Tar Pawl—khrihfa Unau Rual I Mansung Pawl
Annih cu Bawipa inn chungah cinmi thing bantuk, . . . hninghno ngaiin a um i an tar tik hmanh ah thei a tlai lengmang i a zungzal in hring dildel in a um i a ṭhawng ngaimi Bantuk an si.”—SALM 92:13, 14.
1. Tar pawl hi mi tampi nih zeitindah an hmuh hna?
JEHOVAH nih tar pawl i telin, zumhawktlak a salle vialte kha a dawt dih hna. Sihmanhsehlaw, khua ram kong tuaknak pakhat ningin U.S ram i tar nuai cheu hrawng cu kum fatein ningcang loin pehtlaih an si asiloah daihthlanh an si. Vawlei pumpuluk i mah bantuk report hna nih khan tar pawl ningcang loin pehtlaih an si nak hi vawlei pumpi harnak asi tikha an langhter. Kha kong a hrampi kha bu pakhat nih hitin a chim: “Tar pawl cu an ṭhahnem lo, zei chuahpi loin midang an i hngauh tuk timi ruahnak nih minung a ciah hna.”
2. (a) Jehovah nih zumhawktlak a salle tar pawl kha zeitindah a hmuh hna? (b) Salm 92:12-15 ah lung thawh awk zei langhternak dah kan hmuh?
2 Jehovah Pathian nih zumhfekmi a salle tar pawl kha a sunhsak hna. Pumsa lei thil kan ti khawh lonak nakin chung lei minung “kan thlarau si nak” tu kha Pathian nih a ngiat. (2 Korin 4:16) Pathian Bia, Baibal chungah lung thawh awk hi biakamnak hi kan hmuh: “Midingmi cu tum kung bantuk in an hninghno lai i Lebanon tlang sidar thingkung bantuk in an ṭhang lai. Annih cu Bawipa inn chungah cinmi thing bantuk, Bawipa biakinn chungah hninghno ngaiin a um i an tar tik hmanhah thei a tlai lengmang i a zungzal in hring dildel in a um i a ṭhawng ngaimi bantuk an si.” (Salm 92:12-15) Mah Baibal cacang hna ṭha tein kan ruahnak thawngin Khrihfa Unau rual caah man sungmi si khawhnak lam kha kan hngalh lai.
‘Tar tikah Theitlainak’
3. (a) Zeicah miding mi hna hi tum kung he a tahchunh hna? (b) Zeitindah tar pawl nih ‘an tar tik hmanhah thei an tlai’ khawh?
3 Salm caṭialtu nih miding mi hna kha “Bawipa inn chungah cinmi” tum kung he a tahchunh hna. Annih cu ‘an tar tik hmanh ah thei an tlai lengmang.’ Mah nih thazang a kan pek ngai asi lo maw? Rumrah a ngei i a kungpi a dingmi tum kung khi Baibal chan i nichuah lei ram i inntual ah hmuh asi tawn. Tum kung cu aa dawh hleiah, a thei tam pi a tlai caah sunhsak a rak si, a cheu tum kung cu kum zakhat leng tiang an tlai.a Nang zong a hmaanmi biaknak i fek tein na dirnak thawngin tum kung bantuk khan ‘thilṭha tuahnak kipah thei na tlai’ kho ve lai.—Kolose 1:10.
4, 5. (a) Zei bantuk a biapimi theitlai dah Khrihfa hna nih tlai a herh? (b) Baibal chung i “hmurka theitlai’ a tlaimi tar pawl i zohchunh awk ṭha kong kha chim hna.
4 Jehovah nih amah le aa timhmi kong chimmi bia hna asimi—“hmurka theitlai” hna kha Khrihfa pawl tlaiter a kan duh. (Hebru 13:15, NW) Cucu a tar cangmi nangmah he tah aa pehtlai maw? Aa tlai taktak ko.
