thleidan thiamnak hna kha ṭha tein hman thiamnak hnga Jehovah sinah thlacam. Cubantukin thla kan cam tikah kan ngaih piak hna lai tiah a kan dawtu vancung kan Pa nih fek tein a chim. An lungthin dihlak in amah aa bochanmi hna kha an lam tluan ter awkah a zungzal in duhnak a ngei.—Salm 65:2; Phungthlukbia 3:5, 6.
5, 6. (a) Khuasak harnak kan teinak hnga Pathian bia kha zeicahdah kan i bochan khawh? (b) Rian phuah kan si tikah lungretheihnak tlawmter awkah zeidah kan tuah khawh?
5 Jehovah kan i bochannak a langhnak dang phunkhat cu Pathian bia chungah lamhruainak kawlnak thawng in a si. Baibal chungah a ummi fimnak a ralrin peknak hna cu “bochan awk a tlak tuk” ti a fiang. (Salm 93:5, NW) A luan ciami kum 1,900 lengah an rak limmi cauk a si ko nain mah thawchuah hnawhmi cauk chungah khuasak harnak kha ṭha deuh in tawnghtham khawhtertu bochan tlakmi ruahnak cheuhnak le hmuh thiamnak a um. Baibal fimnak tahchunhnak cheukhat kha zoh hna hmanh.
6 A fimmi Solomon siangpahrang nih caan saupi lio in hitin a rak hngalh cang: “Rian hrang a ṭuanmi cu eiawk a zaa a ngeih caan a um lai, a ngeih lo caan a um lai, sihmanhsehlaw zan tal ah ṭhate in aa hngilh; sihmanhsehlaw mirum cu tampi a ngei ko nain a lung retheihnak nih khan hngilh lo in a um ter.” (Phungchimtu 5:12) Kan ngeihmi chawva thilri kha remh, thenh, zohkhenh le kilven awkah a caan le tangka a herh. Cucaah, rian phuah kan si tikah kan nunning kha ruat ṭhan in kan herhmi le kan duhmi kha thleidan kan i zuam ahcun a ṭha lai. Lungretheihnak tlawmter awkah thlennawnnak cheukhat tuah cu fim a si ko lai. Tahchunhnak ah, inn hme deuh ah i ṭhialnak in siseh, a herh lomi thil zuarnak in siseh kan nunning kha kan fawiter kho maw?—Matthai 6:22.
7, 8. (a) A tling lomi minung nih thilri kong ah lungretheihnak an ngei tuk ti a hngalh ti kha Jesuh nih zeitindah a langhter? (Tanglei fianternak kha zoh) (b) Thinphan luannak kha hrial awkah zei fimchimhnak dah Jesuh nih a rak chim?
7 Tlangcung Phungchimnak ah Jesuh nih hitin a cawnpiak hna: “Nan nunnak ding ca i nan herhmi rawl le ti kong ah le nan pum ca i nan herhmi hnipuan kong ah lungrethei awlokchong in va um hlah u.”b (Matthai 6:25) A tlinglomi minung nih an herhmi thil kong ah lung rethei in an um tawn ti kha Jesuh nih a hngalh. Cu thil kong ah ‘lungretheih lo in’ zeitindah kan um khawh lai? “Pathian Pennak . . . kha hmasa bik ah kawl u, [NW]” tiah Jesuh nih a rak chim. Zei harnak hmanh tong ko u sihlaw kan nunnak ah Jehovah biaknak kha hmasa ah kan chiah peng lai. Cutin kan tuah ahcun, vancung kan Pa nih kan herhmi thil dang vialte zong “a kan chapchih lai.” Kan herhmi kha lamkhat khat in a kan bawmh ko lai.—Matthai 6:33, NW.
