Jehovah Cu A Fekmi Dawtnak In A Khat
“Jehovah cu . . . dawt-zangfahnak in a khatmi asi.”—SALM 145:8, NW.
1. Jehovah a dawtnak cu zeitlukdah a phanh?
“PATHIAN cu dawtnak asi.” (1 Johan 4:8) Jehovah nih dawtnak in a uk ti kha mah bia nih lungtho ngaiin a langhter. A bia a ngai lomi hna cung hmanhah ni a tlanter i ruah a surter caah ṭhathnemnak an hmu! (Matthai 5:44, 45) Mi vialte kha a dawt hna caah a ral hna hmanh an i ngaihchih i a sinah an i merṭhan ahcun nunnak an hmu kho. (Johan 3:16) Asinain, Jehovah nih dinnak a umnak vawlei thar ah amah a dawtu hna zungzal nunnak an i nomhpi khawh nakhnga chimh hrinh khawh asi lomi misual hna cu a rauhhlan ah a hrawh dih cang hna lai.—Salm 37:9-11, 29; 2 Piter 3:13.
2. Jehovah nih amah sin aa pum pemi hna kha dawtnak he pehtlai in zei muisam kha dah a hleikhun in a langhter?
2 Jehovah nih a hmaanmi amah a biatu hna cungah duhdawtnak in a dawtnak a langhter peng. Cu bantuk dawtnak cu “dawt-zangfahnak” asilole “a fekmi dawtnak” tiah lehmi Hebru biafang in langhter khawh asi. Hlanlio Israel Siangpahrang David nih Pathian dawt zangfahnak kha a rak lawmh. Amah a tonmi in siseh, midang hna he Pathian an i pehtlaihnak tuaktan in a ruahṭhanmi in siseh zumhfek tein hitin hla a rak sak: “BAWIPA cu a fekmi dawtnak in a khatmi asi.”—Salm 145:8.
Pathian Cung Zumhfekmi Hna Thleidan i Hngalhnak
3, 4. (a) Jehovah cung zumhfek mi hna cu Salm 145 nih zeitindah a kan thleidanter khawh? (b) Pathian cung zumhfek mi hna nih Pathian kha zeitindah an “thangṭhat?”
3 Jehovah Pathian he pehtlai in profet Samuel a nu Hannah nih hitin a chim: “A mithiang [“zumhfek mi,” NW] hna an ke kha a ven.” (1 Samuel 2:9) Hi “zumhfek mi hna” cu ahote dah an si? Mah bia halnak cu Siangpahrang David nih a leh. Jehovah khuaruahhar a sining hna kha hla in a thangṭhat hnuah “zumhfek mi hna nih thluachuah an in pek lai.” (Salm 145:10, NW) Mi pakhat nih Pathian kha zeitindah thluachuah a pek khawh lai ti hngalh na duh ko lai. Hla le holh in thangṭhat kha asi.
4 Jehovah a thangṭhat lengmang mi cu Jehovah cung zumhfekmi an si ti kha hngalh khawh asi. Annih nih zaraan he an i komhnak le Khrihfa pumhnak hna ah zeikong dah an chim tawn? Jehovah Pennak kong lawng an chim tawn! Jehovah cung zumhfekmi sal hna cu hi hla a satu David lungputning an ngei ve: “[Jehovah] pennak a sunpar ning kha an chim lai i na ṭhawnnak kha an thanh lai.”—Salm 145:11.
5. Jehovah nih a cung i zumhfekmi hna nih an thangṭhatnak kha a theih piak hna ti kha zeitindah kan hngalh?
5 Jehovah cung zumhfek mi hna nih amah an thangṭhat tikah a theihpiak hna maw? A si, an chimmi paoh kha a ngaih piak hna. Kan chan i a ummi a hmaanmi biaknak he aa tlaiin Malakhi nih hitin a rak chimchung: “Khi tikah BAWIPA a ṭih mi hna cu bia an i ruah i BAWIPA nih an bia cu a theih piak hna i a ngaih piak hna. Amah a ṭih mi hna le an lungchung in a min aa cinken mi hna cu a hmaika i cazin chungah an min kha khumh asi.” (Malakhi 3:16) Jehovah nih a cung i zumhfekmi hna nih an thangṭhat tikah a lawmh hna i annih kha a philh hna lo.