5 Baibal chungah Jehovah min le aa timhmi kong ral ṭha ngaiin a chimmi tar pawl i zohchunh awk ṭha umtuzia tampi a um. A profet le a biachimtu pakhat in Jehovah nih a rak hman tikah khan Moses cu “kum sawm sarih” leng a rak si cang. (Salm 90:10; Exodus 4:10-17) Jehovah nawlngeihnak kong kha a kum a upa cangmi profet Daniel nih chim ngam loin a um lo. Vanpang i aa ṭialmi hngalh a har ngaingaimi caṭial sullam leh awk i Belshazzar nih a rak auh tikah khan Daniel cu kum 90 leng hrawng a rak si cang. (Daniel, angan 5) Tarpa lamkaltu Johan tah? Zumhawktlak tein rian a ṭuannak a donghnak lei ah ‘Pathian bia a chim ca le Jesuh nih a phuanmi biatak a phuan ruangah, Patmos timi tikulh ah khan’ thong an rak thlak. (Biathlam 1:9) Upat lei sangah “hmurka theitlai” hna a rak tlaimi Baibal chung i midang hna zong kha naa cinken ko hna lai.—1 Samuel 8:1, 10; 12:2; 1 Siangpahrang 13:11; 14:4, 5; Luka 1:7, 67-79; 2:22-32.
6. Hi ni hmanung bik caan ah hin profet bia chim dingah Jehovah nih “tar hna” kha zeitindah a hman hna?
6 Hebru profet Joel kha cherhchan in lamkaltu Piter nih hitin a rak thanh: “Ni hmanung bikah cun mi vialte kha [“Tar hna” telin] ka Thlarau ka toih hna lai. . . . Nan tar hna nih mang an manh [“profet bia an chim,” NW] lai” (Lamkaltu 2:17, 18; Joel 2:28) Cu he aa tlakin, hi ni hmanung bik caan ah hin, Jehovah nih aa timhmi kha thanh awkah thlarau chiti thuhmi hna le “tuu dang” hna i tar le upa hna kha a hman hna. (Johan 10:16) Annih lakah a cheu cu Pathian Pennak theitlai kha kum hra bu chung zumhawktlak in an tlai cang.
7. Tar pawl nih pumsa lei ah tuah khawh lomi an ngei ko nain Pennak theitlai zeitindah an tlai khawh peng ko tikha tahchunhnak pe.
7 1941 thawk in caan tling Pennak thawngthanhtu pakhat a rak simi Sonia kong hi ruathmanh. Saupi a ngorfem ko nain a inn ah hmaan tein Baibal cawnnak tampi a rak tuah. “Thawngṭha chim hi ka nunnak cheubang asi. A taktak ti ahcun, ka nunnak asi. Chim loin ka um bal lo” tiah Sonia nih a ti. Nai ah, Sonia le a u nu nih siizung hngahnak khaan ah an hmuhmi a zawt a zual ngaimi Janet kha Baibal bia ruahchannak kong an chimh. Biaknak lei ah aa zuammi Janet nu nih a fa an dawt an langhtermi a hmuh tikah a lung a suk tuk i innchung Baibal cawn dingah a hna a rak tla i atu a ṭhangcho thluahmah. Pennak theitlai tlai awkah cu bantuk caanṭha hna na la kho ve lai maw?
8. Kaleb nih Jehovah aa bochanmi kha zeitindah a langhter i, Khrihfa tar pawl nih Kaleb a nawl zeitindah an i cawn khawh?
8 Tar ruangah tuah khawh lomi cu a um ko nain teirial te le ralṭha ngaiin Pennak phung chimnak rian an ṭuannak thawngin Khrihfa tar pawl nih kum sawmli chung Moses he ramlak ah a rak kalmi zumhawktlak Kaleb keneh kha an zulh. Kaleb cu kamhmi ram va luh awk i Jordan Tiva an rak tan tikah khan kum 79 a rak si cang. Teitu asi mi Israel ralkap pakhat in kum ruk chung ral a tuk hnuah, min ṭhatnak a hmuhmi in hnangam tein rak um khawh asi ko. Sihmanhsehlaw cutin um loin, mi ngan pipi asimi Anak mi hna umnak Judah tlangram i “kulhmi khualipi hna” va doh awk rian har ngai kha ralṭha ngaiin a rak hal. Jehovah bawmhnak thawngin, Kaleb nih khan “Bawipa nih . . .nawl a pek mi bangin, . . . a dawi hna” (Joshua 14:9-14; 15:13, 14) Kaleb sinah Jehovah a rak um bantukin, na tar tikah Pennak thei na tlai peng lioah na sinah a um ve lai tikha zum. Zumhawktlak na si peng ahcun, Pathian kamhmi vawlei thar ah hmun hmun khat an pek lai.—Isaiah 40:29-31; 2 Piter 3:13.