8 Jesuh nih hitin ruahnak a kan cheuhchap: “Cucaah thaizing kong ah lungrethei in um hlah u; thaizing nih cun lungretheihnak cu a zaa in aa ngeih ve ko lai.” (Matthai 6:34) Thaizing ah a cang kho menmi thil kong ah lungretheih luan in um cu hruh a si. Baibal lei mifim pa pakhat nih hitin a ti: “A cang mithil hi kan rak ruah i kan rak ṭih tlukin a chia theng lo.” Biapi chiah tlakmi kha biapi ah chia law ni khat caah nung timi Baibal ruahnak cheuhnak kha toidawr tein na zulhnak nih thinphan luannak in an khamh lai.—1 Piter 5:6, 7.
9. Tangka lei harnak tontik ah ‘zumawktlak le a fimmi sal’ nih an chuahmi cauk in zei bawmhnak dah hmuh khawh a si?
9 Tangka lei harnak ton tikah ‘zumhawktlak le a fimmi sal’ i cauk hna ah bawmhnak kawlnak thawngin Jehovah kan i bochannak kha kan langhter khawh. (Matthai 24:45) A tu le tu, Ihlau! mekkazin ah khuasak harnak tei awkah mi a bawmmi ruahnak cheuhnak pawl a um. 1992, may 8 i chuahmi “Rian lo in umnak—Zeitindah tei a si lai?” timi capar nih mi tampi rian loin an um tikah tangka lei le lungthin lei ah bawmtu a rak simi hman awktlak lamhruainak pariat kha a chim. c A si ko, mah lamhruainak hna kha tangka a biapit ning i a hmaanmi hmuhnak he cuaithlai ding a si. Cu kong cu, mah mekkazin i “tangka nak in a biapi deuhmi thil” timi capar ah a um.—Phungchimtu 7:12.
Dam Lo Ruang I Ṭihphannak A Um Tikah
10. Fakngai in kan zawt tikah Jehovah i bochan cu aa tlakmi a si ti kha David sining nih zeitin dah a langhter?
10 Fak ngaiin kan zawt tik i Jehovah i bochan cu aa tlak maw? Aa tlak taktak ko! A miphun hna lak i a zawmi hna cungah Jehovah nih zawnruahnak a ngei. Cuhleiah, bawmh awkah timh cia a si. Tahchunhnak ah, David siangpahrang kong kha ruat hmanh. A zawmi miding pa pakhat in Pathian he an i pehtlaihning kong a ṭial lioah amah thengte fak ngaiin a rak zaw ko lai. “A zawt tikah Bawipa nih a bawmh lai i a dam ter ṭhan lai” tiah a rak chim. (Salm 41:1, 3, 7, 8) David nih Pathian kha fek tein aa bochan i a donghnak ah a rak dam. A sinain, kandam lo ruang ah kan lungre a thei ahcun Pathian kha zeitindah kan i bochan khawh lai?
11. Zawt tikah, vancung kan Pa sinah zeidah kan hal khawh?
11 Zawt tikah, Jehovah i bochannak a langhtermi lam pakhat cu inkhawh awk bawmhnak caah a sinah zangfah hal thlacamnak in a si. Kan sining nih nawl a pek tiangin kan dam nak hnga “aa tlakmi fimnak” kha hman awkah Pathian kha bawmhnak kan hal khawh. (Phungthlukbia 3:21, NW) Zawtnak kan tei khawhnak hnga lungsaunak le inkhawhnak ngeihawk zongah amah kha bawmhnak kan hal khawh. Cu lengah, Jehovah nih a kan bawmhnak hnga, cun zei a can hmanh ah zumhfekmi le a tlarimi si peng awkah ṭhawnnak a kan pek nak hnga bawmh hal kan duh ko lai. (Filipi 4:13) Pathian cungah dinfel pengnak cu a tu kan nunnak nak hmanh in a biapi deuh. Kan dinfel peng ahcun laksawng Petu Nganbik nih a tlingmi nunnak le damnak a zungzal in a kan pek lai.—Hebru 11:6.