6. Zei rian nih dah Jehovah cung zumhfek mi hna cu thleidan in a hngalhter hna?
6 Zumhfekmi Jehovah salle hna nih a hmaanmi Pathian a bia lo mi hna kha ralṭha te le caan ṭha kawl in phung an chimh hna caah annih cu thleidan khawh an si. Pathian cung zumhfek mi hna nih ‘thil khuaruahhar a tuah mi le a Pennak a sunparning a lianhngan ning kha mi vialte an hmuhter hna.’ (Salm 145:12) Jehovah Pennak kong kha midang chimh dingah caanṭha na kawl bal maw? A lo zau mi minung cozah he i lo loin a Pennak cu a zungzal in a hmun. (1 Timote 1:17) Minung cu Jehovah i zungzal a hmunmi Pennak kong cawn in a ṭanhtu in dir awkah a biapi ngai. “Na pennak cu zungzal in a hmun lai i nangmah cu zungzal in siangpahrang na si lai” tiah David nih hla in a sak.—Salm 145:13.
7, 8. 1914 kum ah zei thil dah a hung cang? Pathian nih a Fapa Pennak in atu ah a uk cang ti awk a kong zeidah a um?
7 1914 kum in Jehovah Pennak kong chim ding tampi a hung um. Mah kum ahcun Pathian nih David Fapa Jesuh Khrih kha vancung Pennak i Messiah siangpahrang asiter. Cuticun Jehovah nih David pennak cu a zungzal in ka fehter lai timi a biakam kha a tlinter.—2 Samuel 7:12, 13; Luka 1:32, 33.
8 Jehovah nih a Fapa Jesuh Khrih Pennak in atu a uk cang ti kha a phanhnak hmelchunh pehzulh in a tlinnak nih a fianter. Cu hmelchunhnak ahcun aa thleidang bik mi cu Pathian i zumhawk tlak a mi vialte nih an tuah lai tiah Jesuh nih a rak chimchungmi hi rian hi asi: “Cun miphun vialte hna ca i tehte si awk ah Vancung Pennak kong Thawng Ṭha hi khuazakip ah chim asi lai cun cu hnu lawngah cun donghnak cu asi lai!” (Matthai 24:3-14) Pathian cung zumhfek mi hna nih mah chimchung bia tlinter ding ah lungtho thanuam in an ṭuan i atu ah nuai ruk leng asimi pa he nu he ngakchia he hi rian nganpi ah an i tel. Hi rian cu a hnu ahcun zeitik hmanh ah ṭuan ṭhan asi ti lai lo. Jehovah Pennak a ralchan mi vialte hna cu a rauhhlan ah hrawh an si lai.—Biathlam11:15, 18.
Jehovah Uknak In Ṭhathnemnak Hmuhnak
9, 10. Jehovah le minung uktu hna karlak ah zei aa dannak dah a um?
9 Pum aa pe cangmi Khrihfa kan si asi ahcun, Nawlngeitu Bawipa Jehovah he i pehtlaihnak kan hmuh mi nih ṭhatnak tampi a chuahter. (Salm 71:5; 116:12) Tahchunhnak ah, Pathian kan ṭih caah le dinnak kan tuah caah a mithmaiṭha kan hmu i thlarau lei zong in naih tein kan um kho. (Lamkaltu10:34, 35; Jeim 4:8) Cu he i thleidang in minung uktu hna cu ralbawi hna, a rummi chawletbu hna, asilole lentecelhnak le nuamhngaihnak i minthangmi hna he i kom in an um kal kha kan hmuh. Afrika tadinca Sowetan ah, a langmi cozah uktu pakhat nih a ram chung i sifakmi hna an umnak hmun kong kha hitihin a chim tiah a ti: “A sifakmi umnak hmun hna ah a tamdeuh nih kal kan duh lo ti cu kan hngalhthiam ko. Cubantuk umnak hmun cu philh kan duh caah asi. Kannih nih aman fakmi [mawṭawka] cawk in kan i cit lioah hi bantuk hmun a ummi nih hin lungthin thiang lo le hmaichiat in a kan umter.”
10 Uktu bawi cheukhat cu an kuttang mi hna ca ṭhatnak kha lungtak tein an ruat ti cu a hmaan ko. Asinain, an lak i miṭha bik hmanh nih a kuttang mi hna kha ṭhate in a hngal hna lo. Cu asi caah, a kuttang mi pakhat khat harnak a ton tikah a kuttang mi vialte kha khulrangin bawmh a duhmi uktu pakhat khat a um hnga maw? tiah biahalnak kan tuah men lai. A um ko. David nih hitin a ṭial: “[Jehovah nih] harnak a ing mi kha a bomh hna i ṭhumhnak a tongmi kha a cawi hna.”—Salm 145:14.