“A Zungzal In Hring Dildel In a Um”
9, 10. Khrihfa tar hna nih a ngan a dammi zumhnak le thlarau lei ṭhawnnak kha zeitindah an hmunhter khawh? (Cahmai 18 i rinlikulh kha zoh)
9 Jehovah a salle tar hna zumhawktlak an sinak kha cohlanter duh in salm caṭialtu nih hitin hla a rak sak: “Mi dingmi hna cu tum kung bantuk in an hninghno lai i Lebanon tlang sidar thingkung bantuk in an ṭhang lai. Annih cu Bawipa inn chungah cinmi thing bantuk, Bawipa biakinn chungah hninghno ngaiin a um i an tar tik hmanh ah thei a tlai lengmang i a zungzal in hring dildel in a um i a ṭhawng ngai mi bantuk an si.”—Salm 92:12-14.
10 Na hung tar thluahmah ko nain na thlarau lei ṭhawnnak kha zeitindah na hmunhter khawh lai? Kum tampi chung tum kung aa dawhnak a kong biathli cu ti ṭha tampi a hmuh khi asi. Cu bantuk cun, nang zong Pathian Bia hlathlainak le Pathian bupi he na hawikomhnak thawngin Baibal biatak ti khan thazang rawl naa lak khawh. (Salm 1:1-3; Jeremiah 17:7, 8) Thlarau lei i na ṭhawn caah zumtu khat hna caah man sungmi na si. Khakha a hmaan tikha tar a hung si cangmi tlangbawi ngan Jehoiada hmuhtonmi nih zeitindah a langhter tikha ruathmanh.
11, 12. (a) Judah pennak tuanbia chungah Jehoiada cu a biapimi zei hmun ah dah aa tel? (b) Jehoiada nih a huham ngeihnak kha a hmaanmi biaknak ṭhanchoter nak caah zeitindah a hman?
11 Aa tinhmi a sang tukmi siangpahrang nu Athaliah nih a tu rumro asimi kha a thah i Judah ram pennak a rak lak tikah khan Jehoiada cu kum za leng kai dawh a lo cang. A tarmi Jehoiada nih zeidah a rak tuah khawh? Amah le an nu nih pakhat lawng a rak luatmi siangpahrang roco ding, Joash kha Biakinn ah kum ruk tiang an rak thuh. Cun, Jehoiada nih kum sarih asimi Joash kha singpahrang in a thanh i Athaliah kha a thahter hna.—2 Chanrelnak 22:10–12; 23:1-3, 15, 21.
12 Jehoiada nih siangpahrang kilkawitu pakhat in, a huham ngeihmi khan a hmaanmi biaknak kha a rak cawisan. “Jehoiada nih amah le mi zapi hna le siangpahrang karlak ah khan, annih cu Bawipa mi si awk ah biakamnak a ser.” Jehoiada nawlpeknak in mi hna nih a hmaan lomi Baal pathian inn kha an ṭheh i a biakṭheng hna le a milem hna le a tlangbawi hna kha an khuai an thah hna. Amah lamhruainak ṭhiamṭhiam in khan Joash nih biakinn rian hna kha amah ning kel ah a canter ṭhan i a herh ngaingaimi remhnak rian kha a ṭuan hna. “Tlangbawi Jehoiada nih a cawnpiak caah Joash nih a chan chung vialte Bawipa mithmuh i a dikmi kha a tuah.” (2 Chanrelnak 23:11, 16-19; 24:11-14; 2 Siangpahrang 12:2) Jehoiada cu kum za le kum sawmthum asi i a thih tikah “Israel mi hna sin le Pathian le a inn caah thil ṭha a tuah caah” upat nak pek asi i siangpahrang hna sinah khan an rak vui.—2 Chanrelnak 24:15, 16.