12. Si i thlopnak kong ah zei Baibal phung hna nih dah fimnak in bia khiah awkah a kan bawmh khawh lai?
12 Jehovah kan ni bochannak nih Baibal chung i hman tlakmi lamhruainak kha kawl awkah a kan forh. Baibal chung ummi phung hna nih sii hmanning kongah a ṭhami biakhiahnak a kan tuah ter khawh. Tahchunhnak ah, “khuachia thiamnak” kha Baibal nih a doh ti kha kan hngalh i khuachia thiamnak aa telmi zei bantuk thlopbulnak paoh kha kan hrial lai. (Galati 5:19-21, NW; Deuteronomi 18:10-12) Kaa hin Baibal chung i bochan awk a tlakmi Baibal fimnak he aa tlaiin zohchun awk dang pakhat a um: “Milungthin tlawm nih cun zei pauh kha a zumh.” (Phungthlukbia 14:15) Cucaah, si i thlop awk in khua na ruah tikah ‘zei pauh kha zumh’ loin bochan awk a tlakmi hngalhnak kawl cu fimnak a si. Cu tin “ṭha ten i ralrinnak” nih thim khawh a simi thlopning hna kha ṭha ten ruah i fimngai in biakhiahnak tuah awkah a kan bawmh khawh.—Titas 2:12, NW.
13, 14. (a) Vennakinnsang le Ihlau! mekkazin hna ah hngalhnak a pe ngaimi zei capar hna dah an chuah cang. (Cahmai 17 i rinlikulh kha zoh.) (b) 2002, January 8, i chuahmi Ihlau! mekkazin ah caan saupi zawtnak he pehtlaiin zei ruahnak cheuhnak dah a um?
13 Zumhawk a tlakmi sal i an cauk pawl hlathlainak thawng zong in Jehovah kan i bochannak kha kan langhter khawh. Vennak innsang le Ihlau! Mekkazin hna ah zawtfah harnak le zawtnak a phunphun kong kha a tu le tu aa tel.d Cu journal hna ah zawtnak, dam lonak le tlamtlin lonak a phunphun a teitu hna kong kha a caancaan ah aa ṭial. Cu lengah, capar cheukhat nih caan saupi zawtnak a ingmi hna caah Baibal lei ruahnak cheuhnak hna le hmantlakmi ruahnak cheuhnak hna zong a chim.
14 Tahchunhnak ah, 2002, January 8, chuahmi Ihlau! mekkazin nih “Mizaw caah hnemhnak” tiah a phaw i a ummi a kong kha capar hna peh thluah mah in a fianter. Mah capar hna nih bawmtu a simi Biabal phung hna lawng si loin kum tampi chung a zawmi hna hmuh tonnak an halmi hna zong kha a chim. “Zawtfah bu in teinak he nunnak—zeitindah?” timi capar nih hitin ruahnak a kan cheuh: na zawtnak kong kha a si khawhchung in hngalh i zuam. (Phungthlukbia 24:5) Midang bawmh khawh awk tinhnak hna aa tel in, aa tlakmi tinhnak pawl ngeih i zuam, a si nain midang nih an phakmi tinhnak bel na phan kho lai lo ti kha hngal. (Lamkaltu 20:35; Galati 6:4) Hawikom ngeih loin um hlah. (Phungthlukbia 18:1) Midang nih an in lenmi kha a nuam in thei. (Phungthlukbia 17:22) Cuhlei ah, Jehovah le Khrihfa bu he naih tein um. (Nahum 1:7; Rom 1:11, 12) A bupi hmangin Jehovah nih a kan timh piakmi bochan tlak lamhruainak caah kan i lawm lo maw?