11. Pathian cung zumhfek mi hna cu zei hneksaknak dah an ton i zei bawmhnak dah an hmuh?
11 Jehovah cung zumhfek mi hna cu an tlin lo ruang le ‘Satan’ kutchung a ummi hi vawlei ah an nun caah hneksaknak le harnak nih a tlunnawh hna. (1 Johan 5:19; Salm 34:19) Khrihfa hna cu hremnak an tong. Acheu cu caan saupi zawtnak le ngaihchiatnak an tong. A caan caan ahcun, Jehovah cung zumhfek mi hna i palhnak ruangah lungdong in an i ‘ṭhum’ ko lai. Asinain zeibantuk hneksaknak hmanh tong ko u sih Jehovah cu pakhat cio kha thlarau thazang pek awk le hnangamnak pek awkah timhcia tein a um zungzal ko. Siangpahrang Jesuh Khrih zong nih a cungah zumhfek tein aa dormi hna kha an cungah zawnruahnak le dawtnak a langhter ve.—Salm 72:12-14.
Lung a Sitermi a Caan Hmaanmi Rawl
12, 13. Jehovah nih “thil nung vialte” an herhmi kha ṭhate in zeitindah a pek hna?
12 Jehovah cu dawtnak nganpi a ngeimi asi caah a salle hna an herhbaunak paoh kha a pek hna. Hi ka ah a thawmi rawl cawmnak aa tel. Siangpahrang David nih hitin a rak ṭial: “Ruahchannak he thil nung vialte nih [Jehovah] cu an zoh i an herhmi rawl kha an herh tikah a pek hna. Zaa lak in a pek hna i an dihlak in an herhmi kha tlingte in an hmuh.” (Salm 145:15, 16) Harnak a tlun caan hmanhah zumhfek mi hna cu “rawl nifate” hmuh awkah Jehovah nih a khanpiak hna.—Luka 11:3; 12:29, 30.
13 David nih “thil nung vialte” cu lungsi hnangam in an um lai tiah a rak ti. Cu ahcun saram hna zong an i tel. Vawlei nih tirawl tisik anhnah le rili tangah thingram hna tampi an khoh lo ahcun, rili thilnung hna, vate hna le tlang cung ummi saram hna nih thaw dawp ding oxygen le ei awk a um hnga lo. (Salm 104:14) Sihmanhsehlaw, thilnung hna an herhmi paoh pek dingah Jehovah nih a timhtuah.
14, 15. Nihin ah thlarau rawl kha zeitindah a timhtuah?
14 Minung cu saram he i lo loin thlarau lei chambaunak an ngei. (Matthai 5:3) Jehovah nih a zumhnak a fekmi hna thlarau lei herhbaunak kha ṭhate in a pek hna! Jesuh nih a thih hlan ah a zultu hna kha ‘zumh awk tlak le a fimmi sal’ nih thlarau rawl kha “a caan hmaante in” a dangh hna lai tiah bia aa kam. (Matthai 24:45) Nihin mah sal ahcun chiti thuhmi 144,000 chung i a tangrihmi an i tel. Jehovah nih mah hna hmangin thlarau rawl kha liam lak in a cawm hna.
15 Tahchunhnak ah, Jehovah miphun hna nih mah le holh in lehmi a hmaan i a piangmi Baibal lehnak kha an hmuh caah atu ṭhathnemnak tampi an hmu cang. Vawlei Thar Lehnak Baibal hi a ṭha ngaimi thluachuah pakhat asi! Cu hleiah, Baibal relzohnak ah bawmtu asimi cauk hna nuai tampi kha holh 300 leng in chuah asi rih. Hi thlarau rawl vialte hi vawlei pumpi i a ummi a hmaanmi biatu hna caah thluachuah pakhat asi. Hi vialte caah ahodah thangṭhat awk aa tlak? Jehovah Pathian lawnglawng asi. A dawt-zangfahnak ngan ruangah a salle hna kha ‘a caan hmaante in rawl’ cawm dingah a timhtuah. Cu bantuk timhtuahnak nih atu chan thlarau paradis chungah “thil nung vialte” kha lung a awiter. Hi vawleipi paradis ah a can lai kha a rauh hlanah hmuh asi cang lai caah Jehovah salle hna cu an i lawmtuk hringhran!—Luka 23:42, 43.