13. Khrihfa tar pawl nih ‘a hmaanmi Pathian le a inn caah’ zeitindah ‘thil ṭha an tuah’ khawh?
13 Dam lo ruangah asilole a dang thil umtuning ruangah a hmaanmi biaknak kha na duh tluk in na ṭhanchoter kho men lai lo. Cutin asi hmanhah, ‘a hmaanmi Pathian le a inn caah thil ṭha na tuah’ khawh ko. Khrihfa pumhnak naa pumh le a phi na peknak in le na si khawh chungin lohmun rianṭuannak i naa telnak thawngin thlarau lei Jehovah biakinn caah naa zuamnak kha na langhter khawh. Lungtak in Baibal cawnpiaknak na cohlannak le zumhfek tein “zumhawk a tlakmi le a fimmi sal” le Khrihfabu na bawmhnak nih Khrihfa unau rual kha thazang a ṭhawnter lai. (Matthai 24:45-47) Cun “kan i dawt khawh nakhnga le thilṭha kan i tuah piak khawh nakhnga” zumtu khat pawl kha tha na pek khawh hna. (Hebru 10:24, 25; Filemon 8, 9) “Tar deuh pawl kha, ri-hai hlah u, lungfim in um u, mah le mah aa uk kho mi si u; zumhnak le dawtnak le in khawhnak fek a ngeimi si u, . . . Nu tar deuh pawl kha, nan umtuning ah mi hmaizah a thiammi nan si awk asi, . . . Mi congoih a hmangmi le mi zu ram an si awk asi lo” timi Paul cawnpiaknak ningin na nun ahcun midang caah thluachuah na si lai.—Titas 2:2-4.
14. A hmaanmi biaknak hunchoter awkah Khrihfabu zohkhenhtu saupi a ṭuan cangmi hna nih zeidah an tuah khawh?
14 Nang cu khrihfabu upa in kum tampi chung rian na ṭuan cang maw? “Kum tampi chung na hmuhmi fimnak kha mah zawn ruat loin hmang. Rian cheu hna, na hmuhtonnak kha cawn duhnak lungthin a ngeimi hna kha chim hna . . . Midang thil ti khawhnak kha hmu. Cu bantuk thil ti khawhnak kha kauhter law ṭhanter. Hmailei caah i timlam” tiah Khrihfa upa rian saupi a ṭuan cangmi nih ruahnak a kan cheuh. (Deuteronomi 3:27, 28) Kauhter lengmangmi Pathian Pennak rian kha na lungthin tak in na duhnak nih kan Khrihfa unau rual chung i midang hna kha ṭhatnak tampi a pek hna lai.
‘Jehovah Cu a Ding Tiah langhter U’
15. Khrihfa tar pawl nih zeitindah ‘Jehovah cu a ding tiah an langhter’?
15 ‘Jehovah cu a ding tiah langhter’ ding an rian kha Jehovah i a salle tar pawl nih nuam ngaiin an ṭuan. Khrihfa patar pakhat na si ahcun, ‘an chanhtu na lungpi Jehovah cungah cun palhnak zeihmanh a um lo’ tikha na biachim le na tuahsernak in midang sinah na langhter khawh. (Salm 92:15) Tum kung hna nih khin a Sertu i a sang bik ziaza hna kha aw thawng loin an thanh. Sihmanhsehlaw Jehovah nih a hmaanmi biaknak a zummi paoh kha a kong thanh awk tinvo ṭha a pek hna. (Deuteronomi 32:7; Salm 71:17, 18; Joel 1:2, 3) Zeicahdah Jehovah kong thanh cu a biapit?
16. ‘Jehovah cu a ding tiah langhter’ a biapi tikha zei Baibal tahchunhnak nih dah a langhter?