Pumsa Derthawmnak Pakhat Kan Cungah a Hmunh Tikah
15. Lamkaltu Paul nih a tlinglomi pumsa duhnak a doh tikah zeitindah a rak tei, zeidah fektein kan zumh khawh?
15 Lamkaltu Paul nih: “Ka chungah hin . . . ṭhatnak a um lo ti kha ka hngalh” tiah a rak ṭial. (Rom 7:18) A tling lomi pumsa duhnak le derthawmnak hna doh cu zeitluk in dah a har tikha Paul nih a rak tuar. Sihmanhsehlaw, ka tei khawh lai tiah Paul nih zumhfehnak a ngei. (1 Korin 9:26, 27) Zeitindah? A lungthin dihlak in Jehovah aa bochannak thawngin a si. Cucaah, Paul nih hitin a rak chim khawh: “Mi lung rethei ka va si dah! Thihnak i a ka kalpitu pum chung hin aho nih dah a ka khamh lai? Pathian lawnglawng nih kan Bawipa Jesuh Khrih thawngin a ka khamh lai?” (Rom 7:24, 25) Kan nih tah? Kannih zong pumsa derthawmnak kha kan doh ve. Cubantuk derthawmnak kha doh khawh kan i zuam lio ah zeitik hmanh ah ka tei kho lai lo tiah ruah i zumhfehnak ngeih ti lo awk a fawi te. A sinain, Paul bantuk in kanmah ṭhawnnak si loin Jehovah tu kan i bochan ahcun Pathian nih a kan bawmh ko lai.
16. Pumsa derthawmnak pakhat a hmunh ahcun zeica ah dah thla kan cam lai, kan sining hlun ah kan tlak ṭhan ahcun zeidah kan tuah khawh?
16 Kan pumsa derthawmnak pakhat a hmunh tikah Jehovah sinah fakpi in nawlnak kan tuahnak thawngin amah kan i bochannak kha kan langhter khawh. Jehovah thiangthlarau bawmhnak kha hal, cun nawl hmanh a herh. (Luka 11:9-13) Pathian thingthlarau theitlai pakhat a simi mah le mah i tei khawhnak kha a hleikhun in hal khawh a si. (Galatians 5:22, 23) Kan sining hlun ah kan tlak ṭhan ahcun zeidah kan tuah ding a si? Zeiti hmanh in, a sung kan pek ding a si lo. Zangfah hmangmi kan Pathian sinah, thlacamnak in ngaihthiamnak le bawmhnak hal awk thadi ngai in zeitik hmanh ah um hlah u sih. Sual aa phuhrungmi “a kuaimi” thinlung zong kha Jehovah nih zeitik hmanh ah a hlaw lai lo. (Salm 51:17, NW) Sual i theih i a ngaih a chiami thinlung in lung takin kan nawl ahcun tukforhnak hna kha doh khawh awkah Jehovah nih a kan bawmh ko lai.—Filipi 4:6, 7.
17. (a) Kan dohmi derthawmnak pakhatkhat kha Jehovah nih zeitindah a hmuh ti tuaktan cu zei ruangah man a ngeih? (b) Thinhun fawinak kha uk awk, lei i sum awk le ṭhatnak a chuahpi lomi nuamhngaihnak lei ah kan lung a purmi kha doh awkah aa zuammi kan si ahcun zei Baibal cacang hna dah i ciah khawh a si?
17 A bia chungah bawmhnak kan kawlnak zongin Jehovah kan i bochannak kha kan langhter khawh. Baibal kawl fawinak ca i hmanmi asiloah kum donghnak lei ah chuahmi Vannakinnsang le Ihlau! ah a ummi Index kha hman in ‘Hi ka dohmi ka derthawmnak hi Jehovah nih zeitindah a hmuh hnga?’ Jehovah nih hi kong hi zeitindah a hmuh ti ruah ṭhannak nih a lung ton awkah a kan ṭhawnter deuh lai. Cuticun, amah bantuk in kan hmuh ve lai i a huatmi kha kan huat thiam ve lai. (Salm 97:10) Acheu nih an dohmi derthawmnak he aa tlaimi Baibal cacang hna kha an zahnak nih a bawmh hna ti kha an hmuh. Thinhun fawinak kha uk awk naa zuam maw? Cuti a si ahcun Phungthlukbia 14:17 le Efesa 4:31 kha na zah khawh ahcun a ṭha lai. Lei i sum tah kan i harh maw? Phungthlukbia 12:18 le Efesa 4:29 ti ban tuk cacang hna kha i ciah khawh a si. Ṭhatnak a pe lomi nuamhngaihnak lei ah tah kan thinlung a pur maw? Efesa 5:3 le Kolose 3:5 kha cinken i zuam hna u sih.