16, 17. (a) A caan hmaan tein pekmi thlarau rawl he pehtlaiin zei tahchunhnak dah a um? (b) Satan nih a chuahtermi a biapimi thil kong he aa tlaiin Pathian cung zumhfekmi hna lungputning kha Salm 145 nih zeitindah a langhter?
16 A caan hmaan tein hmuhmi thlarau rawl he pehtlai in a lang ngaimi zohchunh awk pakhat kha zoh hmanh u si. 1939 kum ah Europe ah Vawlei Ralpi II nak a tlung. Mah kum ahcun November ni 1 chuahmi Vennak Innsang ah “Khoikalei hmanh Ṭanlonak” tiah biatlang bunhmi capar aa tel. Fiangte le piangte in ṭial in a langhter caah vawlei pumpululh a ummi Jehovah Hngaltu hna nihcun ral tuknak ram hna ah i tel loin khattelei i ṭanlonak ah fekte in dir a hau ti kha an hngalh. Cu ruangah cun, kum ruk a raumi raltuknak ah aa do mi hna an pahnih i uktu hna i thinhunnak nganpi kha an rak tong. Pathian cung zumhfek mi hna cu khamnak le hremnak an tong ko nain Pathian Pennak thawngṭha kha an chim ṭhiamṭhiam ko. 1939 in 1946 tiang khuaruahhar awk tlak in 157% karhchonak tiang thluachuah an hmu. Cuhleiah, raltuknak chungah a hleiin dinfel tein an um ruangah a hmaanmi biaknak phung kha mi nih thleidan in an hngalhthiam.—Isaiah 2:2-4.
17 Jehovah timhpiakmi thlarau rawl cu a caan aa tlakmi rawl lawng si loin milung asiter ngaingai. Ralpi pahnihnak ah ram tampi cu fakpi in ral an i do lioah Jehovah a miphun cu harnak chung luatnak nakin a biapi deuhmi thil kha ṭha tein zoh dingah bawmh an si. Van raang chung i a biapi bikmi thil kongah Jehovah a nawlngeihnak asi ti kha Jehovah nih a hngalhter hna. Jehovah Hngaltu pakhat cio cu zumhfek tein Jehovah a nawlngeihnak kha fianter in Satan cu lihchim asi ti kha tehte langhter nakah tlawmpal an i tel khawh caah an lung asi ngaingai! (Phungtlukbia 27:11) Jehovah lawng si loin a uknak phung zong a thangchiattu Satan he i lo loin Jehovah cung zumhfek mi hna nih “[Jehovah] cu thil a tuahnak paoh ah hin dingtein a tuahmi asi,” tiah mi hmai ah an thanh peng ko.—Salm 145:17.
18. Naite ah lungsiter ngaimi a caan hmaanmi thlarau rawl hmuhmi he pehtlaiin zei tahchunhnak dah a um?
18 Lungsiter mi a caan hmaanmi thlarau rawl tahchunhnak dang pakhat cu 2002/03 kum chung i vawlei pumpululh tuahmi “Lungthomi Thawngthanhtu Hna “ District Civuipi ah a za in chuahmi Jehovah Sinah Naih cauk asi. ‘Zumh awk tlak le a fimmi sal’ ṭialmi Jehovah Hngaltu hna chuahmi hi cauk cu Salm 145 chung chimmi sining hna le Jehovah Pathian khuaruahhar sining hna kha a hleiin a langhter. Hi a ṭha ngaingaimi cauk nih Pathian cung zumhfek mi hna kha a sinah naih deuh chinchin khawh awkah a biapimi lam in a bawmh hna lai.
Jehovah Sin Naihnak Caan
19. Fiang tein tuah dingmi zei caan dah a nai cang, cucu zeitindah kan tonghtham lai?
19 Jehovah a nawlngeihnak he pehtlaiin a biapimi kha fiangte in langhter ding caan kha a nai tuk cang. Ezekiel angan 38 nih a chimchung bantuk in Satan nih ‘Magog ram i Gog’ in a rian kha a rauhhlan ah a tuah dih cang lai. Cu ahcun Jehovah miphun dohnak kha aa tel lai. Pathian cung zumhfek mi hna an zumhfehnak kha i tlaih kho lo in hrawh awkah Satan nih fakpi in aa zuam lai. Cutikah, Jehovah a bia mi hna nih voi dang nakin Pathian sinah lungtak tein bawmhnak hal a hau lai. Pathian an upatnak le an dawtnak cu pakpalawng asi lai maw? Si hlah, a kong cu Salm 145 nih hitin a chim: “A autu vialte hna cu an pawng khan a um hnawh hna, lungtak in a autu vialte hna cu. [Jehovah] a ṭihmi paoh cu an herhmi vialte kha a pek hna i an aunak kha a theih i a khamh hna. [Jehovah] a dawtu cu an dihlak in a huhphenh hna, sihmanhsehlaw miṭhalo cu a hrawh dih hna lai.”—Salm 145:18-20.