16 Israel mi hna hruaitu “Joshua cu a upat i a tar ngaingai tikah” Pathian i a dingmi a rianṭuannak hna kha hngalhter ṭhan awkah “Israel mi vialte an upa hna le an lu hna le an biaceihtu hna le an bawi hna kha a auh hna i hitin a rak ti hna: “Bawipa nan Pathian nih nanmah kongah biakamnak a tuah-mi thilṭha vialte lakah pakhat hmanh pakpalawng a [cang] lo . . . a dihlak in a tlung dih, pakhat hmanh a bau lo.” (Joshua 23:1, 2, 14) Mah bia hna nih hin annih cu caan tlawmpal hrawng zumhawktlak asiter hna. Asinain, Joshua a thih tikah, “Bawipa siseh, Israel ca i a tuahmi rian siseh, a hngal lomi chan thar a hung chuak. Cun Israel mi nih Bawipa mithmuh i thil ṭhalo asimi kha an tuah i Baal kha an biak hna.”—Biaceihtu 2:8-11.
17. Tuchan a miphun kha Jehovah nih zeitindah a pehtlaih hna?
17 Tuchan Khrihfabu zumhfehnak cu Pathian i a salle tar pawl chimrelnak cungah aa hngat lo. Asinain, hi donghnak caan ah Jehovah nih a miphun hna caah a tuah cuahmahmi “rian ngan” vialte hna kha kanmah theng nih kan hmuh kan theih tikah Pathian le a biakam hna kha a kan zumhter chinchin. (Phungthlukbia 2:7; 2 Piter 1:16-19) Jehovah a bu he kum tampi chung naa komh cang asi ahcun, na umnak hmun asiloah ram i Pennak thanhtu tlawmpal te lawng an rak um i phungchim rianṭuannak fakpi in doh a rak ton ningcang kha na hun hngal ṭhan ko lai. Kum hna a hung liam tikah, Jehovah nih cheukhat dawnkhantu kha a hrawh hna i ‘rang ngaiin’ Pennak rian a karhter tikha kan hmuh cang hna. (Isaiah 54:17; 60:22) Cun Baibal biatak zong a hung fiang deuh i Pathian mithmuh khawhmi bupi aa hung i remh i, a hung ṭhat chin lengmang zong na hmuh cang ko lai. (Phungthlukbia 4:18; Isaiah 60:17) Jehovah rianṭuan dinnak kong he aa tlaiin na hmuhtonnak kha midang na chimh hna nak thawngin annih thazang pek kha naa zuam maw? Cutin na tuahmi nih Khrihfa unau rual kha thazang a umter lai i a ṭhawnter hna lai!
18. (a) ‘Jehovah cu a ding tiah langhternak’ man i caan sau a nguhmi ṭhatnak kha tahchunhnak pe. (b) Nangmah theng nih Jehovah dinnak kha zeitindah na ton bal?
18 Nangmah pumpak thil kongah dawtnak in Jehovah nih an zohkhenh i lam an hruai tik lio ah tah? (Salm 37:25; Matthai 6:33; 1 Piter 5:7) Martha an timi unau nu tarnu pakhat nih midang kha hitin tha a pek tawn hna: “Zei asi hmanhah, Jehovah cu zeitik hmanhah hlaw hlah. Amah nih an bawmh lai.” Mah lungthin cheuhnak cu 1960 kum ah tipil a rak ingmi Martha nih Baibal a rak cawnpiakmi Tolmina caah a rak ṭhahnem ngaingai. Tolmina nih hitin a chim: “Kan pa a thih tikah kan lung a rak dong ngai te, sihmanhsehlaw Martha bia kha ka hun hngal ṭhan i pumhnak pakhat hmanh hrelh lo awkah bia ka rak khiah. Ka dir khawh nakhnga Jehovah nih a rak ka bawmh taktak.” Tolmina theng nih Baibal a cawnpiakmi hna kha kha bantuk khan lungthin a rak cheuh ve hna. Midang thapeknak le Jehovah i a dingmi a rianṭuannak hna na chimrelnak thawngin zumtu khat hna zumhnak kha tampi hram na fehter khawh ko.
Jehovah Nih Zumhawktlak Tar Pawl Kha a Sunsak Hna
19, 20. (a) Jehovah nih a salle tar pawl ṭuanmi kha zeitindah a hmuh? (b) A changtu capar nih zei kong dah a kan ruah lai?