18. Kan derthawmnak tei awkah Khrihfa upa hna sin i bawmhnak hal cu zeiruang ah ningzah ding a si lo?
18 Thlarau in rian pekmi Khrihfabu upa hna sinah bawmhnak kawl cu Jehovah i bochannak langhternak phun khat a si. (Lamkaltu 20:28) A ngaingai ti ahcun, mah “minung laksawng” hna hi a tuu pawl zohkhenh awkah Jehovah nih Jesuh hmangin a kan timhpiakmi a si. (Efesa 4:7, 8, NW, 11-14) A si ko, derthawmnak pakhat caah bawmhnak hal cu a fawi lo. Khrihfa upa pawl nih a kan zohchuk lai ti phan in kan ning a zak kho men. Sihmanhsehlaw, thlarau lei patling a simi pa hna sinah bawmhnak kan hal ngam hna caah a kan upat lai tiah zumhkhawh a si. Cu lengah, Khrihfa upa hna nih turun he an i pehtlaih tikah Jehovah ziaza hna kha langhter an i zuam. An mi hnemhnak le hmantlakmi fim chimhnak hna lengah Baibal chungin cawpiaknak hna cu kan derthawmnak tei khawh awkah thazang kan herh zat kha a si kho ko.—Jeim 5:14-16.
19. (a) Hi ningcang ah nunnak pakpalawng a sining kha Satan nih zeitindah hman aa zuam? (b) Bochannak ah zeidah aa tel i fek ngai in zeitindah bia kan khiah lai?
19 Satan nih can tawite lawng ka ngei ti a hngalh kha zeitik hmanh ah phih hlah. (Biathlam 12:12) Hi vawlei nunnak pakpaklawng a sining kha hmangin hnabei donghter a kan duh. Rom 8:35-39 chung bia hna hi tling tein i bochan hna u sih: “Aho nih dah Khrih dawtnak he cun a kan ṭhen khawh lai? Harnak nih maw, tem innak nih maw, hremnak nih maw, rawl ṭamnak nih maw, pamnak nih maw, thil ṭihnung nih maw, thinnak nih maw, zeital nih a kan ṭhen kho hnga maw? . . . Hi thilvialte hna chungah hin a kan dawtu thawngin kannih cu teitu kan si. Zeicahtiah a kan dawtnak he cun zeihmanh nih a kan ṭhen kho lai lo ti kha fiang tein kan hngalh: thihnak nih siseh, nunnak nih siseh, vanmi nih si hna seh, uk tu le ṭawnnak nih si hna seh, hmailei can nih siseh, cunglei vawlei nih siseh, tanglei vawlei nih siseh, a kan ṭhen kho lai lo—kan Bawipa Khrih Jesuh thawngin kan ta a simi Pathian dawtnak he a kan ṭhen kho tu ding cu sermi thil dihlak ah hin zeihmanh a um lo.” Jehovah bochannak taktak a va si dah! Sihmanhsehlaw, cu bantuk bochannak cu lungchung i a ummi thil mem a si lo. Cu nakin, nifa tin felfai tein kan ruah hnu ah kan tuahmi biakhiahnak hna aa telmi bochannak tu a si. Cucaah, lungrethei in kan um caan ah Jehovah kha tling tein bochan awkah fek ngai in biakhiak hna u sih.