20. Salm 145:18-20 chungbia hna a hmaan ti kha zeitindah a langh?
20 Ṭhatlonak vialte Jehovah nih a hrawh tikah amah cu kan pawngah a um ti kan theih i a khamhnak thazang kha kan hmuh tikah zeitluk in dah kan i nuamh hnga! Cubantuk kan ton tikah Jehovah nih “lungtak in a autu” hna aunak lawng a theih lai. Miṭha bantuk in aa umter mi hna aunak cu a theih piak hna lai lo. Ṭhatlonak a dongh caan i a min au cu pakpalawng asi tiah Baibal nih fiang tein a langhter.—Phungtlukbia 1:28, 29; Mikah 3:4; Luka 13:24, 25.
21. Jehovah cung zumhfek mi hna nih Pathian a minthiang thanuam tein an hmannak kha zeitindah an langhter?
21 Jehovah a ṭihmi paoh nih cun atu ah voi dang caan nakin ‘lungtak in au’ awk caan asi. Zumhfek mi hna cu thla an cam ah siseh, pumhnak i a phi an pek ah siseh Pathian min hman dingah an lung aa lawm ngai. Pakhat le pakhat bia an i ruah zongah a minthiang cu an chim chih lengmang. Culengah, phungchimnak zongah Jehovah min kha mi zapi hmai ah ral ṭhate in an thanh.—Rom 10:10, 13-15.
22. Vawlei lungputning le duhnak hna doh zungzal cu zeiruangah a biapit?
22 Jehovah Pathian he aa naihmi pehtlaihnak ngeihnak thawngin ṭhathnemnak kan hmuh peng nakhnga thlaraulei dawntu asimi thilri duhtuknak, ṭhatnak a pe lo mi nuamhngaihnak, ngaihthiam a hmang lomi lungput, asilole a herhbau mi hna kha zeipoi loin um ti bantuk hna zong kha doh lengmang awk a biapi ngaingai. (1 Johan 2:15-17; 3:15-17) Cu bantuk sining ziaza hna kan i remh lo ahcun cunihcun a nganmi sualnak tuahnak ziaza siter in a donghnak ah Jehovah mithmai ṭha kan sung kho. (1 Johan 2:1, 2; 3:6) Jehovah cungah zumhfek tein kan um lawngah kan cungah a dawt-zangfahnak, asilole a fekmi dawtnak a langhter lai tiah i cinken cu fimnak lam asi.—2 Samuel 22:26.
23. Pathian cungah zumhfek mi vialte nih zeibantuk hmailei ruahchannak dah an hngah?
23 Cucaah Jehovah cungah zumhfek mi vialte nih an hngahmi hmailei ruahchannak kha a biapi in ruat hna u sih. Cu bantuk tuahnak thawng in Jehovah kha “ni fate in” le “a zungzal in” thluachuah pek in thangṭhat i a lomh mi hna ah i telkhawhnak lunglawmh awk ngaingai ruahchannak a um lai. (Salm 145:1, 2) Cucaah, kannih cu ‘zungzal nunnak hmuh awkah Pathian dawtnak chungah khan um’ u sih. (Jude 20, 21) Amah a dawtu hna cungah a langhtermi a dawt-zangfahnak ngan lengah vancung kan Pa i duh a nungmi a sining ṭhatnak kha kan hmuh lioah kan lungput cu Salm 145 i a donghnak bia ah David nih a langhtermi lungput ningin a zungzal si ve ko seh. “[Jehovah] cu ka thangṭhat lai, thilnung vialte nih a min thiang cu zungzal in thangṭhat hna seh!”—Salm 145:21.
Zeitindah Na Leh Lai?
• Salm 145 nih Pathian cung zumhfek mi hna kha zeitindah a thleidanter khawh?
• Jehovah nih zeitindah thilnung vialte kha an lung asiter?
• Jehovah kha zeiruangah kan naih a hauh?
[Cahmai 23nak i Hmanthlak]