19 Nihin lawmh a hngal lomi hi vawlei ahhin, tar pawl kha an khuaruahmi chungah an telh ti hna lo. (2 Timote 3:1, 2) An kong an ruah tik hna hmanhah tamdeuh cu atu an tuahṭuanmi nakin hlan i an hlawhtlinnak kong tu kha an ruah deuh hna. Baibal tu nih cun hitin a ti: “Pathian cu miding lo asi lo. Rian nan rak ṭuanmi le nan Khrihfa hawi nan rak bawmh tawn hna i atu zongah nan bawmh ko rih hna thawngin nan langhter mi amah nan dawtnak kha a philh lai lo.” (Hebru 6:10) Asi ko, Jehovah nih hlan i na rak ṭuanmi lawng hngal loin a rian na ṭuan lengmang rih mi ruang zongah nangmah cu an sunsak. Asi, Pathian nih zumhawktlak upa tar pawl kha thei a tlaimi, thlarau lei ah a ngan a dam i a tha a thomi —Pathian ṭhawnnak a langhtermi minung tehte in a hmuh hna.—Filipi 4:13.
20 Kan Khrihfa unau rual i tar le upa pawl kha Jehovah nih a hmuh hna bantukin na hmu ve hna maw? Cutin na hmuh hna ahcun an cungah dawtnak na langhter ko lai. (1 Johan 3:18) Dawtnak in an herhmi ṭhate in zohkhenh ning lam cheukhat kha a changtu capar nih a kan ruah te lai.
[A Tanglei Fianternak]
a Tum thei bor borkhat ah a thei thong khat hrawng a tlai kho i pawng 18 asiloah cu leng hmanh in a rit kho. Ca ṭialtu pa pakhat nih “thei a tlaimi tum kung pakhat nih hin a nun chung vialte ah ṭan hnih, ṭan thum kha a ngeitu hna caah a tlai piak ko lai” tiah a tuak.
Na Bialehnak Hna Cu Zeidah An Si?
• Zeitindah tar pawl nih ‘thei an tlai’?
• Khrihfa tar pawl i an thlarau lei ṭhawnnak cu zeicah man ngeimi thil asi?
• Tar pawl nih zeitindah ‘Jehovah cu a ding tiah an langhter’ khawh?
• Jehovah nih a sal saupi asi cangmi hna kha zeicah a sunsak hna?
[Cahmai 18nak i Bawm]
A Ngan A Dammi An Zumhnak An Hmunhter Ning
Zumhnak ngandam i an thlarau lei ṭhawnnak a hmunh nakhnga an Khrihfa sinak a sau cangmi hna kha zeinihdah a rak bawmh hna. Cheukhat nih hitin an chim:
“Jehovah he kan i pehtlaihnak i lungthin a ka chiahtermi Baibal cang hna rel cu a biapi tuk hringhran. Salm 23 le 91 hi zanchiar ngawt zoh loin ka chim.”—Olive, 1930 ah tipil a rak ing.
“Tipil innak phungchimnak kip kha hrelh loin ka kai i ka caah a chim ti ruat in ṭhate in ka ngaih. Aa pumpemi ka si ti i hngalh peng hi zumhawktlak in hmunh khawh awkah a biapi mi kehlan asi.”—Harry, 1946 ah tipil a rak ing.
Ni fatein thlacam a biapi—Jehovah bawmhnak, huhphenhnak le thluachuah kha hal peng in ‘kalnak lam kip ah amah kha hngalh’ a hau. (Phungthlukbia 3:5, 6)—Antônio, 1951 ah tipil a rak ing.
“Kum tampi chung zumhawktlak in atu tiang Pathian rian a ṭuanmi hna hmuhtonnak kong ka ngaih tikah Pathian cungah zumhawktlak in hmunh awk ka biakhiahnak kha a tharter ṭhan.”—Joan, 1954 ah tipil a rak ing.
“Sangtuk in mah le mah i hmuh lo awk a biapi. Kan ngeihmi zeizong vialte hi kan phut lomi Pathian zangfahnak ruangah asi. Cutin hmuhnak nih a dongh tiang inkhawh awk ca i a herhmi thlarau rawl caah lam hmaan kha a kan zohter peng.”—Arlene, 1954 ah tipil a rak ing.
[Cahmai 19nak i Hmanthlak]