[A Tanglei Fianternak Hna]
a 1861, November 20 ah, tangka lei vuanzi Salmon P. Chase nih U. S. tangka sernak hmun [sehzung] ah hitin ca pakhat a rak ṭial: “Pathian ṭhawnnak lo cun zei ram hmanh a ṭhawng kho lo, amah kilvennak umlo cun himnak a um kho lo. Pathian kan i bochannak kong kha kan ram tangka cungah kan langhter ding a si.” Cuticun “Pathian kan i bochan” timi biatlang tawite cu 1864 kum chuahmi U.S. thir tangka nek ah hmasabik hmuh a rak si.
b Hika i langhtermi lungretheihnak cu “nunnak i lawmhnak vialte a tlauter dihtu lungretheihnak” kha a si. “nan lungrethei hlah u” asiloah “nan thinphang hlah u” tiah cheukhat inh an leh. Asinain cutin lehnak nih lungretheihnak le thinphannak kha thawk ding a si lo ti kha a chim duhmi a si. Cherhchannak pakhat nih “Krik verb sining ah thawk cangmi tuahsernak pakhat kha ngawl awkah nawl pek kha a si” tiah a ti.
c Lamhruainak pariat cu hihi an si: (1) lau hlah; (2) ṭhatnak leiin ruat; (3) a dang rian ṭuan awkah thlen fawimi si; (4) midang nunning cawn loin—ngeihmi te he za tein nung; (5) a ba lak kha i ralring; (6) chungkhar lungrualnak kha hmunh ter; (7) nangmah le nangmah i upat; (8) hmuhmi le hmanmi tuaknak cazin i chiah.
d Baibal cherhchanmi mah cauk hna nih si i thlopning pakhat khat kha hnatlakpi asilole thapeknak a pe lo. Si i thlopnak cu mah pumpak nawl a si ti kha a cohlan. Zawtnak pakhat khat kong a chimmi capar hna nih a tu lio theihmi a kong a lam hna kha a reltu theihter a duh i a si.
Naa cinken maw?
• Khuasak harnak hna kan ton tikah Jehovah kan i bochan ti kha zeitindah kan langhter khawh?
• Zawtfah ruangah lungrethei in kan um tikah Pathian kan i bochan kha zeitindah kan langhter khawh?
• Pumsa derthawmnak pakhat a hmunh tikah Jehovah kan i bochan taktak ti kha zeitindah kan langhter khawh?
[Cahmai 12nak i Hmanthlak]
[Cahmai 13nak i Hmanthlak]
Mah Capar Hna Hi Naa Cinken Maw?
Zawtfah ruangah kan lungre a theih tikah, dam lonak le tlamtlinlonak hna ṭha tein a tei khomi hna kong kan relnak nih thazang a kan pek. A tanglei hi Vennakinnsang le Ihlau! mekkazin hna i capar cheukhat an si.
“Ka Derthawmnak Hna Teinak” timi capar nih a chiatnak in ruahnak le lungdonghnak hna kong a bikin a um.—Vennakinnsang, May 1, 1990 [Mirang].
“Thiar Cuap He a Si Ko Nain Phungchim a Ngawl Lo”—Ihlau!, June 8, 1993 [BU].
“Kuanfang Pakhat Nih Ka Nunnak a Rak Thlen” timi capar nih zennak kong a bik in a fainter.—Ihlau!, October 22, 1995 [Mirang].
“Thaizing ah Zei Ti Nan Si Lai Kha Nan Hngal Lo” timi capar nih lungthin ningcang in a umlomi zawtnak teinak kong a chim.—Vennakinnsang, December 1, 2000 [BU].
“A Daihrer Hmun In Loida a Khualtlawnnak” timi capar nih thluak zen zawtnak kong a bik in a chim.—Ihlau, May 8, 2000 [Mirang].
“Nauinn Zawtnak He i Zuamnak” —Ihlau!, July 22, 2000 [Mirang].
“Cuar Hak Zawtnak Dohnak”—Ihlau!, August 8, 2001 [Mirang].
“Fa Hrin Dih Hnu i Lungdonghnak Kha Ka Doh Tikah Teinak Ka Rak Hmuh”—Ihlau!, July 22, 2002 [Mirang].